ຂ່າວຫຼ້າສຸດ

ແຈ້ງເຕືອນຜູ້ທີ່ຢູ່ລຽບຕາມແຄມນ້ຳຂອງແມ່ນ້ຳສາຂາ ຈົ່ງມີສະຕິ

185 01 ສ.ຫ. 2018 ຂ່າວໜ້າ​ໜຶ່ງ

   ເນື່ອງ​ຈາກ​ຄວາມ​ກົດ​ດັນ​ອາ­ກາດ​ຕ່ຳ ຍັງ​ຈະ​ສືບ­ຕໍ່​ປົກ​ຄຸມ​ພາກ​ເໜືອ​ຫາ​ພາກ​ກາງ ຂອງ​ປະ­ເທດ​ລາວ​ດ້ວຍ​ກຳ­ລັງ​ປານ​ກາງ​ສົມ­ທົບ​ກັບ​ລົມ​ມໍ​ລະ​ສຸມ​ຕາ­ເວັນ­ຕົກ​ສຽງ​ໃຕ້ ທີ່​ມີ​ກຳ­ລັງ​ແຮງ​ພັດ​ປົກ​ຄຸມ​ເປັນ​ສ່ວນ​ໃຫຍ່​ໃນ​ໄລ­ຍະ​ວັນ​ທີ 31 ກໍ­ລະ­ກົດ ຫາ 3 ສິງ­ຫາ 2018 ເຊິ່ງ​ລັກ­ສະ­ນະ​ເຊັ່ນ​ນີ້ ຈະ​ເຮັດ​ໃຫ້​ມີ​ຝົນ­ຕົກ​ໃນ​ລະ­ດັບ​ຄ່ອຍ​ຫາ​ປານ​ກາງ​ເປັນ​ບໍ­ລິ­ເວນ​ກວ້າງ​ຢູ່​ແຂວງ​ພາກ​ເໜືອ​ຫາ​ພາກ​ກາງ ຈາກ​ສະ­ພາບ​ຝົນ­ຕົກ​ດັ່ງ­ກ່າວ​ຈະ​ເຮັດ​ໃຫ້​ລະ­ດັບ​ນ້ຳ­ຂອງ ແລະ ແມ່­ນ້ຳ​ສາ­ຂາ​ຍັງ​ຈະ​ສືບ­ຕໍ່​ສູງ​ຂຶ້ນ​ຢ່າງ​ຕໍ່​ເນື່ອງ ຈົນ​ເຖິງ​ເຂດ​ລະ­ວັງ​ໄພ ແລະ ເຂດ​ອັນ­ຕະ­ລາຍ​ໃນ​ວັນ​ທີ 1-3 ວັນ​ຕໍ່­ໜ້າ​ຕາມ​ຂົງ­ເຂດ​ຕ່າງໆ​ດັ່ງ­ນີ້:

    ລະ­ດັບ​ນ້ຳ­ຂອງ​ເວ­ລາ 7:00 ໂມງ​ຂອງ​ວັນ​ທີ 31 ກໍ­ລະ­ກົດ 2018 ຄື:ຢູ່​ເມືອງ​ປາກ​ຊັນ ແຂວງ​ບໍ​ລິ​ຄຳ​ໄຊ ແທກ​ໄດ້ 12,49 ແມັດ ເຂດ​ລະ­ວັງ​ໄພ 13,50 ແມັດ ເຂດ​ອັນ­ຕະ­ລາຍ 14,50 ແມັດ ເມືອງ​ທ່າ​ແຂກ​ແຂວງ​ຄຳ​ມ່ວນ ແທກ​ໄດ້ 12,84 ແມັດ ເຂດ​ລະ­ວັງ​ໄພ 13 ແມັດ ເຂດ​ອັນ­ຕະ­ລາຍ 14 ແມັດ ແຂວງ​ສະ­ຫວັນ​ນະ​ເຂດ  ແທກ​ໄດ້ 11,48 ແມັດ ເຂດ​ລະ­ວັງ​ໄພ 12 ແມັດ ເຂດ​ອັນ­ຕະ­ລາຍ 13 ແມັດ ແລະ ນະ­ຄອນ​ປາກ​ເຊ ແຂວງ​ຈຳ­ປາ​ສັກ ແທກ​ໄດ້ 12,68 ແມັດ ເຂດ​ລະ­ວັງ​ໄພ 11 ແມັດ ເຂດ​ອັນ­ຕະ­ລາຍ 12 ແມັດ.

   ສ່ວນ​ລະ­ດັບ​ນ້ຳ​ຊັນ ເມືອງ​ບໍ​ລິ​ຄັນ ແທກ​ໄດ້ 7,53 ແມັດ ເຂດ​ລະ­ວັງ​ໄພ 7 ແມັດ ເຂດ​ອັນ­ຕະ­ລາຍ  8 ແມັດ ລະ­ດັບ​ນ້ຳ​ຊອງ ເມືອງ​ວັງ​ວຽງ ແທກ​ໄດ້ 3,46 ແມັດ ເຂດ​ລະ­ວັງ​ໄພ 3 ແມັດ ເຂດ​ອັນ­ຕະ­ລາຍ 4  ແມັດ  ລະ­ດັບ​ນ້ຳ​ເຊ​ຈຳ​ພອນ ແກ້ງ​ກອກ ແທກ​ໄດ້ 8,62 ແມັດ ເຂດ​ລະ­ວັງ​ໄພ 7,50 ແມັດ ເຂດ​ອັນ ຕະ​ລາຍ 8,50 ແມັດ ລະ­ດັບ​ນ້ຳ​ເຊ​ບັ້ງ­ໄຟ ຈຸດ​ເມືອງ​ມະ­ຫາ​ໄຊ ແທກ​ໄດ້ 17,22 ແມັດ ເຂດ​ລະ­ວັງ​ໄພ 14 ແມັດ ເຂດ​ອັນ­ຕະ­ລາຍ 15 ແມັດ ຈຸດ​ເມືອງ​ເຊ​ບັ້ງ­ໄຟ ແທກ​ໄດ້ 21,82 ແມັດ ເຂດ​ລະ­ວັງ​ໄພ 17,50ແມັດ ເຂດ​ອັນ­ຕະ­ລາຍ 18,50 ແມັດ ແລະ ຈຸດ​ຕົ້ນ​ແທນ ແທກ​ໄດ້ 15,42 ແມັດ ເຂດ​ລະ­ວັງ​ໄພ 13,50 ແມັດ ເຂດ​ອັນ­ຕະ­ລາຍ 14,50 ແມັດ ລະ­ດັບ​ນ້ຳ​ເຊ​ໂດນ ສຸ­ວັນ­ນະ​ຄີ­ລີ  ແທກ​ໄດ້ 9,60 ແມັດ ເຂດ​ລະ ວັງ​ໄພ 10 ແມັດ ເຂດ​ອັນ­ຕະ­ລາຍ 11 ແມັດ.

    ດັ່ງ­ນັ້ນ ຈຶ່ງ​ແຈ້ງ​ເຕືອນ​ເຖິງ​ພໍ່​ແມ່​ປະ­ຊາ­ຊົນ ອຳ­ນາດ​ການ​ປົກ­ຄອງ ແລະ ອົງ​ການ­ຈັດ­ຕັ້ງ​ທຸກ​ພາກ­ສ່ວນ​ທີ່​ອາ­ໄສ​ຢູ່​ລຽບ​ແຄມ​ນ້ຳ­ຂອງ ແລະ ແມ່­ນ້ຳ​ສາ­ຂາ​ໃນ​ຂົງ­ເຂດ​ດັ່ງ­ກ່າວ ຈົ່ງ​ມີ​ສະ­ຕິ​ຕໍ່​ການ​ຕິດ­ຕາມ​ສະ­ພາບ​ຝົນ­ຕົກ ເຊິ່ງ​ຈະ​ກໍ່­ໃຫ້­ເກີດ​ມີ​ນ້ຳ​ຖ້ວມ​ອັ່ງ ນ້ຳ​ຖ້ວມ​ຊຸ ແລະ ຂໍ​ໃຫ້​ເກັບ​ມ້ຽນ​ວັດ­ຖຸ​ສິ່ງ​ຂອງ​ທີ່​ມີ­ຄ່າ ສັດ­ລ້ຽງ​ໄວ້​ໃນ​ທີ່​ສູງ​ບ່ອນ​ທີ່​ປອດ​ໄພ ພ້ອມ​ນີ້​ໃຫ້​ຕິດ­ຕາມ​ການ​ລາຍ​ງານ​ຂ່າວ​ສະ­ພາບ​ອາ­ກາດ​ຈາກ​ກົມ​ອຸ­ຕຸ­ນິ­ຍົມ ແລະ ອຸ​ທົກ​ກະ​ສາດ​ຢ່າງ​ເປັນ​ປະ­ຈຳ.

ຂ່າວທີ່ກ່ຽວຂ້ອງ