ຂ່າວຫຼ້າສຸດ

ຫຼາຍໂຄງການຊ່ວຍເຫຼືອຍີ່ປຸ່ນ ໄດ້ຮັບການຈັດຕັ້ງປະຕິບັດສຳເລັດ

217 01 ສ.ຫ. 2018 ຂ່າວໜ້າ​ໜຶ່ງ

    ວັນ​ທີ 30 ກໍ­ລະ­ກົດ 2018 ທີ່​ກະ­ຊວງ​ແຜນ­ການ ແລະ ການ​ລົງ­ທຶນ ໄດ້​ຈັດ​ກອງ​ປະ­ຊຸມ​ທົບ​ທວນ​ການ­ຈັດ­ຕັ້ງ​ປະ­ຕິ­ບັດ​ໂຄງ­ການ​ທີ່​ໄດ້​ຮັບ​ການ​ຊ່ວຍ­ເຫຼືອ​ລ້າ ແລະ ກູ້​ຢືມ​ດອກ​ເບ້ຍ​ຜ່ອນ­ຜັນ​ຈາກ​ລັດ­ຖະ­ບານ​ຍີ່­ປຸ່ນ ປະ­ຈຳ​ສົກ​ປີ 2017-2018 ມີ​ທ່ານ ກິ​ແກ້ວ ຈັນ­ທະ​ບູ​ຣີ ຮອງ​ລັດ­ຖະ­ມົນ­ຕີ​ກະ­ຊວງ​ແຜນ­ການ ແລະ ການ​ລົງ­ທຶນ ທ່ານ ທາ​ເກ​ຊິ ຮິ​ກິ​ຮາ​ຣະ ເອກ​ອັກ­ຄະ­ລາ­ຊະ­ທູດ​ຍີ່­ປຸ່ນ ປະ­ຈຳ​ລາວ ພ້ອມ​ດ້ວຍ​ຜູ້­ຕາງ­ໜ້າ​ຈາກ​ກະ­ຊວງ ອົງ​ການ­ຈັດ­ຕັ້ງ​ກ່ຽວ­ຂ້ອງ​ເຂົ້າ​ຮ່ວມ.

    ກອງ​ປະ­ຊຸມ​ໄດ້​ປຶກ­ສາ​ຫາ­ລື​ຄວາມ​ຄືບ​ໜ້າ​ບັນ­ດາ​ໂຄງ­ການ​ຕ່າງໆ​ທີ່​ໄດ້​ຮັບ​ການ​ຊ່ວຍ­ເຫຼືອ​ຈາກ​ລັດ­ຖະ­ບານ​ຍີ່­ປຸ່ນ ເຊິ່ງ​ໃນ​ສົກ​ປີ 2017-2018 ມີ​ທັງ​ໝົດ 6 ໂຄງ­ການ​ຫຼັກ ໃນ​ນັ້ນ ມີ 4 ໂຄງ­ການ​ກູ້​ຢືມ ໃນ 6 ໂຄງ­ການ​ປະ­ກອບ​ມີ​ໂຄງ­ການ​ພັດ­ທະ­ນາ​ລະ­ບົບ​ພະ­ລັງ­ງານ​ໄຟ­ຟ້າ​ຢູ່​ແຂວງ​ພາກ​ໃຕ້ ໂຄງ­ການ​ເຂື່ອນ​ໄຟ­ຟ້າ​ນ້ຳ​ງື່ມ​ພາກ​ຂະ­ຫຍາຍ ໂຄງ­ການ​ຂະ­ຫຍາຍ​ນ້ຳ​ປະ­ປາ​ໃນ​ຕົວ​ເມືອງ​ນະ­ຄອນ­ຫຼວງ​ວຽງ​ຈັນ (ຈີ່­ນາຍ​ໂມ້) ໂຄງ­ການ​ຂະ­ຫຍາຍ​ອາ­ຄານ​ສະ­ໜາມ​ບິນ​ວັດ​ໄຕ​ສາ­ກົນ ນະ­ຄອນ­ຫຼວງ​ວຽງ​ຈັນ ໂຄງ­ການ​ກໍ່­ສ້າງ​ປັບ­ປຸງ​ຂົວ​ຄືນ­ໃໝ່ ໃນ​ເສັ້ນ­ທາງ​ຫຼວງ ເລກ 9 ແລະ ໂຄງ­ການ​ສ້າງ​ຄວາມ​ເຂັ້ມ­ແຂງ​ການ​ຄົ້ນ­ຄວ້າ ແລະ ພັດ­ທະ­ນາ​ການ​ປະ­ມົງ-ການ​ເພາະ​ພັນ​ສັດ​ນ້ຳ.

    ປະ­ເທດ​ຍີ່­ປຸ່ນ ຖື​ເປັນ​ຄູ່​ຮ່ວມ​ພັດ­ທະ­ນາ​ທີ່​ສຳ­ຄັນ​ຂອງ​ລາວ ເຊິ່ງ​ໃນ​ຊຸມ​ປີ­ຜ່ານ­ມາ ໄດ້​ປະ­ກອບ­ສ່ວນ​ຊ່ວຍ­ເຫຼືອ​ວຽກ​ງານ​ພັດ­ທະ­ນາ​ເສດ­ຖະ­ກິດ-ສັງ­ຄົມ​ຂອງ​ລາວ ໂດຍ​ເນັ້ນ​ໃສ່ 3 ເສົາ­ຄ້ຳ​ຄື: ເພີ່ມ​ທະ­ວີ​ການ​ເຊື່ອມ​ຈອດ​ກັບ​ປະ­ເທດ​ອ້ອມ​ຂ້າງ​ດ້ວຍ​ການ​ຊ່ວຍ­ເຫຼືອ​ທາງ​ດ້ານ​ວັດ­ຖຸ-ເຕັກ­ນິກ​ວິ­ຊາ​ການ ການ​ພັດ­ທະ­ນາ​ຊັບ­ພະ­ຍາ­ກອນ​ມະ­ນຸດ​ໃນ​ຂະ­ແໜງ​ອຸດ­ສາ­ຫະ­ກຳ ເພື່ອ​ຕອບ​ສະ­ໜອງ​ການ​ເພີ່ມ​ທະ­ວີ​ຂອງ​ການ​ແຂ່ງ­ຂັນ ແລະ ການ​ຂະ­ຫຍາຍ­ຕົວ​ທາງ​ດ້ານ​ອຸດ­ສາ­ຫະ­ກຳ ແລະ ວຽກ​ງານ​ການ​ແກ້​ໄຂ​ຄວາມ​ແຕກ​ໂຕນ​ໂດຍ​ການ​ພັດ­ທະ­ນາ​ຕົວ​ເມືອງ ແລະ ທ້ອງ­ຖິ່ນ​ໃຫ້​ສົມ​ດຸນ​ພາຍ​ໃຕ້​ການ​ຄຳ­ນຶງ​ເຖິງ​ການ​ປົກ​ປັກ​ຮັກ­ສາ​ສິ່ງ­ແວ­ດລ້ອມ ເຊິ່ງ​ມີ­ໜ້າ​ວຽກ​ຫຼັກ​ແມ່ນ​ໂຄງ­ການ​ກໍ່­ສ້າງ​ພື້ນ­ຖານ​ໂຄງ​ລ່າງ ການ​ຊ່ວຍ­ເຫຼືອ​ດ້ານ​ເຕັກ­ນິກ​ວິ­ຊາ​ການ ຊ່ຽວ­ຊານ ອາ­ສາ​ສະ­ໝັກ ແລະ ການ​ພັດ­ທະ­ນາ​ຊັບ­ພະ­ຍາ­ກອນ​ມະ­ນຸດ​ທັງ​ໄລ­ຍະ​ສັ້ນ ແລະ ຍາວ.

ຂ່າວທີ່ກ່ຽວຂ້ອງ