ຂ່າວຫຼ້າສຸດ

ພັດທະນາອາຄານ ບີເອັມພລາຊາ ໃຫ້ເປັນສູນການຄ້າທີ່ທັນສະໄໝ

162 01 ສ.ຫ. 2018 ຂ່າວໜ້າ​ໜຶ່ງ
ພັດທະນາອາຄານ ບີເອັມພລາຊາ ໃຫ້ເປັນສູນການຄ້າທີ່ທັນສະໄໝ

    ທ່ານ ທອງ​ທິບ ສີ​ວິ​ໄຊ ຮັກ­ສາ​ການ​ຫົວ­ໜ້າ​ຫ້ອງ­ການ​ຄຸ້ມ​ຄອງ ແລະ ບໍ­ລິ­ການ​ດ່ານ​ສາ­ກົນ ຂົວ​ມິດ­ຕະ­ພາບ​ລາວ-ໄທ ແຫ່ງ​ທີ 1 ນະ­ຄອນ­ຫຼວງ​ວຽງ​ຈັນ (ນວ) ໃຫ້​ສຳ­ພາດ​ວັນ​ທີ 25 ກໍ­ລະ­ກົດ 2018 ວ່າ: ດ່ານ​ສາ­ກົນ ຂົວ​ມິດ­ຕະ­ພາບ​ລາວ-ໄທ ແຫ່ງ​ທີ 1 ມີ​ເນື້ອ­ທີ່ 15 ເຮັກ­ຕາ ໃນ​ນີ້ ໄດ້​ນຳ​ໃຊ້​ເປັນ​ອາ­ຄານ​ດ່ານ ແລະ ເສັ້ນ­ທາງ​ຕ່າງໆ 7 ເຮັກ­ຕາ ເຫຼືອ​ນັ້ນ​ແມ່ນ​ບັນ­ດາ​ບໍ­ລິ­ສັດ​ໄດ້​ເຊົ່າ-ສຳ​ປະ­ທານ​ນຳ​ລັດ­ຖະ­ບານ ເພື່ອ​ເຄື່ອນ​ໄຫວ​ເຮັດ​ທຸ­ລະ​ກິດ ເປັນ­ຕົ້ນ ບໍ­ລິ­ສັດ​ດາວ­ເຮືອງ​ກຣຸບ ບໍ­ລິ­ສັດ​ບີ​ເອັມ​ກຣຸບ​ຈຳ­ກັດ ບໍ­ລິ­ສັດ​ເອ​ັສ​ທີ​ກຣຸບ ແລະ ບໍ­ລິ­ສັດ​ອື່ນໆ.

    ໄລ­ຍະ​ຜ່ານ​ມາ​ການ​ພັດ­ທະ­ນາ​ດ່ານ​ດັ່ງ­ກ່າວ​ທາງ​ຂັ້ນ​ເທິງ​ໄດ້​ມີ​ຂໍ້​ຕົກ­ລົງ ໂດຍ​ສະ­ເພາະ ຂໍ້​ຕົກ­ລົງ​ຂອງ​ເຈົ້າ​ຄອງ ນວ ເລກ​ທີ 1190/ຈ​ນວ ລົງ​ວັນ​ທີ 13 ທັນ­ວາ 2011 ວ່າ​ດ້ວຍ​ການ​ຮັບ­ຮອງ​ແຜນ​ພັດ­ທະ­ນາ​ດ່ານ ເຊິ່ງ​ໄດ້​ກຳ­ນົດ​ເຂດ​ຫ້ອງ­ການ​ດ່ານ 10 ເຮັກ­ຕາ ແຕ່​ປັດ­ຈຸ­ບັນ​ມີ​ພຽງ 7 ເຮັກ­ຕາ ລະ­ບົບ​ສາງ​ຕ່າງໆ 4 ເຮັກ­ຕາ ຮ້ານ​ຄ້າ​ປອດ​ພາ­ສີ 1,1 ເຮັກ­ຕາ ເຂດ​ຈັດ​ສັນ​ທົ່ວ​ໄປ 1,7 ເຮັກ­ຕາ ເຂດ​ຮ້ານ​ຄ້າ​ໃຫຍ່​ທົ່ວ​ໄປ 3,2 ເຮັກ­ຕາ ເຂດ​ປ້ອງ​ກັນ 0,2 ເຮັກ­ຕາ ແລະ ເຂດ​ຮອງ​ຮັບ​ການ​ຂະ­ຫຍາຍ 2 ເຮັກ­ຕາ ໃນ​ປີ 2014 ບໍ­ລິ­ສັດ​ບີ​ເອັມ​ກຣຸບ​ຈຳ­ກັດ ໄດ້​ສ້າງ​ອາ ຄານ​ບີ​ເອັມ​ພລາ​ຊາ ຂຶ້ນ​ຢູ່​ເບື້ອງ​ຂວາ​ມື​ປະ­ຕູ­ໂຂງ​ທາງ​ເຂົ້າ​ດ່ານ ເນື້ອ­ທີ່ 37.150 ຕາ​ແມັດ ເພື່ອ​ຈະ​ສ້າງ​ໃຫ້​ເປັນ​ເຂດ​ເສດ­ຖະ­ກິດ​ສະ­ເພາະ​ຂອງ​ດ່ານ ໂດຍ​ໄດ້​ນຳ​ສະ­ເໜີ​ຕໍ່​ເຈົ້າ​ຄອງ ນວ ເຊິ່ງ​ຜ່ານ​ກອງ​ປະ­ຊຸມ​ເຈົ້າ​ຄອງ-ຮອງ​ເຈົ້າ​ຄອງ​ໃນ​ເດືອນ​ມິ­ຖຸ­ນາ 2015 ແມ່ນ​ບໍ່​ເຫັນ​ດີ​ໃຫ້​ສ້າງ​ເປັນ​ເຂດ​ເສດ­ຖະ­ກິດ​ພິ­ເສດ ເນື່ອງ​ຈາກ​ເນື້ອ­ທີ່​ຄັບ­ແຄບ (ບໍ່​ມີ​ຄວາມ​ເໝາະ​ສົມ) ມາ​ເຖິງ​ທ້າຍ​ປີ 2015 ຄະ­ນະ​ກຳ­ມະ­ການ​ແຫ່ງ​ຊາດ​ເພື່ອ​ຄຸ້ມ​ຄອງ​ເຂດ​ເສດ­ຖະ­ກິດ​ພິ­ເສດ ແລະ​ເຂດ​ເສດ­ຖະ­ກິດ​ສະ­ເພາະ ຈຶ່ງ​ໄດ້​ເປີດ​ກອງ​ປະ­ຊຸມ​ຂຶ້ນ ໂດຍ​ເປັນ​ປະ­ທານ​ຂອງ​ທ່ານ ສົມ​ສະ­ຫວາດ ເລັ່ງ​ສະ​ຫວັດ ຮອງ​ນາ­ຍົກ­ລັດ­ຖະ­ມົນ­ຕີ ໃນ​ນີ້ ໄດ້​ເອ­ກະ​ພາບ​ບໍ່​ເຫັນ​ດີ​ໃຫ້​ສ້າງ​ເປັນ​ເຂດ​ເສດ­ຖະ­ກິດ​ພິ­ເສດ ແລະ ມອບ​ໃຫ້​ບໍ­ລິ­ສັດ​ຂຶ້ນ​ແຜນ­ການ​ສົມ­ທົບ​ກັບ ນວ ເພື່ອ​ກວດ­ກາ​ທີ່​ດິນ​ເຂດ​ບ້ານ​ດົງ​ໂພ​ສີ 60 ເຮັກ­ຕາ ເພື່ອ​ຈັດ​ເປັນ​ເຂດ​ເສດ­ຖະ­ກິດ​ສະ­ເພາະ ແທນ​ສະ­ຖານ­ທີ່​ຢູ່​ດ່ານ​ສາ­ກົນ​ຂົວ​ມິດ­ຕະ­ພາບ ລາວ-ໄທ ແຫ່ງ​ທີ 1.

    ເມື່ອ​ເປັນ​ແນວ​ນັ້ນ ການ​ນຳ​ໃຊ້​ອາ­ຄານ​ບີ​ເອັມ​ພລາ​ຊາ ຈຶ່ງ​ໄດ້​ຫັນ­ປ່ຽນ​ເປັນ​ຮູບ​ການ​ໃໝ່ ແລະ ໄດ້​ມີ​ການ​ປັບ­ປຸງ​ເປັນ​ຮູບ​ແບບ​ໃໝ່ (ເປັນ​ຮ້ານ​ຄ້າ​ທົ່ວ​ໄປ) ໂດຍ​ຄາດ​ວ່າ​ທ້າຍ​ເດືອນ​ສິງ­ຫາ 2018 ຈະ​ໄດ້​ຍົກ­ຍ້າຍ​ຮ້ານ​ຄ້າ​ທົ່ວ​ໄປ​ຢູ່​ບໍ­ລິ­ເວນ​ຮ້ານ​ຄ້າ​ປອດ​ພາ­ສີ​ຂອງ​ບໍ­ລິ­ສັດ​ດາວ­ເຮືອງ​ກຣຸບ ປະ­ມານ 100 ຮ້ານ ຂຶ້ນ​ໄປ​ຄ້າ­ຂາຍ​ຢູ່​ອາ­ຄານ​ດັ່ງ­ກ່າວ ເຊິ່ງ​ປັດ­ຈຸ­ບັນ​ບໍ­ລິ­ສັດ​ບີ​ເອັມ​ກຣຸບ​ຈຳ­ກັດ ໄດ້​ລົງ­ມື​ປັບ­ປຸງ-ກໍ່­ສ້າງ​ສຳ­ເລັດ 80% (ຄາດ­ໝາຍ​ແມ່ນ 90-120 ຫ້ອງ ສຳ­ເລັດ​ແລ້ວ 50 ຫ້ອງ ນອກ​ນີ້ ອະ­ນາ­ຄົດ​ຍັງ​ຈະ​ພັດ­ທະ­ນາ​ເປັນ​ສູນ​ການ​ຄ້າ​ທີ່​ທັນ​ສະ­ໄໝ ໂຮງ­ແຮມ ແລະ ການ​ບໍ­ລິ­ການ​ຕ່າງໆ​ຕື່ມ​ອີກ ສ່ວນ​ບໍ­ລິ­ເວນ​ຮ້ານ​ຄ້າ​ທີ່​ຍົກ­ຍ້າຍ​ໄປ​ອາ­ຄານ​ບີ​ເອັມ​ພລາ​ຊາ ບໍ­ລິ­ສັດ​ດາວ­ເຮືອງ​ກຣຸບ​ຈະ​ປັບ­ປຸງ​ໃຫ້​ເປັນ​ເຂດ​ຮ້ານ​ຄ້າ​ປອດ​ພາ­ສີ​ສະ­ເພາະ.

ຂ່າວທີ່ກ່ຽວຂ້ອງ