ຂ່າວຫຼ້າສຸດ

ນະຄອນຫຼວງວຽງຈັນ ຈະບິແບ່ງເຄື່ອງຊ່ວຍເຫຼືອໃຫ້ບັນດາແຂວງທີ່ຖືກນ້ຳຖ້ວມ

208 01 ສ.ຫ. 2018 ຂ່າວໜ້າ​ໜຶ່ງ
ນະຄອນຫຼວງວຽງຈັນ ຈະບິແບ່ງເຄື່ອງຊ່ວຍເຫຼືອໃຫ້ບັນດາແຂວງທີ່ຖືກນ້ຳຖ້ວມ

ທ່ານ ພູ​ວົງ ວົງ​ຄຳ​ຊາວ ຫົວ­ໜ້າ​ຫ້ອງ​ວ່າ­ການ​ນະ­ຄອນ­ຫຼວງ​ວຽງ​ຈັນ ໃຫ້​ຮູ້​ວັນ​ທີ 31 ກໍ­ລະ­ກົດ 2018 ທີ່​ຫ້ອງ​ວ່າ­ການ​ປົກ­ຄອງ​ນະ­ຄອນ­ຫຼວງ​ວຽງ​ຈັນ​ວ່າ: ພາຍ­ຫຼັງ​ທີ່​ໄດ້​ຈັດ​ຕັ້ງ​ສູນ​ຮັບ​ບໍ­ລິ­ຈາກ​ການ​ຊ່ວຍ­ເຫຼືອ​ຜູ້​ປະ­ສົບ​ໄພ​ນ້ຳ​ຖ້ວມ ເມືອງ​ສະ­ໜາມ​ໄຊ ແຂວງ​ອັດ​ຕະ​ປື ນັບ​ແຕ່​ວັນ​ທີ 25 ກໍ­ລະ­ກົດ​ເປັນ­ຕົ້ນ​ມາ ເຫັນ​ວ່າ​ບັນ­ດາ​ພະ­ແນກ­ການ ອົງ­ການ ບັນ­ດາ​ບໍ­ລິ­ສັດ ຫ້າງ​ຮ້ານ ຜູ້​ປະ­ກອບ​ການ ຕະ­ຫຼອດ​ຮອດ​ປະ­ຊາ­ຊົນ​ທີ່­ຢູ່​ໃນ​ນະ­ຄອນ­ຫຼວງ​ວຽງ​ຈັນ ໄດ້​ນຳ​ເອົາ​ເຄື່ອງ​ອຸ­ປະ­ໂພກ-ບໍ­ລິ­ໂພກ ເປັນ­ຕົ້ນ ເຄື່ອງ­ນຸ່ງ​ຫົ່ມ ອາ­ຫານ​ແຫ້ງ ເຄື່ອງ­ໃຊ້​ຄົວ​ເຮືອນ ແລະ ເຄື່ອງ­ໃຊ້​ຈຳ­ເປັນ​ອື່ນໆ​ປະ­ກອບ­ສ່ວນ​ຊ່ວຍ­ເຫຼືອ​ເປັນ​ຈຳ­ນວນ​ຫຼວງ­ຫຼາຍ ເຊິ່ງ​ເຄື່ອງ​ທີ່​ໄດ້​ຮັບ​ການ​ບໍ​ລິ​ຈານ​ຊ່ວຍ­ເຫຼືອ​ນັ້ນ​ໄດ້​ມີ​ການ​ໄຈ້​ແຍກ​ເປັນ​ແຕ່​ລະ​ປະ­ເພດ​ໃຫ້​ມີ​ຄວາມ​ເປັນ​ລະ­ບົບ​ລະ­ບຽບ ສະ­ດວກ​ໃນ​ເວ­ລາ​ຈັດ​ສົ່ງ ເຊິ່ງ​ມາ​ຮອດ​ປັດ­ຈຸ­ບັນ​ເຄື່ອງ​ດັ່ງ­ກ່າວ​ເຫັນ​ວ່າ​ມີ​ຈຳ­ນວນ​ເພີ່ມ​ຂຶ້ນ​ເລື້ອຍໆ ແລະ ເງິນ­ສົດ​ມີ​ຈຳ­ນວນ 1.382.083.500 ກີບ ເງິນ​ບາດ 336.500 ບາດ ກັບ 1.068 ໂດ​ລາ​ສະ­ຫະ­ລັດ ແລະ 4.105  ຢວນ ໃນ​ນີ້ ໄດ້​ຈັດ​ສົ່ງ​ເຄື່ອງ​ໄປ​ຊ່ວຍ­ເຫຼືອ​ເບື້ອງ​ຕົ້ນ​ປະ­ເພດ​ເຄື່ອງ​ອຸ­ປະ­ໂພກ ແລະ ບໍ­ລິ­ໂພກ 12 ຄັນ​ລົດ ແລະ ມອບ​ເງິນ­ສົດ 500 ລ້ານ​ກີບ ພ້ອມ​ນັ້ນ ຍັງ​ຈະ​ຈັດ​ສົ່ງ​ອີກ​ໃນ​ທ້າຍ​ອາ­ທິດ​ນີ້ ແລະ ຈັດ​ສົ່ງ​ເປັນ​ແຕ່​ລະ​ໄລ­ຍະ​ໃຫ້​ຮອດ​ເຖິງ​ມື​ພໍ່​ແມ່​ປະ­ຊາ­ຊົນ​ຢ່າງ​ວ່ອງ­ໄວ.

ປັດ­ຈຸ­ບັນ​ປະ­ເພດ​ເຄື່ອງ​ອຸ­ປະ­ໂພກ-ບໍ­ລິ­ໂພກ ແລະ ເຄື່ອງ­ໃຊ້​ຈຳ­ເປັນ​ຈຳ­ນວນ​ໜຶ່ງ​ຍັງ​ຄ້າງ​ຢູ່​ຫ້ອງ​ວ່າ­ການ​ນະ­ຄອນ ຫຼວງ​ວຽງ​ຈັນ ປະ­ມານ 20 ຄັນ​ລົດ ເຊິ່ງ​ເຄື່ອງ​ທີ່​ໄດ້​ຮັບ​ການ​ຊ່ວຍ­ເຫຼືອ​ຄັ້ງ​ນີ້ ຈະ​ໄດ້​ບິ​ແບ່ງ​ໄປ​ຊ່ວຍ­ເຫຼືອ​ບັນ­ດາ​ແຂວງ​ອື່ນໆ​ໃນ​ທົ່ວ​ປະ­ເທດ​ທີ່​ຖືກ​ຜົນ​ກະ­ທົບ​ນ້ຳ​ຖ້ວມ ຕາມ​ຄວາມ​ເໝາະ​ສົມ ແລະ ອີງ​ຕາມ​ສະ­ພາບ​ຄວາມ​ເປັນ​ຈິງ​ຂອງ​ຄວາມ​ຕ້ອງ­ການ​ຂອງ​ພາກ­ສ່ວນ​ຕ່າງໆ ພ້ອມ​ນັ້ນ ທ່ານ​ຫົວ­ໜ້າ​ຫ້ອງ​ວ່າ­ການ​ປົກ­ຄອງ​ນະ­ຄອນ­ຫຼວງ​ວຽງ​ຈັນ ຍັງ​ໄດ້​ສະ­ແດງ​ຄວາມ​ຂອບ­ໃຈ​ຕໍ່​ບັນ­ດາ​ພາກ­ສ່ວນ​ຕ່າງໆ​ທີ່​ໄດ້​ນຳ​ວັດ­ຖຸ​ປັດ​ໄຈ​ປະ­ກອບ­ສ່ວນ​ຊ່ວຍ­ເຫຼືອ​ຄັ້ງ​ນີ້ ອັນ​ໄດ້​ສະ­ແດງ​ເຖິງ​ຄວາມ​ສາ­ມັກ­ຄີ​ເປັນ​ປຶກ​ແຜ່ນ​ຂອງ​ພີ່­ນ້ອງ​ຮ່ວມ​ຊາດ ໂດຍ​ສະ­ເພາະ ແມ່ນ​ປະ­ຊາ­ຊົນ​ລາວ​ບັນ­ດາ­ເຜົ່າ​ທີ່​ມີ​ມູນ­ເຊື້ອ​ຄວາມ​ສາ­ມັກ­ຄີ​ຮັກ­ແພງ​ໃຫ້­ການ​ຊ່ວຍ ເຫຼືອ​ເຊິ່ງ​ກັນ ແລະ ກັນ ພ້ອມ​ນັ້ນ ຍັງ​ສະ­ເໜີ​ໃຫ້​ຜູ້​ທີ່​ມີ​ຈິດ­ໃຈ​ປະ­ກອບ­ສ່ວນ​ຊ່ວຍ­ເຫຼືອ​ສາ­ມາດ​ນຳ​ມາ​ມອບ​ປະ­ກອບ­ສ່ວນ​ໄດ້​ທີ່​ຫ້ອງ​ວ່າ­ການ​ປົກ­ຄອງ ນະ­ຄອນ­ຫຼວງ​ວຽງ​ຈັນ ຈົນ​ຮອດ ວັນ​ສຸກ​ທີ 3 ກໍ­ລະ­ກົດ​ນີ້ ໂດຍ​ສະ­ເພາະ ສິ່ງ​ທີ່​ກຳ­ລັງ​ຕ້ອງ­ການ​ຮີບ​ດ່ວນ​ແມ່ນ​ວັດ­ຖຸ​ໃນ​ການ​ສ້ອມ­ແປງ​ເຮືອນ​ຢູ່​ອາ­ໄສ ປະ­ກອບ​ມີ ສັງ­ກະ­ສີ ເຫຼັກ​ຕະ­ປູ ອາ­ສາ​ສະ​ໜັກ​ໄຈ້​ແຍກ​ເຄື່ອງ ແລະ ອື່ນໆ.

ຂ່າວທີ່ກ່ຽວຂ້ອງ