ຂ່າວຫຼ້າສຸດ

ຊາວ​ອິນ​ເດຍ 4 ລ້ານ​ກວ່າ​ຄົນ ບໍ່​ມີ​ໜັງສື​ທີ່​ຖືກຕ້ອງ​ເພື່ອ​ຮັບ​ສິດທິ​ພົນລະເມືອງ

93 01 ສ.ຫ. 2018 ຂ່າວຕ່າງປະເທດ
ຊາວ​ອິນ​ເດຍ 4 ລ້ານ​ກວ່າ​ຄົນ ບໍ່​ມີ​ໜັງສື​ທີ່​ຖືກຕ້ອງ​ເພື່ອ​ຮັບ​ສິດທິ​ພົນລະເມືອງ

     ລັດຖະບານ​ອິນ​ເດຍ ແຈ້ງ​ໃຫ້​ຮູ້ເມື່ອ​ວັນ​ທີ 30 ກໍລະກົດ​ທີ່​ຜ່ານ​ມາ​ວ່າ ໄດ້​ຄັດ​ໃຫ້ 4 ລ້ານ​ກວ່າ ຄົນ ຢູ່​ໃນ​ລັດ ​ອັສ​ສຳ (ພາກ​ຕາເວັນ​ອອກ​ປະເທດ​ອິນ​ເດຍ) ອອກ​ໄປ​ຈາກ​ຮ່າງ​ບັນຊີ​ລາຍ​ຊື່​ການ​ໃຫ້ ສິດທິ​ພົນລະເມືອງ ຍ້ອນ​ວ່າ​ຄົນ​ເຫຼົ່ານັ້ນ ບໍ່​ສາມາດ​ທີ່​ຈະ​ນຳ​ເອົາ​ໜັງ​ສື່​ຖືກຕ້ອງ​ຕາມ​ລະບຽບ​ການ ອອກ​ມາ.

ການ​ດຳເນີນ​ການ​ດັ່ງກ່າວ ເຮັດ​ໃຫ້​ເກີດ​ຄວາມ​ກັງວົນ​ອອກ​ມາ ກ່ຽວ​ກັບ​ອະນາຄົດ ຂອງ​ຫຼາຍ​ພັນ​ຄົນ​ຢູ່​ໃນ​ລັດ​ດັ່ງກ່າວ ທີ່​ມີ​ຊາຍ​ແດນ​ຕິດ​ກັບ​ປະເທດ​ບັງ​ກລາ​ເດ​​ສ ນັ້ນ.

    ເຈົ້າ​ໜ້າທີ່​ອິນ​ເດຍ ໄດ້​ປະກາດ​ບັນຊີ​ລາຍ​ຊື່ ການ​ລົງທ​​ະ​ບຽນ​ສິດທິ​ພົນລະເມືອງ​ທົ່ວ​ປະເທດ ຕໍ່​ກອງ​ປະຊຸມ​ຖະແຫຼງ​ຂ່າວ ໂດຍ​ຊີ້​ອອກ​ວ່າ​ໃນ​ຈຳນວນ 30 ລ້ານ​ກວ່າ​ຄົນ ທີ່​ຂໍ​ສິດທິ​ພົນລະເມືອງ​ນັ້ນ ມີ 4 ລ້ານ​ກວ່າ​ຄົນ ໄດ້​ຖືກ​ນຳ​ອອກ​ໄປ​ຈາກ​ບັນຊີ​ລາຍ​ຊື່. ເຖິງ​ຢ່າງໃດ​ກໍ​ຕາມ ຜູ້​ທີ່​ຖືກ​ຄັດ​ອອກ​ໄປ ຈາກ​ບັນຊີ​ລາຍ​ຊື່​ນັ້ນ ກໍ​ຍັງ​ມີ​ໂອກາດ​ສູ້​ຄະດີ ແລະ​ຊື່​ສຽງ​ຮຽງ​ນາມ​ຂອງ​ພວກ​ເຂົາ ສາມາດ​ຖືກ​ນຳ​ເຂົ້າ​ໄປ ໃນ​ບັນຊີ​ລາຍ​ຊື່​ສຸດ​ທ້າຍ​ໄດ້.

    ຮ່າງ​ບັບ​ຊີ​ລົງທະບຽນ​ພົນລະເມືອງ​ທົ່ວ​ປະເທດ (NRC) ສະບັບ​ທຳ​ອິດ​ຂອງ​ອິນ​ເດຍ ໄດ້​ຖືກ​ນຳ​ປະກາດ ເມື່ອ​ເດືອນ​ທັນວາ​ປີ​ກາຍ ໂດຍ​ໄດ້​ຮັບ​ຮູ້​ສິດທິ​ພົນລະເມືອງ​ໃຫ້​ແກ່ 19 ລ້ານ​​ຄ​ຄົນ.

    ເພື່ອ​ໃຫ້​ໄດ້​ມາ​ຊຶ່ງ​ການ​ຮັບ​ຮູ້​ວ່າ​ເປັນ​ພົນລະເມືອງ​ຂອງ​ອິນ​ເດຍ​ນັ້ນ ປະຊາຊົນ​ທຸກໆ​ຄົນ​ຢູ່​ໃນ​ລັດ ​ອັສ​ສຳ (ມີ​ປະຊາກອນ​ທັງ​ໝົດ 33 ລ້ານ​ຄົນ) ຕ້ອງ​ໄດ້​ຍື່ນ​ເອກະສານ​ຕ່າງໆ​ທີ່​​ຖືກຕ້ອງ ຕາມ​ລະບຽບ​ການ ທີ່​ສະແດງ​ໃຫ້​ເຫັນ​ວ່າ​ພວກ​ເຂົາ ຫຼື​ຄອບຄົວ​ຂອງ​ພວກ​ເຂົາ​ໄດ້​ດຳລົງ​ຊີວິດ​ຢູ່​ທີ່​ນັ້ນ ກ່ອນ​ວັນ​ທີ 24 ມີນາ ປີ 1971.

   ຫຼາຍ​ແສນ​ຄົນ​ຢູ່​ໃນ​ປະເທດ​ບັງ​ກລາ​ເດ​​ສ ໄດ້​ໜີ​ໄພ​ເຂົ້າ​ໄປ​ອາ​ໃສ​ຢູ່​ໃນ​ອິນ​ເດຍ ໃນ​ລະຫວ່າງ ສົງຄາມ​ຍາດ​ເອົາ​ເອກະລາດ​ຂອງ​ບັງ​ກລາ​ເດ​​ສ ຈາກ​ປາ​ກິດ​ສະຖານ ໃນ​ຕົ້ນ​ຊຸມ​ປີ  1970. ສ່ວນ​ຫຼາຍ ຂອງ​ຄົນ​ຈຳນວນ​ນັ້ນ ໄດ້​ຕັ້ງ​ຖິ່ນ​ຖານ​ຢູ່​ໃນ​ລັດ​​ອັສ​ສຳ ຫ່າງ​ຈາກ​ຊາຍ​ແດນ​ບັງ​ກລາ​ເດ​​ສ ເກືອບ 270​ກມ.

 

ຂ່າວທີ່ກ່ຽວຂ້ອງ