ເກີດ​ນ້ຳມັນ​ຮົ່ວ​ອອກ​ສູ່​ທະເລ​ຢູ່​ໃນ​ຊູ​ແອດ

275 01 ສ.ຫ. 2018 ຂ່າວຕ່າງປະເທດ
ເກີດ​ນ້ຳມັນ​ຮົ່ວ​ອອກ​ສູ່​ທະເລ​ຢູ່​ໃນ​ຊູ​ແອດ

    ກອງ​ກຳລັງ​ກູ້​ໄພ​ສຸກ​ເສີນ​ຂອງ​ຊູ​ແອດ ໃຊ້​ຄວາມ​ພະຍາຍາມ​ແຂ່ງ​ກັບ​ເວລາ ເພື່ອ​ແກ້​ໄຂ​ເຫດການ​ນ້ຳມັນ​ຮົ່ວ​ໄຫຼ​ຈາກ​ກຳປັ່ນ​ບັນທຸກ​ນ້ຳມັນ​ລຳ​ໜຶ່ງ ທີ່່​ເກີດ​ເກີຍ​ຕື້ນ ຢູ່​ໃນ​ທະເລ​ບໍລິເວນ​ນອກ​ຝັ່ງ ເຂດ​ກາ​​ລ​ມາ (ພາກ​ໃຕ້​ຊູ​ແອດ).

    ສື່ສານ​ໃນ​ຊູ​ແອດ​ລາຍ​ງານ​ເມື່ອ​ວັນ​ທີ 30 ກໍລະກົດ​ທີ່​ຜ່ານ​ມາ​ວ່າ ເຈົ້າ​ໜ້າທີ່​ຈາກ​ກອງ​ກຳລັງ ສຸກ​ເສີນ​ຢ່າງ​ໜ້ອຍ 120 ຄົນ ໄດ້​ໃຊ້​ຄວາມ​ພະຍາຍາມ​ກີດ​ກັນ​ເພື່ອ​ບໍ່​ໃຫ້​ນ້ຳມັນ​ແພ່​ກວ້າງ​ອອກ​ໄປ.

     ຍັງ​ບໍ່​ເປັນ​ທີ່​ຈະ​ແຈ້ງວ່າ ບໍ​ລິ​ມາດ​ນ້ຳມັນ​ທີ່​ຮົ່ວ​ໄຫຼ​ອອກ​ໄປ​ຈາກ​ກຳປັ່ນ Makassar Highway ນັ້ນ​ມີ​ເທົ່າໃດ ຫາກ​ພຽງ​ແຕ່​ຮູ້​ວ່າ ໃນ​ເວລາ​ທີ່​ເກີດ​ເກີຍ​ຕື້ນ​ເມື່ອ​ຄ່ຳ​ຄືນ​ຂອງ​ວັນ​ທີ 29 ກໍລະກົດ​ນັ້ນ ກຳປັ່ນ​ດັ່ງກ່າວ ບັນທຸກ​ນ້ຳມັນ 400.000 ລິດ.

    ກອງ​ກຳລັງ​ປ້ອງ​ກັນ​ຝັ່ງ​ທະເລ​ຂອງ​ຊູ​ແອດ ໃຫ້​ຮູ້​ວ່າ ມາ​ຮອດ​ວັນ​ທີ 30 ກໍລະກົດ ໜ່ວຍ​ກູ້​ໄພ ໄດ້​ເກັບ​ກູ້​ນ້ຳມັນ​ທີ່​ໄຫຼ​ອອກ​ສູ່​ທະເລ​ມາ​ໄດ້ 7.000 ລິດ. ໃນ​ຂະນະ​ດຽວ​ກັນ ກຳປັ່ນ ເຮືອ​ແພ​ຫຼາຍ​ລຳ ສົມທົບ​ກັບ​ເຮືອບິນ​ຂອງ​ກອງ​ກຳລັງ​ປ້ອງ​ກັນ​ຝັ່ງທ​​ະ​ເລ ກໍ​ພວມ​ໃຊ້​ຄວາມ​ພະຍາຍາມ ໃນ​ການ​ດູດ​ເອົາ ນ້ຳມັນ​ທີ່​ໄຫຼ​ອອກ​ມາ​ນັ້ນ.

 

ຂ່າວທີ່ກ່ຽວຂ້ອງ