ຂ່າວຫຼ້າສຸດ

ປະລິມານ​ການ​ຜະລິດ​ເຫຼັກ​ກ້າ​ຂອງ​ຈີນ​ເພີ່ມ​ຂຶ້ນ​ໄວ​ໃນ 6 ເດືອນ​ຕົ້ນ​ປີ​ນີ້

175 31 ກ.ກ. 2018 ຂ່າວຕ່າງປະເທດ
ປະລິມານ​ການ​ຜະລິດ​ເຫຼັກ​ກ້າ​ຂອງ​ຈີນ​ເພີ່ມ​ຂຶ້ນ​ໄວ​ໃນ 6 ເດືອນ​ຕົ້ນ​ປີ​ນີ້

    ສະຫະພັນ​ຜູ້​ຜະລິດ​ເຫຼັກ​ກ້າ​ໂລກ (Worldsteel) ໃຫ້​ຮູ້​ວ່າ ຈີນ ຊຶ່ງ​ເປັນ​ຜູ້​ຜະລິດ ແລະ ບໍລິໂພກ​ເຄິ່ງ​ໜຶ່ງ​ຂອງ​ປະລິມານ​ເຫຼັກ​ກ້າ​ຂອງ​ໂລກ​ນັ້ນ ໄດ້​ເພີ່ມ​ປະລິມານ​ການ​ຜະລິດ​ເຫຼັກ​ກ້າ​ຂຶ້ນ​ເຖິງ  6% ຂຶ້ນ​ສູ່​ລະດັບ 451,2 ລ້ານ​ໂຕນ ພາຍ​ໃນ​ເຄິ່ງ​ຕົ້ນ​ປີ 2018.

    ສະເພາະ​ແຕ່​ໃນ​ເດືອນ​ມິຖຸນາ 2018 ເທົ່າ​ນັ້ນ ປະລິມານ​ການ​ຜະລິດ​ເຫຼັກ​ກ້າ​ຂອງ​ຈີນ ບັນລຸ​ທີ່ 80,2 ລ້ານ​ໂຕນ ເພີ່ມ​ຂຶ້ນ 7,5% ເມື່ອທ​​ຽບ​ໃສ່​ເວລາ​ດຽວ​ກັນ​ຂອງ​ປີ 2017. Worldsteel ຍັງ​ໃຫ້​ຮູ້​ວ່າ ປະລິມານ​ການ​ຜະລິດ​ເຫຼັກ​ກ້າ​ຂອງ​ທົ່ວ​ໂລກ ໃນ​ເຄິ່ງ​ຕົ້ນ​ປີ​ນີ້ ໄດ້​ເພີ່ມ​ຂຶ້ນ 4,6% ເມື່ອ​ທຽບໃສ່​ໄລຍະ​ເວລາ​ດຽວ​ກັນ​ຂອງ​ປີ​ກາຍ. ຜົນ​ທີ່​ອອກ​ມາ​ຄື​ແນວ​ນັ້ນ ກໍ​ແມ່ນ​ເປັນ​ຍ້ອນ​ຜົນ​ຕອບ​ແທນ​ສູງ ເປັນ​ການ​ສົ່ງເສີມ​ໃຫ້​ບັນດາ​ໂຮງ​ຈັກ​ໂຮງງານ​ຜະລິດ​ເຫຼັກ​ກ້າ​ເພີ່​​ມ​ການ​ຜະລິດ​ຂຶ້ນ.

    ປະລິມານ​ການ​ຜະລິດ​ເຫຼັກ​ກ້າ ຊຶ່ງ 64 ປະເທດ ແຈ້ງ​ຕໍ່ Worldsteel ນັ້ນ​ບັນລຸ 881,5 ລ້ານ​ໂຕນ ພາຍ​ໃນ​ເຄິ່ງ​ຕົ້ນ​ປີ​ນີ້. ໄລ່​ສະເພາະ​ແຕ່​ໃນ​ເດືອນ​ມິຖຸນາ 2018 ຕົວ​ເລກ​ດັ່ງກ່າວ​ບັນລຸ 151,4 ລ້ານ​ໂຕນ ເພີ່ມ​ຂຶ້ນ 5,8% ເມື່ອທ​​ຽບ​ໃສ່​ໄລຍະ​ເວລາ​ດຽວ​ກັນ​ຂອງ​ປີ​ກາຍ.

    ການ​ຜະລິດ​ເຫຼັກ​ກ້າ ເປັນ​ຂະແໜງ​ອຸດສາຫະກຳ​ໃຫຍ່​ອັນ​ດັບ​ສອງ​ຂອງ​ໂລກ ໂດຍ​ເປັນ​ຮອງ​ຈາກ​ນ້ຳມັນ-ແກ​​ັສ ມີ​ມູນ​ຄ່າ​ປະມານ 900 ຕື້​ໂດ​ລາ​ສະຫະລັດ/ປີ. Worldsteel ເປັນ​ຕົວ​ແທນ​ໃຫ້​ແກ່​ຜູ້​ຜະລິດ​ເຫຼັກ​ກ້າ 160 ລາຍ ກວມ​ເອົາ 85% ຂອງ​ປະລິມານ​ການ​ຜະລິດ​ເຫຼັກ​ກ້າ​ທົ່ວ​ໂລກ.

 

ຂ່າວທີ່ກ່ຽວຂ້ອງ