ຂ່າວຫຼ້າສຸດ

ປະທານາທິບໍດີ​ຟີ​ລິບ​ປິນ ສະເໜີ​ໃຫ້​ກຸ່ມ​ມື​ປືນ ອາ​ບູ ເຊ​ຢາບ ເຂົ້າ​ຮ່ວມ​ເຈລະຈາ​ກັບ​ທາງ​ການ

121 31 ກ.ກ. 2018 ຂ່າວຕ່າງປະເທດ
 ປະທານາທິບໍດີ​ຟີ​ລິບ​ປິນ ສະເໜີ​ໃຫ້​ກຸ່ມ​ມື​ປືນ ອາ​ບູ ເຊ​ຢາບ ເຂົ້າ​ຮ່ວມ​ເຈລະຈາ​ກັບ​ທາງ​ການ

      ປະທານາທິບໍດີ​ຟີ​ລິບ​ປິນ ໂຣດ​ຣີ​ໂກ ດູ​ເຕີ​ເຕ ກ່າວ​ຢູ່​ທີ່​ນະຄອນ ໂຈ​ໂລ ໃນ​ແຂວງ​ຊູ​ລູ ເມື່ອ​ວັນ​ທີ 27 ກໍລະກົດ​ທີ່​ຜ່ານ​ມາ ວ່າ​ໄດ້​ສະເໜີ​ໃຫ້​ກຸ່ມ​ມື​ປືນ ອາ​ບູ ເຊ​ຢາບ  (Abu Sayyaf - ASG) ເຂົ້າ​ຮ່ວມ​ການ​ເຈລະຈາ​ກັບ​ທາງ​ການ​ຟີ​ລິບ​ປິນ  ໂດຍ​ຖື​ວ່າ ເວລາ​ນີ້​ເປັນ​ຈຸດ​ເວລາ​ເພື່ອ​ຢຸດຕິ​ການ ພິພາດ.

    ປະທານາທິບໍດີ ດູ​ເຕີ​ເຕ ຢືນຢັນ​ວ່າ​ຈາກ​ການ​ລົງ​ນາມ​ກົດໝາຍ​ພື້ນຖານ​ກ່ຽວ​ກັບ ບັງ​ຊາ​ໂມ​ໂຣ (Bangsamoro - BOL) ນັ້ນ ສັນຕິພາບ​ຈະ​ໄດ້​ມີ​ຂຶ້ນ​ໃນ​ບໍ່​ຊ້າ​ນີ້ ທີ່​ເກາະ​ມິນ​ດາ​ນາວ (ພາກ​ໃຕ້​ຟີ​ລິບ​ປິນ). ໃນ​ຖະແຫຼງການ​ທີ່​ສົ່ງ​ໄປ​ຍັງ ພວກ​ມື​ປືນ​ອາ​ບູ ເຊ​ຢາບ ນັ້ນ ປະທານາທິບໍດີ ດູ​ເຕີ​ເຕ ສະເໜີ​ວ່າ “ຈົ່ງ​ເຈລະຈາ” ແລະ “ຈົ່ງ​ຢຸດຕິ​ການ​ພິພາດ.”

    ປະທານາທິບໍດີ ດູ​ເຕີ​ເຕ ກໍ​ໄດ້​ແຈ້ງ​ເຕືອນ​ວ່າ ຖ້າ​ຫາກ​ວ່າການ​ພິພາດ​ຍັງ​ສືບຕໍ່​ກໍ​ຈະ​ມີ ຜູ້​ເສຍ​ຊີວິດ​ຕື່ມ​ອີກ​ຫຼາຍ​ຄົນ. ໃນ​ຂະນະ​ດຽວ​ກັນ ປະທານາທິບໍດີ ດູ​ເຕີ​ເຕ ກໍ​ໄດ້​ໄປ​ຍັງ​ເມືອງ​ໂຈ​ໂລ ເພື່ອ​ກວດກາ​ເບິ່ງ​ສະພາບ​ການ​ຂອງ​ປະຊາຊົນ​ປະມານ 30.000 ຄົນ ທີ່​ຕົກ​ຢູ່​ໃນ​ສະພາບ​ບໍ່​ມີ​ທີ່ຢູ່​ອາ​ໃສ ຫຼັງ​ຈາກ​ທີ່​ໄຟ​ໄດ້​ເຜົາ​ໄໝ້​ບ້ານ​ແຫ່ງ​ໜຶ່ງ​ຢູ່​ທີ່​ນັ້ນ ຊຶ່ງ​ເກີດ​ຂຶ້ນ​ເມື່ອ​ວັນ​ທີ 24 ກໍລະກົດ​ທີ່​ຜ່ານ​ມາ.

    ອາ​ບູ ເຊ​ຢາບ ເປັນ​ອົງການ​ມຸ​ສລິມ​ຫົວ​ຮຸນ​ແຮງ ເຄື່ອນ​ໄຫວ​ຢູ່​ໃນ​ເຂດ​ຝັ່ງ​ຕາເວັນຕົກ ຂອງ​ເກາະ​ມິນ​ດາ​ນາວ ແລະ​ໝູ່​ເກາະ ຊູ​ລູ. ກຸ່ມ​ດັ່ງກ່າວ​ເປັນ​ທີ່​ຮູ້​ກັນ ດ້ວຍ​ຫຼາຍ​ກໍລະນີ​ຂ້າ​ຄົນ ລັກ​ພາ​ຕົວ​ຜູ້​ຄົນ​ເພື່ອ​ຮຽກ​ຄ່າ​ໄຖ່ ແລະ​ການ​ວາງ​ລະເບີດ​ຫຼາຍ​ລາຍ​ຢູ່​ໃນ​ເກາະ​ມິນ​ດາ​ນາວ. ໃນ​ຂະນະ​ດຽວ​ກັນ ອາ​ບູ ເຊ​ຢາບ ກໍ​ປະກາດ​ເຖິງ​ຄວາມ​ຈົງ​ຮັກ​ພັກດີ​ກັບ​ອົງການ​ລັດ​ອິດ​ສະ​ລາມ (IS) ແລະ​ຊ່ວຍເຫຼືອ​ກຸ່ມ​ມື​ປືນ​ເໝົາ (Maute) ໃນ​ການ​ໂຈມ​ຕີ​ນະຄອນ​ມາ​ຣາ​ວີ ເມື່ອ​ເດືອນ​ພຶດສະພາ ປີ 2017 ເປັນ​ການ​ຈຸດ​ສະ​ນວນ​ໃຫ້​ແກ່​ການ​ສູ້​ຮົບ​ຢ່າງ​ຮ້າຍ​ແຮງ ເຮັດ​ໃຫ້​ມີ​ຜູ້​ເສຍ​ຊີວິດ 1.200 ກວ່າ​ຄົນ.

    ກົດໝາຍ BOL ຊຶ່ງ​ປະທານາທິບໍດີ ດູ​ເຕີ​ເຕ ລົງ​ນາມ​ປະກາດ​ໃຊ້​ເມື່ອ​ວັນ​ທີ 27 ກໍລະກົດ​ທີ່​ຜ່ານ​ມາ​ນັ້ນ ຖືກ​ນຳ​ອອກ​ມາ​ເພື່ອ​ແທນ​ທີ່​ໃຫ້​ແກ່​ເຂດ​ປົກຄອງ​ຕົນ​ເອງ​ຢູ່​ໃນ​ເຂດ ມິນ​ດາ​ນາວ ມຸ​ສລິມ (ARMM) ທີ່​ໄດ້​ສ້າງຕັ້ງ​ເມື່ອ​ປີ 1989 ດ້ວຍ​ເຂດ​ບັງ​ຊາ​ໂມ​ໂຣ (Bangsamoro) ໃໝ່ ຫຼັງ​ຈາກ​ທີ່​ຂໍ້ຄວາມ​ຕ່າງໆ ຖືກ​ນຳ​ອອກ​ມາ​ຢູ່​ໃນ​ຂໍ້​ຕົກລົງ​ຮອບດ້ານ​ບັງ​ຊາ​ໂມ​ໂຣ ຊຶ່ງ​ລັດຖະບານ ຟີ​ລິບ​ປິນ ແລະ ແນວ​ໂຮມ​ປົດ​ປ່ອຍ​ມຸ​ສລິມ ໂມ​ໂຣ (MILF) ລົງ​ນາມ​ເມື່ອ​ປີ  2014.

    ກົດໝາຍ BOL ກໍ​ລະບຸ​ວ່າ ເຂດ​ປົກຄອງ​ຕົນ​ເອງ​ບັງ​ຊາ​ໂມ​ໂຣ​ໃໝ່ ຢູ່​ໃນ​ມິນ​ດາ​ນາວ​ມຸ​ສລິມ ຈະ​ໄດ້​ເປັນ​ເຈົ້າ​ຕົນ​ເອງ​ໃນ​ດ້ານ​ການ​ເງິນ ມີ​ອຳນາດ​ການ​ປົກຄອງ​ເຂດ ມີ​ສະພາ​ນິຕິບັນຍັດ ແລະ​ລະບົບ ຍຸຕິ​ທຳ​ທີ່​ໃຫຍ່​ກວ່າ​ເກົ່າ./.

 

ຂ່າວທີ່ກ່ຽວຂ້ອງ