ຜົນ​ເບື້ອງ​ຕົ້ນ​ຂອງ​ການ​ເລືອກ​ຕັ້ງ​ໃນ​ກຳປູເຈຍ

175 31 ກ.ກ. 2018 ຂ່າວຕ່າງປະເທດ
ຜົນ​ເບື້ອງ​ຕົ້ນ​ຂອງ​ການ​ເລືອກ​ຕັ້ງ​ໃນ​ກຳປູເຈຍ

 

    ຂໍ້​ມູນ​ຈາກ​ພັກ​ປະຊາຊົນ​ກຳປູເຈຍ (CPP) ທີ່​ມີ​ອອກ​ມາ​ເມື່ອ​ຄ່ຳ​ຄືນ​ຂອງ​ວັນ​ທີ 29 ກໍລະກົດ​ນີ້ ໃຫ້​ຮູ້​ວ່າ ພັກ​ດັ່ງກ່າວ​ໄດ້​ຮັບ​ໄຊຊະນະ​ຢ່າງ​ຂາດ​ຂັ້ນ ຢູ່​ໃນ​ການ​ເລືອກ​ຕັ້ງ​ສະພາ​ແຫ່ງ​ຊາດ​ຊຸດ​ທີ VI ຊຶ່ງ​ຈັດ​ຂຶ້ນ​ໃນ​ວັນ​ດຽວ​ກັນ ໂດຍ​ໄດ້​ຮັບ​ສຽງ​ສະໜັບສະໜູນ​ກວ່າ 4,2 ລ້ານ​ບັດ ຈາກ​ຈຳນວນ ຜູ້​ໄປ​ໃຊ້​ສິດ​ເລືອກ​ຕັ້ງ​ກວ່າ  6,8 ລ້ານ​ຄົນ ເປັນ​ການ​ກວມ​ເອົາ​ກວ່າ 60% ຂອງ​ຈຳນວນ​ບັດ​ເລືອກ​ຕັ້ງ.

    ອັດຕາ​ສ່ວນ​ສຽງ​ສະໜັບສະໜູນ​ດັ່ງກ່າວ ນັບ​ວ່າ​ສູງ​ກວ່າ​ຫຼາຍ ເມື່ອທ​​ຽບ​ໃສ່​ຈຳນວນ​ບັດ​ສະໜັບ ສະ​ໜູນ​ທີ່  CPP ໄດ້​ມາ​ໃນ​ການ​ເລືອກ​ຕັ້ງ​ສະພາ​ແຫ່ງ​ຊາດ​ຊຸດ​ທີ V ເມື່ອ​ປີ 2013 (ໄດ້​ພຽງ 48,83%). ພັກ​ການເມືອງ​ຕ່າໆ ທີ່​ຍາດ​ໄດ້​ບັດ​ຄະແນນ​ສຽງ​ສະໜັບສະໜູນ​ຫຼາຍ​ເປັນ​ອັນ​ດັບ​ຖັດ​ລົງ​ມາ ກໍ​ແມ່ນ​ພັກ ພັກ​ປະຊາທິປະໄຕ​ພື້ນຖານ (GDP) ໄດ້​ກວ່າ 560.000 ບັດ ໃນ​ຂະນະ​ທີ່​ພັກ FUNCINPEC ໄດ້​ກວ່າ 326.000 ບັດ ພັກ​ພັນທະ​ພາບ ປາ​ຊາ​ທິ​ປະ​ໄຕ (LDP) ໄດ້​ກວ່າ 268.000 ບັດ ພັກ​ນ້ຳໃຈ​ຂະເໝນ (KWP) ໄດ້​ກວ່າ 183.000 ບັດ ແລະ​ອື່ນໆ.

    ກ່ອນ​ໜ້າ​ນັ້ນ​ຄະນະ​ກຳມະການ​ການ​ເລືອກ​ຕັ້ງ​ແຫ່ງ​ຊາດ​ກຳປູເຈຍ (NEC) ໃຫ້​ຮູ້​ວ່າການ ເລືອກ​ຕັ້ງ​ດັ່ງກ່າວ​ໄດ້​ປະສົບ​ຄວາມ​ສຳເລັດ ໂດຍ​ມີ​ຜູ້​ມີ​ສິດ​ເລືອກ​ຕັ້ງ ໄປ​ໃຊ້​ສິດ​ປ່ອນ​ບັດ 82,17%. ຈຳນວນ​ຜູ້​ມີ​ສິດ​ເລືອກ​ຕັ້ງ ທີ່​ໄປ​ໃຊ້​ສິດ​ປ່ອນ​ບັດ​ໃນ​ເທື່ອ​ນີ້ ມີ​ສູງ​ກວ່າ​ຫຼາຍ​ເມື່ອ​ທຽບໃສ່​ໃນ​ການ​ເລືອກ ຕັ້ງ​ເທື່ອ​ກ່ອນ ທີ່​ຈັດ​ຂຶ້ນ​ໃນ​ປີ 2013 ໂດຍ​ໃນ​ເທື່ອ​ນັ້ນ​ມີ​ຜູ້​ໄປ​ໃຊ້​ສິດ​ປ່ອນ​ບັດ ກວ່າ 69,60%.

    ການ​ເລືອກ​ຕັ້ງ​ສະພາ​ແຫ່ງ​ຊາດ​ກຳປູເຈຍ ຊຸດ​ທີ VI ມີ 20 ພັກ​ການເມືອງ​ເຂົ້າ​ຮ່ວມ. ຕາມ​ການ​ກຳນົດ​ແລ້ວ ໃນ​ກໍລະນີ​ທີ່​ບໍ່​ມີ​ການ​ຟ້ອງ​ຮ້ອງ​ໃດໆ ທີ່​ເຮັດ​ໃຫ້​ຕ້ອງ​ໄດ້​ຈັດການ ເລືອກ​ຕັ້ງ​ຄືນໃໝ່​ແລ້ວ NEC ກໍ​ຈະ​ປະກາດ​ຜົນ​ການ​ເລືອກ​ຕັ້ງ​ເບື້ອງ​ຕົ້ນ ໃນ​ວັນ​ທີ 11 ສິງຫາ ແລະ ​ຜົນ​ການ​ເລືອກ​ຕັ້ງ​ຢ່າງ​ເປັນ​ທາງ​ການ ແມ່ນ​ຈະ​ນຳ​ອອກ​ມາ​ປະກາດ​ໃນ​ວັນ​ທີ 15 ສິງຫາ​ໜ້າ​ນີ້.

 

ຂ່າວທີ່ກ່ຽວຂ້ອງ