ຝົນຕົກ​ແກ່ຍາວ ເຮັດ​ໃຫ້​ມີ​ຜູ້​ເສຍ​ຊີວິດ​ເກືອບ 600 ຄົນ ຢູ່​ໃນ​ອິນ​ເດຍ

    ໂທລະພາບ​ຂອງ​ອິນ​ເດຍ ອ້າງ​ຕາມ​ຂໍ້​ມູນ​ຈາກ​ສູນ​ຮອງ​ຮັບ​ສຸກ​ເສີນ​ແຫ່ງ​ຊາດ ໃຫ້​ຮູ້​ວ່າ ມີ​ຜູ້​ເສຍ​ຊີວິດ​ໄປ​ແລ້ວ​ເກືອບ 600 ຄົນ ເຮືອນ​ຫຼາຍ​ຮ້ອຍ​ຫຼັງ​ຖືກ​ນ້ຳ​ພັດ​ໄຫຼ​ໄປ ຫຼື​ບໍ່​ກໍ​ຖືກ​ເປ່​ເພ ຢ່າງ​ຮ້າຍ​ແຮງ ແລະ​ມີ​ຫຼາຍ​ລ້ານ​ຄົນ ຕົກ​ຢູ່​ໃນ​ສະພາບ​ບໍ່​ມີ​ທີ່ຢູ່​ອາ​ໃສ ຢູ່​ໃນ 6 ລັດ​ຂອງ​ອິນ​ເດຍ ຍ້ອນ​ເກີດ​ຝົນຕົກ​ໜັກ​ແກ່ຍາວ​ເປັນ​ເວລາ 2 ອາທິດ​ທີ່​ຜ່ານ​ມາ.

    ຂ່າວ​ແຈ້ງວ່າ ລັດ ມາ​ຮາ​ຣາ​​ສ​ຕຣາ (ທິດຕາເວັນຕົກ​ສ່ຽງ​ໃຕ້​ຂອງ​ອິນ​ເດຍ) ເປັນ​ທ້ອງຖິ່ນ ທີ່​ໄດ້​ຮັບ​ຄວາມ​ເສຍ​ໜັກໜ່ວງ​ທີ່​ສຸດ ໂດຍ​ມີ​ຜູ້​ເສຍ​ຊີວິດ​ເກືອບ 140 ຄົນ. ຮອງ​ລົງ​ມາ​ກໍ​ແມ່ນ​ລັດ ເກ​ຣາ​ລາ ມີ​ຜູ້​ເສຍ​ຊີວິດ 126 ຄົນ ໃນ​ຂະນະ​ທີ່​ລັດ ເວ​​ສ ເບນ​ການ (ທິດຕາເວັນອອກ​ຂອງ​ອິນ​ເດຍ) ມີ​ຜູ້​ເສຍ​ຊີວິດ 116 ຄົນ ລັດ ອຸດ​ຕາ​ປຣາ​ເດ​​ສ (ພາກ​ເໜືອ​ອິນ​ເດຍ) ມີ​ຜູ້​ເສຍ​ຊີວິດ 70 ຄົນ ລັດ​ກຸ​ຈາ​ຣາດ (ທິດຕາເວັນຕົກ​ອິນ​ເດຍ) ແລະ​ລັດ​​ອັສ​ສຳ (ທິດຕາເວັນອອກ​ສ່ຽງ​ເໜືອ​ອິນ​ເດຍ) ມີ​ຜູ້​ເສຍ​ຊີວິດ​ຕາ​ລຳດັບ 52 ແລະ 34 ຄົນ.

    ລັດຖະບານ​ອິນ​ເດຍ ໄດ້​ຜັນ​ຂະຫຍາຍ​ການ​ປະຕິບັດ​ງານ​ຂອງ​ກອງ​ກຳລັງ ຊ່ວຍເຫຼືອ​ສຸກ​ເສີນ ແຫ່ງ​ຊາດ (NDRF) ຈຳນວນ 43 ທິມ​ງານ ຊຶ່ງ​ແຕ່​ລະ​ທິມ​ມີ​ຢ່າງ​ໜ້ອຍ 45 ຄົນ ໄປ​ຍັງ 6 ລັດ​ດັ່ງກ່າວ​ເພື່ອ​ໃຫ້​ຄວາມ​ຊ່ວຍເຫຼືອ​ກູ້​ໄພ.

    ໃນ​ຂະນະ​ດຽວ​ກັນ ສື່ສານ​ໃນ​ມຽນ​ມາ ອ້າງ​ຕາມ​ເຈົ້າ​ໜ້າທີ່​ໃນ​ມຽນ​ມາ ແຈ້ງ​ໃຫ້​ຮູ້ ເມື່ອ​ວັນ​ທີ 29 ກໍລະກົດ​ນີ້​ວ່າ ມີ​ຜູ້​ເສຍ​ຊີວິດ​ຢ່າງ​ໜ້ອຍ 5 ຄົນ ແລະ​ອີກ​ຫຼາຍ​ໝື່ນ​ຄົນ ຕ້ອງ​ໄດ້​ໜີ​ປະ​ເຮືອນ​ຊານ ເພື່ອ​ໄປ​ລີ້​ໄພ ຫຼັງ​ຈາກ​ທີ່​ຝົນຕົກ​ໜັກ ໄດ້​ເຮັດ​ໃຫ້​ຫຼາຍ​ບ້ານ​ຖືກ​ຈົມ​ຢູ່​ໃນ​ນ້ຳ ແລະ​ພັດ​ເອົາ​ຂົວ​ຫຼາຍ​ແຫ່ງ ໄຫຼ​ໄປ.