ຂ່າວຫຼ້າສຸດ

ຫຼາຍພາກສ່ວນຮ່ວມກັນຊ່ວຍເຫຼືອ ແລະ ໃຫ້ກຳລັງໃຈຜູ້ປະສົບໄພພິບັດ

181 31 ກ.ກ. 2018 ຂ່າວໜ້າ​ໜຶ່ງ
ຫຼາຍພາກສ່ວນຮ່ວມກັນຊ່ວຍເຫຼືອ ແລະ ໃຫ້ກຳລັງໃຈຜູ້ປະສົບໄພພິບັດ

   ໃນ​ວັນ​ທີ 27-28 ກໍ­ລະ­ກົດ 2018 ທ່ານ ນາງ ປາ­ນີ ຢາ​ທໍ່​ຕູ້ ປະ­ທານ​ສະ­ພາ​ແຫ່ງ​ຊາດ ພ້ອມ​ດ້ວຍ​ທ່ານ ສົມ​ພູ ດວງ​ສະ­ຫວັນ ປະ­ທານ​ກຳ­ມາ​ທິ​ການ​ວັດ­ທະ­ນະ­ທຳ-ສັງ­ຄົມ ທ່ານ ນາງ ສວນ​ສະ­ຫວັນ ວິ​ຍະ​ເກດ ເລ­ຂາ­ທິ­ການ​ສະ­ພາ​ແຫ່ງ​ຊາດ ແລະ ຄະ­ນະ​ຕິດ­ຕາມ ​ໄດ້​ເຄື່ອນ​ໄຫວ​ພົບ​ປະ​ຢ່າງ​ໃກ້­ຊິດ​ກັບ​ຜູ້​ປະ­ສົບ​ອຸ​ທົກ​ກະ​ໄພ​ນ້ຳ​ຖ້ວມ ​ໃນ​ເມືອງ​ສະ­ໜາມ​ໄຊ ແຂວງ​ອັດ​ຕະ​ປື ທີ່​ໄດ້​ຮັບ​ຜົນ​ກະ­ທົບ​ຈາກ​ອຸ­ບັດ​ຕິ​ເຫດ​ເຂື່ອນ​ກັ້ນ​ນ້ຳ​ເຊ​ປຽນ-ເຊ​ນ້ຳ​ນ້ອຍ​ແຕກ ປະ­ຊາ­ຊົນ​ຊາວ​ເມືອງ​ສະ­ໜາມ​ໄຊ ​ທີ່​ໄດ້​ຮັບ​ຜົນ​ກະ­ທົບ​ແລ້ວ​ຍົກ­ຍ້າຍ​ມາ​ປິ່ນ­ປົວ ແລະ ອາ­ໄສ​ຢູ່​ທີ່​ເມືອງ​ປາກ​ຊ່ອງ ແຂວງ​ຈຳ­ປາ​ສັກ​ເປັນ​ການ​ຊົ່ວ­ຄາວ ແລະ ປະ­ຊາ­ຊົນ​ທີ່​ຍັງ​ອາ­ໄສ​ຢູ່​ບັນ­ດາ​ສູນ​ພັກ­ຊົ່ວ­ຄາວ​ຕ່າງໆ​ຂອງ​ເມືອງ​ສະ­ໜາມ​ໄຊ.

   ໂອ­ກາດ​ດຽວ​ກັນ​ນີ້ ປະ­ທານ​ສະ­ພາ​ແຫ່ງ​ຊາດ ໄດ້​ສະ­ແດງ​ຄວາມ​ເຫັນ​ອົກ​ເຫັນ­ໃຈ ແລະ ຫ່ວງ​ໃຍ​ຕໍ່​ປະ­ຊາ­ຊົນ​ລາວ​ບັນ­ດາ­ເຜົ່າ ໂດຍ​ສະ­ເພາະ ປະ­ຊາ­ຊົນ​ທີ່​ໄດ້​ຮັບ​ຜົນ​ກະ­ທົບ​ຕໍ່​ເຫດ­ການ​ທີ່​ບໍ່​ຄາດ​ຝັນ​ດັ່ງ­ກ່າວ ທັງ​ໄດ້​ໃຫ້​ທິດ​ຊີ້​ນຳ ແລະ ໃຫ້​ກຳ­ລັງ​ໃຈ​ຕໍ່​ປະ­ຊາ­ຊົນ​ທຸກ​ຄົນ​ຈົ່ງ​ອົດ­ທົນ​ຜ່ານ​ຜ່າ​ອຸ­ປະ­ສັກ​ອັນ​ໂຫດ­ຮ້າຍ​ນີ້ ເຊື່ອ​ວ່າ​ອີກ​ບໍ່​ດົນ​ຈະ​ສາ­ມາດ​ກູ້​ວິ​ກິດ​ນີ້ ​ເຂົ້າ​ສູ່​ສະ­ພາ­ວະ​ປົກ­ກະ­ຕິ​ໄດ້ ແລະ ສະ­ແດງ​ຄວາມ​ຊົມ­ເຊີຍ​ຕໍ່​ຄະ­ນະ​ທີ່​ປະ­ຈຳ​ຢູ່​ພາກ​ສະ­ໜາມ ແລະ ໜ່ວຍ​ງານ​ຕ່າງໆ​ທັງ​ພາຍ​ໃນ ແລະ ຕ່າງ­ປະ­ເທດ ທີ່​ເຂົ້າ​ມາ​ຊ່ວຍ­ເຫຼືອ​ແກ້​ວິ​ກິດ​ການ​ໃນ​ຄັ້ງ​ນີ້ ເຊິ່ງ​ທ່ານ​ໄດ້​ເນັ້ນ​ໜັກໃຫ້​ຄະ­ນະ​ຮັບ​ຜິດ​ຕ້ອງ​ຮີບ​ດ່ວນ​ ໃນ​ການ​ຊ່ວຍ­ເຫຼືອ​ແກ່​ຜູ້​ທີ່​ຖືກ​ຜົນ​ກະ­ທົບ ແລະ ຂໍ​ໃຫ້​ຄຸ້ມ​ຄອງ​ເຄື່ອງ​ຊ່ວຍ­ເຫຼືອ​ໃຫ້​ທົ່ວ​ເຖິງ​ກັນ.

   ໃນ​ການ­ເຄື່ອນ­ໄຫວ​ຄັ້ງ​ນີ້ ຄະ­ນະ​ໄດ້​ນຳ​ເອົາ​ເງິນ­ສົດ 19 ລ້ານ​ກີບ ແລະ ເຄື່ອງ​ບໍ­ລິ­ໂພກ-ອຸ­ປະ­ໂພກຈຳ­ນວນ​ໜຶ່ງ ​ທີ່​ໄດ້​ຈາກ​ການ​ລະ­ດົມ​ທຶນ​ຈາກ​ພະ­ນັກ­ງານ​ນັບ​ແຕ່​ຂັ້ນ​ການ​ນຳ​ຕ່າງໆ ຈົນ​ເຖິງ​ພະ­ນັກ­ງານ​ວິ­ຊາ​ການ​ພາຍ​ໃນ​ສະ­ພາ​ແຫ່ງ​ຊາດ ພ້ອມ​ນັ້ນຍັງ​ໄດ້​ຮັບ​ຈາກ​ການ​ລະ­ດົມ​ໄດ້​ຈາກ​ບໍ­ລິ­ສັດ ແສງ​ເພັດ​ກໍ່­ສ້າງ​ຂົວ-ທາງ ເກັບ​ກູ້​ລະ­ເບີດ ຊ່ວຍ­ເຫຼືອ​ເຂົ້າ­ສານ 30 ໂຕນ ມູນ​ຄ່າ 180 ລ້ານ​ກີບ ເຄື່ອງ​ບໍ­ລິ­ໂພກ-ອຸ­ປະ­ໂພກ ຈາກ​ບໍ­ລິ­ສັດ BKK ອຸດ­ສາ­ຫະ­ກຳ​ການ​ຄ້າ ມູນ​ຄ່າ​ປະ­ມານ 50 ລ້ານ​ກີບ ແລະ ທະ­ນາ­ຄານ​ລາວ-ຫວຽດ ປະ­ມານ 90 ລ້ານ​ກີບ ລວມ​ມູນ​ຄ່າ​ທັງ​ໝົດ 300 ລ້ານ​ກວ່າ​ກີບ ພ້ອມ​ນີ້ ທ່ານ ສິນ​ລະ​ວົງ ຄຸດ​ໄພ­ທູນ ເຈົ້າ​ຄອງ​ນະ­ຄອນ­ຫຼວງ​ວຽງ​ຈັນ ພ້ອມ​ດ້ວຍ​ຄະ­ນະ ໄດ້​ລົງ​ໄປ​ເຄື່ອນ​ໄຫວ​ຢ້ຽມ­ຢາມ​ປະ­ຊາ­ຊົນ​ເມືອງ​ສະ­ໜາມ​ໄຊ ແຂວງ​ອັດ​ຕະ​ປື ແລະ ນຳ​ເອົາ​ເງິນ ພ້ອມ​ເຄື່ອງ​ອຸ­ປະ­ໂພກ-ບໍ­ລິ­ໂພກ ມາ​ຊ່ວຍ­ເຫຼືອ​ຜູ້​ປະ­ສົບ​ໄພ​ນ້ຳ​ຖ້ວມ ເຄື່ອງ​ທີ່​ນຳ​ມາ​ມອບ​ຄັ້ງ​ນີ້ ເປັນ​ງວດ​ທີ I ໄດ້​ຮັບ​ການ​ປະ­ກອບ­ສ່ວນ​ຈາກ​ພາກ​ລັດ-ເອ­ກະ​ຊົນ ບໍ­ລິ­ສັດ​ຫ້າງ​ຮ້ານ ແລະ ພໍ່​ແມ່​ປະ­ຊາ­ຊົນ​ຊາວ​ນະ­ຄອນ­ຫຼວງ​ວຽງ​ຈັນ ມີ: ເງິນ­ສົດ​ຈຳ­ນວນ 500 ລ້ານ​ກີບ ເຂົ້າ­ສານ 30 ໂຕນ ຊີ້ນ​ແຫ້ງ 400 ກິ​ໂລ ໝູ​ຝອຍ 60 ກິ​ໂລ ນ້ຳ​ດື່ມ 630 ແກັດ ປ໋ອງ​ປາ 16 ແກັດ ໝີ່ 597 ແກັດ ນົມ+ໝາກ​ໄມ້ 138 ແກັດ ເຄື່ອງ­ນຸ່ງ​ຫົ່ມ 3.767 ກິ​ໂລ ເຄື່ອງ​ນອນ 266 ກິ​ໂລ ແລະ ເກີບ 136 ກິ​ໂລ ສົ່ງ­ຕໍ່​ໃຫ້​ຜູ້​ປະ­ສົບ​ໄພ​ທີ່​ໄດ້​ຮັບ​ຜົນ​ກະ­ທົບ​ຈາກ​ອຸ​ທົກ​ກະ​ໄພ​ນ້ຳ​ຖ້ວມ ຢູ່​ເມືອງ​ສະ­ໜາມ​ໄຊ ແຂວງ​ອັດ​ຕະ​ປື ເພື່ອ​ເປັນ​ການ​ແກ້​ໄຂ​ບັນ­ເທົາ​ທຸກ​ຂອງ​ປະ­ຊາ­ຊົນ​ຜູ້​ທີ່​ໄດ້​ຮັບ​ໄພ­ພິ­ບັດ ນອກ​ນີ້ ຍັງ​ມີ​ອີກ​ຈຳ­ນວນ​ໜຶ່ງ​ພວມ​ກຳ­ລັງ​ກະ­ກຽມ​ສົ່ງ​ມາ​ຕື່ມ.

   ພິ­ທີ​ມອບ-ຮັບ​ເຄື່ອງ​ຊ່ວຍ­ເຫຼືອ​ໄດ້​ມີ​ຂຶ້ນ​ໃນ​ວັນ​ທີ 27 ກໍ­ລະ­ກົດ 2018 ທີ່​ສຳ­ນັກ­ງານ​ຫ້ອງ​ວ່າ­ການ​ປົກ­ຄອງ​ແຂວງ​ອັດ​ຕະ​ປື ໃຫ້​ກຽດ​ມອບ​ໂດຍ​ທ່ານ ສິນ​ລະ​ວົງ ຄຸດ​ໄພ­ທູນ ແລະ ຮັບ​ໂດຍ​ທ່ານ ເລັດ ໄຊ​ຍະ​ພອນ ມີ​ພາກ­ສ່ວນ​ກ່ຽວ­ຂ້ອງ​ເຂົ້າ​ຮ່ວມ.

   ໃນ​ວັນ​ທີ 27 ກໍ­ລະ­ກົດ ນີ້ ທີ່​ກະ­ຊວງ​ການ​ເງິນ ບໍ­ລິ­ສັດ ໄຟ­ຟ້າ​ຫົງ​ສາ ຈຳ­ກັດ ໄດ້​ນຳ​ເງິນ​ມາ​ມອບ​ເພື່ອ​ຊ່ວຍ­ເຫຼືອ​ບັນ­ເທົາ​ທຸກ​ ປະ­ຊາ­ຊົນ​ຜູ້​ປະ­ສົບ​ໄພ​ນ້ຳ​ຖ້ວມ​ຄັ້ງ​ໃຫຍ່​ທີ່ແຂວງ​ອັດ​ຕະ​ປື ແລະ ແຂວງ​ຈຳ­ປາ​ສັກ ຈຳ­ນວນ 520 ລ້ານ​ກີບ ກ່າວ​ມອບ​ໂດຍ​ທ່ານ ຄະ​ທະ​ຢຸດ ຊູ​ພູນ ຜູ້­ອຳ­ນວຍ­ການ​ໃຫຍ່​ບໍ­ລິ­ສັດ ໄຟ­ຟ້າ​ຫົງ​ສາ ຈຳ­ກັດ ແລະ ກ່າວ​ຮັບ​ໂດຍ​ທ່ານ ສົມ​ດີ ດວງ​ດີ ຮອງ​ນາ­ຍົກ­ລັດ­ຖະ­ມົນ­ຕີ ລັດ­ຖະ­ມົນ­ຕີ​ກະ­ຊວງ​ການ​ເງິນ ແລະ ວັນ​ທີ 28 ກໍ­ລະ­ກົດ ທີ່​ຜ່ານ​ມາ ທ່ານ​ຜູ້­ອຳ­ນວຍ­ການ​ໃຫຍ່​ບໍ­ລິ­ສັດ ໄຟ­ຟ້າ​ຫົງ​ສາ ຈຳ­ກັດ ຍັງ​ໄດ້​ມອບ​ເງິນ​ສົມ­ທົບ​ທຶນ ເພື່ອ​ບັນ­ເທົາ​ທຸກ​ໃຫ້​ກັບ​ປະ­ຊາ­ຊົນ​ຜູ້​ປະ­ສົບ​ໄພ​ນ້ຳ​ຖ້ວນ ແຂວງ​ອັດ​ຕະ​ປື ຈຳ­ນວນ 26 ລ້ານ​ກີບ ກ່າວ​ມອບ​ໂດຍ​ທ່ານ ກຽດ​ຕິ​ຄຸນ ຊາດ​ປະ­ເສີດ ທູດ​ໄທ​ປະ­ຈຳ​ລາວ ແລະ ໄດ້​ເຂົ້າ​ຮ່ວມ​ງານ​ເຮັດ­ບຸນ ເນື່ອງ​ໃນ​ວັນ​ຄ້າຍ​ວັນ​ສະ­ເຫຼີມ­ສະ­ຫຼອງ​ພະ​ຊົນ​ມະ​ພັນ​ສາ​ໃນ​ຫຼວງ​ລັດ­ຊະ­ການ​ທີ 10 ແລະ ລົງ​ນາມ​ຖວາຍ​ພະ​ພອນ​ທີ່​ສະ­ຖານ­ທູດ​ໄທ​ ປະ­ຈຳ​ລາວ.

   ນອກ​ນັ້ນ ບໍ­ລິ­ສັດ ພູ​ເບ້ຍ​ມາຍ​ນິງ ຈຳ­ກັດ ໄດ້​ໃຫ້­ການ​ການ​ຊ່ວຍ­ເຫຼືອ​ບັນ­ເທົາ​ທຸກ​ໃຫ້​ຜູ້​ປະ­ສົບ​ໄພ​ນ້ຳ​ຖ້ວມ ​ໂດຍ​ການ​ປະ­ສານ​ງານ​ຮ່ວມ​ມື​ກັບ​ລັດ­ຖະ­ບານ​ລາວ ໂດຍ​ໄດ້​ຈັດ​ສົ່ງ​ພະ­ນັກ­ງານ​ຊ່ຽວ­ຊານ​ຫຼາຍ​ທ່ານ​ເຊັ່ນ: ແພດ ໝໍ ພະ­ນັກ­ງານ​ກູ້​ໄພ​ສຸກ​ເສີນ ແລະ ຊ່ຽວ­ຊານ​ດ້ານ​ການ​ຂົນ­ສົ່ງ​ລຳ­ລຽງ​ລົງ​ໄປ​ແຂວງ​ອັດ​ຕະ​ປື ພ້ອມ​ທັງ​ສົ່ງ​ເຮືອ​ກູ້​ໄພ ແລະ ພາ­ຫະ­ນະ ເຄື່ອງ​ຊ່ວຍ­ເຫຼືອ​ດ້ານ​ການ​ແພດ​ສຸກ​ເສີນ ແລະ ເຄື່ອງ​ສະ­ໜອງ​ອື່ນໆ ແລະ ພ້ອມ​ນັ້ນ ບໍ­ລິ­ສັດ​ຍັງ​ໄດ້​ບໍ­ລິ­ຈາກ​ເງິນ 400 ລ້ານ​ກີບ ຫຼື ປະ­ມານ 50.000 ໂດ​ລາ​ສະ­ຫະ­ລັດ ໃຫ້​ແກ່​ໜ່ວຍ​ງານ​ຮັບ­ຜິດ­ຊອບ​ປະ­ສານ​ງານ​ບັນ­ເທົາ​ທຸກ​ຂັ້ນ​ສູນ​ກາງ­ຂອງ​ລັດ­ຖະ­ບານ​ລາວ ແລະ ຈະ​ບໍ­ລິ­ຈາກ​ເພີ່ມ​ເຕີມ​ສົມ­ທົບ​ເງິນ​ຈຳ­ນວນ​ເທົ່າ​ກັນ​ກັບ​ຈຳ­ນວນ​ເງິນ​ທັງ​ໝົດ ​ທີ່​ພະ­ນັກ­ງານ​ຂອງ​ບໍ­ລິ­ສັດ​ໃນ​ເຄືອ​ທຸກ​ບ່ອນ​ໄດ້​ບໍ­ລິ­ຈາກ ພະ­ນັກ­ງານ​ຂອງ​ບໍ­ລິ­ສັດ​ຍັງ​ໄດ້​ບໍ­ລິ­ຈາກ​ອາ­ຫານ ຜ້າ­ຫົ່ມ ນ້ຳ​ດື່ມ ແລະ ເຄື່ອງ­ໃຊ້​ທີ່​ຈຳ­ເປັນ​ອື່ນໆ ​ເຊິ່ງ​ເປັນ​ສ່ວນ​ໜຶ່ງ​ຂອງ​ການ​ຊ່ວຍ­ເຫຼືອ​ບັນ­ເທົາ​ທຸກ​ຜູ້​ປະ­ສົບ​ໄພ​ນ້ຳ​ຖ້ວມ​ອີກ​ດ້ວຍ.

ຂ່າວທີ່ກ່ຽວຂ້ອງ