ລັດຖະບານຈີນ ສົ່ງເຄື່ອງຊ່ວຍເຫຼືອໄພພິບັດນ້ຳຖ້ວມ

176 31 ກ.ກ. 2018 ຂ່າວໜ້າ​ໜຶ່ງ
ລັດຖະບານຈີນ ສົ່ງເຄື່ອງຊ່ວຍເຫຼືອໄພພິບັດນ້ຳຖ້ວມ

   ລັດ­ຖະ­ບານ ແລະ ປະ­ຊາ­ຊົນ​ຈີນ​ ໄດ້​ສົ່ງ​ເຄື່ອງ​ມາ​ຊ່ວຍ­ເຫຼືອ​ຜູ້​ປະ­ສົບ​ໄພ​ນ້ຳ​ຖ້ວມ​ທີ່​ເມືອງ​ສະ­ໜາມ​ໄຊ ແຂວງ​ອັດ​ຕະ​ປື ເຊິ່ງ​ເຄື່ອງ​ໄດ້​ສົ່ງ​ເຖິງ ສປປ ລາວ​ ໃນ​ວັນ​ທີ 30 ກໍ­ລະ­ກົດ 2018 ຕາງ­ໜ້າ​ມອບ​ໂດຍທ່ານ ຫວາງ ເວີນ​ທຽນ ເອກ​ອັກ​ຄະ​ລັດ​ຖະ​ທູດ ສປ ຈີນ ປະ­ຈຳ​ລາວ ແລະ ຕາງ­ໜ້າ​ຮັບ​ໂດຍ​ທ່ານ​ນາງ ໃບ​ຄຳ ຂັດ​ທິ​ຍະ ຮອງ​ລັດ­ຖະ­ມົນ­ຕີ​ກະ­ຊວງ​ແຮງ​ງານ ແລະ ສະ­ຫວັດ­ດີ​ການ​ສັງ­ຄົມ.

   ທ່ານ ຫວາງ ເວີນ​ທຽນ ກ່າວ​ວ່າ: ເຄື່ອງ​ທີ່​ລັດ­ຖະ­ບານ ແລະ ປະ­ຊາ­ຊົນ​ຈີນ​ນຳ​ມາ​ຊ່ວຍ­ເຫຼືອ​ຄັ້ງ​ນີ້​ປະ­ກອບ​ມີ: ເຮືອ​ໄວ 100 ລຳ ເຄື່ອງ​ຕອງ​ນ້ຳ 100 ຊຸດ ເຕັ້ນ 500 ເຕັ້ນ ຜ້າ­ຫົ່ມ 1 ພັນ​ຜືນ ມຸ້ງ 1 ພັນ​ດາງ ລວມ​ເປັນ​ມູນ​ຄ່າ​ທັງ​ໝົດ 20 ລ້ານ​ຢວນ ຫຼື ປະ­ມານ 24,6 ຕື້​ກີບ ນອກ​ນີ້ ໃນ​ໄລ­ຍະ​ຜ່ານ​ມາ​ລັດ​ຖະບານ​ຈີນ ​ຍັງ​ໄດ້​ສົ່ງ​ໜ່ວຍ​ແພດ​ຕ້ານ​ພະ­ຍາດ​ລະ­ບາດ​ຢ່າງ​ຮີບ​ດ່ວນ ແລະ ໜ່ວຍ​ກູ້​ໄພ​ເດີນ­ທາງ​ໄປ​ຊ່ວຍ­ເຫຼືອ​ຜູ້​ປະ­ສົບ​ໄພ​ໃນ​ເຂດ​ດັ່ງ­ກ່າວ​ແລ້ວ ພ້ອມ​ນັ້ນ ສະ­ຖານ­ທູດ​ຈີນ ​ປະ­ຈຳ​ລາວ ​ຍັງ​ໄດ້​ປຸກ­ລະ­ດົມ​ໃຫ້​ວິ​ສາ​ຫະ​ກິດ​ຈີນ ຄົນ​ຈີນ ແລະ ຈີນ​ຕ່າງ​ດ້າວ​ທີ່​ອາ­ໄສ​ຢູ່ ສປປ ລາວ ເຂົ້າ​ຮ່ວມ​ການ​ກູ້​ໄພ​ນ້ຳ​ຖ້ວມ​ຢ່າງ​ຕັ້ງ­ໜ້າ ຫຼາຍ​ບໍ­ລິ­ສັດ ແລະ ບຸກ­ຄົນ​ທັງ­ຫຼາຍ​ໄດ້​ບໍ­ລິ­ຈາກ​ເງິນ​ຢ່າງ​ຫ້າວ­ຫັນ ພ້ອມ​ນັ້ນ ລັດ­ຖະ­ບານ​ຈີນ​ຍັງ​ຈະ​ສືບ­ຕໍ່​ຊ່ວຍ­ເຫຼືອ​ຕາມ​ຄວາມ​ຮຽກ­ຮ້ອງ​ຕ້ອງ­ການ​ຂອງ​ລັດ­ຖະ­ບານ​ລາວ.

   ທ່ານ​ນາງ ໃບ​ຄຳ ຂັດ​ທິ​ຍະ ໄດ້​ກ່າວ​ສະ­ແດງ​ຄວາມ​ຂອບ­ໃຈ​ຕໍ່​ການ​ຊ່ວຍ­ເຫຼືອ​ຂອງ​ລັດ­ຖະ­ບານ ແລະ ປະ­ຊາ­ຊົນ​ຈີນ ທີ່​ໄດ້​ສົ່ງ​ຄວາມ​ຊ່ວຍ­ເຫຼືອ​ໃຫ້​ກັບ​ຜູ້​ປະ­ສົບ​ໄພ­ພິ­ບັດ ນັບ​ແຕ່​ມື້​ເກີດ​ເຫດ​ຈົນ​ເຖິງ​ປັດ­ຈຸ­ບັນ​ໃນ​ຄັ້ງ​ນີ້ ພ້ອມ​ຢືນ­ຢັນ​ຈະ​ນຳ​ເຄື່ອງ​ຊ່ວຍ­ເຫຼືອ​ລົງ​ໄປ​ສູ່​ຜູ້​ປະ­ສົບ​ໄພ​ຢ່າງ​ຮີບ​ດ່ວນ ແລະ ທັນ​ການ.

   ສະ­ເພາະ​ສູນ​ຮັບ​ບໍ­ລິ­ຈາກ​ຢູ່​ກະ­ຊວງ​ແຮງ​ງານ ແລະ ສະ­ຫວັດ­ດີ​ການ​ສັງ­ຄົມ ຍອດ​ຮັບ​ເງິນ ມາ​ຮອດ​ວັນ​ທີ 29 ກໍ­ລະ­ກົດ 2018 ໄດ້​ທັງ​ໝົດ​ເປັນ​ເງິນ​ກີບ 9.933.565.156 ກີບ ເງິນ​ບາດ 2.334.670 ບາດ ຫຼື ປະ­ມານ 602.344.860 ກີບ ເງິນ​ໂດ​ລາ 130.004 ໂດ​ລາ ຫຼື ປະ­ມານ 1.096.583.740 ກີບ ແລະ ເງິນ​ຢວນ 10.000 ຢວນ ຫຼື ປະ­ມານ 12.210.000 ກີບ ລວມ​ທັງ​ໝົດ 11.636.186.356 ກີບ.

ຂ່າວທີ່ກ່ຽວຂ້ອງ