ຂ່າວຫຼ້າສຸດ

300 ກວ່າບ້ານຂອງແຂວງຄຳມ່ວນ ໄດ້ຮັບຜົນກະທົບຈາກໄພນ້ຳຖ້ວມ

154 31 ກ.ກ. 2018 ຂ່າວໜ້າ​ໜຶ່ງ

   ລາຍ​ງານ​ຫຼ້າ​ສຸດ​ຈາກ​ຄະ­ນະ​ກຳ­ມະ­ການ​ຄວບ​ຄຸມ ແລະ ປ້ອງ​ກັນ​ໄພ­ພິ­ບັດ​ຂັ້ນ​ແຂວງ ໃນ​ວັນ​ທີ 30 ກໍ­ລະ­ກົດ 2018 ໃຫ້​ຮູ້​ວ່າ: ໃນ​ທົ່ວ​ແຂວງ​ຄຳ​ມ່ວນ ມີ​ບ້ານ​ປະ­ຊາ­ຊົນ​ທີ່​ໄດ້​ຮັບ​ຜົນ​ກະ­ທົບ​ຈາກ​ໄພ­ພິ­ບັດ​ນ້ຳ​ຖ້ວມ ທັງ​ໝົດ 309 ບ້ານ ຄອບ­ຄົວ​ທີ່​ໄດ້​ຮັບ​ຜົນ​ກະ­ທົບ 13.589 ຄອບ­ຄົວ ເນື້ອ­ທີ່​ນາ­ປີ 25.049 ເຮັກ­ຕາ ໃນ​ນັ້ນ ເສຍ​ຫາຍ​ແລ້ວ 2.044 ເຮັກ­ຕາ ນອກ​ນັ້ນ ຍັງ​ມີ​ໄຟ­ຟ້າ​ຢູ່​ບາງ​ເຂດ​ແມ່ນ​ເປ່​ເພ ເສັ້ນ­ທາງ​ຖືກ​ຕັດ­ຂາດ​ຫຼາຍ​ຈຸດ ແລະ ຍັງ​ມີ​ສັດ­ລ້ຽງ​ປະ­ເພດ​ງົວ ຄວາຍ ແບ້ ໝູ ແລະ ສັດ​ປີກ​ຕາຍ​ອີກ​ຈຳ­ນວນ​ໜຶ່ງ.

   ສຳ­ລັບ​ເມືອງ​ທີ່​ໄດ້​ຮັບ​ຜົນ​ກະ­ທົບ​ຫຼາຍ​ກວ່າ​ໝູ່​ຄື: ເມືອງ​ບົວ­ລະ­ພາ ມີ​ຈຳ­ນວນ​ບ້ານ​ຖືກ​ກະ­ທົບ 41 ບ້ານ ເນື້ອ­ທີ່​ນາ​ຖືກ​ຖ້ວມ 5.166 ເຮັກ­ຕາ ເມືອງ​ໜອງ​ບົກ 51 ບ້ານ ເນື້ອ­ທີ່​ນາ 4.208 ເຮັກ­ຕາ ເມືອງ​ຫີນ​ບູນ 36 ບ້ານ ເນື້ອ­ທີ່​ນາ 3.460 ເຮັກ­ຕາ ເມືອງ​ເຊ​ບັ້ງ­ໄຟ 35 ບ້ານ ເນື້ອ­ທີ່​ນາ 3.112 ເຮັກ­ຕາ ເມືອງ​ມະ­ຫາ​ໄຊ 40 ບ້ານ ເນື້ອ­ທີ່​ນາ 2.442 ເຮັກ­ຕາ ເມືອງ​ຍົມ​ມະ​ລາດ 22 ບ້ານ ເນື້ອ­ທີ່​ນາ 2.191 ເຮັກ­ຕາ ເມືອງ​ທ່າ​ແຂກ 38 ບ້ານ ເນື້ອ­ທີ່​ນາ 1.589 ເຮັກ­ຕາ ເມືອງ​ໄຊ​ບົວ­ທອງ 27 ບ້ານ ເນື້ອ­ທີ່​ນາ 1.570 ເຮັກ­ຕາ ເມືອງ​ຄູນ​ຄຳ 17 ບ້ານ ເນື້ອ­ທີ່​ນາ 1.293 ເຮັກ­ຕາ ແລະ ເມືອງ​ນາ​ກາຍ 2 ບ້ານ ເນື້ອ­ທີ່​ນາ 18 ເຮັກ­ຕາ.

   ຄະ­ນະ​ກຳ­ມະ­ການ​ປ້ອງ​ກັນ ແລະ ຄວບ​ຄຸມ​ໄພ­ພິ­ບັດ​ຂັ້ນ​ແຂວງ ຍັງ​ໃຫ້​ຮູ້​ຕື່ມ​ວ່າ: ເຊິ່ງ​ຄວາມ​ຕ້ອງ­ການ​ໃນ​ການ​ຊ່ວຍ­ເຫຼືອ​ປັດ­ຈຸ­ບັນ ​ສ່ວນ​ໃຫຍ່​ແມ່ນ​ປະ­ເພດ​ເຄື່ອງ​ອຸ­ປະ­ໂພກ-ບໍ­ລິ­ໂພກ ເຮືອ­ຈັກ ແລະ ນ້ຳ​ດື່ມ ສ່ວນ​ລະ­ດັບ​ນ້ຳ­ຂອງ​ຢູ່​ເມືອງ​ທ່າ​ແຂກ​ໃນ​ວັນ​ທີ 30 ກໍ­ລະ­ກົດ 2018 ວັດ­ແທກ​ໄດ້ 12,60 ແມັດ ເຂດ​ອັນ­ຕະ­ລາຍ​ແມ່ນ 14 ແມັດ ລະ­ດັບ​ນ້ຳ​ເຊ​ບັ້ງ­ໄຟ​ບ້ານ​ໂພ​ວາ ເມືອງ​ມະ­ຫາ​ໄຊ ວັດ­ແທກ​ໄດ້ 16,78 ແມັດ ເຂດ​ອັນ­ຕະ­ລາຍ​ແມ່ນ 15 ແມັດ ນ້ຳ​ເຊ​ບັ້ງ­ໄຟ ຈຸດ​ບ້ານ​ຂົວ​ເຊ ເມືອງ​ເຊ​ບັ້ງ­ໄຟ ວັດ­ແທກ​ໄດ້ 21,60 ແມັດ ເຂດ​ອັນ­ຕະ­ລາຍ​ແມ່ນ 18,50 ແມັດ ລະ­ດັບ​ນ້ຳ​ເຊ​ບັ້ງ­ໄຟ ບ້ານ​ໄຮ່​ຜາ​ວຽງ ເມືອງ​ຍົມ​ມະ​ລາດ ວັດ­ແທກ​ໄດ້ 14,52 ແມັດ ເຂດ​ອັນ­ຕະ­ລາຍ​ແມ່ນ 13 ແມັດ ແລະ ລະ­ດັບ​ນ້ຳ​ເຊ​ບັ້ງ­ໄຟ​ຢູ່​ບ້ານ​ຊອກ​ເບາະ ເມືອງ​ໜອງ​ບົກ ວັດ­ແທກ​ໄດ້ 15,35 ແມັດ ເຂດ​ອັນ­ຕະ­ລາຍ​ແມ່ນ 14 ແມັດ.

ຂ່າວທີ່ກ່ຽວຂ້ອງ