ຂ່າວຫຼ້າສຸດ

ປີ 2019 ທົ່ວປະເທດຈະມີສູນໄອຊີທີ ທຸກແຂວງ

197 31 ກ.ກ. 2018 ຂ່າວໜ້າ​ໜຶ່ງ

   ສູນ​ເຕັກ​ໂນ​ໂລ​ຊີ​ຂ່າວ­ສານ ແລະ ການ​ສື່­ສານ​ການ​ສຶກ​ສາ ແລະ ກີ­ລາ ກະ­ຊວງ​ສຶກ​ສາ​ທິ​ການ ແລະ ກີ­ລາ ຈັດ​ກອງ​ປະ­ຊຸມ​ສະ­ຫຼຸບ​ເຄິ່ງ​ໄລ­ຍະ​ຂອງ​ການ­ຈັດ­ຕັ້ງ​ປະ­ຕິ­ບັດ​ໂຄງ­ການ​ປັບ­ປຸງ​ລະ­ບົບ​ການ​ຮຽນ-ການ​ສອນ​ແບບ​ເອ​ເລັກ​ໂຕຣ​ນິກ ຂຶ້ນ​ວັນ​ທີ 30 ກໍ­ລະ­ກົດ 2018 ທີ່ ນະ­ຄອນ­ຫຼວງ​ວຽງ​ຈັນ ເປັນ​ປະ­ທານ​ຂອງ​ທ່ານ ກອງ​ສີ ແສງ​ມະ­ນີ ຮອງ​ລັດ­ຖະ­ມົນ­ຕີ​ກະ­ຊວງ​ສຶກ​ສາ​ທິ​ການ ແລະ ກີ­ລາ ມີ​ທ່ານ​ນາງ ອີ​ວາ ຮາ​ເກີ ທູດ​ໂອ​ຕິດ ປະ­ຈຳ​ລາວ ບັນ­ດາ​ຜູ້​ບໍ­ລິ­ຫານ​ການ​ສຶກ​ສາ​ຈາກ​ແຂວງ ແລະ ພາກ­ສ່ວນ​ກ່ຽວ­ຂ້ອງ​ເຂົ້າ​ຮ່ວມ.

   ທ່ານ ພູ­ເຂົາ​ກ້າ ສັກ​ລໍ​ຄຳ ຮັກ­ສາ​ການ​ຫົວ­ໜ້າ​ສູນ​ໄອ​ຊີ​ທີ ກ່າວ​ວ່າ: ໂຄງ­ການ​ປັບ­ປຸງ​ພື້ນ­ຖານ​ໂຄງ​ລ່າງ​ກ່ຽວ​ກັບ​ວຽກ​ງານ​ຂອງ​ສູນ​ໄອ​ຊີ​ທີ ໄດ້​ດຳ­ເນີນ​ມາ​ແຕ່​ປີ 2013 ໂດຍ​ໄດ້​ຮັບ​ການ​ສະ­ໜັບ­ສະ­ໜູນ​ທຶນ​ກູ້​ຢືມ​ແບບ​ບໍ່​ມີ​ດອກ​ເບ້ຍ​ຈາກ​ລັດ­ຖະ­ບານ​ຈີນ ເປັນ​ການ​ດຳ­ເນີນ​ໂຄງ­ການ​ໄລ­ຍະ​ໜຶ່ງ ສ່ວນ​ໂຄງ­ການ​ປັບ­ປຸງ​ລະ­ບົບ​ການ​ຮຽນ-ການ​ສອນ ແບບ​ເອ​ເລັກ​ໂຕຣ​ນິກ ໄດ້​ດຳ­ເນີນ​ການ­ຈັດ­ຕັ້ງ​ປະ­ຕິ­ບັດ​ມາ​ແຕ່​ປີ 2016 ແລະ ຈະ​ສຳ­ເລັດ​ໂຄງ­ການ​ໃນ​ທ້າຍ​ປີ 2018 ເຊິ່ງ​ໄດ້​ຮັບ​ທຶນ​ກູ້​ຢືມ​ຈາກ​ປະ­ເທດ​ໂອ​ຕິດ ຈຸດ­ປະ­ສົງ​ໂຄງ­ການ ແມ່ນ​ພັດ­ທະ­ນາ​ລະ­ບົບ​ຈັດ­ການ​ການ​ຮຽນ-ການ​ສອນ ແລະ ພັດ­ທະ­ນາ​ການ​ຄຸ້ມ​ຄອງ​ໂຮງ­ຮຽນ​ແບບ​ເອ​ເລັກ​ໂຕຣ​ນິກ ປັບ­ປຸງ​ລະ­ບົບ​ເຄືອ​ຄ່າຍ ແລະ ຖານ​ຂໍ້​ມູນ ສະ­ໜອງ​ອຸ­ປະ­ກອນ​ທີ່​ຈຳ­ເປັນ ພ້ອມ​ສ້າງ​ຂີດ​ຄວາມ​ສາ­ມາດ​ທາງ​ດ້ານ​ການ​ນຳ​ໃຊ້​ໄອ​ຊີ​ທີ.

   ປັັດ​ຈຸ​ບັນ​ສາ­ມາດ​ສ້າງ​ສູນ​ໄດ້​ທັງ​ໜົດ 18 ແຂວງ ແລະ ໂຮງ­ຮຽນ​ເຂົ້າ​ຮ່ວມ​ໂຄງ­ການ​ທັງ​ໝົດ 26 ແຫ່ງ ໃນ​ນັ້ນ ນະ­ຄອນ­ຫຼວງ​ວຽງ​ຈັນ ມີ 3 ໂຮງ­ຮຽນ​ຄື: ໂຮງ­ຮຽນ ມສ ຈັນ​ສະ­ຫວ່າງ ມສ ໜອງ​ບອນ ແລະ ມສ ພັນ​ໝັ້ນ ສ່ວນ​ແຂວງ​ໄຊ​ສົມ­ບູນ ກຳ­ລັງ​ກະ­ກຽມ​ສ້າງ­ຕັ້ງ ແລະ ຄາດ​ວ່າ​ຈະ​ສຳ­ເລັດ​ສາ­ມາດ​ເປີດ​ສູນ​ປີ 2019 ພ້ອມ​ດຽວ​ກັນ​ນີ້​ກອງ​ປະ­ຊຸມ​ຍັງ​ໄດ້​ມອບ​ໃບ­ຢັ້ງ­ຢືນ​ໃຫ້​ຜູ້​ສຳ­ເລັດ​ການ​ເຝິກ­ອົບ­ຮົມ​ວຽກ​ງານ​ໄອ​ຊີ​ທີ 15 ຄົນ​ຕື່ມ​ອີກ.

ຂ່າວທີ່ກ່ຽວຂ້ອງ