ຂ່າວຫຼ້າສຸດ

ເບິ່ງບ້ານເຂົາເອົາບົດຮຽນ 31/07/2018

112 31 ກ.ກ. 2018 ຫົວຂໍ້ຂ່າວອື່ນໆ

ໃນ​ຄໍ​ລຳ​ນີ້​ມີ​ສອງ​ເລື່ອງ​ທີ່​ຄວນ​ເບິ່ງ​ໄວ້​ເປັນບົດ­ຮຽນ ຄື: ເລື່ອງ​ການ​ປະ​ກວດ​ເດັກ​ຍິງ​ງາມ ມາດ​ຕະ­ການ​ແກ້​ໄຂ​ຜູ້​ລະ­ເມີດ​ກົດ­ໝາຍ​ຄຸ້ມ​ຄອງ​ແຫຼ່ງ​ນ້ຳ ແລະ ເລື່ອງ​ບັນ­ຫາ​ຢາ​ຂ້າ​ສັດ­ຕູ​ພືດ ທັງ​ໝົດ​ເກີດ​ຢູ່​ໃນ ໂບ​ລີ​ວີ ຫວຽດ­ນາມ ແລະ ສະ­ຫະພາບ​ເອີ​ຣົບ​ຕາມ​ລຳ­ດັບ.

ທີ່ ໂບ​ລີ​ວີ (ພາກ​ພື້ນ​ອາ​ເມ​ຣິ​ກາ​ໃຕ້): ມີ​ຂ່າວ​ອອກ​ມາ​ໃນ​ທ້າຍ​ເດືອນ​ເມ­ສາ​ປີ​ນີ້​ວ່າ: ທາງ​ການ​ປະ­ເທດ​ໂບ​ລີ​ວີ ໄດ້​ສັ່ງ​ຫ້າມ​ການ​ຈັດ​ປະ​ກວດ​ຄວາມ​ງາມ​ສຳ­ລັບ​ເດັກ​ຍິງ​ຢ່າງ​ເດັດ­ຂາດ ໂດຍ​ອ້າງ​ເຫດ­ຜົນ​ວ່າ ເພື່ອ​ຮັບ­ປະ­ກັນ​ໃຫ້​ເດັກ­ນ້ອຍ ແລະ ຊາວ​ໜຸ່ມ-ເຍົາ­ວະ​ຊົນ​ມີ​ຊີ­ວິດ​ທີ່​ສົດ­ໃສ​ໃນໄວ​ເດັກ ເພື່ອ​ຫຼີກ­ເວັ້ນ​ຄວາມ​ສ່ຽງ​ທີ່​ພວກ​ເດັກນ້ອຍ ໂດຍ​ສະ­ເພາະແມ່ນ​ເດັກ​ຍິງ​ຈະ​ຖືກ​ລວນລາມ​ທາງ​ເພດ.

ສ່ວນ​ເຫດ­ຜົນ​ອື່ນໆ​ນັ້ນ​ບອກ​ວ່າ: ບໍ່​ຕ້ອງ­ການ​ໃຫ້​ເດັກ​ຍິງ​ຖືກ​ກຳ­ນົດ​ຕົວ​ຕົນ​ທາງ​ເພດ​ໄວ​ເກີນ​ໄປ (ໝາຍ​ຄວາມ​ວ່າ​ບໍ່​ຢາກ​ໃຫ້​ເດັກ​ຍິງ “ສຸກ​ກ່ອນ​ເຫີ່ມ”) ບໍ່​ຕ້ອງ­ການ​ໃຫ້​ພວກ​ເຂົາ​ຕົກ​ເປັນ​ເຫຍື່ອ​ການ​ລອກ​ແບບ​ຂອງ​ຜູ້​ໃຫຍ່ ແລະ ເປັນ​ເຄື່ອງ­ມື​ໂຄ­ສະ­ນາ​ຜະ­ລິດ​ຕະ​ພັນ​ອາ­ພອນ​ເພດ​ຂອງ​ຫ້າງ​ຮ້ານ ແລະ ບໍ­ລິ­ສັດ​ຕ່າງໆ.

ໃນ​ປັດ­ຈຸ­ບັນ ເລື່ອງ​ການ​ປະ​ກວດ​ນາງ​ງາມ​ເດັກ​ຍິງ​ນັ້ນ​ ພວມ​ກາຍ­ເປັນ​ຫົວ­ຂໍ້​ຖົກ​ຖຽງ​ກັນ​ໃນ​ຫຼາຍໆ​ປະ­ເທດ ເພາະ​ຊ່ຽວ­ຊານ​ຫຼາຍໆ​ຄົນ​ໄດ້​ສະ­ແດງ​ທັດ­ສະ­ນະ​ອອກ​ມາ​ວ່າ: ການ​ໃສ່​ເກີບ​ສົ້ນ​ສູງ ການ​ແຕ່ງ​ໃບ​ໜ້າ-ຮ່າງ­ກາຍ​ແບບ​ເຂັ້ມ​ຂຸ້ນ ແລະ ການ​ອອກ​ປາ­ກົດ​ໂຕ​ເທິງ​ເວ­ທີ​ຕໍ່­ໜ້າ​ສາຍຕາ​ກຳ­ມະ­ການ ແລະ ຜູ້​ຊົມ​ນັ້ນ​ ຈະ​ສົ່ງ​ຜົນ​ກະ­ທົບ​ທາງ​ລົບ​ຕໍ່​ຈິດ­ຕະ­ສາດ​ຂອງ​ພວກ​ເດັກ​ທີ່​ຍັງ​ອ່ອນ​ນ້ອຍ ເຊິ່ງ​ອາດ​ນຳ­ໄປ​ສູ່​ອາ­ການ​ຊຶມ​ເສົ້າ ແລະ ອາດ​ກາຍ­ເປັນ​ເປົ້າ​ໝາຍ​ຖືກ​ລວນ​ລາມ​ທາງ​ເພດ ຢູ່​ປະ­ເທດໂບ​ລີ​ວີ ມີ​ເດັກ​ຍິງ​ໂດຍ​ສະ­ເລ່ຍ 16 ຄົນ ຕົກ​ເປັນ​ເຫຍື່ອ​ຄວາມ​ຮຸນ​ແຮງ​ທາງ​ເພດ​ໃນ​ແຕ່​ລະ​ວັນ ແລະ ໃນ​ປີ 2017 ເດັກ­ນ້ອຍ ໂບ​ລີ​ວີ ຖືກ​ຂ້າ​ຕາຍ​ຢ່າງ​ປ່າ​ເຖື່ອນ ທັງ​ໝົດ 87 ຄົນ.

ທີ່​ ຫວຽດ­ນາມ: ໃນ​ຕົ້ນ​ໄຕ​ມາດ​ທີ​ສອງ ປີ 2017 ລັດ­ຖະ­ບານ​ຫວຽດ­ນາມ ​ໄດ້​ອອກ­ດຳ­ລັດ​ກຳ­ນົດ​ໂທດ​ຕໍ່​ຜູ້​ລະ­ເມີດ​ກົດ­ໝາຍ​ວ່າ​ດ້ວຍ​ຊັບພະ­ຍາ­ກອນ​ທຳ​ມະ​ຊາດ ແລະ ແຫຼ່ງ​ນ້ຳ ສຳ­ລັບ​ຜູ້​ລະ­ເມີດ​ລະ­ບຽບ​ກົດ­ໝາຍ​ກ່ຽວ​ກັບ​ຊັບ​ພະ­ຍາກອນ​ແຫຼ່ງ​ນ້ຳ​ນັ້ນ ​ຈະ​ໄດ້​ຮັບ​ໂທດ​ປັບ​ໃໝ​ເປັນ​ເງິນ​ແຕ່ 250 ລ້ານ​ດົງ (11.125 ໂດ​ລາ​ສະ­ຫະ­ລັດ) ເຖິງ 2 ຕື້​ດົງ (89.000 ໂດ​ລາ​ສະ­ຫະ­ລັດ).

ການ​ກະ­ທຳ​ທີ່​ຖື​ວ່າ​ເປັນ​ການ​ລະ­ເມີດ​ທາງ​ບໍ­ລິ­ຫານ​ ກ່ຽວ​ກັບ​ຊັບ­ພະ­ຍາ­ກອນ​ແຫຼ່ງ​ນ້ຳ​ນັ້ນ ລວມ​ມີ​ການ​ລະ­ເມີດ​ດ້ານ​ການ​ກວດ­ກາ ການວາງ​ແຜນ ການ​ສຳ​ຫຼວດ ການ​ຂຸດ​ຄົ້ນ ແລະ ນຳ​ໃຊ້​ແຫຼ່ງ​ນ້ຳ ການ​ລະ­ເມີດ​ລະ­ບົບ​ອ່າງ­ເກັບ­ນ້ຳ ການ​ລະ­ເມີດ​ມາດ​ຕະ­ການ​ປ້ອງ​ກັນ​ຊັບ​ພະ­ຍາກອນ​ແຫຼ່ງ​ນ້ຳ ແລະ ອື່ນໆ.

ທີ່ ສະ­ຫະ­ພາບ​ເອີ​ຣົບ (ອີ​ຢູ-EU): ໃນ​ວັນ​ທີ 27 ເດືອນ​ເມ­ສາ​ປີ​ນີ້ ສະ­ຫະ­ພາບ​ເອີ​ຣົບ ຫຼື ອີ​ຢູ ໄດ້​ຮັບ­ຮອງ​ເອົາ​ຄຳ​ສັ່ງ​ຫ້າມ​ໃຊ້​ຢາ​ປາບ​ສັດ­ຕູ​ພືດ ເຊິ່ງ​ຈະ​ສົ່ງ​ຜົນ​ຮ້າຍ​ຕໍ່​ຝູງ​ເຜິ້ງ ໂດຍ​ສະ­ເພາະແມ່ນ​ ຢາ​ປາບ​ສັດ­ຕູ​ພືດ​ທີ່​ເຈືອ​ປົນ​ທາດ ນີ​ໂອ​ນີ​ໂກ​ຕີນອຍ (Neonicotinoid) ຢາ​ປາບ​ສັດ­ຕູ​ພືດ​ຊະ­ນິດ​ນີ້​ ຫ້າມ​ໃຊ້​ໃນ​ສະ­ຖານ­ທີ່​ກາງ­ແຈ້ງ​ເດັດ­ຂາດ ແຕ່​ສາ­ມາດ​ໃຊ້​ໃນ​ສວນ​ເຮືອນ​ແກ້ວ​ເທົ່າ​ນັ້ນ.

ຂ່າວ​ບອກ​ວ່າ: ໃນ​ຊຸມ​ປີ​ຫຼັງໆ​ມາ​ນີ້ ຈຳ­ນວນ​ປະ­ຊາ­ກອນ​ເຜິ້ງ​ໄດ້​ຫຼຸດ​ລົງ​ຢ່າງ​ໄວ­ວາ ຍ້ອນ​ໄດ້​ຮັບ​ຜົນ​ກະ­ທົບ​ຈາກ​ຢາ​ປາບ​ສັດ­ຕູ​ພືດ​ທີ່​ກ່າວ​ມາ​ນັ້ນ ​ທີ່​ທຳ­ລາຍ​ລະ­ບົບ​ປະ­ສາດ​ຂອງ​ຝູງ​ເຜິ້ງ ເຮັດ​ໃຫ້​ພວກ​ມັນ​ຫຼຸດ​ຄວາມ​ສາ­ມາດ​ໃນ​ການ​ຕ້ານ­ທານ​ກັບ​ພະ­ຍາດ ແລະ ບໍ່​ສາ­ມາດ​ກຳ­ນົດ​ທິດ​ບິນ​ໄດ້​ຢ່າງ​ຖືກ­ຕ້ອງ.

ຂ່າວທີ່ກ່ຽວຂ້ອງ