ສະໜາມເປີດ-ປິດ ຊຽງຂວາງ ເກມ ສຳເລັດ 86%

179 31 ກ.ກ. 2018 ວົງຈອນກີລາ
ສະໜາມເປີດ-ປິດ ຊຽງຂວາງ ເກມ ສຳເລັດ 86%

   ທ່ານ ບົວ​ລີ ພັນ​ນາ​ວົງ ຫົວ­ໜ້າ​ພະ​ແນກ​ສຶກ​ສາ​ທິ​ການ ແລະ ກີ­ລາ​ແຂວງ​ຊຽງ​ຂວາງ ລາຍ​ງານ​ຕໍ່​ກອງ​ປະ­ຊຸມ​ຜູ້​ບໍ­ລິ­ຫານ​ການ​ສຶກ​ສາ ແລະ ກີ­ລາ ທົ່ວ​ປະ­ເທດ ປະ­ຈຳ​ປີ 2018 ເມື່ອ​ວັນ​ທີ 25 ກໍ​ລະກົດ ຜ່ານ​ມາ ທີ່​ຫ້ອງ​ປະ­ຊຸມຫ້ອງ​ວ່າ­ການ​ປົກ­ຄອງ​ແຂວງ​ບໍ​ລິ​ຄຳ​ໄຊ ວ່າ: ສຳ­ລັບ​ຄວາມ​ຄືບ​ໜ້າ​ໃນ​ການ​ກະ­ກຽມ​ຄວາມ​ພ້ອມ​ຂອງ​ແຂວງ​ຊຽງ​ຂວາງ ທີ່​ຈະ​ເປັນ​ເຈົ້າ­ພາບ​ງານ​ມະ­ຫາ​ກຳ​ກີ­ລາ​ແຫ່ງ​ຊາດ ຄັ້ງ​ທີ 11 ນັ້ນ ໃນ​ດ້ານ​ພື້ນ­ຖານ​ໂຄງ​ລ່າງ ແມ່ນ​ໄດ້​ດຳ­ເນີນ​ການ​ກໍ່­ສ້າງ​ມາ​ຕັ້ງ­ແຕ່​ປີ 2012  ຜ່ານ​ການ­ເຄື່ອນ­ໄຫວ​ມາ​ເຖິງ​ປັດ­ຈຸ­ບັນ ແມ່ນ​ໄດ້​ລາຍ​ງານ​ໃນ​ກອງ​ປະ­ຊຸມ​ລະ­ດັບ​ຊາດ​ແລ້ວ 3 ຄັ້ງ ແລະ ກອງ​ປະ­ຊຸມ​ວິ­ສາ­ມັນ 2 ຄັ້ງ ໂດຍ​ສະ­ເພາະ​ແມ່ນ​ດ້ານ​ແຜນ​ງົບ­ປະ­ມານ​ຂອງ​ບັນ­ດາ​ກຳ­ມະ­ການ ມາ​ເຖິງ​ປັດ­ຈຸ­ບັນ​ແມ່ນ​ເຊັນ​ຮັບ­ຮອງ ແລະ ສາ­ມາດ​ນຳ​ໃຊ້​ງົບ­ປະ­ມານ​ເຂົ້າ​ສູ່​ການ​ປະ­ຕິ­ບັດ​ກິດ­ຈະ­ກຳ​ໄດ້.

   ດ້ານ​ກຳ­ມະ­ການ ປກຊ-ປກສ ແມ່ນ​ກຳ­ນົດ​ຈຸດ​ປ້ອງ​ກັນ​ທີ່​ຫຼໍ່​ແຫຼມ 97 ຈຸດ​ທົ່ວ​ແຂວງ ກຳ­ລັງ​ພົນ 1.300 ຄົນ ສ່ວນ​ວຽກ​ກຳ­ມະ­ການ​ເສດ­ຖະ­ກິດ-ລະ­ດົມ​ທຶນ ປະ­ກອບ​ມີ ການ​ລະ­ດົມ​ທຶນ 2 ຄັ້ງ ມີຄັ້ງ​ທີ 1 ແມ່ນ​ໄດ້​ເງິນ ຈຳ­ນວນ 1.3 ຕື້​ກີບ ແລະ ຄັ້ງ​ທີ 2 ແມ່ນ​ໄດ້​ເງິນ 907.355 ລ້ານ​ກີບ ດ້ານ​ວຽກ​ງານ​ສະ­ຖານ­ທີ່​ພັກ ຄະ­ນະ​ນຳ​ຂັ້ນ​ສູນ​ກາງ ກະ­ຊວງແຂວງ ມີ​ໂຮງ­ແຮມ 19 ແຫ່ງ 726 ຫ້ອງ ເຮືອນ​ພັກ 106 ແຫ່ງ ຣີ​ສອດ 3 ແຫ່ງ ດ້ານ​ຄວາມ​ສາ­ມາດ​ຮອງ​ຮັບ­ແຂກ 3.225 ຄົນ​ຕໍ່​ຄືນ ທີ່​ພັກ​ໃກ້​ຄຽງ ປະ­ກອບ​ມີ ເມືອງ​ຄຳ ໄລ­ຍະ​ທາງ 51 ກິ­ໂລ­ແມັດ ເມືອງ​ຄູນ ໄລ­ຍະ​ທາງ 32 ກິ­ໂລ­ແມັດ ເມືອງ​ພູ​ກູດ ໄລ­ຍະ​ທາງ 28 ກິ­ໂລ­ແມັດ ແລະ ເມືອງ​ຜາ​ໄຊ ໄລ­ຍະ​ທາງ 25 ກິ­ໂລ­ແມັດ ແລະ ຮ້ານ​ອາ­ຫານ 99 ແຫ່ງ ຮ້ານ​ກິນ​ດື່ມ ມີ 179 ແຫ່ງ ຄວາມ​ສາ­ມາດ​ບັນ­ຈຸ 9.377 ຄົນ ແລະ ດ້ານ​ທີ່​ພັກ​ຄູ​ເຝິກ ແລະ ນັກ­ກີ­ລາ ປະ­ກອບ​ມີ ໂຮງ­ຮຽນ 32 ແຫ່ງ ສາ­ມາດ​ຮອງ​ຮັບ​ໄດ້ 8.580 ຄົນ.

   ສ່ວນ​ຄວາມ​ຄືບ​ໜ້າ​ກ່ຽວ​ກັບ​ສະ­ໜາມ​ຕ່າງໆ ທີ່​ໃກ້​ຈະ​ສຳ­ເລັດ​ສົມ­ບູນ​ເກືອບ 100% ປະ­ກອບ​ມີ: ສະ­ໜາມ​ເປີດ-ປິດ ສຳ­ເລັດ​ໄປ​ແລ້ວ 86% ສະ­ໜາມ​ແຂ່ງ­ຂັນ​ຢູ່​ບັນ­ດາ​ພະ­ແນກ­ການ​ຕ່າງໆ ລວມ​ທັງ​ໝົດ 11 ແຫ່ງ ສະ­ໜາມ​ສ້າງ​ໃໝ່ ໄດ້­ແກ່: ສະ­ໜາມ​ບານ­ບ້ວງ ເທັນ​ນິ​ສ ກຳ­ລັງ​ກໍ່­ສ້າງ​ສະ­ໜາມ​ເອກະ​ຊົນ​ລົງ­ທຶນ ຄື​ສະ­ໜາມ​ບານ­ສົ່ງ ສະ­ໜາມ​ເປ​ຕັງ ສະ­ໜາມ​ໂບ​ບິ້ງ ສະ​ໜາມ​ກ໊ອຟ ສະ­ໜາມ​ຍິງ​ປືນ ສະ­ໜາມ​ສະ­ນຸກ​ເກີ ແລະ ສະ­ໜາມ​ມວຍ​ລາຍ​ລາວ.

ຂ່າວທີ່ກ່ຽວຂ້ອງ