ໄພພິບັດ ຕ້ອງລະວັງໄວ້

539 30 ກ.ກ. 2018 ນານາສາລະ

    ໃນ​ທະ­ວີບ​ເອ​ເຊຍ ເວ­ລາ​ນີ້​ຍ່າງ​ເຂົ້າ​ລະ­ດູ­ຝົນ​ຢ່າງ​ເຕັມ​ຂັ້ນ ແລະ ເຈົ້າ​ລະ­ດູ​ກໍ່​ເຮັດ​ໜ້າ­ທີ່​ຢ່າງ​ພິ­ຖີ​ພິ​ຖັນ​ດີ​ບໍ່​ນ້ອຍ ​ຄື​ຕົກ​ກະ​ໜ່ຳ​ ໃນ​ບາງ​ບ່ອນ​ຈົນ​ມືນ​ຫູ​ມືນ​ຕາ​ບໍ່​ໄດ້ ແລະ ຈົນ​ບໍ່​ໄດ້​ຍິນ​ວ່າ​ມີ​ບ່ອນ​ໃດ​ແດ່​ເກີດ​ມີ​ການ​ແຫ້ງ­ແລ້ງ​ແກ່­ຍາວ ກົງ­ກັນ­ຂ້າມ​ກັບ​ມີ​ແຕ່​ຂ່າວ​ຝົນ​ກັບ​ຝົນ ໂດຍ​ສະ­ເພາະ ພາ­ຍຸ​ຝົນ­ຕົກ​ລິນ​ແກ່­ຍາວ ຂ່າວ​ນ້ຳ​ຖ້ວມ​ຢູ່​ອິນ​ເດຍ ນ້ຳ​ຖ້ວມ​ດິນ​ເຈື່ອນ​ຢູ່ ສປ ຈີນ ນ້ຳ​ຖ້ວມ​ຢູ່​ພາກ​ກາງ ສສ ຫວຽດ­ນາມ ຢູ່​ດອນ​ໃຫຍ່ “ກິວ​ຊິວ” ປະ­ເທດ​ຍີ່­ປຸ່ນ ເຮັດ​ໃຫ້​ເຮືອນ​ຊານ ຖະ­ໜົນ​ຫົນ­ທາງ​ເພ­ພັງ​ຢ່າງ​ມະ­ຫາ­ສານ ສິ່ງ​ທີ່​ໜ້າ​ເຫັນ­ໃຈ​ຄື​ ພາ­ຍຸ​ນີ້​ໄດ້​ເຮັດ​ໃຫ້​ມີ​ຜູ້​ຄົນ​ເສຍ​ຊີ­ວິດ​ຫຼາຍ​ກວ່າ 200 ຄົນ ແລະ ອື່ນໆ.

    ເມື່ອ​ໄດ້​ຍິນ​ຂ່າວ​ຕໍ່​ເນື່ອງ​ອອກ​ມາ​ແນວ​ນີ້ ກໍ່​ອົດ​ທີ່​ຈະ​ເວົ້າ​ບໍ່​ໄດ້ ເພາະ​ບ້ານ​ເຮົາ​ກໍ່​ຢູ່​ໃນ​ຍ່ານ​ເຂດ​ໄພ­ພິ­ບັດ​ຈາກ​ພາ­ຍຸ​ຝົນ​ເຊັ່ນ​ກັນ ແລະ ກໍ່​ເຄີຍ​ມີ​ມາ​ແລ້ວ​ຫຼາຍ​ບ່ອນ ເມື່ອ​ສອງ​ສາມ​ປີ­ຜ່ານ­ມາ​ ກໍ່​ແມ່ນ​ຢູ່​ເຂດ​ເມືອງ​ນ່ານ ແຂວງ​ຫຼວງ​ພະ​ບາງ ອີກ​ປະ­ການ​ໜຶ່ງ​ແມ່ນ​ຍ້ອນ​ສຸ­ຂະ­ພາບ​ຂອງ​ປ່າ­ໄມ້​ໃນ​ເຂດ​ໂນນ​ສູງ ບ້ານ​ເຮົາ​ມັນ​ຂ້ອນ​ຂ້າງ​ບອບ​ບາງ ຍ້ອນ​ມີ​ການ​ຕັດ​ໄມ້​ໃຫຍ່ ທຳ­ລາຍ​ປ່າ ຖາງ​ປ່າ­ໄມ້​ໃຊ້​ໃນ​ການ​ປູກ​ໄມ້​ອຸດ­ສາ­ຫະ­ກຳ​ຂຶ້ນ​ໃໝ່ ເປັນ­ຕົ້ນ: ປູກ​ຢາງ­ພາ­ລາ ປູກ​ໄມ້​ເກດ­ສະ­ໜາ ປູກ​ຕົ້ນ​ວິກ ໄມ້​ສັກ​ທອງ ກະ­ຖິນ​ນະ​ລົງ ກະ­ຖິນ​ເທ­ພາ ອື່ນໆ ເຮັດ​ໃຫ້​ຄວາມ​ແຂງ­ແຮງ​ຂອງ​ປ່າ­ໄມ້​ໃຫຍ່​ຫຼຸດ​ໜ້ອຍ​ຖອຍ​ລົງ ເມື່ອ​ຝົນ­ຕົກ​ລິນ​ຫຼາຍ​ວັນ ຫຼື ພາ­ຍຸ​ຝົນ​ມາ​ກໍ່​ບໍ່​ສາ­ມາດ​ເກັບ​ກັກ​ນ້ຳ ຫຼື ອູ້ມ​ນ້ຳ​ສູ່​ໃຕ້​ດິນ​ໄດ້ ເມື່ອ​ນ້ຳ​ປ່າ​ໄຫຼ­ຊຸ​ມາ​ຫຼາຍ ບໍ​ລິ​ມາດ​ປ່າ­ໄມ້​ທີ່​ຈະ​ຕ້ານ­ທານ​ກະ­ແສ­ນ້ຳ​ກໍ່​ອ່ອນ­ແອ ຈຶ່ງ​ເປັນ​ເຫດ​ໃຫ້​ມີ​ການ​ໄຫຼ­ຊຸ​ທະ­ລຸ ດິນ​ເຈື່ອນ ຖະ­ໜົນ​ຫົນ­ທາງ ບ້ານ​ເຮືອນ​ເພ­ພັງ​ໄຫຼ​ໄປ​ຕາມ​ກະ­ແສ­ນ້ຳ ເຮັດ​ໃຫ້​ຊີ­ວິດຊັບ​ສິນ​ຂອງ​ປະ­ຊາ­ຊົນ​ໄດ້​ຮັບ​ການ​ເສຍ​ຫາຍ.

    ເພື່ອ​ເປັນ​ການ​ປ້ອງ​ກັນ​ຕໍ່​ໄພ­ພິ­ບັດ​ດັ່ງ­ກ່າວ (ເສຍ​ໜ້ອຍ​ດີ​ກວ່າ​ເສຍ​ຫຼາຍ) ທາງ​ດ້ານ​ພື້ນ­ຖານ​ທາງ​ການ​ແມ່ນ​ການ​ແຈ້ງ​ເຕືອນ​ທາງ​ການ ດ້ານ​ພະ­ຍາ­ກອນ​ອາ­ກາດ ສັນ­ຍານ​ຕ່າງໆ​ທາງ​ທຳ​ມະ​ຊາດ ​ທີ່​ແຈ້ງ​ເຕືອນ​ບອກ​ໃຫ້​ຮູ້​ວ່າ​ພາ­ຍຸ​ຈະ​ເຂົ້າ ຊຶ່ງ​ຊາວ​ໄຮ່­ນາ​ພື້ນ­ຖານ​ເອງ ​ກໍ່​ພໍ​ຮູ້​ດີ​ຈຳ­ນວນ​ບໍ່​ໜ້ອຍ​ ຍ້ອນ​ມີ​ປະ­ສົບ​ການ​ໃນ​ລະ­ຫວ່າງ​ເດືອນ​ໃດ​ຫາ​ເດືອນ​ໃດ​ມັກ​ມີ​ພາ­ຍຸ ສິ່ງ​ໃດ​ທີ່​ຈະ​ເສຍ​ຫາຍ ແລະ ພໍ​ຍົກ­ຍ້າຍ​ໃຫ້​ຫວິດ​ເວັ້ນ​ຈາກ​ການ​ສູນ​ເສຍ ຜູ້​ຄົນ​ທີ່­ຢູ່​ໃນ​ພື້ນ​ທີ່​ສ່ຽງ​ກໍ່​ຕ້ອງ​ເຮັດ ເຊັ່ນ​ດຽວ​ກັບ​ການ​ເດີນ­ທາງ​ລົດ ໂດຍ​ສະ­ເພາະ ໃນ​ເຂດ​ພູ​ສູງ ກໍ່​ຕ້ອງ​ສຶກ​ສາ​ຫາ​ຂໍ້​ມູນ​ທາງ​ພະ­ຍາ­ກອນ​ອາ­ກາດ​ໃຫ້​ດີ​ເຊັ່ນ​ກັນ ມີ​ເຄື່ອງ­ມື​ເຄື່ອງ­ໃຊ້​ຈຳ­ເປັນ​ຕິດ​ລົດ​ໄປ​ນຳ​ຈຳ­ນວນ​ໜຶ່ງ ເປັນ­ຕົ້ນ: ຈົກ ຊວ້ານ.. ເພື່ອ​ແກ້​ໄຂ​ເມື່ອ​ບໍ​ລິ​ມາດ​ດິນ​ທີ່​ໄຫຼ​ທັບ​ທາງ​ຫາກ​ມີ​ບໍ​ລິ​ມາດ​ເລັກ​ນ້ອຍ​ສາ­ມາດ​ແກ້​ໄຂ​ໄດ້​ເອງ​ກໍ່​ເຮັດ..

   ສ່ວນ​ການ​ກູ້​ໄພ​ກໍ່​ເຊັ່ນ​ກັນ ເມື່ອ​ຮັບ​ຂ່າວ​ເຖິງ​ການ​ຈະ​ມີ​ເຫດ​ຮ້າຍ​ໂດຍ​ຮູ້​ຈາກ​ພະ­ຍາ­ກອນ​ອາ­ກາດ ຫຼື ມີ​ຂ່າວ​ນ້ຳ​ຖ້ວມ ນ້ຳ​ປ່າ​ໄຫຼ­ຊຸ​ກະ­ທັນ­ຫັນ ກໍ່​ຄວນ​ມີ​ວິ­ທີ​ການ​ຊ່ວຍ­ເຫຼືອ​ຄົນ​ໃຫ້​ພົ້ນ​ອັນ­ຕະ­ລາຍ​ນັ້ນ​ກ່ອນ​ໂດຍ​ດ່ວນ ຫຼື ຫາ​ວິ­ທີ​ການ​ທີ່​ເໝາະ​ສົມ ຈຳ­ເປັນ ເພື່ອ​ເຮັດ​ແນວ­ໃດ​ໃຫ້​ເສຍ​ໜ້ອຍ​ສຸດ ກ້າວ​ເຖິງ​ປອດ​ໄພ​ນັ້ນ​ເອງ.

ໂດຍ: ດອກ​ຊ້ອນ ດອນ​ໂຂງ

ຂ່າວທີ່ກ່ຽວຂ້ອງ