ຂ່າວຫຼ້າສຸດ

ລັດຖະບານຢືນຢັນ ໃຫ້ການຊ່ວຍເຫຼືອຊອກຄົ້ນ ຟື້ນຟູທີ່ຢູ່ອາໄສໃຫ້ກັບຄືນສູ່ສະພາບປົກກະຕິໂດຍໄວ

257 30 ກ.ກ. 2018 ຂ່າວໜ້າ​ໜຶ່ງ
ລັດຖະບານຢືນຢັນ ໃຫ້ການຊ່ວຍເຫຼືອຊອກຄົ້ນ ຟື້ນຟູທີ່ຢູ່ອາໄສໃຫ້ກັບຄືນສູ່ສະພາບປົກກະຕິໂດຍໄວ

    ລັດ­ຖະ­ບານ​ຢືນ­ຢັນ ​ຈະ​ຢູ່​ຄຽງ​ຂ້າງ​ປະ­ຊາ­ຊົນ​ທີ່​ປະ­ສົບ​ໄພ­ພິ­ບັດ ໂດຍ​ສະ­ເພາະ ຈະ​ສືບ­ຕໍ່​ຊອກ​ຄົ້ນ​ຫາ​ຜູ້​ທີ່​ລອດ​ຊີ­ວິດ ແລະ ເສຍ​ຊີ­ວິດ ​ຢູ່ເມືອງ​ສະ­ໜາມ​ໄຊ ແຂວງ​ອັດ​ຕະ​ປື ທ່ານ ທອງ​ລຸນ ສີ​ສຸ​ລິດ ນາ­ຍົກ­ລັດ­ຖະ­ມົນ­ຕີ ໄດ້​ລົງ​ມາ​ພົບ​ປະ​ສູນ​ຮັບ​ບໍ­ລິ­ຈາກ​ຜູ້​ປະ­ສົບ​ໄພ­ພິ­ບັດ​ນ້ຳ​ຖ້ວມ ໃນ​ວັນ​ທີ 29 ກໍ­ລະ­ກົດ 2018.

    ໃນ​ໂອ­ກາດ​ນີ້ ທ່ານ ທອງ​ລຸນ ສີ​ສຸ​ລິດ ນາ­ຍົກ­ລັດ­ຖະ­ມົນ­ຕີ ກ່າວ​ວ່າ: ຈາກ​ເຫດ­ການ​ທີ່​ເກີດ​ຂຶ້ນ ໄດ້​ເຮັດ​ໃຫ້​ຫຼາຍ​ພາກ­ສ່ວນ​ມີ​ຄວາມ​ກະ​ຕື​ລື​ລົ້ນ​ຮ່ວມ​ແຮງ​ຮ່ວມ​ໃຈ​ກັນ​ຊ່ວຍ­ເຫຼືອ ເຫັນ​ໄດ້​ໃນ​ສະ­ເພາະ​ນະ­ຄອນຫຼວງ​ວຽງ​ຈັນ ໄດ້​ເປີດ​ຮັບ​ບໍ­ລິ­ຈາກ​ເຄື່ອງ​ຊ່ວຍ­ເຫຼືອ​ໃນ​ຫຼາຍ​ຈຸດ ຖື​ວ່າ​ທົ່ວ​ປະ­ເທດ​ໄດ້​ສົ່ງ​ທັງ​ແຮງ​ໃຈ ແລະ ນ້ຳ­ໃຈ​ທີ່​ເປັນ​ວັດ­ຖຸສິ່ງ​ຂອງ ແລະ ເງິນ​ຄຳ​ຈຳ­ນວນ​ໜຶ່ງ ນອກ­ຈາກ​ນັ້ນ ລາວ​ເຮົາ​ຍັງ​ໄດ້​ຮັບ​ການ​ຊ່ວຍ­ເຫຼືອ​ຈາກ​ປະ­ເທດ​ເພື່ອນ​ມິດ​ທີ່​ເປັນ​ແຮງ​ໃຈ ວັດ­ຖຸ ເງິນ ຢ່າງ​ບໍ່​ຂາດ ແລະ ເປັນ​ຈຳ­ນວນ​ຫຼາຍ ສຳ­ລັບ​ການ​ຊ່ວຍເຫຼືອ​ແມ່ນ​ບໍ່​ສາ­ມາດ​ປະ​ເມີນ​ມູນ​ຄ່າ​ໄດ້ ແລະ ເປັນ​ການ​ຊ່ວຍ­ເຫຼືອ​ໄດ້​ທັນ​ກັບ​ສະ­ພາບ​ການ ດັ່ງ­ນັ້ນ ໃນ​ນາມ​ລັດ­ຖະ­ບານ ຂໍ​ສະ­ແດງ​ຄວາມ​ຂອບ­ໃຈ​ມາ​ຍັງ​ພາກ­ສ່ວນ​ທີ່​ໃຫ້­ການ​ຊ່ວຍ­ເຫຼືອ ແລະ ປະ­ເທດ​ເພື່ອນ​ມິດທີ່​ໃຫ້­ການ​ຊ່ວຍ­ເຫຼືອ​ຄັ້ງ​ນີ້ ເຊິ່ງ​ການ​ຊ່ວຍ­ເຫຼືອ​ດັ່ງ­ກ່າວ ​ໄດ້​ມອບ​ໃຫ້​ພາກ­ສ່ວນ​ກ່ຽວ­ຂ້ອງ​ສົ່ງ​ໃຫ້​ຜູ້​ປະ­ສົບ​ໄພ​ໄດ້​ທັນ​ການ.

    ນອກ­ຈາກ​ນັ້ນ ລັດ­ຖະ­ບານ ຍັງ​ຈະ​ສືບ­ຕໍ່​ຊອກ​ຄົ້ນ​ຜູ້​ສູນ­ຫາຍ​ໃຫ້​ໄວ​ທີ່​ສຸດ ເພື່ອ​ໃຫ້​ເຂົາ­ເຈົ້າ​ໄດ້​ມີ​ຊີ­ວິດ​ຕໍ່​ໄປ ສ່ວນ​ຜູ້​ເສຍ​ຊີ­ວິດ​ກໍ່​ຕ້ອງ​ຊອກ​ໃຫ້​ໄດ້ ແລະ ພາຍ­ຫຼັງ​ທີ່​ນ້ຳ​ຫຼຸດ ແມ່ນ​ຈະ​ຊ່ວຍ​ປະ­ຊາ­ຊົນ​ກັບ​ຄືນ​ໄປ​ສູ່​ເຮືອນ ແລະ ຟື້ນ​ຟູ​ເຮືອນ​ຊານ​ທີ່​ເປ່​ເພ ພ້ອມ​ທັງ​ວາງ​ແຜນ​ຟື້ນ​ຟູເມືອງ​ສະ­ໜາມ​ໄຊ ​ໃຫ້​ມີ​ລະ­ບົບ​ແບບ­ແຜນກັບ​ສູ່​ສະ­ພາບ​ປົກ­ກະ­ຕິ ພ້ອມ​ດຽວ​ກັນ​ນັ້ນ ລັດ­ຖະ­ບານ ຍັງ​ຈະ​ສືບ­ຕໍ່​ສືບ­ສວນ​ສອບ​ສວນ​ຈຸດ​ເກີດ​ເຫດ ຊອກ​ໃຫ້​ໄດ້​ເຫັນ​ສາ­ເຫດ ແລະ ເຫດ­ຜົນ​ຂອງ​ການ​ເກີດ​ໄພ­ພິ­ບັດ​ຄັ້ງ​ນີ້ ເພື່ອ​ເຮັດ​ໃຫ້­ການ​ສອບ​ສວນ​ມີ​ຄວາມ​ໂປ່ງ​ໃສ ລັດ­ຖະ­ບານ​ຈະ​ຮ່ວມ​ມື​ກັບ​ບໍ­ລິ­ສັດ​ທີ່​ລົງ­ທຶນ​ແກ້​ໄຂ​ບັນ­ຫາ​ນີ້ ດັ່ງ­ນັ້ນ ຈຶ່ງ​ຮຽກ­ຮ້ອງ​ມາ​ຍັງ​ປະ­ຊາ­ຊົນ ຕ້ອງ​ມີ​ສະ­ມາ­ທິ​ຊ່ວຍ​ກັນ​ ໃນ​ການ​ຮັບ​ຟັງ​ຂໍ້​ມູນ​ຂ່າວ­ສານ​ຈາກ​ຂໍ້​ມູນ​ຂ່າວ­ສານ​ທີ່​ເຊື່ອ​ຖື​ໄດ້​ ຈາກ​ແຫຼ່ງ​ຂ່າວ​ຂອງ​ລັດ​ຖະບານ.

ຂ່າວທີ່ກ່ຽວຂ້ອງ