ຂ່າວຫຼ້າສຸດ

ເຈົ້າຄອງລົງຢ້ຽມຢາມ ແລະ ໃຫ້ກຳລັງໃຈປະຊາຊົນຜູ້ປະສົບໄພ

185 30 ກ.ກ. 2018 ຂ່າວໜ້າ​ໜຶ່ງ
ເຈົ້າຄອງລົງຢ້ຽມຢາມ ແລະ ໃຫ້ກຳລັງໃຈປະຊາຊົນຜູ້ປະສົບໄພ

   ໃນ​ວັນ​ທີ 28 ກໍ­ລະ­ກົດ 2018 ທ່ານ ສິນ​ລະ​ວົງ ຄຸດ​ໄພ­ທູນ ເຈົ້າ​ຄອງ​ນະ­ຄອນ­ຫຼວງ​ວຽງ​ຈັນ ພ້ອມ​ດ້ວຍ​ຄະ­ນະ ໄປ​ເຄື່ອນ​ໄຫວ​ຢ້ຽມ­ຢາມ​ໃຫ້​ກຳ­ລັງ​ໃຈ​ປະ­ຊາ­ຊົນ​ຜູ້​ທີ່​ປະ­ສົບ​ໄພ­ພິ­ບັດ​ນ້ຳ​ຖ້ວມ ຢູ່​ບັນ­ດາ​ສູນ​ທີ່​ກຳ­ນົດ​ໃຫ້​ປະ­ຊາ­ຊົນ​ມາ​ພັກ​ເຊົາ ຢູ່​ເມືອງ​ສະ­ໜາມ​ໄຊ ແຂວງ​ອັດ​ຕະ​ປື.

    ໂອ­ກາດ​ນີ້ ໄດ້​ຮັບ​ຟັງ​ລາຍ​ງານ​ຫຍໍ້​ຈາກ​ທ່ານ ບຸນ​ໂຮມ ພົມ​ມະ​ສານ ເຈົ້າ­ເມືອງ​ສະ­ໜາມ​ໄຊ ວ່າ: ໄລ­ຍະ​ຜ່ານ​ມາ​ມີ​ຝົນ­ຕົກ​ຫຼາຍ​ໃນ​ທຸກ​ພື້ນ​ທີ່ ເຊິ່ງ​ມີ​ມວນ​ນ້ຳ​ມະ­ຫາ­ສານ​ສະ​ສົມ​ໃນ​ອ່າງ​ນ້ຳ­ຂອງ​ໂຄງ­ການ​ເຂື່ອນ​ໄຟ­ຟ້າ​ເຊ​ປຽນ-ເຊ​ນ້ຳ​ນ້ອຍ ເປັນ​ເຫດ​ເຮັດ​ໃຫ້​ອ່າງ­ເກັບ­ນ້ຳ​ບໍ່​ສາ­ມາດ​ຮັບ​ນ້ຳ​ໄດ້ ຈຶ່ງ​ເກີດ​ອຸ­ບັດ​ຕິ​ເຫດ​ເຮັດ​ໃຫ້​ເຂື່ອນ​ກັ້ນ​ນ້ຳ​ແຕກ​ທະ­ລຸ​ລົງ​ນ້ຳ​ເຊ​ປຽນ ແລະ ເຂດ​ພື້ນ​ທີ່​ຕ່ຳ​ເປັນ​ຈຳ­ນວນ​ຫຼວງ­ຫຼາຍ ເຊິ່ງ​ເຮັດ​ໃຫ້ 13 ​ບ້ານ​ຖືກ​ນ້ຳ​ຖ້ວມ ແລະ ມີ​ຈຳ­ນວນ​ຄອບ­ຄົວ​ຖືກ​ຜົນ​ກະ­ທົບ 2.836 ຄອບ­ຄົວ ມີ​ຈຳ­ນວນ​ພົນ 13.067 ຄົນ ຍິງ 6.104 ຄົນ ໃນ​ນີ້ ບັນ­ດາ​ບ້ານ​ທີ່​ຖືກ​ຜົນ​ກະ­ທົບ​ໜັກ​ແມ່ນ 6 ບ້ານ ມີ​ບ້ານ​ຫີນ​ລາດ ສະ­ໜອງ​ໄຕ້ ທ່າ​ແສງ​ຈັນ ທ່າ​ຫີນ ບ້ານ​ໃໝ່ ແລະ ບ້ານ​ແທ້ ມີ​ຈຳ­ນວນ 1.611 ຄອບ­ຄົວ ຈຳ­ນວນ​ຄົນ 5.095 ຄົນ ສ່ວນ 7 ບ້ານ ທີ່​ຖືກ​ຜົນ​ກະ­ທົບ​ຕາມ​ມາ​ມີ​ບ້ານບິນ​ດົງ ຕະ​ມໍ​ຢອດ ໂພຍ​ສະ­ອາດ ໜອງ​ແຂ້ ໄຊ​ດອນ​ໂຂງ ສົ້ມ­ປ່ອຍ ຫາດ​ອຸ­ດົມ​ໄຊ ຈຳ­ນວນ 1.225 ຄອບ­ຄົວ ຈຳ­ນວນ​ຄົນ 5.922 ຄົນ ຈຳ­ນວນ​ຜູ້​ສູນ­ຫາຍ​ທີ່​ໄດ້​ຮັບ​ການ​ແຈ້ງ​ຈາກ​ປະ­ຊາ­ຊົນ​ໃນ 6 ບ້ານ ທີ່​ໄດ້​ຮັບ​ຜົນ​ກະ­ທົບ​ຈາກ​ໂຄງ­ການ​ໂດຍ​ກົງ​ໃນ​ເບື້ອງ​ຕົ້ນ​ແມ່ນ 131 ຄົນ ຈຳ­ນວນ 7 ບ້ານ​ແມ່ນ​ຈະ​ສືບ­ຕໍ່​ກວດ­ກາ​ເກັບ​ກຳ​ຂໍ້​ມູນ​ຕື່ມ​ອີກ ຜ່ານ​ມາ​ໄດ້​ເຕົ້າ­ໂຮມ​ປະ­ຊາ­ຊົນ 6 ບ້ານ​ມາ​ເຂດ​ທີ່​ປອດ​ໄພ​ຟື້ນ​ຟູ​ບັນ­ເທົາ​ທຸກ 6 ຈຸດ ມີ​ຈຳ­ນວນ 5.964 ຄົນ ກຽມ​ເພີ່ມ​ອີກ 1 ຈຸດ ໄດ້​ນຳ​ສົ່ງ​ຜູ້​ບາດ­ເຈັບ​ສົ່ງ​ໂຮງ­ໝໍ 26 ຄົນ ພົບ​ຜູ້​ເສຍ​ຊີ­ວິດ 8 ສົບ ພ້ອມ​ນີ້​ໄດ້​ສືບ­ຕໍ່​ຄົ້ນ​ຫາ​ຜູ້​ປະ­ສົບ​ໄພ ຕາມ​ສະ­ຖິ­ຕິ​ມີ​ປະ­ມານ 1.126 ຄົນ.

    ພາຍ­ຫຼັງ​ຮັບ​ຟັງ​ລາຍ​ງານ​ແລ້ວ ທ່ານ​ນາງ ມີ­ນາ​ພອນ ໄຊ​ຊົມ​ພູ ຮອງ​ເລ­ຂາ​ພັກ​ແຂວງ ກໍ່​ໄດ້​ນຳ­ພາ​ທ່ານ ສິນ​ລະ​ວົງ ຄຸດ​ໄພ­ທູນ ແລະ ຄະ­ນະ ລົງ​ຢ້ຽມ­ຢາມ​ຖາມ​ຂ່າວ​ຊີ­ວິດ​ການ​ເປັນ​ຢູ່​ຂອງ​ປະ­ຊາ­ຊົນ​ຜູ້​ທີ່​ປະ­ສົບ​ໄພ​ນ້ຳ​ຖ້ວມ ​ທີ່​ໄດ້​ພັກ​ໃນ​ແຕ່​ລະ​ສູນ​ນັ້ນ ໂອ­ກາດ​ນີ້ ທ່ານ​ເຈົ້າ​ຄອງໄດ້​ນຳ​ເອົາ​ເງິນ ແລະ ເຄື່ອງ​ອຸ­ປະ­ໂພກ-ບໍ­ລິ­ໂພກ ສະ­ເພາະ​ຄອບ​ຄົບ​ຂອງ​ທ່ານ​ມອບ​ເງິນ­ສົດ​ໃຫ້​ສູນ​ລະ 5 ລ້ານ​ກີບ ພ້ອມ​ເຄື່ອງ ຈຳ­ນວນ 3 ຈຸດ ພ້ອມ​ທັງ​ກ່າວ​ສະ­ແດງ​ຄວາມ​ເຫັນ​ອົກ​ເຫັນ­ໃຈ ແລະ ສະ­ແດງ​ຄວາມ​ເສຍ​ໃຈ​ນຳ​ຄອບ­ຄົວ​ປະ­ຊາ­ຊົນ​ທີ່​ໄດ້​ຮັບ​ຜົນ​ກະ­ທົບ​ໃນ​ເຫດ­ການ​ຄັ້ງ​ນີ້ ທີ່​ບໍ່​ມີ​ໃຜ​ຢາກ​ໃຫ້​ເກີດ​ຂຶ້ນ ທັງ​ເປັນ​ເຫດ­ການ​ທີ່​ກະ­ທັນ­ຫັນ ຈຶ່ງ​ເຮັດ​ໃຫ້​ບໍ່​ມີ​ເວ­ລາ​ເພື່ອ​ກະ­ກຽມ ແລະ ຮັບ​ມື ແນວ­ໃດ​ ຂໍ​ເປັນ​ກຳ­ລັງ​ໃຈ​ໃຫ້​ບັນ­ດາ​ພໍ່​ແມ່​ປະ­ຊາ­ຊົນ​ຜູ້​ທີ່​ປະ­ສົບ​ໄພ​ ຈົ່ງ​ເຂັ້ມ­ແຂງ​ຕໍ່­ສູ້​ບັນ­ຫາ​ອຸ­ປະ­ສັກ​ຕ່າງໆ​ໃຫ້​ຜ່ານ​ພົ້ນ​ໄປ​ໄວໆ.

ຂ່າວທີ່ກ່ຽວຂ້ອງ