ຂ່າວຫຼ້າສຸດ

ນວ ສືບຕໍ່ລະດົມເຄື່ອງຊ່ວຍເຫຼືອຜູ້ປະສົບໄພນ້ຳຖ້ວມ ເມືອງສະໜາມໄຊ

196 30 ກ.ກ. 2018 ຂ່າວໜ້າ​ໜຶ່ງ
ນວ ສືບຕໍ່ລະດົມເຄື່ອງຊ່ວຍເຫຼືອຜູ້ປະສົບໄພນ້ຳຖ້ວມ ເມືອງສະໜາມໄຊ

   ເພື່ອ​ເປັນ​ການ​ແບ່ງ​ເບົາ​ຄວາມ​ໂສກ­ເສົ້າ ແລະ ປະ­ກອບ­ສ່ວນ​ຊ່ວຍ­ເຫຼືອ​ທາງ​ດ້ານ​ວັດ­ຖຸ ແລະ ປັດ​ໄຈ​ໃຫ້​ແກ່​ຜູ້​ປະ­ສົບ​ອຸ​ທົກ​ກະ​ໄພ­ພິ­ບັດ​ນ້ຳ​ຖ້ວມ ເມືອງ​ສະ­ໜາມ​ໄຊ ແຂວງ​ອັດ​ຕະ​ປື ວັນ​ທີ 27-28 ກໍ­ລະ­ກົດ 2018 ຫ້ອງ​ວ່າ­ການ​ນະ­ຄອນ­ຫຼວງ​ວຽງ​ຈັນ ແລະ ພະ­ແນກ­ການ​ກ່ຽວ­ຂ້ອງ ​ໄດ້​ສືບ­ຕໍ່​ຂະ​ບວນ​ການ​ລະ­ດົມ​ຄວາມ​ຊ່ວຍ­ເຫຼືອ​ ຈາກ​ພໍ່​ແມ່​ປະ­ຊາ­ຊົນ​ຢູ່​ພາຍ​ໃນ​ນະ­ຄອນ­ຫຼວງ​ວຽງ​ຈັນ ແລະ ຕ່າງ­ປະ­ເທດ ເຊິ່ງ​ບັນ­ດາ​ພະ­ແນກ­ການ ອົງ​ການ­ຈັດ­ຕັ້ງ ຫົວ­ໜ່ວຍ​ທຸ­ລະ​ກິດ ຫ້າງ​ຮ້ານ ແລະ ຜູ້​ປະ­ກອບ​ການ ຕະ­ຫຼອດ​ຮອດ​ພໍ່​ແມ່​ປະ­ຊາ­ຊົນ​ບັນ­ດາ­ເຜົ່າ ​ໄດ້​ນຳ​ເອົາ​ເຄື່ອງ­ນຸ່ງ​ຫົ່ມ ຜ້າ­ຫົ່ມ ເຂົ້າ­ສານ ອາ­ຫານ​ແຫ້ງ ຕະ­ຫຼອດ​ຮອດ​ອຸ­ປະ­ກອນ​ເຄື່ອງ­ໃຊ້​ຕ່າງໆ​ທີ່​ຈຳ­ເປັນ ແລະ ເງິນ­ສົດ​ອີກ​ຈຳ­ນວນ​ໜຶ່ງ​ ມາ​ມອບ​ໃຫ້​ຄະ­ນະ​ຮັບ­ຜິດ­ຊອບ​ຂະ​ບວນ​ການ​ລະ­ດົມ​ຄວາມ​ຊ່ວຍ­ເຫຼືອ ຢູ່​ຫ້ອງ​ວ່າ­ການ​ນະ­ຄອນ­ຫຼວງ​ວຽງ​ຈັນ​ຢ່າງ​ຕໍ່​ເນື່ອງ ເປັນ​ຂະ​ບວນ​ຟົດ­ຟື້ນ ປະ­ກອບ​ມີ ສຳ­ນັກ­ງານ​ປົກ­ຄອງ​ເມືອງ​ຈັນ­ທະ​ບູ​ລີ ເຄື່ອງ​ອຸ­ປະ­ໂພກ-ບໍ­ລິ­ໂພກ​ຈຳ­ນວນ 15 ຄັນ​ລົດ ສາ­ຂາ​ມູນ​ນິ­ທິ​ທ້າຍ​ພີງ​ຫຼົງ​ກາງ 13 ລ້ານ​ກີບ ບໍ­ລິ­ສັດ ເຈີ້ນ​ເໝີຍ​ແອວ​ອີ​ດີ ຈຳ­ກັດ+ບໍ­ລິ­ສັດ​ ລາວ​ຊິງ​ຕຽນ ບົ່ມ​ເພາະ​ທຸ­ລະ​ກິດ​ລົງ­ທຶນ​ສາ­ກົນ ​ຈຳ­ກັດ ມອບ​ດອກ­ໄຟ​ໂຊ​ລາ​ແສງ​ອາ­ທິດ 60 W ຈຳ­ນວນ 15 ດອກ ດອກ­ໄຟ​ໂຊ​ລາ​ແສງ​ອາ­ທິດ 40 W ຈຳ­ນວນ 5 ດອກ ມູນ​ຄ່າ 13 ລ້ານ​ກີບ ແລະ ບໍ­ລິ­ສັດ ອີ​ຊີ​ຊວງ​ລອງ ຈຳ­ກັດ ມອບ​ເງິນ 10 ລ້ານ​ກີບ ໂຮງ­ແຮມ​ອຸ່ນ​ໂຈ່​ແກຣນ 10 ລ້ານ​ກີບ ຊາວ​ຄ້າ­ຂາຍ​ສູນ​ການ​ຄ້າ​ສາ­ກົນ​ຊັງ​ຈຽງ ແລະ ພະ­ນັກ­ງານ​ກຸ່ມ​ບໍ­ລິ­ສັດ​ມອບ​ຜ້າ­ຫົ່ມ ຜ້າ​ເຊື່ອ 1.007 ຜືນ ອາ­ຫານ​ສຳ­ເລັດ​ຮູບ 531 ແກັດ ແລະ ເຄື່ອງ­ນຸ່ງ​ຫົ່ມ 3.952 ໂຕ ນອກ­ຈາກ​ນີ້ ຍັງ​ມີ​ພາກ­ສ່ວນ​ອື່ນໆ​ອີກ​ທີ່​ນຳ​ເຄື່ອງ​ອຸ­ປະ­ໂພກ-ບໍ­ລິ­ໂພກ ແລະ ປັດ​ໄຈ​ຕ່າງໆ​ຢ່າງ​ຕໍ່​ເນື່ອງ​ເປັນ​ຈຳ­ນວນ​ຫຼວງ­ຫຼາຍ ສຳ­ລັບ​ເງິນ­ສົດ​ທີ່​ໄດ້​ຮັບ​ການ​ປະ­ກອບ­ສ່ວນ​ຈາກ​ພາກ­ສ່ວນ​ຕ່າງໆ​ ແຕ່​ວັນ​ທີ 25-28 ກໍ­ລະ­ກົດ ມີ​ຈຳ­ນວນ​ທັງ​ໝົດ​ເປັນ​ເງິນ​ກີບ 1.225.376.000 ກີບ ແລະ ເງິນ​ຕ່າງ­ປະ­ເທດ​ມີ 319.870 ບາດ 868 ໂດ​ລາ​ສະ­ຫະ­ລັດ ກັບ 4.105 ຢວນ ໃນ​ນີ້ ລວມ​ທັງ​ເງິນ​ຈຳ­ນວນ 500 ລ້ານ​ກີບ ແລະ ຊື້​ເຂົ້າ­ສານ 30 ໂຕນ ທີ່​ເຈົ້າ​ຄອງ​ນະ­ຄອນ­ຫຼວງ​ວຽງ​ຈັນ​ມອບ​ຊ່ວຍ­ເຫຼືອ​ໃນ​ເບື້ອງ​ຕົ້ນ.

    ສຳ­ລັບ​ພາກ­ສ່ວນ ແລະ ບຸກ­ຄົນ​ທີ່​ຢາກ​ປະ­ກອບ­ສ່ວນ​ຊ່ວຍ­ເຫຼືອ​ແມ່ນ​ສາ­ມາດ​ນຳ​ເອົາ​ວັດ­ຖຸ ແລະ ປັດ​ໄຈ​ຕ່າງໆ​ຂອງ​ຕົນ ​ມອບ​ໄດ້​ທີ່​ສູນ​ຮັບ​ບໍ­ລິ­ຈາກ​ການ​ຊ່ວຍ­ເຫຼືອ​ຜູ້​ປະ­ສົບ​ອຸ​ທົກ​ກະ​ໄພ­ພິ­ບັດ​ນ້ຳ​ຖ້ວມ ເມືອງ​ສະໜາມ​ໄຊ ຢູ່​ຫ້ອງ​ວ່າ­ການ​ນະ­ຄອນ­ຫຼວງ​ວຽງ​ຈັນ ແຕ່​ມື້­ນີ້​ໄປ​ຈົນ​ເຖິງ​ວັນ​ທີ 3 ສິງ­ຫາ 2018 ເວ­ລາ 8:00ໂມງ ຫາ 22:00 ໂມງ ເຊິ່ງ​ຕອນ​ຄ່ຳ​ວັນ​ທີ 27 ກໍ­ລະ­ກົດ ໄດ້​ຈັດ​ສົ່ງ​ເຄື່ອງ​ໄປ​ຊ່ວຍ­ເຫຼືອ​ເມືອງ​ສະ­ໜາມ​ໄຊ​ຈຳ­ນວນ 3 ຄັນ​ລົດ ແລະ ຕອນ​ເຊົ້າ​ວັນ​ທີ 28 ກໍ­ລະ­ກົດ ໄດ້​ຈັດ​ສົ່ງ​ເຄື່ອງ​ຊ່ວຍ­ເຫຼືອ​ຕື່ມ​ອີກ​ຈຳ­ນວນ 7 ຄັນ​ລົດ.

ຂ່າວທີ່ກ່ຽວຂ້ອງ