ຂ່າວຫຼ້າສຸດ

ແຈ້ງການກ່ຽວກັບການບໍລິໂພກຂໍ້ມູນຂ່າວ

174 30 ກ.ກ. 2018 ຂ່າວໜ້າ​ໜຶ່ງ

    ຄະ­ນະ​ກຳ­ມະ­ການ​ສະ­ເພາະ​ກິດ ແກ້​ໄຂ​ໄພ­ພິ­ບັດ​ລະ­ດັບ​ຊາດ ຂໍ​ແຈ້ງ​ໃຫ້​ທົ່ວ​ສັງ­ຄົມ ທັງ​ພາຍ​ໃນ ແລະ ຕ່າງ­ປະ­ເທດ ພ້ອມ​ທັງ​ສຳ­ນັກ​ຂ່າວ​ຕ່າງໆ ຜູ້​ຜະ­ລິດ​ສົ່ງ ແລະ ແລກ­ປ່ຽນ​ຂໍ້­ຄວາມ ແລະ ຮູບ​ພາບຜ່ານ​ສື່​ສັງ­ຄົມ​ອອນ​ລາຍ ຊາບ​ດັ່ງ­ນີ້:

1. ຂໍ​ໃຫ້​ທຸກ​ພາກ­ສ່ວນ​ທີ່​ກ່າວ​ມາ​ຂ້າງ​ເທິງ​ນັ້ນ ໄດ້​ຕິດ­ຕາມ​ຮັບ​ຂ່າວ­ສານ​ທີ່​ຖືກ­ຕ້ອງ​ຕາມ​ຄວາມ​ເປັນ​ຈິງ ແລະ ເຊື່ອ​ຖື​ໄດ້​ຈາກ​ບັນ­ດາ​ສື່​ທາງ​ການ​ຂອງ​ລັດ­ຖະ­ບານ​ເທົ່າ​ນັ້ນ ໂດຍໜັງ­ສື­ພິມ ວິ­ທະ­ຍຸ ແລະ ໂທລະພາບ​ແຫ່ງ​ຊາດ ທີ່​ໄດ້​ຕິດ­ຕາມ ແລະ ລາຍ​ງານ​ຂ່າວ​ເຫດ­ການ​ດັ່ງ­ກ່າວ​ເປັນ​ປະ­ຈຳ​ຕະ­ຫຼອດ ໂດຍ​ສາ­ມາດ​ເຂົ້າ​ອ່ານ ຮັບ​ຟັງ ແລະ ເບິ່ງ​ໄດ້​ໃນ​ທຸກ​ຊ່ອງ​ທາງ ເຊັ່ນ: Facebook YouTube ແລະ ອື່ນໆ​ອີກ.

2. ຜ່ານ​ມາ​ນັບ​ແຕ່​ມື້​ເຫດ­ການ​ເກີດ​ຂຶ້ນ ໄດ້​ພົບ​ເຫັນ​ສື່​ສັງ­ຄົມ​ອອນ​ລາຍ ແລະ ບຸກ­ຄົນ​ຈຳ­ນວນ​ໜຶ່ງຢູ່ພາຍ​ໃນ ແລະ ນອກ​ປະ­ເທດ ພ້ອມ​ທັງ​ສຳ­ນັກ​ສື່​ມວນ​ຊົນ​ຕ່າງໆ ໄດ້​ມີ​ການ​ສະ­ເໜີ ແລະ ແຈກ​ຢາຍ​ຂ່າວ​ທີ່​ເຫັນ​ວ່າ​ບໍ່​ຖືກ­ຕ້ອງ​ກັບ​ຄວາມ​ເປັນ​ຈິງ​ຫຼາຍ​ຢ່າງ.

3. ທຸກ​ການ​ກະ­ທຳ​ໃນ​ການ​ສະ­ເໜີ ແລະ ແລກ­ປ່ຽນ​ຂ່າວ ແລະ ພາບກ່ຽວ​ກັບ​ເຫດ­ການ​ໄພ­ພິ­ບັດ​ຢູ່ແຂວງ​ອັດ​ຕະ​ປື ແລະ ສະ­ພາບ​ດິນ​ຟ້າ​ອາ­ກາດ ແລະ ພາ­ຍຸ ໃນ​ຂອບ​ເຂດ​ທົ່ວ​ປະ­ເທດ ທີ່​ບໍ່​ຖືກ­ຕ້ອງ​ຕາມ​ຄວາມ​ເປັນ​ຈິງ ຫຼື ບິດ​ເບືອນ​ຈາກ​ການ​ລາຍ​ງານ​ຂອງ​ແຫຼ່ງ​ຂ່າວ​ທາງ​ການ​ລັດ­ຖະ­ບານ ລ້ວນ​ແຕ່​ເປັນ​ການລ່ວງ​ລະ­ເມີດ​ກົດ­ໝາຍ ແລະ ລະ­ບຽບ​ການ​ຂອງ ສປປ ລາວ ເປັນ­ຕົ້ນແມ່ນ​ກົດ­ໝາຍ​ອາ­ຍາ ກົດ­ໝາຍ​ວ່າດ້ວຍ​ການ​ຕ້ານ ແລະ ສະ­ກັດ​ກັ້ນ​ອາ​ຊະ​ຍາ​ກຳ​ທາງ​ລະ­ບົບ​ຄອມ​ພີວ​ເຕີ ມາດ­ຕາ 13 ວ່າ​ດ້ວຍ​ການ​ສ້າງຄວາມ​ເສຍ​ຫາຍຜ່ານ​ສື່​ສັງ­ຄົມ​ອອນ​ລາຍ ມາດ­ຕາ 57 ວ່າ​ດ້ວຍ​ມາດ​ຕະ­ການ​ຕໍ່​ຜູ້​ລະ­ເມີດກົດ­ໝາຍ​ວ່າດ້ວຍ​ສື່​ມວນ​ຊົນ (ສະ­ບັບ​ປັບ­ປຸງ) ມາດ­ຕາ 66 ວ່າ​ດ້ວຍ​ຂໍ້​ຫ້າມສຳ­ລັບ​ອົງ­ການ​ສື່​ມວນ​ຊົນ ແລະ ດຳ­ລັດວ່າ​ດ້ວຍ​ການ​ຄຸ້ມ​ຄອງ​ຂໍ້​ມູນ​ຂ່າວ­ສານ​ຜ່ານ​ອິນ​ເຕີ​ເນັດ ມາດ­ຕາ​ທີ 10 ວ່າ​ດ້ວຍ​ເນື້ອ​ໃນ​ທີ່​ບໍ່​ອະ­ນຸ­ຍາດ​ເຜີຍແຜ່​ຜ່ານ​ອິນ​ເຕີ​ເນັດ.

4. ການ​ກະ­ທຳ​ດັ່ງ­ກ່າວ​ນັ້ນ ຍັງ​ເປັນ​ການ​ລະ­ເມີດ​ຈັນ​ຍາ​ບັນ​ຂອງ​ນັກ​ຂ່າວ ແລະ ຜູ້​ເຄື່ອນ​ໄຫວ​ເຮັດ​ຂ່າວ​ຜ່ານ​ຊ່ອງ​ທາງ​ຕ່າງໆໃນ​ລະ­ບົບ​ອິນ​ເຕີ​ເນັດ ສະ­ນັ້ນ ຈຶ່ງ​ຮຽກ­ຮ້ອງ​ໃຫ້​ມີ​ການ​ເຊີດ​ຊູ​ຈັນ​ຍາ​ບັນ​ວິ­ຊາ​ຊີບໃນ​ການ​ເຮັດ​ຂ່າວ ເຊີດ​ຊູ​ນ້ຳ­ໃຈ ແລະ ຄວາມ​ມີ​ມະ­ນຸດ­ສະ­ທຳ ຄວາມ​ຮັບ­ຜິດ­ຊອບ​ຂອງ​ພົນ­ລະ­ເມືອງ​ລາວ ແລະ ຕ່າງ­ປະ­ເທດ​ທີ່​ດີ​ຕໍ່­ໜ້າ​ກົດ­ໝາຍ ທີ່​ໄດ້​ສະ­ເໜີ​ຂ້າງ​ເທິງ​ນັ້ນ ເພື່ອ​ປະ­ກອບ­ສ່ວນ​ຊ່ວຍ​ບັນ­ເທົາ ແລະ ແກ້​ໄຂ​ສະ­ພາບ​ໄພ­ພິ­ບັດ​ທີ່​ໜັກ­ໜ່ວງ​ໃນ​ປັດ­ຈຸ­ບັນ​ນີ້ ໃຫ້​ຄ່ອຍໆ​ຜ່ອນ​ເບົາ​ລົງ ແລະ ກັບ​ຄືນ​ສູ່​ຄວາມ​ເປັນ​ປົກກະ­ຕິ​ໂດຍ​ໄວ.

ຄະ­ນະ​ກຳ­ມະ­ການ​ສະ­ເພາະ​ກິດ ແກ້​ໄຂ​ໄພ­ພິ­ບັດ​ລະ­ດັບ​ຊາດ.

ຂ່າວທີ່ກ່ຽວຂ້ອງ