ຂ່າວຫຼ້າສຸດ

ຮອງນາຍົກລັດຖະມົນຕີ ແລະ ເລຂາທິການໃຫຍ່ອາຊຽນ ລົງເຂດປະສົບໄພຢູ່ອັດຕະປື

150 30 ກ.ກ. 2018 ຂ່າວໜ້າ​ໜຶ່ງ

    ຕອນ​ບ່າຍ​ວັນ​ທີ 28 ກໍ­ລະ­ກົດ 2018 ນີ້ ທ່ານ ສອນ​ໄຊ ສີ​ພັນ​ດອນ ຮອງ​ນາ­ຍົກ­ລັດ­ຖະ­ມົນ­ຕີ ປະ­ທານ​ຄະ­ນະ​ກຳ­ມະ­ການ​ສະ­ເພາະ​ກິດ​ແກ້​ໄຂ​ໄພ­ພິ­ບັດ​ລະ­ດັບ​ຊາດ ແລະ ທ່ານ ດາ​ໂຕະ ລິມ​ຈອກ​ຮອຍ ເລ­ຂາ­ທິ­ການ​ໃຫຍ່​ອາ​ຊຽນ ພ້ອມ​ດ້ວຍ​ຄະ­ນະ ໄດ້​ເດີນ­ທາງ​ໄປ​ພົບ​ປະ​ກັບ​ປະ­ຊາ­ຊົນ​ທີ່​ປະ­ສົບ​ກັບ​ອຸ​ທົບ​ກະ​ໄພ​ນ້ຳ​ຖ້ວມ​ຢູ່​ສູນ​ພັກ​ເຊົາ​ຊົ່ວ­ຄາວ ເມືອງ​ສະ­ໜາມ​ໄຊ ແຂວງ​ອັດ​ຕະ​ປື ສະ­ເພາະ​ທ່ານ ສອນ​ໄຊ ສີ​ພັນ​ດອນ ພ້ອມ​ດ້ວຍ​ຄະ­ນະ ໄດ້​ໄປ​ພົບ​ປະ​ກັບ​ປະ­ຊາ­ຊົນ​ຢູ່​ໂຮງ­ຮຽນ​ມັດ­ທະ­ຍົມ​ສົມ­ບູນ​ສະ­ໜາມ​ໄຊ ເຊິ່ງ​ມີ​ປະ­ຊາ­ຊົນ​ຍົກຍ້າຍ​ມາ​ອາ­ໄສ​ຢູ່​ແຫ່ງ​ນີ້ 4 ບ້ານ​ຄື: ບ້ານ​ທ່າ​ແສງ​ຈັນ ບ້ານ​ຫີນ​ລາດ ບ້ານ​ທ່າ​ຫີນ ແລະ ບ້ານ​ທ່າ​ອວນ.

    ໂອ­ກາດ​ນີ້ ທ່ານ ສອນ​ໄຊ ສີ​ພັນ​ດອນ ໄດ້​ມອບ​ເຄື່ອງ​ຊ່ວຍ­ເຫຼືອ​ຈຳ­ນວນ​ໜຶ່ງ​ໃຫ້​ຕາງ­ໜ້າ​ຜູ້​ປະ­ສົບ​ໄພ ແລະ ໄດ້​ພົບ​ປະ​ໂອ​ລົມ​ໃຫ້​ກຳ­ລັງ​ໃຈ​ປະ­ຊາ­ຊົນ​ທີ່​ປະ­ສົບ​ອຸ​ທົກ​ກະ​ໄພ​ໃນ​ຄັ້ງ​ນີ້ ໃຫ້​ມີ​ກຳ­ລັງ​ໃຈ​ທີ່​ເຂັ້ມ­ແຂງ ຕາງ­ໜ້າ​ໃຫ້​ລັດ­ຖະ­ບານ ໄດ້​ສະ­ແດງ​ຄວາມ​ເຊື່ອ​ໝັ້ນ​ຕໍ່​ປະ­ຊາ­ຊົນ​ວ່າ: ພັກ ແລະ ລັດ­ຖະ­ບານ ຈະ​ເພີ່ມ​ທະ­ວີ​ຄວາມ​ເອົາ­ໃຈ­ໃສ່​ຕໍ່​ປະ­ຊາ­ຊົນ​ທີ່​ໄດ້​ຮັບ​ຜົບ​ກະ­ທົບ​ໃນ​ຄັ້ງ​ນີ້ ໃຫ້​ມີ​ຜົນ­ສຳ­ເລັດ​ໂດຍ​ໄວ ນອກ​ນີ້ ທ່ານ ສອນ​ໄຊ ສີ​ພັນ​ດອນ ໄດ້​ເດີນ­ທາງ​ໄປ​ທີ່​ໂຮງ­ໝໍ​ເມືອງ​ສະ­ໜາມ​ໄຊ ເພື່ອ​ຕິດ­ຕາມ​ການ​ເບິ່ງ­ແຍງ​ປະ­ຊາ­ຊົນ​ທີ່​ເຂົ້າ​ມາ​ປິ່ນ­ປົວ​ສຸຂະ​ພາບ ພ້ອມ​ທັງ​ໄດ້​ພົບ​ປະ​ກັບ​ທີມ​ປິ່ນ­ປົວ ແລະ ປ້ອງ​ກັນ​ພະ­ຍາດ​ກົມ​ເສ­ນາ​ຮັກ ຈາກ​ສາ­ທາ­ລະ­ນະ​ລັດ​ປະຊາ​ຊົນ​ຈີນ ທີ່​ເດີນ­ທາງ​ມາ​ໃຫ້­ການ​ຊ່ວຍ­ເຫຼືອ​ຜູ້​ປະ­ສົບ​ໄພ​ແຕ່​ວັນ​ທີ 25 ກໍ­ລະ­ກົດ ຈຳ­ນວນ 30 ຄົນ.

    ການ​ລົງ­ພື້ນ​ຖານ​ຂອງ​ທ່ານ​ຮອງ​ນາ­ຍົກ­ລັດ­ຖະ­ມົນ­ຕີໃນ​ຄັ້ງ​ນີ້ ນອກ­ຈາກ​ມາ​ພົບ​ປະ​ປະ­ຊາ­ຊົນ​ແລ້ວ ຍັງ​ເປັນ​ການ​ສຳ​ຫຼວດ​ຜົນ​ເສຍ​ຫາຍ​ຕົວ​ຈິງ​ຕື່ມ​ອີກ ສ່ວນ​ທ່ານ ດາ​ໂຕະ ລິມ​ຈອກ​ຮອຍ ໄດ້​ໄປ​ຢ້ຽມ­ຢາມ​ປະ­ຊາ­ຊົນ​ທີ່​ປະ­ສົບ​ໄພ​ຢູ່​ໂຮງ­ຮຽນ​ປະ­ຖົມ​ສະ­ໜາມ​ໄຊ ແລະ ໄປ​ເບິ່ງ​ສູນ​ບັນ­ຊາ​ການ​ເຮັດ​ວຽກ​ກູ້​ໄພ​ຢູ່​ເມືອງ​ສະ­ໜາມ​ໄຊ.

ຂ່າວທີ່ກ່ຽວຂ້ອງ