ຂ່າວຫຼ້າສຸດ

ແມ່ຕູ້​ທີ່​ມີ​ອາຍຸ​ສູງ​ສຸດ​ໃນ​ຍີ່ປຸ່ນ ເຖິງ​ແກ່​ມໍລະນະ​ກຳ​ໃນ​ໄວ 117 ປີ

137 30 ກ.ກ. 2018 ຂ່າວຕ່າງປະເທດ
ແມ່ຕູ້​ທີ່​ມີ​ອາຍຸ​ສູງ​ສຸດ​ໃນ​ຍີ່ປຸ່ນ ເຖິງ​ແກ່​ມໍລະນະ​ກຳ​ໃນ​ໄວ 117 ປີ

    ກະຊວງ​ສາທາລະນະ​ສຸກ​ຂອງ​ຍີ່ປຸ່ນ ແຈ້ງ​ໃຫ້​ຮູ້​ວ່າ ແມ່ຕູ້ ຈີ​ໂຢ ມີ​ຢາ​ໂກ (Chiyo Miyako) ຜູ້​ທີ່​ມີ​ອາຍຸ​ສູງ​ສຸດ​ຢູ່​ໃນ​ຍີ່ປຸ່ນ ໄດ້​ເຖິງ​ແກ່​ມໍລະນະ​ກຳ​ແລ້ວ ເມື່ອ​ວັນ​ທີ 22 ກໍລະກົດ​ທີ່​ຜ່ານ​ມາ ລວມ​ອາຍຸ​ໄດ້ 117 ປີ.

    ແຈ້ງ​ການ​ຂອງ​ກະຊວງ​ສາທາລະນະ​ສຸກ​ຍີ່ປຸ່ນ ໃຫ້​ຮູ້​ວ່າ ແມ່ຕູ້ ມີ​ຢາ​ໂກ ເກີດ​ເມື່ອ​ວັນ​ທີ 2 ພຶດສະພາ ປີ  1901 ຊຶ່ງ​ເພິ່ນ​ດຳລົງ​ຊີວິດ​ຢູ່​ໃນ​ເມືອງ ໂຢ​ໂກ​ຮາ​ມາ  ໄດ້​ກາຍເປັນ​ຜູ້​ທີ່​ມີ​ອາຍຸ​ຍືນ ທີ່​ສຸດ​ໃນ​ຍີ່ປຸ່ນ ຫຼັງ​ຈາກ​ທີ່​ແມ່ຕູ້ ນາ​ບີ ຕາ​ຈີ​ມາ (Nabi Tajima) ຜູ້​ທີ່​ດຳລົງ​ຊີວິດ​ຢູ່​ໃນ​ເມືອງ ກາໂກ​ຊີ​ມາ ເຖິງ​ແກ່​ມໍລະນະ​ກຳ​ໄປ​ເມື່ອ​ເດືອນ​ເມສາ​ທີ່​ຜ່ານ​ມາ ຊຶ່ງ​ກໍ​ລວມ​ອາຍຸ​ໄດ້ 117 ປີ​ເຊັ່ນ​ກັນ.

    ຫຼັງ​ຈາກ​ທີ່​ແມ່ຕູ້ ມີ​ຢາ​ໂກ ເຖິງ​ແກ່​ມໍລະນະ​ກຳ​ໄປ​ແລ້ວ ນາມມະຍົດ​ຜູ້​ທີ່​ມີ​ອາຍຸ​ສູງ​ສຸດ ກໍ​ໄດ້​ໂອນ​ໄປ​ໃຫ້​ແມ່ຕູ້ ການ ຕານາ​ກາ (Kane Tanaka) ຊຶ່ງ​ຕາມ​ອຳນາດ​ການ​ປົກຄອງ​ນະຄອນ ຟູ​ກູ​ໂອ​ກາ ບ່ອນ​ທີ່​ແມ່ຕູ້ ຕານາ​ກາ ດຳລົງ​ຊີວິດ​ຢູ່​ນັ້ນ ໃຫ້​ຮູ້​ວ່າ​ແມ່ຕູ້​ຄົນ​ນີ້ ປັດຈຸບັນ ມີ​ອາຍຸ 115 ປີ ພວມ​ດຳລົງ​ຊີວິດ​ຢູ່​ໃນ​ສະຖານທີ່​ດູ​ແລ​ຄົນ​ຊະລາ ແລະ ​ແມ່ຕູ້​ກໍ​ມີ​ສຸຂະພາບ​ທີ່​ດີ.

    ໃນ​ຂະນະ​ດຽວ​ກັນ ພໍ່​ຕູ້​ທີ່​ມີ​ອາຍຸ​ສູງ​ສຸດ​ໃນ​ຍີ່ປຸ່ນ ກໍ​ແມ່ນ​ພໍ່​ຕູ້ ມາ​ຊາ​ໂຊ ໂນ​ນາ​ກາ (Masazo Nonaka) ເວລາ​ນີ້​ມີ​ອາຍຸ 113 ປີ ດຳລົງ​ຊີວິດ​ຢູ່ ຮອກ​ໄກ​ໂດ ຊຶ່ງ​ປຶ້ມ​ສະຖິຕິ​ໂລກ Guinness ຮັບ​ຮູ້ເມື່ອ​ເດືອນ​ເມສາ​ທີ່​ຜ່ານ​ມາ ວ່າ​ເປັນ​ພໍ່​ຕູ້​ທີ່​ມີ​ອາຍຸ​ຍືນ​ທີ່​ສຸດ​ຂອງ​ໂລກ.

 

ຂ່າວທີ່ກ່ຽວຂ້ອງ