ຂ່າວຫຼ້າສຸດ

ຫວຽດນາມ​ກາຍເປັນ​ຄູ່​ຄ້າ​ລາຍ​ໃຫຍ່​ສຸດ​ຂອງ​ຈີນ ຢູ່​ໃນ ASEAN

156 30 ກ.ກ. 2018 ຂ່າວຕ່າງປະເທດ
ຫວຽດນາມ​ກາຍເປັນ​ຄູ່​ຄ້າ​ລາຍ​ໃຫຍ່​ສຸດ​ຂອງ​ຈີນ ຢູ່​ໃນ ASEAN

     ທູດ​ການ​ຄ້າ​ຂອງ​ສະຖານທູດ​ຈີນ ປະຈຳ​ຫວຽດນາມ ກ່າວ​ຕໍ່​ກອງ​ປະຊຸມ​ຖະແຫຼງ​ຂ່າວ ທີ່​ຈັດ ຂຶ້ນ​ຢູ່​ຮ່າ​ໂນ້ຍ ໂດຍ​ແມ່ນ​ສະຖານທູດ​ຈີນ​ປະຈຳ​ຫວຽດນາມ ຈັດ​ຂຶ້ນ​ເມື່ອ​ວັນ​ທີ 26 ກໍລະກົດ ທີ່​ຜ່ານ​ມາ​ວ່າ ຫວຽດນາມ​ໄດ້​ລ້ຳ​ໜ້າ​ມາ​ເລ​ເຊຍ ກາຍເປັນ​ຄູ່​ຄ້າ​ລາຍ​ໃຫຍ່​ສຸດ​ຂອງ​ຈີນ ຢູ່​ໃນ​ສະມາຄົມ ບັນດາ​ປະເທດ​ອາຊີ​ຕາເວັນ​ອອກ​ສ່ຽງ​ໃຕ້  (ASEAN).

    ທູດ​ການ​ຄ້າ​ຂອງ​ສະຖານທູດ​ຈີນ ປະຈຳ​ຫວຽດນາມ ເວົ້າ​ວ່າ ໃນ​ຊຸມ​ປີ​ມໍ່ໆມານີ້ ມາ​ເລ​ເຊຍ ເປັນ​ຄູ່​ຄ້າ​ລາຍ​ໃຫຍ່​ສຸດ​ຂອງ​ຈີນ ຢູ່​ໃນ ASEAN. ເຖິງ​ຢ່າງໃດ​ກໍ​ຕາມ ຕົວ​ເລກ​ສະຖິຕິ ໃໝ່​ຫຼ້າ​ສຸດ​ຂອງ​ຝ່າຍ​ຈີນ ຊີ້​ໃຫ້​ເຫັນ​ວ່າ ຫວຽດນາມ​ໄດ້​ຄອງ​ທີ່​ນັ່ງ​ນັ້ນ​ຂອງ​ມາ​ເລ​ເຊຍ​ໄປ​ແລ້ວ

    ໃນ 6 ເດືອນ​ຕົ້ນ​ປີ​ນີ້ ຍອດ​ມູນ​ຄ່າ​ການ​ຄ້າ​ລະຫວ່າງ​ຈີນ ກັບ​ຫວຽດນາມ ຄາດ​ວ່າ​ບັນລຸ 66 ຕື້​ໂດ​ລາ​ສະຫະລັດ. ທີ່​ໜ້າ​ໃສ່ໃຈ​ກໍ​ແມ່ນ ມູນ​ຄ່າ​ການ​ຄ້າ​ສະເລ່ຍ​ໃນ​ແຕ່​ລະ​ເດືອນ ລະຫວ່າງ ສອງ​ປະເທດ​ໄດ້​ບັນລຸ​ເກີນ 10 ຕື້ ໂດ​ລາ​ສະຫະລັດ ເປັນ​ເທື່ອ​ທຳ​ອິດ​ໃນ​ປະຫວັດສາດ. ສະເພາະ​ໃນ ເດືອນ​ມິຖຸນາ​ທີ່​ຜ່ານ​ມາ ມູນ​ຄ່າ​ການ​ແລກປ່ຽນ​ການ​ຄ້າ ຈີນ - ຫວຽດນາມ ບັນລຸ​ທີ່ 11,2 ຕື້ ໂດ​ລາ​ສະຫະລັດ ເປັນ​ຕົວ​ເລກ​ທີ່​ສູງ​ກວ່າ​ຫຼາຍ ເມື່ອ​ທຽບໃສ່​ຕົວ​ເລກ 9,3 ຕື້ ໂດ​ລາ​ສະຫະລັດ ຂອງ​ມູນ​ຄ່າ​ການ​ແລກປ່ຽນ​ການ​ຄ້າ ລະຫວ່າງ​ຈີນ ກັບ​ມາ​ເລ​ເຊຍ.

    ເມື່ອ​ເວົ້າ​ເຖິງ​ໂຄງການ​ຕ່າງໆ ທີ່​ບັນດາ​ວິ​ສາ​ຫະ​ກິດ​ຂອງ​ຈີນ​ຮັບ​ເໝົາ​ຢູ່​ໃນ​ຫວຽດນາມ​ນັ້ນ ທູດ​ການ​ຄ້າ​ຂອງ​ສະຖານທູດ​ຈີນ ປະຈຳ​ຫວຽດນາມ ເວົ້າ​ວ່າ ຍອດ​ມູນ​ຄ່າ​ການ​ຮັບ​ເໝົາ ຂອງ​ບັນດາ​ບໍລິສັດ​ຂອງ​ຈີນ ສະເລ່ຍ​ແມ່ນ​ຢູ່​ທີ່​ປະມານ  6 ຕື້​ໂດ​ລາ​ສະຫະລັດ/ປີ. ໃນ 6 ເດືອນ​ຕົ້ນ​ປີ​ນີ້ ຍອດ​ມູນ​ຄ່າ​ຂອງ​ບັນດາ​ໂຄງການ​ຮັບ​ເໝົາ​ນັ້ນ​ຢູ່​ທີ່  2,4 ຕື້​ໂດ​ລາ​ສະຫະລັດ.

 

ຂ່າວທີ່ກ່ຽວຂ້ອງ