ຂ່າວຫຼ້າສຸດ

BRICS ສະໜັບສະໜູນ​ລະບົບ​ການ​ຄ້າ​ແບບ​ຫຼາຍ​ຝ່າຍ

171 30 ກ.ກ. 2018 ຂ່າວຕ່າງປະເທດ
BRICS ສະໜັບສະໜູນ​ລະບົບ​ການ​ຄ້າ​ແບບ​ຫຼາຍ​ຝ່າຍ

    ຢູ່​ໃນ​ກອງ​ປະຊຸມ​ສຸດ​ຍອດ​ຄັ້ງ​ທີ 10 ຂອງ​ກຸ່ມ​ບັນດາ​ພື້ນຖານ​ເສດຖະກິດ​ເກີດ​ໃໝ່ ອັນ​ດັບ ແຖວ​ໜ້າ​ຂອງ​ໂລກ (BRICS) ທີ່​ປະກອບ​ມີ ບຣາ​ຊີ​​ລ ຣັດ​ເຊຍ ອິນ​ເດຍ ຈີນ ແລະ ອາ​ຟະ​ຣິກ​ກາ​ໃຕ້ ທີ່​ດຳເນີນ​ໄປ​ເມື່ອ​ວັນ​ທີ 26 ກໍລະກົດ​ທີ່​ຜ່ານ​ມາ ທີ່​ນະຄອນ ໂຈ​ຮັນ​ແນ​​ສ​ເບີກ ຂອງ​ອາ​ຟະ​ຣິກ​ກາ​ໃຕ້ ນັ້ນ ບັນດາ​ຜູ້ນຳ​ຂອງ BRICS ໄດ້​ລົງ​ນາມ​ໃນ​ຖະແຫຼງການ​ສະບັບ​ໜຶ່ງ ກ່ຽວ​ກັບ​ການ​ສະໜັບສະໜູນ ລະບົບ​ການ​ຄ້າ​ເປີດ​ແບບ​ຫຼາຍ​ຝ່າຍ ແລະ​ຮອບດ້ານ.

    ຢູ່​ໃນ​ກອງ​ປະຊຸມ​ສຸດ​ຍອດ​ດັ່ງກ່າວ ຊຶ່ງ​ແກ່ຍາວ​ເປັນ​ເວລາ 3 ວັນ (25-27 ກໍລະກົດ) ບັນດາ ຜູ້ນຳ​ຂອງ BRICS ໄດ້​ຄົ້ນ​ພົບ​ສຽງ​ເວົ້າ​ຮ່ວມ​ກັນ ໃນ​ການ​ສະໜັບສະໜູນ​ການ​ຄ້າ​ທົ່ວ​ໂລກ ພ້ອມ​ກັນ​ນັ້ນ​ກໍ​ໃຫ້​ສັນຍາ​ເຖິງ​ການ​ຕໍ່ສູ້​ຕ້ານ​ກັບ​ລັດທິ​ພຽງ​ຝ່າຍ​ດຽວ ແລະ​ລັດທິ​ປົກ​ປ້ອງ ຫຼັງ​ຈາກ​ທີ່​ມີ​ການ ຂູ່​ປະຕິບັດ​ພາສີ ຂອງ​ປະທານາທິບໍດີ ສ ອາ​ເມ​ຣິ​ກາ ໂດ​ນາ​​ລ ທຣຳ.

    ໃນ​ມື້​ທີ​ສອງ​ຂອງ​ການ​ປະຊຸມ​ດັ່ງກ່າວ ໄດ້​ມີ​ວາລະ​ປະຊຸມ​ຢ່າງ​ເປັນ​ທາງ​ການ ຂອງ​ຜູ້ນຳ​ຈາກ 5 ປະເທດ​ສະມາຊິກ BRICS ໂດຍ​ຜູ້ນຳ​ເຫຼົ່ານັ້ນ​ໄດ້​ເນັ້ນ​ໜັກ​ເຖິງ​ຄວາມ​ຈຳເປັນ ຂອງ​ບັນດາ ປະເທດ​ສະມາຊິກ ໃນ​ການ​ກະກຽມ​ກຳລັງ​ຄົນ ແລະ ​ກຳລັງ​ວັດຖຸ ເພື່ອ​ໃຫ້​ຄຸ້ນ​ເຄີຍ ແລະ ນຳ​ໃຊ້ ທ່າ​ໄດ້​ປຽບ ຊຶ່ງ​ການ​ປະຕິວັດ​ອຸດສາຫະກຳ 4.0 ນຳ​ມາ.

    ປະທານາທິບໍດີ​ຂອງ​ອາ​ຟະ​ຣິກ​ກາ​ໃຕ້ ໄຊ​ຣີ​​ລ ຣາ​ມາ​ໂຟ​ຊາ ເວົ້າ​ວ່າ ປະເທດ​ຕ່າງໆ​ຕ້ອງ​ໄດ້ ກະກຽມ​ເປັນ​ຢ່າງ​ດີ ເພື່ອ​ຕອບ​ສະໜອງ​ຕໍ່​ຄວາມ​ຮຽກຮ້ອງ​ຕ້ອງການ ຂອງ​ການ​ປະຕິວັດ​ອຸດສາຫະກຳ 4.0 ແລະ​ທ່ານ​ກໍ​ໄດ້​ຢືນຢັນ​ວ່າ ນີ້​ບໍ່​ພຽງ​ແຕ່​ເປັນ​ການ​ປະຕິວັດ​ດີ​ຈີ​​ຕອລ​ເທົ່າ​ນັ້ນ ຫາກ​ຍັງ​ເປັນ​ການ ປ່ຽນແປງ​ກ່ຽວ​ກັບ​ແບບແຜນ​ການ​ດຳລົງ​ຊີວິດ ວິທີ​ການ​ເຮັດ​ວຽກ ແລະ​ການ​ພົວພັນ​ຂອງ​ມວນ​ມະນຸດ ນຳ​ອີກ.

ຂ່າວທີ່ກ່ຽວຂ້ອງ