ການ​ລົງທຶນ​ໃສ່​ນ້ຳມັນ​ໃນ​ທົ່ວ​ໂລກ ຄາດ​ວ່າ​ບັນລຸ 400 ຕື້​ໂດ​ລາ ໃນ​ປີ​ນີ້

100 30 ກ.ກ. 2018 ຂ່າວຕ່າງປະເທດ
ການ​ລົງທຶນ​ໃສ່​ນ້ຳມັນ​ໃນ​ທົ່ວ​ໂລກ ຄາດ​ວ່າ​ບັນລຸ 400 ຕື້​ໂດ​ລາ ໃນ​ປີ​ນີ້

    ລາຄາ​ນ້ຳມັນ​ດິບ​ໃນ​ຕະຫຼາດ​ໂລກ ໃນ​ໄລຍະ​ທີ່​ຜ່ານ​ມາ ເພີ່ມ​ຂຶ້ນ​ຫຼາຍ​ພໍ​ສົມຄວນ ເປັນ​ການ​ນຳ​ມາ​ຊຶ່ງ​ຜົນ​ຕອບ​ແທນ​ອັນ​ໃຫຍ່​ໂຕ ໃຫ້​ແກ່​ບັນດາ​ບໍລິສັດ​ນ້ຳມັນ. ເຖິງ​ຢ່າງໃດ​ກໍ​ຕາມ  ຈຳນວນ​ເງິນ​ທີ່​ປ້ອນ​ເຂົ້າ​ໄປ​ໃນ​ການ​ສຳ​ຫຼວດ ແລະ​ຂຸດ​ຄົ້ນ​ນ້ຳມັນ ພັດ​ຫຼຸດ​ລົງ​ຢ່າງ​ແຮງ.

    ລາຄາ​ນ້ຳມັນ ເພີ່ມ​ຂຶ້ນ​ຈາກ​ລະດັບ 27 ໂດ​ລາ​ສະຫະລັດ/ບາ​ເຣນ ໃນ​ເດືອນ​ມັງກອນ ປີ 2016 ເປັນ 57 ໂດ​ລາ​ສະຫະລັດ/ບາ​ເຣນ ໃນ​ທ້າຍ​ປີ 2017. ຍິ່ງ​ໄປ​ກວ່າ​ນັ້ນ ລາຄາ​ນ້ຳມັນ​ດິບ ໃນ​ເດືອນ​ພຶດສະພາ ປີ 2018 ນີ້ ໄດ້​ເພີ່ມ​ສູງ​ຂຶ້ນ​ອີກ ແລະ ບັນລຸ 80 ໂດ​ລາ​ສະຫະລັດ/ບາ​ເຣນ.

    ລາຄາ​ນ້ຳມັນ​ດິບ​ເພີ່ມ​ສູງ​ຂຶ້ນ ແມ່ນ​ໄດ້​ຈາກ​ຂໍ້​ຕົກລົງ​ກ່ຽວ​ກັບ​ການ​ຕັດ​ຫຼຸດ​ການ​ຂຸດ​ຄົ້ນ​ນ້ຳມັນ ຊຶ່ງ​ອົງການ​ບັນດາ​ປະເທດ ຜູ້​ສົ່ງ​ອອກ​ນ້ຳມັນ (OPEC) ລົງ​ນາມ​ກັບ 10 ປະເທດ​ທີ່ຢູ່​ນອກ OPEC (ໃນ​ນັ້ນ​ມີ​ຣັດ​ເຊຍ) ເມື່ອ​ເດືອນ​ທັນວາ ປີ 2016.

    ໃນ​ບົດ​ລາຍ​ງານ​ການ​ເຮັດ​ທຸລະ​ກິດ ໃນ​ໄຕ​ມາດ​ທີ 2 ທີ່​ຜ່ານ​ມາ​ນັ້ນ ບໍລິສັດ​ນ້ຳມັນ​ເກືອບ​ທັງ​ໝົດ ຕ່າງ​ກໍ​ຊີ້​ໃຫ້​ເຫັນ​ເຖິງ​ການ​ມີ​ຜົນ​ຕອບ​ແທນ​ສູງ​ຂຶ້ນ. ເຖິງ​ຢ່າງໃດ​ກໍ​ຕາມ ວົງ​ການ​ວິຊາ​ການ ກໍ​ຍັງ​ມີ​ຄວາມ​ກັງວົນ ກ່ຽວ​ກັບ​ຄວາມ​ຜັນ​ຜວນ​ຂອງ​ລາຄາ​ນ້ຳມັນ ເນື່ອງ​ຈາ​ກວ່າ​ປະລິມານ​ການ​ຜະລິດ​ນ້ຳມັນ​ຈາກ​ຫີນ​ພຸພຸ່ຍ​ຂອງ ສ ອາ​ເມ​ຣິ​ກາ ຍັງ​ເພີ່ມ​ຂຶ້ນ ແລະ​ ແຫຼ່ງ​ສະໜອງ​ນ້ຳມັນ ເກີດ​ຂາດ​ວັກ​ຂາດ​ຕອນ ຢູ່​ໃນ​ລີ​ບີ ເວ​ເນ​ຊູ​ເອ​ລາ ແລະ​ອີ​ຣານ.

    ຕົວ​ເລກ​ຂອງ​ອົງການ IFPEN ຊີ້​ໃຫ້​ເຫັນ​ວ່າ ການ​ລົງທຶນ​ເຂົ້າ​ໃນ​ການເຄື່ອນໄຫວ​ຜະລິດ ແລະ​ສຳ​ຫຼວດ​ນ້ຳມັນ​ໃນ​ທົ່ວ​ໂລກ ບັນລຸ 700 ຕື້​ໂດ​ລາ​ສະຫະລັດ ໃນ​ປີ 2014 ກ່ອນ​ທີ່​ຈະ​ຫຼຸດ​ຖອຍ​ລົງ​ໄປ​ກັບ​ລາຄາ​ນ້ຳມັນ. ຄາດ​ວ່າ​ຍອດ​ລະດັບ​ການ​ລົງທຶນ​ດັ່ງກ່າວ ຈະ​ບັນລຸ​ປະມານ 400 ຕື້​ໂດ​ລາ​ສະຫະລັດ​ໃນ​ປີ​ນີ້.

    ທາງ​ດ້ານ​ອົງການ​ພະລັງງານ​ສາກົນ (IEA) ໄດ້​ແຈ້ງ​ເຕືອນ​ວ່າ ມີ​ຄວາມ​ເປັນ​ໄປ​ໄດ້​ຫຼາຍ ທີ່​ແຫຼ່ງ​ສະໜອງ​ນ້ຳມັນ ຈະ​ບໍ່​ພຽງພໍ​ຕໍ່​ການ​ສະໜອງ​ຕາມ​ຄວາມ​ຕ້ອງການ​ທີ່​ເພີ່ມ​ຂຶ້ນ ໃນ​ຊຸມ​ປີ​ຕໍ່ໜ້າ.

 

ຂ່າວທີ່ກ່ຽວຂ້ອງ