ຂ່າວຫຼ້າສຸດ

ເອີຣົບສະເໜີໃຫ້ກວດກາສຸຂະພາບທາງຈິດຂອງນັກບິນ

97 30 ກ.ກ. 2018 ຂ່າວຕ່າງປະເທດ
ເອີຣົບສະເໜີໃຫ້ກວດກາສຸຂະພາບທາງຈິດຂອງນັກບິນ

   ຄະນະກຳມະການເອີຣົບ (EC) ໄດ້ຮັບຮອງຂໍ້ກຳນົດເປັນເທື່ອທຳອິດ ທີ່ບັງຄັບໃຫ້ບັນດາບໍລິສັດການບິນຕ່າງໆ ຕ້ອງໄດ້ດຳເນີນການກວດກາສຸຂະພາບທາງຈິດຂອງບັນດານັກບິນ ກ່ອນທີ່ຮັບສະໝັກເຂົາເຈົ້າ.

    ຂໍ້ກຳນົດໃໝ່ ທີ່ຫາກໍນຳອອກມາເປີດເຜີຍເມື່ອວັນທີ 25 ກໍລະກົດທີ່ຜ່ານມາ ລະບຸວ່ານັກບິນທັງໝົດຕ້ອງໄດ້ເຂົ້າຫາໂຄງການຊ່ວຍເຫຼືອ ໃນກໍລະນີມີບັນຫາກ່ຽວກັບສຸຂະພາບທາງຈິດ. ບັນດາບໍລິສັດການບິນໃນເອີຣົບ ກໍໄດ້ຮັບການສະເໜີໃຫ້ປະຕິບັດບົດກວດກາທາງຈິດຂອງນັກບິນ ກ່ອນທີ່ເຂົາເຈົ້າເລີ່ມຮັບວຽກ.

    ນອກຈາກນັ້ນແລ້ວ ບໍລິສັດການບິນທຸກໆແຫ່ງໃນເອີຣົບ ແລະ ຕ່າງປະເທດ ທີ່ບິນຢູ່ໃນເຂດທ້ອງຟ້າຂອງສະຫະພາບເອີຣົບ (EU) ກໍຕ້ອງໄດ້ກວດກາປະລິມານ ແອນກໍຮໍ ແລະສານກະຕຸ້ນປະສາດ ສຳລັບບັນດານັກບິນ ແລະຈຸບິນ. ພວກນັກບິນກໍຍັງຄົງກວດກາສຸຂະພາບປະຈຳປີຢູ່ເປັນປະຈຳ ແຕ່ວ່າການກວດສຸຂະພາບນີ້ ບໍ່ໄດ້ລວມເຖິງການກວດກາສຸຂະພາບທາງຈິດ.

    ຂໍ້ກຳນົດໃໝ່ຂອງ EC ແມ່ນອີງໃສ່ການສະເໜີກ່ຽວກັບຄວາມປອດໄພ ຂອງອົງການຄວາມປອດໄພການບິນຂອງເອີຣົບ (EASA). ບັນດາບໍລິສັດການບິນ ແລະບັນດາປະເທດທີ່ຂຶ້ນກັບ EU ມີໄລຍະຂ້າມຜ່ານແກ່ຍາວເປັນເວລາ 2 ປີ ເພື່ອປະຕິບັດຂໍ້ກຳນົດນີ້ຢ່າງຈິງຈັງ.

    EC ຮັດເຄັ່ງຂໍ້ກຳນົດ ກ່ຽວກັບສຸຂະພາບທາງຈິດຂອງນັກບິນ ທ່າມກາງທີ່ເອີຣົບຍັງບໍ່ລືມໄພພິບັດທາງການບິນ ຊຶ່ງເກີດຂຶ້ນຢູ່ທີ່ຝຣັ່ງ ເມື່ອກ່ອນໜ້ານີ້ສາມປີ ເຮັດໃຫ້ຜູ້ໂດຍສານ ແລະ ຈຸບິນທັງໝົດ 150 ຄົນເສຍຊີວິດ. ຜ່ານການວິເຄາະກັບດຳຂອງເຮືອບິນທີ່ປະສົບເຫດນັ້ນ ພວກນັກສືບສວນສອບສວນ ໃຫ້ການສະຫຼຸບວ່າ ອຸບັດເຫດເກີດຂຶ້ນແມ່ນຍ້ອນການກະທຳຂອງຜູ້ຊ່ວຍນັກບິນ (ນັກບິນສຳຮອງ) ໃນເວລາທີ່ເຂົາຢູ່ໃນຫ້ອງຂັບພຽງຄົນດຽວ. ຜູ້ພິພາກສາເວົ້າວ່າ ຜູ້ຊ່ວຍນັກບິນຂອງເຮືອບິນດັ່ງກ່າວ ມີອາການປະສາດປັ່ນປ່ວນ ແລະເຄີຍມີຈຸດປະສົງຂ້າຕົວຕາຍມາກ່ອນ.

 

ຂ່າວທີ່ກ່ຽວຂ້ອງ