ສ ອາ​ເມ​ຣິ​ກາ ໜູນ​ຊ່ວຍ​ກະສິກອນ​ທີ່​ໄດ້​ຮັບ​ຄວາມ​ເສຍ​ຫາຍ​ຈາກ​ການ​ຕອບ​ໂຕ້​ດ້ານ​ການ​ຄ້າ

167 27 ກ.ກ. 2018 ຂ່າວຕ່າງປະເທດ
ສ ອາ​ເມ​ຣິ​ກາ ໜູນ​ຊ່ວຍ​ກະສິກອນ​ທີ່​ໄດ້​ຮັບ​ຄວາມ​ເສຍ​ຫາຍ​ຈາກ​ການ​ຕອບ​ໂຕ້​ດ້ານ​ການ​ຄ້າ

     ໃນ​ການເຄື່ອນໄຫວ ທີ່​ສະແດງ​ໃຫ້​ເຫັນ​ເຖິງ​ການ​ຍອມຮັບ​ເປັນ​ເທື່ອ​ທຳ​ອິດ ຂອງ​ອຳນາດ​ການ​ປົກຄອງ​ຂອງ​ປະທານາທິບໍດີ ສ ອາ​ເມ​ຣິ​ກາ ໂດ​ນາ​​ລ ທຣຳ ກ່ຽວ​ກັບ​​ນ​ະ​ໂຍ​ບາຍ​ປົກ​ປ້ອງ​ການ​ຄ້າ ທີ່​ພວມ​ຄຸກ​ຄາມ​ຕໍ່​ປະຊາຊົນ​ໃນ ສ ອາ​ເມ​ຣິ​ກາ ນັ້ນ ເມື່ອ​ວັນ​ທີ 24 ກໍລະກົດ ລັດຖະບານ ສ ອາ​ເມ​ຣິ​ກາ ໄດ້​ແຈ້ງ​ໃຫ້​ຮູ້​ເຖິງ​ການ​ໃຫ້ການ​ໜູນ​ຊ່ວຍ ເປັນ​ມູນ​ຄ່າ 12 ຕື້​ໂດ​ລາ​ສະຫະລັດ ໃຫ້​ແກ່​ບັນດາ​ກະສິກອນ ທີ່​ໄດ້​ຮັບ​ຜົນ​ກະທົບ​ຈາກ​ມາດ​ຕະການ​ຕອບ​ໂຕ້ ຈາກ​ບັນດາ​ຄູ່​ຮ່ວມ​ຕ່າງປະເທດ.

    ທ່ານ ຊັນ​ນີ ເພີ​ດູ ລັດຖະມົນຕີ​ກະສິກຳ​ຂອງ ສ ອາ​ເມ​ຣິ​ກາ ກ່າວ​ຕໍ່​ສື່​ມວນ​ຊົນ​ວ່າ ໂຄງການ​ດັ່ງກ່າວ ຈະ​ໃຫ້ການ​ໜູນ​ຊ່ວຍ​ບັນດາ​ກະສິກອນ ທີ່​ໄດ້​ແບກ​ຫາບ​ຄວາມ​ເສຍ​ຫາຍ ທີ່​ຄາດ​ວ່າ​ມີ​ມູນ​ຄ່າ​ເຖິງ 11 ຕື້ ໂດ​ລາ​ສະຫະລັດ ຍ້ອນ​ການ​ປະຕິບັດ​ພາສີ​ຕອບ​ໂຕ້ ຂອງ​ບັນດາ​ຄູ່​ຮ່ວມ​ທາງ​ດ້ານ​ການ​ຄ້າ​ຂອງ ສ ອາ​ເມ​ຣິ​ກາ.

    ທ່ານ ເພີ​ດູ ເວົ້າ​ວ່າ ນີ້​ເປັນ​ວິທີ​ການ​ແກ້​ໄຂ “ໄລຍະ​ສັ້ນ ເພື່ອ​ໃຫ້​ຄວາມ​ຊ່ວຍເຫຼືອ​ກະສິກອນ​ໃນ ສ ອາ​ເມ​ຣິ​ກາ ພ້ອມ​ທັງ​ເປັນ​ການ​ເຮັດ​ໃຫ້​ປະທານາທິບໍດີ ທຣຳ ມີ​ເວລາ​ຕື່ມ​ອີກ ໃນ​ການ​ເຈລະຈາ​ກ່ຽວ​ກັບ​ຂໍ້​ຕົກລົງ​ການ​ຄ້າ​ທີ່​ຍາວ​ກວ່າ ເພື່ອ​ຊ່ວຍເຫຼືອ​ຂະແໜງການ​ກະສິກຳ ແລະ​ຂົງເຂດ​ອື່ນໆ​ອີກ ທີ່​ໄດ້​ຮັບ​ຄວາມ​ເສຍ​ຫາຍ​ຍ້ອນ “ການ​ກະທຳ​ທາງ​ດ້ານ​ການ​ຄ້າ​ທີ່​ບໍ່​ຍຸຕິ​ທຳ ຂອງ​ປະເທດ​ອື່ນໆ.”

    ໃນ 3 ໂຄງການ​ໃຫ້​ຄວາມ​ຊ່ວຍເຫຼືອ​ກອບ​ກູ້​ຂອງ​ກະຊວງ​ກະສິກຳ ສ ອາ​ເມ​ຣິ​ກາ ນັ້ນ ບັນດາ​ກະສິກອນ ຫຼື​ຈະ​ໄດ້​ຮັບ​ບ້ວງ​ເງິນ​ໜູນ​ຊ່ວຍ​ໂດຍ​ກົງ ຫຼື​ສາມາດ​ຂາຍ​ປະລິມານ​ສິນຄ້າ​ທີ່​ມີ​ເຫຼືອ​ຢູ່ ໃຫ້​ແກ່​ລັດຖະບານ ເພື່ອ​ນຳ​ໃຊ້​ໃຫ້​ແກ່​ທະນາຄານ​ສະບຽງ​ອາຫານ  ແລະ​ລາຍການ​ຊ່ວຍເຫຼືອ​ດ້ານ​ສະບຽງ​ອາຫານ​ອື່ນໆ. ນອກຈາກ​ນັ້ນແລ້ວ ລັດຖະບານ ສ ອາ​ເມ​ຣິ​ກາ ກໍ​ຈະ​ດຳເນີນ​ການ​ເປີດ​ກວ້າງ​ຕະຫຼາດ ໃໝ່ໆ.

    ທ່ານ ເພີ​ດູ ເວົ້າ​ວ່າ ໂຄງການ​ໜູນ​ຊ່ວຍ​ດັ່ງກ່າວ​ເປັນ “ຖະແຫຼງການ​ທີ່​ແຂງ​ແກ່ນ” ວ່າ​ປະເທດ​ອື່ນໆ ບໍ່​ສາມາດ​ທີ່​ຈະ “ບີບ” ໃຫ້​ບັນດາ​ຜູ້​ຜະລິດ​ທາງ​ດ້ານ​ກະສິກຳ​ຂອງ ສ ອາ​ເມ​ຣິ​ກາ ເພື່ອ​ບັງຄັບ​ໃຫ້​ປະເທດ​ນີ້​ຕ້ອງ​ຍິນ​ຍອມ.

    ໂລກ​ພວມ​ຢືນ​ຢູ່​ຕໍ່ໜ້າ​ສົງຄາມ​ການ​ຄ້າ​ໃນ​ຂະໜາດ​ກວ້າງ ຊຶ່ງ​ເລີ່ມ​ຂຶ້ນ​ຕົ້ນ​ກໍ​ແມ່ນ​ມາດ​ຕະການ​ປະຕິບັດ​ພາສີ​ກັບ​ອາ​ລູ​ມີ​ນຽມ ແລະ​ເຫຼັກ​ກ້າ​ນຳ​ເຂົ້າ ຕາມ​ລຳດັບ​ທີ 10% ແລະ 25% ຊຶ່ງ ສ ອາ​ເມ​ຣິ​ກາ ນຳ​ອອກ​ມາ​ເພື່ອ​ດັດ​ແກ້ຄວາມ​ສົມ​ດຸນ​ທາງ​ດ້ານ​ການ​ຄ້າ ລະຫວ່າງ ສ ອາ​ເມ​ຣິ​ກາ ກັບ​ບັນດາ​ຄູ່​ຮ່ວມ​ໃນ​ໂລກ ເຮັດ​ໃຫ້​ເກີດ​ກະແສ​ມາດ​ຕະການ​ຕອບ​ໂຕ້​ຂຶ້ນ​ມາ.

 

ຂ່າວທີ່ກ່ຽວຂ້ອງ