ຂ່າວຫຼ້າສຸດ

ຣັດ​ເຊຍ ຂຶ້ນ​ພາສີ​ເພື່ອ​ປະຕິບັດ​ແຜນການ​ໃຊ້​ຈ່າຍ​ຂອງ​ປະທານາທິບໍດີ ປູ​ຕິນ

120 26 ກ.ກ. 2018 ຂ່າວຕ່າງປະເທດ
ຣັດ​ເຊຍ ຂຶ້ນ​ພາສີ​ເພື່ອ​ປະຕິບັດ​ແຜນການ​ໃຊ້​ຈ່າຍ​ຂອງ​ປະທານາທິບໍດີ ປູ​ຕິນ

     ເມື່ອ​ວັນ​ທີ 24 ກໍລະກົດ​ນີ້ ບັນດາ​ສະມາຊິກ​ລັດ​ຖະ​ສະພາ​ຂອງ​ຣັດ​ເຊຍ ໄດ້​ຮັບຮອງ​ຮ່າງ ກົດໝາຍ​ວ່າ​ດ້ວຍ​ການ​ຂຶ້ນ​ພາສີ​ມູນ​ຄ່າ​ເພີ່ມ (VAT) ຈາກ 18% ຂຶ້ນ​ເປັນ 20% ເລີ່ມ​ແຕ່​ປີ 2019 ເປັນຕົ້ນ​ໄປ ທັ້ງ​ນີ້​ກໍ​ເພື່ອ​ເປັນ​ການ​ເພີ່ມ​ລາຍ​ຮັບ ໜູນ​ຊ່ວຍ​ການ​ຊ່ວຍເຫຼືອ​ດ້ານ​ການ​ເງິນ ໃຫ້​ແກ່​ແຜນການ​ຂອງ​ປະທານາທິບໍດີ ວາ​ລາ​ດີ​ເມຍ ປູ​ຕິນ ໃນ​ການ​ແກ້​ໄຂ​ວຽກ​ງານ​ດູ​ແລ​ສຸຂະພາບ ການ​ສຶກ​ສາ ແລະ​ພື້ນຖານ​ໂຄງ​ລ່າງ.

     ຮ່າງ​ກົດໝາຍ​ດັ່ງກ່າວ ໄດ້​ຮັບ​ການ​ຮັບຮອງ​ຈາກ​ພັກ​ປະເທດ​ຊາດ​ຣັດ​ເຊຍ (ພັກ​ກຳ​ອຳນາດ) ແລ້ວ ເຖິງ​ແມ່ນ​ວ່າຄວາມ​ສ່ຽງ​ໃນ​ການ​ຂຶ້ນ​ພາສີ ອາດ​ເຮັດ​ໃຫ້​ເງິນ​ເຟີ້​ພຸ່ງ​ສູງ​ຂຶ້ນ ແລະ​ເປັນ​ຜົນ​ກະທົບ​ຕໍ່​ຄວາມ​ຕ້ອງການ​ຂອງ​ຜູ້​ບໍລິໂພກ​ກໍ​ຕາມ. ທາງ​ການ​ຣັດ​ເຊຍ ໃຫ້​ຮູ້​ວ່າ ມາດ​ຕະການ​ດັ່ງກ່າວ​ຈະ​ນຳ​ລາຍ​ຮັບ​ມາ​ໄດ້ 620 ຕື້​ຣຸບ (ເທົ່າ​ກັບ 10,3 ຕື້​ໂດ​ລາ​ສະຫະລັດ)/ປີ ໃຫ້​ແກ່​ຄັງ​ເງິນ​ແຫ່ງ​ຊາດ.

    ປະທານາທິບໍດີ ປູ​ຕິນ ໄດ້​ໃຫ້​ສັນຍາ​ເຖິງ​ການ​ຍົກ​ສູງ​ລະດັບ​ການ​ດຳລົງ​ຊີວິດ ຫັນ​ວຽກ​ງານ​ການ​ດູ​ແລ​ສຸຂະພາບ ແລະ ການ​ສຶກ​ສາ​ໃຫ້​ທັນ​ສະໄໝ ພ້ອມ​ກັນ​ນັ້ນ​ຍົກ​ລະດັບ​ພື້ນຖານ​ໂຄງ​ລ່າງ.

     ເມື່ອ​ອາທິດ​ກ່ອນ ບັນດາ​ສະມາຊິກ​ລັດ​ຖະ​ສະພາ​ຂອງ​ຣັດ​ເຊຍ ກໍ​ໄດ້​ຮັບຮອງ​ຮ່າງ​ກົດໝາຍ​ອື່ນ​ອີກ​ໜຶ່ງ​ສະບັບ ທີ່​ເປັນ​ການ​ສະໜັບສະໜູນ​ແຜນການ​ຂອງ​ລັດຖະບານ ໃນ​ການ​ເພີ່ມ​ອາຍຸ​ພັກຜ່ອນ​ຮັບ​ເບ້ຍ​ບຳນານ​ຂຶ້ນ​ເປັນ 63 ປີ ສຳລັບ​ເພດ​ຍິງ ແລະ 65 ປີ ສຳລັບ​ເພດ​ຊາຍ ຈາກ​ທີ່​ໃຊ້​ຢູ່​ໃນ​ປັດຈຸບັນ​ກໍ​ຄື 55 ປີ ສຳລັບ​ເພດ​ຍິງ ແລະ 60 ປີ ສຳລັບ​ເພດ​ຊາຍ.

ຂ່າວທີ່ກ່ຽວຂ້ອງ