ລາວ-ຫວຽດນາມ ເພີ່ມທະວີການຮ່ວມມື

354 26 ກ.ກ. 2018 ຂ່າວໜ້າ​ໜຶ່ງ
ລາວ-ຫວຽດນາມ ເພີ່ມທະວີການຮ່ວມມື

    ວັນ​ທີ 25 ກໍ­ລະ­ກົດ 2018 ທີ່​ຫ້ອງ​ວ່າ­ການ​ສູນ​ກາງ​ພັກ ສະ­ຫາຍ ບຸນ​ຍັງ ວໍ­ລະ​ຈິດ ເລ­ຂາ­ທິ­ການ​ໃຫຍ່ ຄະ­ນະ​ບໍ­ລິ­ຫານ​ງານ​ສູນ​ກາງ​ພັກ ປະ­ຊາ­ຊົນ ປະ­ຕິ­ວັດ​ລາວ ປະ­ທານ​ປະ­ເທດ ແຫ່ງ ສປປ ລາວ ໄດ້​ຕ້ອນ­ຮັບ​ການ​ເຂົ້າ​ຢ້ຽມ​ຄຳ­ນັບ​ຂອງ​ສະ­ຫາຍ ຫວໍ ວັນ ເຖືອງ ກຳ­ມະ­ການ​ກົມ​ການ­ເມືອງ​ສູນ​ກາງ​ພັກ ເລ­ຂາ­ທິ­ການ​ສູນ​ກາງ​ພັກ ຫົວ­ໜ້າ​ຄະ­ນະ​ໂຄ­ສະ­ນາ​ສຶກ​ສາ​ສູນ​ກາງ​ພັກ​ກອມ​ມູ​ນິດ​ຫວຽດ­ນາມ ພ້ອມ​ດ້ວຍ​ຄະ­ນະ ໂອ­ກາດ​ທີ່​ຄະ­ນະ​ດັ່ງ­ກ່າວ​ເດີນ­ທາງ​ມາ​ຢ້ຽມ­ຢາມ ແລະ ເຮັດ​ວຽກ​ຢູ່ ສປປ ລາວ ວັນ​ທີ 24-27 ກໍ­ລະ­ກົດ​ນີ້.

    ສະ­ຫາຍ ບຸນ​ຍັງ ວໍ­ລະ​ຈິດ ໄດ້​ຕີ​ລາ­ຄາ​ສູງ​ຕໍ່​ການ​ຢ້ຽມ­ຢາມ ແລະ ການ​ເຂົ້າ​ຮ່ວມ​ສຳ​ມະ​ນາ​ທິດ​ສະ​ດີ​ລະ­ຫວ່າງ​ພັກ​ປະ­ຊາ­ຊົນ ປະ­ຕິ­ວັດ​ລາວ ແລະ ພັກ​ກອມ​ມູ​ນິດ​ຫວຽດ­ນາມ ຄັ້ງ​ທີ 6 ເຊິ່ງ​ເປັນ​ການ­ຈັດ­ຕັ້ງ​ຜັນ​ຂະ­ຫຍາຍ​ຜົນ​ຂອງ​ການ​ພົບ​ປະ​ລະ­ຫວ່າງ​ການ​ນຳ​ສູງ​ສຸດ​ຂອງ​ສອງ​ພັກ ລາວ-ຫວຽດ­ນາມ ທີ່​ໄດ້​ເປັນ​ເອ­ກະ​ພາບ​ກັນ​ໄລ­ຍະ​ຜ່ານ​ມາ ກ່ຽວ​ກັບ​ການ​ຮັກ­ສາ​ການ​ພົບ​ປະ ແລກ­ປ່ຽນ ການ​ຢ້ຽມ­ຢາມ​ລະ­ຫວ່າງ​ການ​ນຳ​ຂັ້ນ​ສູງ​ສອງ​ພັກ​ຢ່າງ​ເປັນ​ປົກ­ກະ­ຕິ ການ​ຜັດ­ປ່ຽນ​ກັນ​ເປັນ​ເຈົ້າ­ພາບ​ຈັດ​ສຳ​ມະ​ນາ​ທິດ​ສະ​ດີ​ລະ­ຫວ່າງ​ສອງ​ພັກ​ໃນ​ທຸກໆ​ປີ ສະ­ເພາະ​ຄັ້ງ​ນີ້​ໄດ້​ປະ­ກອບ­ສ່ວນ​ອັນ​ສຳ­ຄັນ​ໜຶ່ງ​ເຂົ້າ​ໃນ​ການ​ເພີ່ມ​ທະ­ວີ​ສາຍ​ພົວ­ພັນ​ມິດ­ຕະ­ພາບ​ທີ່​ຍິ່ງ​ໃຫຍ່ ຄວາມ​ສາ­ມັກ­ຄີ​ພິ­ເສດ ແລະ ການ​ຮ່ວມ​ມື​ຮອບ­ດ້ານ​ລະ­ຫວ່າງ ລາວ-ຫວຽດ­ນາມ ໃຫ້​ນັບ​ມື້​ນັບ​ແໜ້ນ​ແຟ້ນ ເລິກ­ເຊິ່ງ ແລະ ເກີດ​ດອກ​ອອກ​ຜົນ​ຍິ່ງໆ​ຂຶ້ນ ເຊິ່ງ​ການ​ສຳ​ມະ​ນາ​ພາຍ​ໃຕ້​ຫົວ­ຂໍ້ ວຽກ​ງານ​ແນວ​ຄິດ​ໃນ​ເງື່ອນ­ໄຂ​ປັດ­ຈຸ­ບັນ ສະ­ພາບ​ຄວາມ​ເປັນ​ຈິງ ບັນ­ຫາ​ຕັ້ງ​ຂຶ້ນ ແລະ ວິ­ທີ​ການ​ແກ້​ໄຂ ເປັນ​ຫົວ­ຂໍ້​ສຳ­ຄັນ ທີ່​ສອງ​ຝ່າຍ​ໄດ້​ພ້ອມ​ກັນ​ຄົ້ນ­ຄວ້າ ແລກ­ປ່ຽນ​ບົດ­ຮຽນ ເຊິ່ງ​ກັນ ແລະ ກັນ ເພື່ອ​ຮັບ​ໃຊ້​ໃຫ້​ແກ່​ວຽກ​ງານ​ກຳ​ອຳ­ນາດ​ຢູ່​ທັງ​ສອງ​ປະ­ເທດ ລາວ-ຫວຽດ­ນາມ ບົນ​ເສັ້ນ­ທາງ​ສ້າງ­ສາ​ພັດ­ທະ­ນາ​ປະ­ເທດ​ຊາດ​ໄປ​ສູ່​ຈຸດ­ໝາຍ​ສັງ­ຄົມ​ນິ­ຍົມ ທັງ​ເປັນ​ການ​ປະ­ກອບ­ສ່ວນ​ເຮັດ​ໃຫ້​ຄັງ​ສາງ​ທິດ​ສະ​ດີ​ລະ­ຫວ່າງ​ສອງ​ພັກ​ໃຫ້​ນັບ​ມື້​ມີ​ເນື້ອ​ໃນ​ທີ່​ອຸ­ດົມ­ສົມ­ບູນ​ຂຶ້ນ.

   ໂອ­ກາດ​ນີ້ ສະ­ຫາຍ ຫວໍ ວັນ ເຖືອງ ໄດ້​ສະ­ແດງ​ຄວາມ​ຂອບ­ໃຈ​ຕໍ່​ສະ­ຫາຍ ບຸນ​ຍັງ ວໍ­ລະ​ຈິດ ປະ­ທານ​ປະ­ເທດ ທີ່​ໄດ້​ໃຫ້​ກຽດ​ຕ້ອນ­ຮັບ​ຢ່າງ​ອົບ​ອຸ່ນ ພ້ອມ​ທັງ​ຕີ​ລາ­ຄາ​ຜົນ­ສຳ­ເລັດ​ທີ່​ປະ­ຊາ­ຊົນ​ລາວ​ບັນ­ດາ­ເຜົ່າ​ຍາດ​ມາ​ໄດ້ ພາຍ​ໃຕ້​ການ​ນຳ­ພາ​ຂອງ​ພັກ​ປະ­ຊາ­ຊົນ ປະ­ຕິ­ວັດ​ລາວ ຕີ​ລາ­ຄາ​ສູງ​ຕໍ່​ຜົນ­ສຳ­ເລັດ​ອັນ​ຈົບ­ງາມ​ຂອງ​ການ​ຢ້ຽມ­ຢາມ ສສ ຫວຽດ­ນາມ ຂອງ​ສະ­ຫາຍ​ເລ­ຂາ­ທິ­ການ​ໃຫຍ່​ໃນ​ຕົ້ນ​ເດືອນ​ກໍ­ລະ­ກົດ ທີ່​ຜ່ານ​ມາ.

ຂ່າວທີ່ກ່ຽວຂ້ອງ