ຮ່ວມແຮງຮ່ວມໃຈ ໃຫ້ການຊ່ວຍເຫຼືອຮີບດ່ວນຕໍ່ຜູ້ປະສົບໄພ ແຂວງອັດຕະປື

435 26 ກ.ກ. 2018 ຂ່າວໜ້າ​ໜຶ່ງ
ຮ່ວມແຮງຮ່ວມໃຈ ໃຫ້ການຊ່ວຍເຫຼືອຮີບດ່ວນຕໍ່ຜູ້ປະສົບໄພ ແຂວງອັດຕະປື

   ຈາກ​ສະ­ພາບ​ທີ່​ເກີດ​ຂຶ້ນ ຂອງ​ວັນ​ທີ 23 ກໍ­ລະ­ກົດ 2018 ຢູ່​ເມືອງ​ສະ­ໜາມ​ໄຊ ແຂວງ​ອັດ​ຕະ​ປື ກ່ຽວ​ກັບ​ອຸ­ບັດ​ຕິ​ເຫດ­ການ​ແຕກ​ຫັກ​ຂອງ​ເຂື່ອນ​ກັ້ນ​ນ້ຳ ແຫ່ງ​ທີ 3 ເຊ​ປຽນ-ເຊ​ນ້ຳ​ນ້ອຍ ທ່ານ ທອງ​ລຸນ ສີ​ສຸ​ລິດ ນາ­ຍົກ­ລັດ­ຖະ­ມົນ­ຕີ ແຫ່ງ ສປປ ລາວ ໄດ້​ຖະ­ແຫຼງ​ຂ່າວ​ຕໍ່​ສື່​ມວນ​ຊົນ ຢູ່​ທີ່​ຫ້ອງ​ວ່າ­ການ​ສຳ­ນັກ­ງານ​ນາ­ຍົກ­ລັດ­ຖະ­ມົນ­ຕີ ໃນ​ວັນ​ທີ 25 ກໍ­ລະ­ກົດ 2018 ວ່າ: ຈາກ​ຜົນ​ກະ­ທົບ​ໄພ​ນ້ຳ​ຖ້ວມ​ຄັ້ງ​ນີ້ ແມ່ນ​ຮ້າຍ​ແຮງ​ໃຫຍ່​ຫຼວງ ອາດ​ຈະ​ເວົ້າ​ໄດ້​ວ່າ​ເປັນ​ຄັ້ງ​ທຳ​ອິດ​ໃນ​ຮອບ​ຫຼາຍ​ສິບ​ປີ ສາ­ເຫດ​ຍ້ອນ​ຝົນ­ຕົກ​ໜັກ​ຕິດ­ຕໍ່​ກັນ​ຫຼາຍ​ວັນ ປະ­ລິ­ມານ​ນ້ຳ​ຂຶ້ນ​ສູງ​ຫຼາຍ ເຮັດ​ໃຫ້​ອ່າງ­ເກັບ­ນ້ຳ​ສຳ­ຮອງ​ຂອງ​ເຂື່ອນ​ໄຟ­ຟ້າ​ເຊ​ປຽນ-ເຊ​ນ້ຳ​ນ້ອຍ ຮັບ​ນ້ຳ​ບໍ່​ໄດ້​ເລີຍ​ແຕກ ນ້ຳ​ຊຸ​ລົງ​ມາ­ສູ່​ທີ່​ຕ່ຳ ບ້ານ​ເຮືອນ​ປະ­ຊາ­ຊົນ​ຢ່າງ​ກະ­ທັນ­ຫັນ ເຮັດ​ໃຫ້​ບ້ານ​ເຮືອນ​ຈົມ​ຢູ່​ໃຕ້​ນ້ຳ ກະ­ແສ­ນ້ຳ​ໄຫຼ​ແຮງ​ພັດ​ເອົາ​ເຮືອນ ພ້ອມ​ດ້ວຍ​ຄົນ​ໄປ​ຕາມ​ກະ­ແສ­ນ້ຳ.

   ປະ­ຊາ­ຊົນ​ຈຳ­ນວນ​ໜຶ່ງ​ຫາຍ​ສາບ​ສູນ ຍັງ​ກຳ­ລັງ​ສະ­ຫຼຸບ​ຈຳ­ນວນ​ບໍ່​ໄດ້​ໝົດ ສ່ວນ​ປະ­ຊາ­ຊົນ​ທີ່​ຫຼົບ​ໄປ​ຢູ່​ເທິງ​ຫຼັງ­ຄາ​ເຮືອນ ເທິງ​ຕົ້ນ­ໄມ້​ໃຫຍ່ ລໍ­ຖ້າ​ການ​ຊ່ວຍ­ເຫຼືອ ໃນ​ຕອນ​ແລງ​ຂອງ​ວັນ​ທີ 24 ກໍ­ລະ­ກົດ 2018 ເຖິງ​ເວ­ລາ 19:00 ໂມງ ໄດ້​ກອບ​ກູ້​ມາ​ໄດ້​ໝົດ​ແລ້ວ ແລະ ນຳ­ໄປ​ໄວ້​ໃນ​ບ່ອນ​ປອດ​ໄພ ພ້ອມ​ທັງ​ຈັດ​ສັນ​ທີ່­ຢູ່​ຊົ່ວ­ຄາວ ສະ­ເພາະ​ຈຳ­ນວນ​ຜູ້​ທີ່​ຂາດ​ທີ່­ຢູ່​ອາ­ໄສ ມີ​ເຖິງ 587 ຄອບ­ຄົວ ມີ 3.060 ຄົນ ຜູ້​ສູນ­ຫາຍ​ມີ​ເຖິງ 131 ຄົນ ແລະ ກຳ­ລັງ​ຖືກ​ຜົນ​ກະ­ທົບ 13 ບ້ານ ເພາະ​ນ້ຳ​ຈາກ​ຈຸດ​ຖືກ​ກະ­ທົບ​ທຳ​ອິດ​ນັ້ນ ໄດ້​ຫຼຸດ​ລະ­ດັບ​ນ້ຳ​ລົງ ແຕ່​ປະ­ລິ­ມານ​ນ້ຳ​ຊ້ຳ​ຜັດ​ກຳ­ລັງ​ໄຫຼ​ເທ​ລົງ​ໃສ່ 5-6 ບ້ານ​ທາງ​ໃຕ້​ຕື່ມ ໜ່ວຍ​ງານ​ທີ່​ປະ­ຕິ­ບັດ​ພື້ນ​ທີ່​ຈະ​ສືບ­ຕໍ່​ໄປ​ກອບ​ກູ້​ຕໍ່​ໄປ.

   ທ່ານ​ນາ­ຍົກ­ລັດ­ຖະ­ມົນ­ຕີ​ກ່າວ​ຕື່ມ​ວ່າ: ຂ້າ­ພະ­ເຈົ້າ​ໄດ້​ລົງ​ຕິດ­ຕາມ​ຢ່າງ​ໃກ້­ຊິດ ໃນ​ການ​ດຳ­ເນີນ​ການ​ແກ້​ໄຂ​ໃນ​ຄັ້ງ​ນີ້ ແລະ ໄດ້​ລົງ​ກວດ­ກາ​ຊີ້​ນຳ​ດ້ວຍ​ຕົນ​ເອງ ໃນ​ພື້ນ​ທີ່​ຕົວ​ຈິງ ແລະ ຂໍ​ສະ­ແດງ​ຄວາມ​ຮູ້​ບຸນ­ຄຸນ ຂອບ­ໃຈ​ຕໍ່​ການ​ຊ່ວຍ­ເຫຼືອ​ຂອງ​ທຸກ​ພາກ­ສ່ວນ ດ້ວຍ​ນ້ຳ​ໃສ​ໃຈ​ຈິງ ດ້ວຍ​ຄວາມ​ເປັນ​ຫ່ວງ​ຂອງ​ປະ­ຊາ­ຊົນ​ລາວ ທີ່​ມີ​ຕໍ່​ປະ­ຊາ­ຊົນ ຜູ້​ຖືກ​ເຄາະ​ຮ້າຍ​ໃນ​ຄັ້ງ​ນີ້ ແລະ ຂ້າ­ພະ­ເຈົ້າ​ຕາງ­ໜ້າ​ໃຫ້​ລັດ­ຖະ­ບານ ແລະ ປະ­ຊາ­ຊົນ​ລາວ ຂໍ​ຂອບ­ໃຈ​ຢ່າງ​ຈິງ​ໃຈ​ຕໍ່​ການ­ສະ­ແດງ​ຄວາມ​ເຫັນ­ໃຈ ເຈດ​ຈຳ­ນົງ ໃຫ້­ການ​ຊ່ວຍ­ເຫຼືອ​ຈາກ​ລັດ­ຖະ­ບານ ແລະ ປະ­ຊາ­ຊົນ​ປະ­ເທດ​ເພື່ອນ​ມິດ ລວມ​ທັງ​ອົງ​ການ­ຈັດ­ຕັ້ງ​ສາ­ກົນ ສິ່ງ​ດັ່ງ­ກ່າວ​ໄດ້​ສ້າງ​ກຳ­ລັງ​ໃຈ​ໃຫ້​ແກ່​ຜູ້​ປະ­ສົບ​ເຄາະ​ຮ້າຍ​ໃນ​ຄັ້ງ​ນີ້ ເພື່ອ​ສາ­ມາດ​ເຮັດ​ໃຫ້​ສະ­ພາບ​ຟື້ນ​ຟູ​ເຂົ້າ​ສູ່​ຄວາມ​ເປັນ​ປົກ­ກະ­ຕິ​ໂດຍ​ໄວ ພ້ອມ​ທັງ​ຂໍ​ຮຽກ­ຮ້ອງ​ໃຫ້​ເພື່ອນ​ຮ່ວມ​ຊາດ​ໃນ​ທົ່ວ​ປະ­ເທດ ແລະ ພີ່­ນ້ອງ​ລາວ​ໃນ​ຕ່າງ­ປະ­ເທດ ຈົ່ງ​ໄດ້​ເອົາ­ໃຈ­ໃສ່​ຊ່ວຍ­ເຫຼືອ​ເພື່ອ​ແກ້​ໄຂ​ເຫດ­ການ​ຄັ້ງ​ນີ້ ແລະ ມີ​ຄວາມ​ເຊື່ອ​ໝັ້ນ​ວ່າ ເຫດ­ການ​ດັ່ງ­ກ່າວ ຈະ​ໄດ້​ຮັບ​ການ​ແກ້​ໄຂ ແລະ ສະ­ພາບ​ຈະ​ກ້າວ​ເຂົ້າ​ສູ່​ຄວາມ​ເປັນ​ປົກ­ກະ­ຕິ​ໂດຍ​ໄວ ພ້ອມ​ທັງ​ໃຫ້​ທຸກ​ຄົນ​ມີ​ສະ­ຕິ​ຕໍ່​ຂ່າວ​ຄາວ​ທີ່​ອອກ​ມາ ເພື່ອ​ບໍ່​ໃຫ້​ເປັນ​ການ​ສ້າງ​ຄວາມ​ເຂົ້າ­ໃຈ​ຜິດ​ເຂວ​ໄປ​ຕ່າງໆ​ນາໆ ແລະ ສຸມ​ກຳ­ລັງ​ແຮງ ກຳ­ລັງ​ຊັບ ກຳ­ລັງ​ໃຈ​ຂອງ​ພວກ​ເຮົາ​ທຸກ​ຄົນ ເພື່ອ​ຊ່ວຍ­ເຫຼືອ​ກັນ​ໃຫ້​ສະ­ພາບ​ກັບ​ຄືນ​ສູ່​ປົກ­ກະ­ຕິ​ໂດຍ​ໄວ ແລະ ຂໍ​ໃຫ້​ພີ່­ນ້ອງ​ປະ­ຊາ­ຊົນ ແຕ່​ເໜືອ​ຮອດ​ໃຕ້ ສືບ­ຕໍ່​ຕິດ­ຕາມ​ສະ­ພາບ​ດິນ​ຟ້າ​ອາ­ກາດ ທີ່​ມີ​ການ​ປ່ຽນ­ແປງ​ຢູ່​ຕະ­ຫຼອດ​ເວ­ລາ ມີ​ສະ­ຕິ​ລະ­ວັງ​ຕົວ​ໄວ້​ຢູ່​ສະ­ເໝີ ເພື່ອ​ກຽມ​ຮັບ​ມື​ກັບ​ສະ­ຖາ­ນະ​ການ​ທີ່​ຈະ​ເກີດ​ຂຶ້ນ​ຂອງ​ໄພ​ທຳ​ມະ​ຊາດ ແຕ່​ລະ​ຄັ້ງ ເພື່ອ ຫຼີກ​ລ່ຽງ​ຄວາມ​ເສຍ​ຫາຍ​ທີ່​ຈະ​ເກີດ​ຂຶ້ນ.

   ຂ້າ­ພະ­ເຈົ້າ​ຂໍ​ມອບ​ໃຫ້​ຄະ­ນະ​ພັກ ອຳ­ນາດ​ການ​ປົກ­ຄອງ ແລະ ທຸກ​ໜ່ວຍ​ງານ ນັບ​ແຕ່​ສູນ​ກາງ ແລະ ທ້ອງ­ຖິ່ນ ຈົ່ງ​ນຳ­ພາ​ປະ­ຊາ­ຊົນ ດ້ວຍ​ຄວາມ​ຮັບ­ຜິດ­ຊອບ​ສູງ​ໃນ​ການ​ເຕືອນ​ສະ­ຕິ ນຳ­ພາ​ກະ­ກຽມ​ຮັບ​ມື ຫຼີກ​ລ່ຽງ​ຜົນ​ກະ­ທົບ ເມື່ອ​ມີ​ເຫດ​ເກີດ​ຂຶ້ນ ຕ້ອງ​ມີ​ແຜນ​ປະ­ຕິ­ບັດ​ງານ​ຮັບ​ມື​ຢ່າງ​ມີ​ປະ​ສິດ­ທິ​ຜົນ ສ່ວນ​ການ​ປະ​ເມີນ​ຜົນ​ເສຍ​ຫາຍ​ນັ້ນ​ຍັງ​ບໍ່​ສາ­ມາດ​ປະ​ເມີນ​ຜົນ​ໄດ້​ເທື່ອ ສຳ­ລັບ​ການ​ຊ່ວຍ­ເຫຼືອ​ຕໍ່​ຜູ້​ປະ­ສົບ​ໄພ​ຄັ້ງ​ນີ້ ແມ່ນ​ສາ­ມາດ​ຊ່ວຍ​ໄດ້​ຫຼາຍ​ທາງ ໂດຍ​ເນັ້ນ​ກະ­ຊວງ​ແຮງ​ງານ ແລະ ສະ­ຫວັດ­ດີ​ການ​ສັງ­ຄົມ ແລະ ພະ​ແນກ​ແຮງ​ງານ​ສະ­ຫວັດ­ດີ​ການ​ສັງ­ຄົມ ຂອງ​ແຂວງ ນະ­ຄອນ­ຫຼວງ ເປັນ​ຫຼັກ ເພື່ອ​ເຕົ້າ­ໂຮມ​ການ​ຊ່ວຍ­ເຫຼືອ ແລະ ສິ່ງ​ຕ້ອງ­ການ​ອັນ​ຮີບ​ດ່ວນ​ຂອງ​ຜູ້​ປະ­ສົບ​ໄພ ແມ່ນ​ເຄື່ອງ​ອຸ­ປະ­ໂພກ ແລະ ບໍ­ລິ­ໂພກ ໂດຍ​ສະ­ເພາະ ນ້ຳ​ດື່ມ ຢາ​ປິ່ນ­ປົວ​ພະ­ຍາດ ແລະ ເຄື່ອງ­ໃຊ້​ປະ­ຈຳ​ວັນ​ທີ່​ຈຳ­ເປັນ.

ຂ່າວທີ່ກ່ຽວຂ້ອງ