ລາວ-ມຽນມາ ເສີມຂະຫຍາຍການພົວພັນຮ່ວມມືຫຼາຍດ້ານ

212 26 ກ.ກ. 2018 ຂ່າວໜ້າ​ໜຶ່ງ

    ໂດຍ​ຕອບ​ສະ­ໜອງ​ຕາມ​ຄຳ​ເຊີນ​ຂອງ​ທ່ານ ອູ ຈໍ ຕິນ ລັດ­ຖະ­ມົນ­ຕີ​ກະ­ຊວງ​ຮ່ວມ​ມື​ສາ­ກົນ ແຫ່ງ ສາ­ທາ­ລະ­ນະ​ລັດ ສະ­ຫະ­ພາບ ມຽນ​ມາ ທ່ານ ສະ­ເຫຼີມ​ໄຊ ກົມ​ມະ​ສິດ ລັດ­ຖະ­ມົນ­ຕີ​ກະ­ຊວງ​ການ​ຕ່າງ­ປະ­ເທດ ແຫ່ງ ສາ­ທາ­ລະ­ນະ​ລັດ ປະ­ຊາ­ທິ­ປະ­ໄຕ ປະ­ຊາ­ຊົນ​ລາວ ພ້ອມ​ດ້ວຍ​ຄະ­ນະ ໄດ້​ເດີນ­ທາງ​ຢ້ຽມ­ຢາມ ສສ ມຽນ​ມາ ຢ່າງ​ເປັນ​ທາງ​ການ ໃນ​ລະ­ຫວ່າງ​ວັນ​ທີ 23-24 ກໍ­ລະ­ກົດ ນີ້.

    ວັນ​ທີ 24 ກໍ­ລະ­ກົດ 2018 ທ່ານ ສະ­ເຫຼີມ​ໄຊ ກົມ​ມະ​ສິດ ລັດ­ຖະ­ມົນ­ຕີ​ກະ­ຊວງ​ການ​ຕ່າງ­ປະ­ເທດ ແຫ່ງ ສປປ ລາວ ໄດ້​ພົບ​ປະ​ສອງ​ຝ່າຍ​ກັບ ທ່ານ ອູ ຈໍ ຕິນ ລັດ­ຖະ­ມົນ­ຕີ​ກະ­ຊວງ​ຮ່ວມ​ມື​ສາ­ກົນ ແຫ່ງ ສສ ມຽນ​ມາ ທີ່​ກະ­ຊວງ​ການ​ຕ່າງ­ປະ­ເທດ​ມຽນ​ມາ ໃນ​ການ​ພົບ​ປະ​ຄັ້ງ​ນີ້ ສອງ​ຝ່າຍ​ໄດ້​ຕີ​ລາ­ຄາ​ສູງ​ຕໍ່​ສາຍ​ພົວ­ພັນ​ມິດ­ຕະ­ພາບ ແລະ ການ​ຮ່ວມ​ມື​ອັນ​ໃກ້­ຊິດ​ທີ່​ມີ​ມູນ­ເຊື້ອ​ອັນ​ຍາວ​ນານ ຖານ​ບ້ານ​ໃກ້​ເຮືອນ​ຄຽງ​ທີ່​ດີ­ງາມ ລະ­ຫວ່າງ​ສອງ​ປະ­ເທດ ທີ່​ນັບ​ມື້​ໄດ້​ຮັບ​ການ​ເສີມ​ຂະ­ຫຍາຍ​ຢ່າງ​ບໍ່​ຢຸດ​ຢັ້ງ ເຊິ່ງ​ເຫັນ​ໄດ້​ຈາກ​ການ​ແລກ­ປ່ຽນ​ການ​ຢ້ຽມ­ຢາມ​ເຊິ່ງ​ກັນ ແລະ ກັນ ນັບ​ແຕ່​ການ​ນຳ​ຂັ້ນ​ສູງ ຈົນ​ເຖິງ​ຂັ້ນ​ວິ­ຊາ​ການ​ຂອງ​ສອງ​ປະ­ເທດ ຢ່າງ​ເປັນ​ປົກ­ກະ­ຕິ ສອງ​ຝ່າຍ​ໄດ້​ສະ­ແດງ​ຄວາມ​ຊົມ­ເຊີຍ ຕໍ່​ຄະ­ນະ​ວິ­ຊາ​ການ​ຂອງ​ທັງ​ສອງ​ປະ­ເທດ ທີ່​ໄດ້​ສຳ­ເລັດ​ການ​ຮ່ວມ​ກັນ​ລົງ​ກວດ­ກາ​ບູ­ລະ­ນະ ແລະ ກໍ່­ສ້າງ​ຫຼັກ​ໝາຍ​ຊາຍ​ແດນ ລາວ-ມຽນ​ມາ ທີ່​ເປ່​ເພ​ຄືນ­ໃໝ່ ໃນ​ລະ­ຫວ່າງ​ທ້າຍ​ເດືອນ​ກຸມ­ພາ ຫາ ຕົ້ນ​ເດືອນ​ເມ­ສາ 2018 ຜ່ານ​ມາ.

    ພ້ອມ​ກັນ​ນັ້ນ ສອງ​ຝ່າຍ​ໄດ້​ປຶກ­ສາ​ຫາ­ລື​ກັນ ເພື່ອ​ສືບ­ຕໍ່​ເສີມ​ຂະ­ຫຍາຍ​ການ​ພົວ­ພັນ​ຮ່ວມ​ມື​ໃນ​ດ້ານ​ຕ່າງໆ ໃຫ້​ໄດ້​ຮັບ​ໝາກ­ຜົນ​ຍິ່ງ​ຂຶ້ນ ເປັນ­ຕົ້ນ ແມ່ນ​ການ​ແລກ­ປ່ຽນ​ການ​ຢ້ຽມ­ຢາມ​ຂອງ​ຄະ­ນະ​ຜູ້​ແທນ​ຂັ້ນ​ສູງ ແລະ ຂັ້ນ​ຕ່າງໆ​ໃນ­ຕໍ່­ໜ້າ ການ​ຮ່ວມ​ມື​ລະ­ຫວ່າງ​ສອງ​ຂະ­ແໜງ­ການ​ຕ່າງ­ປະ­ເທດ ດ້ານ​ວຽກ​ງານ​ປ້ອງ​ກັນ​ຊາດ ປ້ອງ​ກັນ​ຄວາມ​ສະ­ຫງົບ ແລະ ວຽກ​ງານ​ຊາຍ​ແດນ ດ້ານ​ຄົມ­ມະ­ນາ­ຄົມ ແລະ ຂົນ­ສົ່ງ ດ້ານ​ການ​ຄ້າ-ການ​ລົງ­ທຶນ ແລະ ຂະ­ແໜງ­ການ​ອື່ນໆ ທັງ​ສອງ​ຝ່າຍ​ເຫັນ​ດີ​ທີ່​ຈະ​ສືບ­ຕໍ່​ຊຸກ­ຍູ້​ການ­ຈັດ­ຕັ້ງ​ປະ­ຕິ­ບັດ ແລະ ຜັນ​ຂະ­ຫຍາຍ​ບັນ­ດາ​ສັນ­ຍາ ບົດ​ບັນ­ທຶກ​ຄວາມ​ເຂົ້າ­ໃຈ ແລະ ຂໍ້​ຕົກ­ລົງ​ຕ່າງໆ ທີ່​ສອງ​ຝ່າຍ​ໄດ້​ລົງ​ນາມ​ຮ່ວມ​ກັນ​ໃນ​ໄລ­ຍະ​ຜ່ານ​ມາ ໃຫ້​ມີ​ໝາກ­ຜົນ​ກວ່າ​ເກົ່າ ນອກ​ນັ້ນ ຄະ­ນະ​ຜູ້​ແທນ​ສອງ​ຝ່າຍ​ຍັງ​ໄດ້​ແລກ­ປ່ຽນ​ຄຳ​ຄິດ​ຄຳ​ເຫັນ ກ່ຽວ​ກັບ​ສະ­ພາບ​ການ​ພາກ​ພື້ນ ແລະ ສາ­ກົນ ທີ່​ມີ​ຄວາມ​ສົນ­ໃຈ​ຮ່ວມ​ກັນ.

ຂ່າວທີ່ກ່ຽວຂ້ອງ