ຂ່າວຫຼ້າສຸດ

ແຈ້ງເຖິງເຂື່ອນໄຟຟ້າທຸກແຫ່ງ ເພີ່ມທະວີເອົາໃຈໃສ່ ການບໍລິຫານຈັດການນ້ຳ ແລະ ຄຸ້ມຄອງການຜະລິດ

226 26 ກ.ກ. 2018 ຂ່າວໜ້າ​ໜຶ່ງ

    ໃນ​ລະ­ຫວ່າງ​ກາງ​ຫາ​ທ້າຍ​ເດືອນ​ກໍ­ລະ­ກົດ 2018 ໄດ້​ເກີດ​ສະ­ພາບ​ຝົນ­ຕົກ​ໜັກ ແລະ ມີ​ບໍ­ລິ­ເວນ​ກວ້າງ​ຢູ່​ໃນ​ຂອບ​ເຂດ​ທົ່ວ​ປະ­ເທດ ໂດຍ​ສະ­ເພາະ ໄດ້​ເກີດ​ພາ­ຍຸ​ເຂດ​ຮ້ອນ​ເຊີນ​ຕິນ ໄດ້​ເຄື່ອນ​ຜ່ານ​ປະ­ເທດ​ເຮົາ​ພາ­ໃຫ້​ມີ​ສະ­ພາບ​ຝົນ­ຕົກ​ໜັກ​ຕິດ­ຕໍ່​ກັນ​ເປັນ​ເວ­ລາ​ຫຼາຍ​ວັນ ອັນ​ໄດ້​ເຮັດ​ໃຫ້​ເກີດ​ສະ­ພາບ​ນ້ຳ​ຖ້ວມ​ຢູ່​ຫຼາຍ​ແຂວງ ແລະ ຄາດ​ຄະ­ເນ​ວ່າ​ໃນ­ຕໍ່­ໜ້າ​ນີ້​ຝົນ​ກໍ່​ຍັງ​ຈະ​ສືບ­ຕໍ່​ຕົກ​ໜັກ​ຕື່ມ​ອີກ​ໃນ​ຕະ­ຫຼອດ​ລະ­ດູ­ຝົນ​ນີ້ ຈາກ​ສະ­ພາບ​ດັ່ງ­ກ່າວ​ຈະ​ເຮັດ​ໃຫ້​ມວນ​ນ້ຳ​ຢູ່​ບັນ­ດາ​ແມ່­ນ້ຳ​ລຳ­ເຊ​ສາຍ​ຕ່າງໆ ນັບ​ທັງ​ບັນ­ດາ​ເຂື່ອນ​ທີ່​ໄດ້​ດຳ­ເນີນ​ການ​ຜະ­ລິດ​ແລ້ວ ແລະ ໂຄງ­ການ​ທີ່​ພວມ​ກໍ່­ສ້າງ​ຢູ່​ໃນ​ປັດ­ຈຸ­ບັນ ພ້ອມ​ກັນ​ນີ້​ກໍ່​ອາດ​ຈະ​ສົ່ງ​ຜົນ​ກະ­ທົບ ແລະ ກໍ່​ຄວາມ​ເສຍ​ຫາຍ​ເຖິງ​ຊີ­ວິດ ສັດ­ລ້ຽງ ຜົນ­ລະ­ປູກ ແລະ ຊັບ​ສິນ​ຂອງ​ປະ­ຊາ­ຊົນ​ບັນ­ດາ­ເຜົ່າ ເປັນ­ຕົ້ນ ແມ່ນ​ຢູ່​ໃນ​ບໍ­ລິ­ເວນ​ໃຕ້​ເຂື່ອນ.

    ວັນ​ທີ 25 ກໍ­ລະ­ກົດ 2018 ທ່ານ ຄຳ​ມະ­ນີ ອິນ​ທິ​ລາດ ລັດ­ຖະ­ມົນ­ຕີ​ກະ­ຊວງ​ພະ­ລັງ­ງານ ແລະ ບໍ່​ແຮ່ ໄດ້​ອອກ​ແຈ້ງ​ການ​ເຖິງ​ຜູ້­ອຳ­ນວຍ­ການ​ເຂື່ອນ​ໄຟ­ຟ້າ ທັງ​ພາກ​ລັດ ແລະ ເອ­ກະ​ຊົນ ກໍ່​ຄື ເຂື່ອນ​ໄຟ­ຟ້າ​ທຸກ​ແຫ່ງ​ໃນ​ຂອບ​ເຂດ​ທົ່ວ​ປະ­ເທດ​ທີ່​ກຳ­ລັງ​ດຳ­ເນີນ​ການ​ຜະ­ລິດ ແລະ ຈັດ​ກັກ​ເກັບ​ນ້ຳ​ເອົາ­ໃຈ­ໃສ່​ຈັດ​ຕັ້ງ​ປະ­ຕິ­ບັດ​ດັ່ງ­ນີ້: ໃຫ້​ທຸກ​ເຂື່ອນ ແລະ ທຸກ​ໂຄງ­ການ​ກໍ່­ສ້າງ​ຕ້ອງ​ເພີ່ມ​ທະ­ວີ​ຄວາມ​ເອົາ­ໃຈ­ໃສ່​ໃນ​ການ​ຕິດ­ຕາມ​ສະ­ພາບ​ການ​ຜັນ​ແປ​ຂອງ​ດິນ​ຟ້າ​ອາ­ກາດ ໂດຍ​ສະ­ເພາະ ແມ່ນ​ສະ­ພາບ​ການ​ເກີດ​ພາ­ຍຸ ມີ​ຝົນ­ຕົກ​ໃນ​ລະ­ດັບ​ຄ່ອຍ​ຫາ​ປານ​ກາງ ແລະ ໜັກ​ຕິດ­ຕໍ່​ກັນ​ຫຼາຍ​ມື້ ຕິດ­ຕາມ​ສະ­ພາບ​ການ​ເພີ່ມ​ຂຶ້ນ ການ​ຫຼຸດ​ລົງ​ບໍ​ລິ​ມາດ​ນ້ຳ​ຢູ່​ໜ້າ​ເຂື່ອນ ແລະ ໃຕ້​ເຂື່ອນ​ໃຫ້​ເປັນ​ລະ­ບົບ​ປົກ­ກະ­ຕິ ພ້ອມ​ດຽວ​ກັນ​ນີ້​ກໍ່​ກະ­ກຽມ​ແຜນ ແລະ ກຽມ­ພ້ອມ​ຮັບ​ມື​ກັບ​ສະ­ພາບ ແລະ ຜົນ​ກະ­ທົບ​ທີ່​ອາດ​ຈະ​ເກີດ​ຂຶ້ນ​ໃຫ້​ທັນ​ການ​ຫຼີກ​ລ່ຽງ​ຜົນ​ເສຍ​ຫາຍ​ທຸກ​ດ້ານ​ທີ່​ອາດ​ຈະ​ເກີດ​ຂຶ້ນ.

   ໃຫ້​ທຸກ​ເຂື່ອນ ແລະ ທຸກ​ໂຄງ­ການ​ກໍ່­ສ້າງ​ຕ້ອງ​ເພີ່ມ​ທະ­ວີ​ຄວາມ​ເອົາ­ໃຈ­ໃສ່​ໃນ​ການ​ຕິດ­ຕາມ​ສະ­ພາບ ແຜນ­ການ​ກັກ​ເກັບ ແລະ ບໍ­ລິ­ຫານ​ນ້ຳ ແຜນ­ການ​ຄຸ້ມ​ຄອງ​ການ​ຜະ­ລິດ ຕິດ­ຕາມ​ກວດ­ກາ​ສະ­ພາບ​ທໍ­ລະ­ນີ​ສາດ ໂຄງ​ສ້າງ​ໂຕ​ເຂື່ອນ ໂຮງ​ຈັກ ສະ ຖາ​ນີ ລະ­ບົບ​ຕາ​ຂ່າຍ​ໄຟ­ຟ້າ ແລະ ໂຄງ​ປະ­ກອບ​ທີ່​ກ່ຽວ­ຂ້ອງ ແລ້ວ​ລາຍ​ງານ​ໃຫ້​ຫ້ອງ­ການ​ກະ­ຊວງ​ພະ­ລັງ­ງານ ແລະ ບໍ່​ແຮ່ ແຕ່​ລະ​ອາ­ທິດ​ໃຫ້​ເປັນ​ປົກ­ກະ­ຕິ ຫຼັງ​ຈາກ​ນັ້ນ​ໃຫ້​ຫ້ອງ­ການ​ກະ­ຊວງ ສັງ​ລວມ​ລາຍ​ງານ​ໃຫ້​ຄະ­ນະ​ນຳ​ກະ­ຊວງ ແລະ ຫ້ອງ​ວ່າ­ການ​ສຳ­ນັກ­ງານ​ນາ­ຍົກ­ລັດ­ຖະ­ມົນ­ຕີ​ເພື່ອ​ຮັບ​ຊາບ.

    ໃນ​ກໍ­ລະ­ນີ​ມີ​ຫຼາຍ​ເຂື່ອນ​ຮ່ວມ​ດຳ­ເນີນ​ການ​ຜະ­ລິດ​ກະ­ແສ​ໄຟ­ຟ້າ​ຢູ່​ລຳ​ນ້ຳ​ດຽວ​ກັນ ໃຫ້​ແຕ່​ລະ​ເຂື່ອນ​ເປັນ​ເຈົ້າ​ການ​ປະ­ສານ​ສົມ­ທົບ​ກັນ​ໃຫ້​ລະ­ອຽດ ເປັນ​ປົກ­ກະ­ຕິ​ກ່ຽວ​ກັບ​ແຜນ­ການ​ກັກ​ເກັບ ແລະ ບໍ­ລິ­ຫານ​ນ້ຳ ແຜນ­ການ​ຄຸ້ມ​ຄອງ​ການ​ຜະ­ລິດ​ຂອງ​ແຕ່​ລະ​ເຂື່ອນ​ໃຫ້​ລະ­ອຽດ ຊັດ​ເຈນ ເພື່ອ​ໃຫ້​ເກີດ​ຄວາມ​ເປັນ​ເອ­ກະ​ພາບ ແລະ ບໍ່​ຕົກ​ທ່າ​ຮັບ​ໃນ​ກໍ­ລະ­ນີ​ໃດ​ໜຶ່ງ​ທີ່​ອາດ​ຈະ​ເກີດ​ຂຶ້ນ.

    ໃນ​ກໍ­ລະ­ນີ​ແຕ່​ລະ​ເຂື່ອນ​ມີ​ແຜນ­ທີ່​ຈະ​ລະ­ບາຍ​ນ້ຳ​ຕ້ອງ​ມີ​ລະ­ບົບ​ແຈ້ງ​ຂ່າວ ໂດຍ​ສົມ­ທົບ​ກັບ​ອຳ­ນາດ​ການ​ປົກ­ຄອງ​ທ້ອງ­ຖິ່ນ​ແຕ່​ລະ​ຂັ້ນ ເພື່ອ​ປະ­ກາດ​ໃຫ້​ປະ­ຊາ­ຊົນ​ບັນ­ດາ­ເຜົ່າ​ຢູ່​ໃນ​ບໍ­ລິ­ເວນ​ໃຕ້​ເຂື່ອນ​ຊາບ​ຢ່າງ​ທົ່ວ​ເຖິງ​ກ່ອນ​ຢ່າງ​ໜ້ອຍ 7 ວັນ ເພື່ອ​ຮັບ­ປະ­ກັນ​ບໍ່​ໃຫ້​ມີ​ສະ­ພາບ​ແຕກ​ຕື່ນ ແລະ ເກີດ​ຄວາມ​ບໍ່​ເຂົ້າ­ໃຈ​ກ່ຽວ​ກັບ​ການ​ລະ­ບາຍ​ນ້ຳ.

    ໃຫ້​ແຕ່​ລະ​ເຂື່ອນ​ຕ້ອງ​ມີ​ແຜນ​ລະ­ອຽດ ໂດຍ​ສົມ­ທົບ​ກັບ​ອຳ­ນາດ​ການ​ປົກ­ຄອງ​ທ້ອງ­ຖິ່ນ​ແຕ່​ລະ​ຂັ້ນ ເພື່ອ​ຮັບ​ມື​ກັບ​ໄພ­ພິ­ບັດ​ໃດ​ໜຶ່ງ​ທີ່​ຈະ​ເກີດ​ຂຶ້ນ ເຊັ່ນ: ສະ­ຖານ­ທີ່​ຮັບ­ປະ­ກັນ​ຄວາມ​ປອດ​ໄພ ເຊິ່ງ​ຈະ​ເຄື່ອນ​ຍ້າຍ​ປະ­ຊາ­ຊົນ​ໄປ​ຢູ່​ຊົ່ວ­ຄາວ ນັບ​ທັງ​ພາ ຫະ​ນະ ວັດ­ຖຸ​ອຸ­ປະ­ກອນ ເພື່ອ​ຮອງ​ຮັບ​ການ​ເຄື່ອນ​ຍ້າຍ​ວັດ­ຖຸ​ສິ່ງ​ຂອງ ສັດ­ລ້ຽງ ແລະ ປະ­ຊາ­ຊົນ​ໄປ​ສູ່​ບ່ອນ​ປອດ​ໄພ​ໄດ້​ທັນ­ທີ.

ຂ່າວທີ່ກ່ຽວຂ້ອງ