ແຈ້ງເຕືອນຈະມີຝົນຕົກໜັກ 3 ວັນຕື່ມອີກ

230 26 ກ.ກ. 2018 ຂ່າວໜ້າ​ໜຶ່ງ

   ເນື່ອງ​ຈາ​ກວ່າ​ລົມ­ພາ­ຍຸ​ດີ​ເປຼ່​ຊັນ ໄດ້​ເຄື່ອນ​ທີ່​ຂຶ້ນ​ຝັ່ງ​ທາງ​ພາກ​ເໜືອ​ສຸດ​ຂອງ​ປະ­ເທດ​ຫວຽດ­ນາມ​ໃນ​ຕອນ​ເຊົ້າ​ວັນ​ທີ 24 ກໍ­ລະ­ກົດ 2018 ແລະ ສືບ­ຕໍ່​ເຄື່ອນ​ທີ່​ມາ​ທາງ​ດ້ານ​ຕາ­ເວັນ­ຕົກ​ຢ່າງ​ຊ້າໆ ເຊິ່ງ​ພາ­ຍຸ​ຫົວ​ນີ້​ຈະ​ອ່ອນ​ກຳ­ລັງ​ລົງ​ເປັນ­ຄວາມ​ກົດ​ດັນ​ອາ­ກາດ​ຕ່ຳ ແລະ ຈະ​ສືບ­ຕໍ່​ປົກ​ຄຸມ​ເຂດ​ພາກ​ເໜືອ​ຂອງ​ຫວຽດ­ນາມ ກວມ​ເອົາ​ເຂດ​ພາກ​ເໜືອ ແລະ ພາກ​ກາງ­ຂອງ​ປະ­ເທດ​ລາວ​ໃນ​ໄລ­ຍະ​ວັນ​ທີ 26-28 ກໍ­ລະ­ກົດ 2018  ເຊິ່ງ​ຈະ​ເຮັດ​ໃຫ້​ລົມ​ມໍ​ລະ​ສຸມ​ຕາ­ເວັນ­ຕົກ​ສ່ຽງ​ໃຕ້​ມີ​ກຳ­ລັງ​ແຮງ​ໃນ​ເຂດ​ພາກ​ກາງ ແລະ ຈະ​ເກີດ​ມີ​ຝົນ­ຕົກ​ໃນ​ລະ­ດັບ​ປານ​ກາງ ແລະ ໜັກ​ຢູ່​ເຂດ​ພາກ​ເໜືອ​ຫາ​ພາກ​ກາງ ແລະ ຕົກ​ໜັກ​ຫຼາຍ​ຢູ່​ບາງ​ທ້ອງ­ຖິ່ນ ເຊັ່ນ: ແຂວງ​ຄຳ​ມ່ວນ ບໍ​ລິ​ຄຳ​ໄຊ ນະ­ຄອນ­ຫຼວງ​ວຽງ​ຈັນ ໄຊ​ສົມ­ບູນ ວຽງ​ຈັນ ຊຽງ​ຂວາງ ຫົວ­ພັນ ຫຼວງ​ພະ​ບາງ ອຸ­ດົມ​ໄຊ ແລະ ແຂວງ​ຜົ້ງ​ສາ­ລີ.

   ດັ່ງ­ນັ້ນ ຈຶ່ງ​ຂໍ​ແຈ້ງ​ເຕືອນ​ມາ​ຍັງ​ຜູ້​ຄຸ້ມ​ຄອງ ແລະ ຜູ້​ປະ­ກອບ​ການ​ເຂື່ອນ​ໄຟ­ຟ້າ​ຈົ່ງ​ຕິດ­ຕາມ​ເຝົ້າ​ລະ­ວັງ​ລະ­ດັບ​ນ້ຳ​ໃນ​ອ່າງ­ເກັບ­ນ້ຳ​ໄວ້​ທີ່­ຢູ່​ໜ້າ​ເຂື່ອນ ແລະ ກ້ອງ​ເຂື່ອນ ເຊິ່ງ​ຈະ​ເຮັດ​ໃຫ້​ລະ­ດັບ​ນ້ຳ​ເພີ່ມ​ຂຶ້ນ​ສູງ ແລະ ຈະ​ມີ​ຄວາມ​ສ່ຽງ​ຕໍ່​ຄວາມ​ປອດ​ໄພ​ຂອງ​ເຂື່ອນ ພ້ອມ​ນີ້ ຂໍ​ແຈ້ງ​ເຕືອນ​ເຖິງ​ອຳ­ນາດ​ການ​ປົກ­ຄອງ​ທຸກ​ພາກ­ສ່ວນ  ແລະ  ພໍ່​ແມ່​ປະ­ຊາ­ຊົນ​ທີ່​ອາ­ໄສ​ຢູ່​ບັນ­ດາ​ແຂວງ​ດັ່ງ­ກ່າວ ເຊິ່ງ​ຈະ​ເປັນ​ອັນ­ຕະ­ລາຍ​ຕໍ່​ຊີ­ວິດ ແລະ ຊັບ​ສິນ​ອັນ​ມີ­ຄ່າ​ຂອງ​ພໍ່​ແມ່​ປະ­ຊາ­ຊົນ ແລະ ກຽມ​ເຄື່ອນ​ຍ້າຍ​ວັດ­ຖຸ​ສິ່ງ​ຂອງ ແລະ ສັດ­ລ້ຽງ​ໄປ​ໄວ້​ບ່ອນ​ທີ່​ປອດ​ໄພ  ຂໍ​ໃຫ້​ຕິດ­ຕາມ​ລາຍ​ງານ​ສະ­ພາບ​ພະ­ຍາ­ກອນ​ອາ­ກາດ ແລະ ລະ­ດັບ​ນ້ຳ​ຈາກ​ກົມ​ອຸ­ຕຸ­ນິ­ຍົມ ແລະ ອຸ​ທົກ​ກະ​ສາດ​ຢ່າງ​ເປັນ​ປະ­ຈຳ.

ຂ່າວທີ່ກ່ຽວຂ້ອງ