ຂ່າວຫຼ້າສຸດ

ຮອງເຈົ້າຄອງ ລົງຕິດຕາມກວດກາສະພາບເສັ້ນທາງ T6

360 26 ກ.ກ. 2018 ຫົວຂໍ້ຂ່າວອື່ນໆ
ຮອງເຈົ້າຄອງ ລົງຕິດຕາມກວດກາສະພາບເສັ້ນທາງ T6

    ທ່ານ ແກ້ວ​ພິ­ລາ​ວັນ ອາ​ໄພ​ລາດ ຮອງ​ເຈົ້າ​ຄອງ​ນະ­ຄອນ­ຫຼວງ​ວຽງ​ຈັນ (ນວ) ພ້ອມ​ດ້ວຍ​ຄະ­ນະ ລົງ​ຕິດຕາມ​ກວດ­ກາ​ສະ­ພາບ​ເສັ້ນ­ທາງ T6 ເລີ່ມ​ແຕ່​ຖະ­ໜົນ​ໄກ­ສອນ ພົມ­ວິ­ຫານ (ບ້ານ​ພະ​ຂາວ) ຜ່ານ​ບ້ານ​ຫ້ວຍ​ຫົງ-ບ້ານ​ໜອງ​ພະ­ຍາ (ຖະ­ໜົນ​ດົງ​ໂດກ-ສີ​ເກີດ) ວັນ​ທີ 20 ກໍ­ລະ­ກົດ 2018 ເພື່ອ​ກວດ­ກາ​ສະ­ພາບ​ການ​ຕົວ​ຈິງ​ຂອງ​ການ​ສັນ­ຈອນ​ຢູ່​ຖະ­ໜົນ​ດັ່ງ­ກ່າວ ພາຍ­ຫຼັງ​ໂຄງ­ການ​ດັ່ງ­ກ່າວ​ມີ​ການ​ກໍ່­ສ້າງ​ຫຼ້າ​ຊ້າ ເຮັດ​ໃຫ້​ສະ­ພາບ​ເສັ້ນ­ທາງ​ເປ່​ເພ ເປັນ​ບວກ-ຂຸມ ແລະ ການ​ສັນ­ຈອນ​ຂອງ​ປະ­ຊາ­ຊົນ​ມີ​ຄວາມ​ຫຍຸ້ງ­ຍາກ.

    ໂອ­ກາດ​ນີ້ ທ່ານ ສຸ​ລິ​ວັນ ພົມ​ມະ­ຫາ​ໄຊ ຮອງ​ຫົວ­ໜ້າ​ພະ​ແນກ​ໂຍ­ທາ​ທິ​ການ ແລະ ຂົນ­ສົ່ງ ນວ ກໍ່​ໄດ້​ລາຍ​ງານ​ວ່າ: ໂຄງ­ການ​ກໍ່­ສ້າງ​ເສັ້ນ­ທາງ T6 ເປັນ​ໂຄງ­ການ​ໜຶ່ງ​ທີ່​ນອນ​ໃນ​ແຜນ​ພັດ­ທະ­ນາ​ຕາ​ໜ່າງ​ເສັ້ນ­ທາງ​ຕາມ​ຜັງ­ເມືອງ​ທີ່ ນວ ເສັ້ນ­ທາງ​ດັ່ງ­ກ່າວ​ມີ​ຄວາມ​ຍາວ 6,2 ກິ­ໂລ­ແມັດ ກວ້າງ 15 ແມັດ ໃນ​ນີ້ ຄວາມ​ກວ້າງ​ໜ້າ​ທາງ 12ແມັດ ມີ​ທາງ​ຄົນ​ຍ່າງ 2 ເບື້ອງ ເບື້ອງ​ລະ 1,5 ແມັດ ໄດ້​ລົງ​ນາມ​ສັນ­ຍາ​ຮັບ​ເໝົາ​ກໍ່­ສ້າງ​ວັນ​ທີ 13 ມີ­ນາ 2012 ມູນ​ຄ່າ​ການ​ກໍ່­ສ້າງ 147,72 ຕື້​ກີບ ໄລ­ຍະ​ການ​ກໍ່­ສ້າງ 24 ເດືອນ (ມີ­ນາ 2012-ມີ­ນາ 2013) ແຕ່​ເນື່ອງ​ຈາກ ໜ້າ​ວຽກ​ບໍ່​ສຳ­ເລັດ ບໍ­ລິ­ສັດ​ຮັບ​ເໝົາ​ກໍ່­ສ້າງ (ບໍ­ລິ­ສັດ​ວຽງ​ຈັນ​ມໍ​ເຕີ​ມາ​ເກັດ ແລະ ບໍ­ລິ­ສັດ​ທະ­ນູ​ຄຳ​ຊະ­ນະ​ກໍ່­ສ້າງ​ຂົວ-ທາງ) ຈຶ່ງ​ສະ­ເໜີ​ຂໍ​ຕໍ່​ສັນ­ຍາ​ຕື່ມ​ອີກ​ຮອດ​ທ້າຍ​ປີ 2015 ເພື່ອ​ຈະ​ສືບ­ຕໍ່​ປະ­ຕິ­ບັດ​ວຽກ​ໃຫ້​ສຳ­ເລັດ​ຕາມ​ແຜນ­ການ ແຕ່​ຜ່ານ​ການ­ຈັດ­ຕັ້ງ​ປະ­ຕິ­ບັດ​ວຽກ​ແຕ່​ປີ 2012-2015 ຜູ້​ຮັບ​ເໝົາ​ປະ­ຕິ­ບັດ​ວຽກ​ໄດ້ 30,16% ເທົ່າ​ກັບ 44,57 ຕື້​ກີບ ຫຼັງ​ຈາກ​ມີ​ການ​ກວດ­ກາ​ຜົນ­ສຳ­ເລັດ​ຂອງ​ວຽກ​ຄັ້ງ​ທີ 1 ໃນ​ທ້າຍ​ປີ 2015 ເປັນ­ຕົ້ນ​ມາ ບໍ­ລິ­ສັດ​ຮັບ​ເໝົາ​ກໍ່​ບໍ່​ໄດ້​ສືບ­ຕໍ່​ເຮັດ​ວຽກ​ທີ່​ຍັງ​ບໍ່​ທັນ​ສຳ­ເລັດ​ຕາມ​ສັນ­ຍາ ສະ­ນັ້ນ ຈຶ່ງ​ເຮັດ​ໃຫ້​ສະ­ພາບ​ໜ້າ​ທາງ​ດິນ​ແດງ​ທີ່​ໄດ້​ກໍ່­ສ້າງ​ແລ້ວ​ນັ້ນ​ເປ່​ເພ​ເປັນ​ບວກ ຂຸມ ການ​ສັນ­ຈອນ​ໄປ-ມາ​ພົບ​ຄວາມ​ຫຍຸ້ງ­ຍາກ ມີ​ຫາງ​ສຽງ​ຈົ່ມ​ວ່າ​ຈາກ​ສັງ­ຄົມ​ຫຼາຍ​ສົມ­ຄວນ ໂດຍ​ສະ­ເພາະ ໄລ­ຍະ​ແຕ່​ໂຮງ­ແຮມ​ຄອນ​ປະ­ສົງ-ເສັ້ນ­ທາງ​ຫ້ວຍ​ຫົງ ຍາວ 1,7 ກິ­ໂລ­ແມັດ ແລະ ໄລ­ຍະ​ແຕ່​ເສັ້ນ­ທາງ​ຫ້ວຍ​ຫົງ-ບ້ານ​ໜອງ​ພະ­ຍາ ຍາວ 2,8 ກິ­ໂລ­ແມັດ ສ່ວນ​ໄລ­ຍະ​ແຕ່​ຖະ­ໜົນ​ໄກ­ສອນ ພົມ­ວິ­ຫານ-ບ້ານ​ພະ​ຂາວ ຍາວ 0,87 ກິ­ໂລ­ແມັດ ແມ່ນ​ຍັງ​ບໍ່​ໄດ້​ປະ­ຕິ­ບັດ​ເທື່ອ ຍ້ອນ​ໄລ­ຍະ​ດັ່ງ­ກ່າວ​ຜ່ານ​ໝູ່​ບ້ານ​ປະ­ຊາ­ຊົນ ແລະ ມີ​ສິ່ງ​ປຸກ​ສ້າງ​ໜາ​ແໜ້ນ ສ່ວນ​ໄລ­ຍະ​ແຕ່​ບ້ານ​ພະ​ຂາວ-ໂຮງ­ແຮມ​ຄອນ​ປະ­ສົງ ຍາວ 0,83 ກິ­ໂລ­ແມັດ ແມ່ນ​ໄດ້​ກໍ່­ສ້າງ​ເປັນ​ທາງ​ເບ​ຕົງ​ແລ້ວ ເພື່ອ​ເປັນ​ທາງ​ເວັ້ນ​ຮັບ​ໃຊ້​ກອງ​ປະ­ຊຸມ ASEM ໂດຍ​ນຳ​ໃຊ້​ເງິນ​ກູ້​ຈາກ ສປ ຈີນ.

    ຕໍ່​ສະ­ພາບ​ການ​ກໍ່­ສ້າງ​ທີ່​ແກ່­ຍາວ ບໍ່​ໄປ​ຕາມ​ແຜນ­ທີ່​ລະ­ບຸ​ໄວ້​ໃນ​ສັນ­ຍາ ນວ ກໍ່​ໄດ້​ລະ­ດົມ​ຊຸກ­ຍູ້​ໃຫ້​ຜູ້​ຮັບ​ເໝົາ​ຮີບ​ຮ້ອນ​ສືບ­ຕໍ່​ກໍ່­ສ້າງ​ເສັ້ນ­ທາງ​ດັ່ງ­ກ່າວ​ໃຫ້​ສຳ­ເລັດ ໂດຍ​ສະ­ເພາະ​ໄລ­ຍະ 4,52 ກິ­ໂລ­ແມັດ (ແຕ່​ໂຮງ­ແຮມ​ຄອນ​ປະ ສົງ-ຫ້ວຍ​ຫົງ-ໜອງ​ພະ­ຍາ) ຍ້ອນ​ວ່າ​ສະ­ພາບ​ເສັ້ນ­ທາງ​ເປ່​ເພ​ຫຼາຍ ຍາມ​ແລ້ງ​ເກີດ​ມີ​ຂີ້­ຝຸ່ນ ຍາມ​ຝົນ​ເປັນ​ບວກ-ຂຸມ ດັ່ງ­ນັ້ນ ຕົ້ນ​ເດືອນ​ກໍ­ລະ­ກົດ 2018 ບໍ­ລິ­ສັດ​ຮັບ​ເໝົາ​ໄດ້​ສ້ອມ­ແປງ​ໄລ­ຍະ 4,5 ກິ­ໂລ­ແມັດ ເຮັດ​ໃຫ້­ການ​ສັນ­ຈອນ​ໃນ​ປັດ­ຈຸ­ບັນ​ມີ​ຄວາມ​ສະ­ດວກ​ໂດຍ​ພື້ນ­ຖານ.

ຂ່າວທີ່ກ່ຽວຂ້ອງ