ເບິ່ງບ້ານເຂົາເອົາບົດຮຽນ 26/07/2018

105 26 ກ.ກ. 2018 ຫົວຂໍ້ຂ່າວອື່ນໆ

ມື້­ນີ້​ມີ​ເລື່ອງ​ລູກ​ໃຊ້​ໄຟ​ຈູດ​ເຮືອນ​ພໍ່-ແມ່​ຢູ່​ອິນ ໂດ​ເນ​ເຊຍ ເລື່ອງ​ປະ­ເທດ​ມານ​ດິບ​ຮື້​ຟື້ນ​ໂທດ​ປະ ຫານ​ຊີ­ວິດ ແລະ ສຸດ​ທ້າຍ​ແມ່ນ​ຂ່າວ​ຄວາມ​ມີ​ນ້ຳ­ໃຈ​ຂອງ​ລັດ­ຖະ­ບານ ສ ເກົາ­ຫຼີ.

ທີ່ ອິນ​ໂດ​ເນ​ເຊຍ: ມີ​ຂ່າວ​ວ່າ​ຊາຍ​ຄົນ​ໜຶ່ງ​ລອຍ ຕາມ​ອາ­ລົມ​ຊົ່ວ​ວູບ​ຈົນ​ເຮັດ​ໃຫ້​ເຂົາ​ຖືກ​ເຈົ້າ​ໜ້າ­ທີ່​ຕຳ­ຫຼວດ​ຈັບ​ກຸມ ເລື່ອງ​ນີ້​ໜັງ­ສື­ພິມ​ວຽງ​ຈັນ​ທາມ ສະ­ບັບ​ວັນ​ທີ 21 ເດືອນ​ນີ້ ໃຫ້​ລາຍ​ລະ­ອຽດ​ວ່າ ທ້າວ ຊຸ​ປິ​ຢັນ​ໂຕ (Supiyanto) ອາ­ຍຸ 25 ປີ ເກີດ​ອາ­ລົມ​ໂມ­ໂຫ​ຈົນ​ຄວບ​ຄຸມ​ສະ­ຕິ​ບໍ່​ໄດ້ ຍ້ອນ​ຜູ້​ເປັນ​ພໍ່ ແມ່​ປະ­ຕິ­ເສດ​ບໍ່​ຍອມ​ຈ່າຍ​ຄ່າ​ແຕ່ງ­ດອງ​ໃຫ້​ເຂົາ ສຸດ​ທ້າຍ​ເຂົາ​ກໍ່​ເລີຍ​ລົງ­ມື​ຈູດ​ເຮືອນ​ພໍ່​ແມ່​ຈົນ​ກ້ຽງ​ເອີດ​ເຕີດ ເຫດ​ຮ້າຍ​ນີ້​ເກີດ​ຂຶ້ນ​ເວ­ລາ 11 ໂມງ​ກາງ ຄືນ​ຂອງ​ວັນ​ທີ 20 ເດືອນ​ນີ້ ຢູ່​ເຂດ​ກາ​ຣັງ​ເຕັນ​ກາ.

ພາຍ­ຫຼັງ​ຜູ້​ເປັນ​ພໍ່​ແມ່​ບໍ່​ຍອມ​ອອກ​ເງິນ​ເພື່ອ​ຈັດ​ງານ​ແຕ່ງ­ດອງ​ຂອງ​ຕົນ ທ້າວ ຊຸ​ປິ​ຢັນ​ໂຕ ກໍ່​ໄດ້​ດູດ​ເອົາ​ນ້ຳ­ມັນ​ແອັດ​ຊັງ​ຈາກ​ລົດ­ຈັກ​ແລ້ວ​ເອົາ​ໄປ​ຮວາດ​ໃສ່​ເສື້ອ​ຜ້າ​ທີ່​ຕາກ​ຢູ່​ຜຽກ​ໃນ​ຫ້ອງ​ມ້ຽນ​ລົດ ຈາກ​ນັ້ນ​ກໍ່​ຕ່ອຍ​ກັບ­ໄຟ​ຈູດ​ເສື້ອ​ຜ້າ ໄຟ​ໄດ້​ລາມ​ໄປ​ໄວ​ປານ​ສາຍ­ຟ້າ​ແລບ ແລະ ເຮືອນ​ທັງ​ຫຼັງ​ກໍ່​ກາຍ­ເປັນ​ເຖົ່າ​ຖ່ານ​ໃນ​ຊົ່ວ​ພິບ​ຕາ​ດຽວ ຊາຍ​ເຈົ້າ​ອາ­ລົມ​ຜູ້​ກໍ່​ເຫດ​ໄດ້​ຫຼົບ​ໄປ​ລີ້​ຢູ່​ເຮືອນ​ໝູ່​ທີ່ ເກ­ປາ​ໂຢ​ຣານ ທາງ​ທິດ­ໃຕ້​ຂອງ​ນະ­ຄອນ­ຫຼວງ ຈາ​ກາ​ຕາ ແຕ່​ສຸດ​ທ້າຍ​ໜີ​ບໍ່​ມົ້ມ​ກັບ​ມື​ຂອງ​ເຈົ້າ​ໜ້າ­ທີ່​ຕຳ­ຫຼວດ.

ທີ່​ປະ­ເທດ​ມານ​ດິບ: ໃນ​ທ້າຍ​ປີ 2017 ທາງ​ການ​ປະ­ເທດ​ມານ​ດິບ (ປະ­ເທດ​ເກາະ​ຢູ່​ມະ­ຫາ​ສະ ໝຸດ​ອິນ​ເດຍ) ໄດ້​ປະ­ກາດ​ຮື້​ຟື້ນ​ຄືນ​ໂທດ​ປະ­ຫານ​ຊີ­ວິດ ພາຍ­ຫຼັງ​ໄດ້​ເວັ້ນ​ມາ​ເປັນ​ເວ­ລາ 60 ປີ ຕໍ່​ຄຳ​ປະ­ກາດ​ດັ່ງ­ກ່າວ ອົງ­ການ​ສະ­ຫະ​ປະ­ຊາ​ຊາດ ແລະ ອົງ­ການ​ນີ​ລະ​ໂທດ​ກຳ​ສາ­ກົນ ໄດ້​ຮຽກ­ຮ້ອງ​ໃຫ້​ລັດ­ຖະ­ບານ​ມານ​ດິບ​ລົບ​ລ້າງ​ແຜນ​ຮື້​ຟື້ນ​ໂທດ​ປະ­ຫານ​ຊີ­ວິດ​ດັ່ງ­ກ່າວ ໂດຍ​ອ້າງ​ວ່າ​ຜູ້​ກະ­ທຳ​ຜິດ​ບາງ​ຄົນ​ອາດ​ໄດ້​ຮັບ​ໂທດ​ປະ­ຫານ​ທີ່​ບໍ່​ເປັນ​ໄປ​ຕາມ​ຂະ​ບວນ​ການ​ຍຸ­ຕິ​ທຳ.

ໂທດ​ປະ­ຫານ​ຢູ່​ປະ­ເທດ​ມານ​ດິບ​ນັ້ນ ປະ­ຕິ­ບັດ​ດ້ວຍ​ການ​ແຂວນ​ຄໍ​ຢູ່​ສະ­ຖານ­ທີ່​ສາ­ທາ­ລະ­ນະ ຄຳ​ຮຽກ­ຮ້ອງ​ຂອງ​ອົງ­ການ ສປຊ ແລະ ອົງ­ການ​ນີ ລະ​ໂທດ​ກຳ​ສາ­ກົນ ໄດ້​ຖືກ​ປະ­ຕິ­ເສດ​ຈາກ​ທາງ​ການ​ຂອງ​ມານ​ດິບ ໂດຍ​ອ້າງ​ວ່າ­ການ​ຮື້​ຟື້ນ​ໂທດ​ປະ­ຫານ​ຊີ­ວິດ​ມີ​ເປົ້າ​ໝາຍ​ເພື່ອ​ຫຼຸດ​ຈຳ­ນວນ​ຄະ­ດີ​ຄາ­ຕະ­ກຳ ແລະ ຄະ­ດີ​ຢາ​ເສບ​ຕິດ ເຊິ່ງ​ມີ​ທ່າ​ອ່ຽງ​ເພີ່ມ​ຂຶ້ນ​ໃນ​ຊຸມ​ປີ​ຫຼັງໆ​ມາ​ນີ້ ແລະ ວ່າ​ປະ­ຊາ­ຊົນ​ມານ​ດິບ​ຕ່າງ​ກໍ່​ສະ­ໜັບ­ສະ­ໜູນ​ໃຫ້​ມີ​ກຳ­ນົດ​ໂທດ​ຂັ້ນ​ປະ­ຫານ​ສຳ­ລັບ​ຄະ­ດີ​ທີ່​ເປັນ​ອັນ­ຕະ­ລາຍ​ຮ້າຍ​ແຮງ ເຊັ່ນ: ການ​ຄາ­ຕະ­ກຳ ແລະ ການ​ຄ້າ­ຂາຍ​ຢາ​ເສບ​ຕິດ.

ທີ່ ສ ເກົາ­ຫຼີ: ໃນ​ປີ 2019 ສ ເກົາ­ຫຼີ ໜຶ່ງ​ໃນ​ປະ­ເທດ​ທີ່​ມີ​ລະ­ບົບ​ເສດ­ຖະ­ກິດ​ເຂັ້ມ­ແຂງ​ໃນ​ລະ­ດັບ​ແຖວ​ໜ້າ ໄດ້​ກຳ­ນົດ​ຈະ​ເພີ່ມ​ບ້ວງ​ເງິນ​ຊ່ວຍ­ເຫຼືອ​ພັດ­ທະ­ນາ​ຢ່າງ​ເປັນ​ທາງ​ການ (ໂອ​ດີ​ເອ - ODA) ສູງ​ເຖິງ 3.500 ຕື້​ວອນ ຫຼື ເທົ່າ​ກັບ 3,16 ຕື້​ໂດ​ລາ​ສະ­ຫະ­ລັດ ໂດຍ​ມີ​ຈຸດ­ປະ­ສົງ​ຊ່ວຍ​ບັນ­ດາ​ປະ­ເທດ​ທີ່​ຈຳ­ນວນ​ໜຶ່ງ​ໃຫ້​ສາ­ມາດ​ເພິ່ງ​ຕົນ​ເອງ ກຸ້ມ​ຕົນ​ເອງ ໃນ​ການ​ປະ­ຕິ­ບັດ​ເປົ້າ​ໝາຍ​ການ​ພັດ​ທະ ນາ​ແບບ​ຍືນ​ຍົງ​ຂອງ​ອົງ­ການ​ສະ­ຫະ​ປະ­ຊາ​ຊາດ.

ໃນ​ຈຳ­ນວນ​ບ້ວງ​ຊ່ວຍ­ເຫຼືອ​ດັ່ງ­ກ່າວ ຈຳ­ນວນ 2.260 ຕື້​ວອນ ຈະ​ທຸ່ມ​ໃສ່​ຊ່ວຍ­ເຫຼືອ​ຂະ​ບວນ​ການ​ຜັນ​ຂະ­ຫຍາຍ​ບັນ­ດາ​ເປົ້າ​ໝາຍ​ການ​ພັດ­ທະ­ນາ​ແບບ​ຍືນ​ຍົງ​ຂອງ ສປຊ ເຊິ່ງ​ເທົ່າ​ກັບ 65% ຂອງ​ຈຳ­ນວນ​ກ້ອນ​ເງິນ ສ່ວນ​ອີກ 154,4 ຕື້​ວອນ ຈະ​ໃຊ້​ຈ່າຍ​ເພື່ອ​ຮັບ­ປະ­ກັນ​ດ້ານ​ສະ­ບຽງ​ອາ­ຫານ ກໍ່​ຄື ໂຄງ­ການ​ດ້ານ​ວິ​ກິດ​ການ​ມະ­ນຸດ­ສະ­ທຳ ສຳ­ລັບ​ໃນ​ປີ 2018 ນີ້ ສ ເກົາ­ຫຼີ ໄດ້​ປະ­ກອບ­ສ່ວນ​ເຂົ້າ​ບ້ວງ ODA ເປັນ​ຈຳ­ນວນ​ເງິນ 3.000 ຕື້​ວອນ.

ຂ່າວທີ່ກ່ຽວຂ້ອງ