2 ນັກແລ່ນລາວ ພ້ອມແລ້ວລົງແຂ່ງຂັນ ຫວຽດ¬ນາມ ໂອເພັ່ນ 2018

104 26 ກ.ກ. 2018 ວົງຈອນກີລາ
2 ນັກແລ່ນລາວ ພ້ອມແລ້ວລົງແຂ່ງຂັນ ຫວຽດ¬ນາມ ໂອເພັ່ນ 2018

   ທ້າວ ອາ​ນຸ​ສອນ ໄຊ​ສາ ແລະ ນາງ ສີ​ລິ​ນາ ພະ​ອາ​ໄພ 2 ນັກ​ແລ່ນ​ທີມ​ຊາດ​ລາວ ພ້ອມ​ແລ້ວ​ຈະ​ລົງ​ແຂ່ງ­ຂັນ​ແລ່ນ-ລານ ລາຍ­ການ ສສ ຫວຽດ­ນາມ ໂອ​ເພັ່ນ 2018 (Vietnam Open 2018) ທີ່​ນະ­ຄອນ​ໂຮ​ຈີ​ມິນ ສສ ຫວຽດ­ນາມ ເປັນ​ເຈົ້າ­ພາບ ກ່ອນ​ລຸຍ​ງານ​ມະ​ຫະ​ກຳ​ກີ­ລາ​ເອ​ຊຽນ​ເກມ ຄັ້ງ​ທີ 18 ທີ່​ປະ­ເທດ​ອິນ​ໂດ​ເນ​ເຊຍ ເປັນ​ເຈົ້າ­ພາບ​ກາງ​ເດືອນ​ສິງ­ຫາ​ນີ້.

   ອີງ​ຕາມ​ການ​ໃຫ້​ສຳ­ພາດ​ຂອງ​ທ້າວ ອາ​ນຸ​ສອນ ໄຊ​ສາ ນັກ​ແລ່ນ​ຂ້າມ​ຮົ້ວ​ຊາຍ​ທີມ​ຊາດ​ລາວ ໃນ​ວັນ​ທີ 25 ກໍ­ລະ­ກົດ ຜ່ານ​ມາ ໃຫ້​ຊາບ​ວ່າ: ປັດ­ຈຸ­ບັນ​ແມ່ນ​ໄດ້​ເດີນ­ທາງ​ມາ​ຮອດ​ນະ­ຄອນ​ໂຮ​ຈີ​ມິງ ປະ­ເທດ ສສ ຫວຽດ­ນາມ ເປັນ​ທີ່​ຮຽບ​ຮ້ອຍ​ແລ້ວ​ກັບ​ທີມ​ງານ ໂດຍ​ການ​ມາ​ໃນ​ຄັ້ງ​ນີ້ ແມ່ນ​ມາ​ນຳ​ກັນ​ທັງ​ໝົດ 3 ຄົນ ປະ­ກອບ​ມີ ທ່ານ ສິດ​ຖິ​ໄຊ ສັກ​ປະ­ເສີດ ຄະ­ນະ​ນຳ ທ້າວ ອາ​ນຸ​ສອນ ໄຊ​ສາ ລາຍ­ການ 100 ແມັດ ແລະ 110 ຂ້າມ​ຮົ້ວ ແລະ ນາງ ສີ​ລິ​ນາ ພະ​ອາ​ໄພ ແລ່ນ 100 ແລະ 200 ແມັດ ເຊິ່ງ​ລາຍ­ການ ແລ່ນ ສສ ຫວຽດ­ນາມ ໂອ​ເພັ່ນ 2018 ໃນ​ຄັ້ງ​ນີ້ ແມ່ນ​ຈະ​ແຂ່ງ­ຂັນ​ເປັນ​ເວ­ລາ 2 ວັນ ໃນ​ວັນ​ທີ 26-27 ກໍ­ລະ­ກົດ ນີ້ ແລະ ການ​ເຂົ້າ​ຮ່ວມ​ດັ່ງ­ກ່າວ ແມ່ນ​ເພື່ອ​ເປັນ​ການ​ທົດ​ສອບ​ຄວາມ​ພ້ອມ​ຂອງ​ພວກ​ເຮົາ ກ່ອນ​ລຸຍ​ງານ​ມະ​ຫະ​ກຳ​ກີ­ລາ​ເອ​ຊຽນ​ເກມ ຄັ້ງ​ທີ 18 ທີ່​ປະ­ເທດ​ອິນ​ໂດ​ເນ​ເຊຍ ເປັນ​ເຈົ້າ­ພາບ ໃນ​ລະ­ຫວ່າງ​ວັນ​ທີ 18 ສິງ­ຫາ ຫາ 2 ກັນ­ຍາ ຈະ​ເຖິງ​ນີ້.

   ພ້ອມ​ກັນ​ນັ້ນ ທ້າວ ອາ​ນຸ​ສອນ ໄຊ​ສາ ຍັງ​ໄດ້​ກ່າວ​ໃຫ້​ຊາບ​ຕື່ມ​ວ່າ: ໃນ​ສ່ວນ​ຕົວ​ແລ້ວ ສະ­ເພາະ​ລາຍ­ການ​ທີ່​ຈະ​ລົງ​ແຂ່ງ­ຂັນ ແມ່ນ​ມີ​ຄວາມ​ໝັ້ນ​ໃຈ​ວ່າ ຈະ​ມີ​ຫຼຽນ​ໃດ​ຫຼຽນ​ໜຶ່ງ​ຕິດ​ມື​ກັບ​ບ້ານ ພາຍ­ຫຼັງ​ໄດ້​ເຂົ້າ​ຮ່ວມ​ການ​ເກັບ​ຕົວ​ເຝິກ­ແອບ​ທີ່​ປະ­ເທດ​ໄທ ໃນ​ໄລ­ຍະ​ທີ່​ຜ່ານ​ມາ.

   ສຳ­ລັບ​ການ​ເຂົ້າ​ຮ່ວມ​ງານ​ມະ​ຫະ​ກຳ​ກີ­ລາ​ເອ​ຊຽນ​ເກມ ຄັ້ງ​ທີ 18 ທີ່​ປະ­ເທດ​ອິນ​ໂດ​ເນ​ເຊຍ ເປັນ​ເຈົ້າ­ພາບ ໃນ​ລະ­ຫວ່າງ​ວັນ​ທີ 18 ສິງ­ຫາ ຫາ 2 ກັນ­ຍາ ຈະ​ເຖິງ​ນີ້ ສະ­ຫະ­ພັນ​ກີ­ລາ​ແລ່ນ-ລານ​ແຫ່ງ​ຊາດ​ລາວ ແມ່ນ​ສົ່ງ​ນັກ​ກີ­ລາ​ທີມ​ຊາດ​ແລ່ນ-ລານ​ລາວ ເຂົ້າ​ຮ່ວມ​ທັງ​ໝົດ 4 ຄົນ ເປັນ​ຍິງ 2 ແລະ ຊາຍ 2 ຄົນ ປະ­ກອບ​ມີ ນາງ ລົດ​ແກ້ວ ອິນ​ທະ​ກຸມ­ມານ ນາງ ສິ­ລິ​ນາ ພະ​ອາ​ໄພ ທ້າວ ອາ​ນຸ​ສອນ ໄຊ​ສາ ແລະ ທ້າວ ອັກ­ສອນ­ສາດ ລາດ​ຊະ​ວົງ.

ຂ່າວທີ່ກ່ຽວຂ້ອງ