ຂ່າວຫຼ້າສຸດ

ລາວ-ຫວຽດນາມ ສົນທະນາລົງເລິກ ວຽກງານແນວຄິດທິດສະດີໃນເງື່ອນໄຂໃໝ່

215 25 ກ.ກ. 2018 ຂ່າວໜ້າ​ໜຶ່ງ
ລາວ-ຫວຽດນາມ ສົນທະນາລົງເລິກ ວຽກງານແນວຄິດທິດສະດີໃນເງື່ອນໄຂໃໝ່

    ກອງ​ປະ­ຊຸມ ລະ­ຫວ່າງ ພັກ​ປະ­ຊາ­ຊົນ ປະ­ຕິ­ວັດ​ລາວ ແລະ ພັກ​ກອມ​ມູ​ນິດ​ຫວຽດ­ນາມ ຄັ້ງ​ທີ 6 ພາຍ​ໃຕ້​ຫົວ­ຂໍ້ ວຽກ​ງານ​ແນວ​ຄິດ​ໃນ​ເງື່ອນ­ໄຂ​ປັດ­ຈຸ­ບັນ ສະ­ພາ­ວະ​ຄວາມ​ເປັນ​ຈິງ ບັນ­ຫາ​ທີ່​ຕັ້ງ​ຂຶ້ນ ແລະ ວິ­ທີ​ການ​ແກ້​ໄຂ ຈັດ​ຂຶ້ນ​ວັນ​ທີ 24-25 ກໍ­ລະ­ກົດ 2018 ທີ່​ນະ­ຄອນ­ຫຼວງ​ວຽງ​ຈັນ ໂດຍ​ຄະ­ນະ​ຜູ້​ແທນ​ຂັ້ນ​ສູງ​ຂອງ​ພັກ​ປະ­ຊາ­ຊົນ ປະ­ຕິ­ວັດ​ລາວ ນຳ​ໂດຍ​ສະ­ຫາຍ ກິ​ແກ້ວ ໄຂ​ຄຳ​ພິ­ທູນ ເລ­ຂາ­ທິ­ການ​ສູນ​ກາງ​ພັກ ຫົວ­ໜ້າ​ຄະ­ນະ​ໂຄ­ສະ­ນາ​ອົບ­ຮົມ​ສູນ​ກາງ​ພັກ ປະ­ທານ​ສະ­ພາ​ວິ­ທະ­ຍາ­ສາດ​ສັງ­ຄົມ​ແຫ່ງ​ຊາດ ແລະ ຄະ­ນະ​ຜູ້​ແທນ​ຂັ້ນ​ສູງ​ຂອງ​ພັກ​ກອມ​ມູ​ນິດ​ຫວຽດ­ນາມ ນຳ​ໂດຍ​ສະ­ຫາຍ ຫວໍ ວັນ​ເຖືອງ ກຳ­ມະ­ການ​ກົມ​ການ­ເມືອງ​ສູນ​ກາງ​ພັກ ເລ­ຂາ­ທິ­ການ​ສູນ​ກາງ​ພັກ ຫົວ­ໜ້າ​ຄະ­ນະ​ໂຄ­ສະ­ນາ​ສຶກ​ສາ​ສູນ​ກາງ​ພັກ​ກອມ​ມູ​ນິດ​ຫວຽດ­ນາມ ມີ​ບັນ­ດາ​ພະ­ນັກ­ງານ​ການ​ນຳ​ຂັ້ນ​ສູງ​ສະ­ພາ​ທິດ​ສະ​ດີ​ສູນ​ກາງ​ພັກ​ກອມ​ມູ​ນິດ​ຫວຽດ­ນາມ ການ​ນຳ​ພັກ-ລັດ ສະ­ມາ­ຊິກ​ສະ­ພາ​ວິ­ທະ­ຍາ­ສາດ​ສັງ­ຄົມ​ແຫ່ງ​ຊາດ​ລາວ ແລະ ພະ­ນັກ­ງານ​ຫຼັກ​ແຫຼ່ງ​ຂອງ​ລາວ​ເຂົ້າ​ຮ່ວມ ​ຈຳ­ນວນ 120 ທ່ານ.

    ການ​ສຳ​ມະ​ນາ​ໃນ​ຫົວ­ຂໍ້​ດັ່ງ­ກ່າວ ເປັນ​ຫົວ­ຂໍ້​ໜຶ່ງ​ທີ່​ມີ​ຄວາມ​ສຳ­ຄັນ​ຍິ່ງ ຕິດ​ພັນ​ກັບ​ການ­ເຄື່ອນ­ໄຫວ​ນຳ­ພາ ແລະ ການ​ກໍ່­ສ້າງ​ພັກ​ຂອງ​ທັງ​ສອງ​ປະ­ເທດ ເຊິ່ງ​ໄດ້​ດຳ­ເນີນ​ໃນ​ທ່າມ­ກາງ​ບັນ­ຍາ­ກາດ​ແຫ່ງ​ການ​ເພີ່ມ​ທະ­ວີ​ສາຍ​ພົວ­ພັນ​ມິດ­ຕະ­ພາບ ຄວາມ​ສາ­ມັກ­ຄີ​ພິ­ເສດ ແລະ ການ​ຮ່ວມ​ມື​ຮອບ­ດ້ານ​ລະ­ຫວ່າງ​ສອງ​ພັກ-ສອງ​ລັດ ແລະ ປະ­ຊາ­ຊົນ​ສອງ​ຊາດ ລາວ-ຫວຽດ­ນາມ ພິ­ເສດ​ແມ່ນ​ການ​ນຳ​ສູງ​ສຸດ​ຂອງ​ສອງ​ພັກ​ຫາ­ກໍ່​ພົບ​ປະ­ກັນ​ດ້ວຍ​ຜົນ­ສຳ­ເລັດ​ອັນ​ຈົບ­ງາມ ພ້ອມ​ນັ້ນ ຍັງ​ໄດ້​ໃຫ້​ຄວາມ​ສຳ­ຄັນ​ໃນ​ລະ­ດັບ​ສູງ​ຕໍ່​ການ​ຮ່ວມ​ມື​ໃນ​ຂົງ­ເຂດ​ວຽກ​ງານ​ຄົ້ນ­ຄວ້າ​ທິດ​ສະ​ດີ ແລະ ພຶດ­ຕິ​ກຳ ເພື່ອ​ປະ­ກອບ­ສ່ວນ​ເຂົ້າ​ໃນ​ການ​ປັບ­ປຸງ​ປົວ­ແປງ​ພັກ ແລະ ປະ­ເທດ​ໃຫ້​ປອດ​ໃສ ເຂັ້ມ­ແຂງ ແລະ ໜັກ​ແໜ້ນ.

    ກອງ​ປະ­ຊຸມ​ໄດ້​ສຸມ​ໃສ່​ຄົ້ນ­ຄວ້າ​ແລກ­ປ່ຽນ​ສົນ­ທະ­ນາ​ລົງ​ເລິກ​ບັນ­ຫາ​ທີ່​ມີ​ລັກ­ສະ­ນະ​ເຄັ່ງ­ຮ້ອນ​ກ່ຽວ​ກັບ​ວຽກ​ງານ​ແນວ​ຄິດ-ທິດ​ສະ​ດີ​ໃນ​ເງື່ອນ­ໄຂ​ໃໝ່​ທີ່​ສອງ​ຝ່າຍ​ໃຫ້​ຄວາມ​ສົນ­ໃຈ ເປັນ­ຕົ້ນ ແມ່ນ​ການ​ເພີ່ມ​ທະ­ວີ​ການ​ນຳ­ພາ​ຂອງ​ພັກ ຍົກ​ສູງ​ຄວາມ​ຮັບ­ຜິດ­ຊອບ​ຂອງ​ທົ່ວ​ພັກ ແລະ ທົ່ວ​ລະ­ບົບ​ການ­ເມືອງ​ຕໍ່​ວຽກ​ງານ​ແນວ​ຄິດ ທິດ​ສະ​ດີ ການ​ປ່ຽນ­ແປງ​ໃໝ່​ດ້ານ​ເນື້ອ​ໃນ ວິ­ທີ​ການ​ເຮັດ​ວຽກ​ງານ ແນວ​ຄິດ ຄົ້ນ­ຄວ້າ​ທິດ​ສະ​ດີ ແລະ ສຶກ​ສາ​ອົບ­ຮົມ​ທິດ​ສະ​ດີ​ການ­ເມືອງ​ຢູ່​ພາຍ​ໃນ​ພັກ ແລະ ສັງ­ຄົມ ບັນ­ຫາ​ການ​ຄົ້ນ­ຄວ້າ​ເສີມ​ຂະ­ຫຍາຍ ໝູນ​ໃຊ້​ຢ່າງ​ປະ­ດິດ​ສ້າງ ແລະ ປົກ​ປ້ອງ​ທິດ​ສະ​ດີ​ມາກ-ເລ​ນິນ ແນວ​ຄິດ​ຂອງ​ຜູ້­ນຳ​ໃນ​ສະ­ພາບ​ການ​ໃໝ່​ໃຫ້​ແທດ­ເໝາະ​ກັບ​ສະ­ພາບ​ຕົວ​ຈິງ​ຂອງ​ສອງ​ປະ­ເທດ ຕິດ​ພັນ​ກັບ​ການ​ຄົ້ນ­ຄວ້າ ຊອກ​ຮູ້ ເລືອກ­ເຟັ້ນ​ເອົາ​ບົດ­ຮຽນ​ພຶດ­ຕິ​ກຳ ກໍ່​ຄື ຜົນ­ສຳ­ເລັດ ສິ່ງ​ຍອດ​ຍິ່ງ​ຂອງ​ມວນ​ມະ­ນຸດ​ໃນ​ໂລກ ການ​ເພີ່ມ​ທະ­ວີ​ວິ­ທີ​ການ​ປັບ­ປຸງ​ຄຸ­ນະ­ພາບ​ຍົກ​ສູງ​ປະ​ສິດ­ທິ​ຜົນ​ຂອງ​ວຽກ​ງານ​ແນວ​ຄິດ​ໃນ​ທົ່ວ​ພັກ ສ້າງ​ພັກ​ໃຫ້​ປອດ​ໃສ ເຂັ້ມ­ແຂງ ແລະ ໜັກ​ແໜ້ນ​ຢ່າງ­ຮອບ­ດ້ານ ບັນ­ຫາ​ປົກ​ປ້ອງ​ພື້ນ­ຖານ​ແນວ​ຄິດ-ທິດ​ສະ​ດີ​ຂອງ​ພັກ ຕ້ານ ແລະ ສະ­ກັດ​ກັ້ນ​ຖ້ອຍ​ທຳ­ນອງ​ບິດ​ເບືອນ​ຂອງ​ອິດ​ທິ​ກຳ­ລັງ​ປໍ​ລະ​ປັກ ການ​ເສີມ​ຂະ­ຫຍາຍ​ບົດ­ບາດ ເພີ່ມ​ທະ­ວີ​ການ​ຄຸ້ມ​ຄອງ ການ­ເຄື່ອນ­ໄຫວ​ຂອງ​ສື່​ມວນ​ຊົນ ນັບ​ທັງ​ສື່​ສັງ­ຄົມ​ອອນ​ລາຍ​ໃນ​ເຄືອ​ຄ່າຍ​ອິນ​ເຕີ​ເນັດ ບັນ­ຫາ​ການ​ເພີ່ມ​ທະ­ວີ​ແກ່​ວຽກ​ງານ​ດ້ານ​ແນວ​ຄິດ ທິດ​ສະ​ດີ​ໃນ​ສະ­ພາບ​ການ​ໃໝ່ ການ​ປັບ­ປຸງ​ການ­ຈັດ­ຕັ້ງ ແລະ ກໍ່­ສ້າງ​ຖັນ​ແຖວ​ພະ­ນັກ­ງານ​ເຮັດ​ວຽກ​ງານ​ແນວ​ຄິດ ທິດ​ສະ​ດີ ຕອບ​ສະ­ໜອງ​ຄວາມ​ຮຽກ­ຮ້ອງ​ດ້ານ​ໜ້າ­ທີ່​ໃນ​ສະ­ພາບ​ການ​ໃໝ່ ເຊິ່ງ​ທັງ​ສອງ​ຝ່າຍ​ໄດ້​ຢືນ­ຢັນ​ເຖິງ​ຜົນ​ປະ­ໂຫຍດ​ໃຫຍ່​ຫຼວງ​ທີ່​ໄດ້​ຮັບ​ຈາກ​ການ​ຮ່ວມ​ມື​ກັນ​ຈັດ​ສຳ​ມະ​ນາ​ທິດ​ສະ​ດີ​ຂອງ​ພັກ ອັນ​ໄດ້​ປະ­ກອບ­ສ່ວນ​ເສີມ​ສ້າງ​ຄັງ​ສາງ​ທິດ​ສະ​ດີ ສ້າງ​ພື້ນ­ຖານ​ທາງ​ດ້ານ​ທິດ​ສະ​ດີ​ວິ­ທະ­ຍາ­ສາດ​ໃຫ້​ແກ່​ການ​ປັບ­ປຸງ​ແນວ­ທາງ ແຜນ​ນະ­ໂຍ­ບາຍ​ຂອງ​ພັກ ແລະ ການ​ເພີ່ມ​ທະ­ວີ​ຊີ້​ນຳ-ນຳ­ພາ​ຕໍ່​ການ​ສ້າງ​ຄວາມ​ສີ­ວິ­ໄລ​ທາງ​ດ້ານ​ຈິດ­ໃຈ​ໃນ​ສັງ­ຄົມ​ຂອງ​ສອງ​ປະເທດ.

ຂ່າວທີ່ກ່ຽວຂ້ອງ