ຂ່າວຫຼ້າສຸດ

ນະຄອນຫຼວງ ຊີ້ແຈງຄວາມຫຼ້າຊ້າ ໃນການປະກາດໃຊ້ນິຕິກຳ

262 25 ກ.ກ. 2018 ຂ່າວໜ້າ​ໜຶ່ງ

   ປັດ­ຈຸ­ບັນ​ສະ­ພາ​ປະ­ຊາ­ຊົນ​ນະ­ຄອນ­ຫຼວງ​ວຽງ​ຈັນ​ໄດ້​ຮັບ­ຮອງ​ເອົາ​ຮ່າງ​ນິ­ຕິ​ກຳ ແລະ ຍັງ​ບໍ່​ທັນ​ໄດ້​ລົງ​ນາມ​ປະ­ກາດ​ໃຊ້​ມີ 4 ສະ­ບັບ ຄື: ຮ່າງ​ດຳ­ລັດ​ວ່າ​ດ້ວຍ​ການ​ກຳ­ນົດ​ຂອບ​ເຂດ​ສະ­ຫງວນ ລະ­ບົບ​ຮ່ອງ​ລະ­ບາຍ​ນ້ຳ​ບຶງ​ທາດ­ຫຼວງ ອອກ​ໃສ່​ບຶງ​ຄັດ​ເຄົ້າ-ຫ້ວຍ​ໝາກ​ຮຽວ ແລະ ບຶງ​ທາດ­ຫຼວງ​ອອກ​ໃສ່​ຫ້ວຍ​ເດື່ອ ຮ່າງ​ຂໍ້​ຕົກ­ລົງ​ວ່າ​ດ້ວຍ​ການ​ສົ່ງ­ເສີມ ການ​ຄຸ້ມ​ຄອງ​ຄຸ­ນະ­ພາບ​ການ​ລ້ຽງ ແລະ ບໍ­ລິ­ໂພກ​ສັດ ຜະ­ລິດ​ຕະ​ພັນ​ສັດ ປາ ແລະ ສັດ​ນ້ຳ​ໃນ​ນະ­ຄອນ­ຫຼວງ​ວຽງ​ຈັນ ຮ່າງ​ຂໍ້​ຕົກ­ລົງ​ວ່າ​ດ້ວຍ​ກອງ​ທຶນ​ທາງ​ປະ­ຊາ­ຊົນ​ນະ­ຄອນ­ຫຼວງ​ວຽງ​ຈັນ ແລະ ຮ່າງ​ຂໍ້​ຕົກ­ລົງ​ວ່າ​ດ້ວຍ​ເປົ້າ​ໝາຍ​ການ​ສ້າງ​ນະ­ຄອນ­ຫຼວງ​ວຽງ​ຈັນ​ສະ­ຫງົບ​ສຸກ​ໃນ​ໄລ­ຍະ​ໃໝ່.

    ທ່ານ ພູ​ວົງ ວົງ​ຄຳ​ຊາວ ຫົວ­ໜ້າ​ຫ້ອງ​ວ່າ­ການ​ປົກ­ຄອງ​ນະ­ຄອນ­ຫຼວງ​ວຽງ​ຈັນ ໄດ້​ຊີ້​ແຈງ​ກ່ຽວ​ກັບ​ເຫດ­ຜົນ​ທີ່​ຍັງ​ບໍ່​ທັນ​ໄດ້​ປະ­ກາດ​ໃຊ້​ນິ­ຕິ​ກຳ​ທີ່​ກອງ​ປະ­ຊຸມ​ສະ­ພາ​ປະ­ຊາ­ຊົນ​ນະ­ຄອນ­ຫຼວງ​ວຽງ​ຈັນ ຮັບ­ຮອງ​ເອົາ​ແລ້ວ​ຕໍ່​ກອງ​ປະ­ຊຸມ​ສະ ໄໝ​ສາ­ມັນ​ເທື່ອ​ທີ 5 ຂອງ​ສະ­ພາ​ປະ­ຊາ­ຊົນ​ນະ­ຄອນ­ຫຼວງ​ວຽງ​ຈັນ​ຊຸດ​ທີ 1 ວ່າ: ດຳ­ລັດ​ຂອງ​ນາ­ຍົກ­ລັດ­ຖະ­ມົນ­ຕີ​ວ່າ​ດ້ວຍ​ການ​ກຳ­ນົດ​ຂອບ​ເຂດ​ສະ­ຫງວນ ລະ­ບົບ​ຮ່ອງ​ລະ­ບາຍ​ນ້ຳ​ບຶງ​ທາດ­ຫຼວງ ອອກ​ໃສ່​ບຶງ​ຄັດ​ເຄົ້າ-ຫ້ວຍ​ໝາກ​ຮຽວ ແລະ ບຶງ​ທາດ­ຫຼວງ​ອອກ​ໃສ່​ຫ້ວຍ​ເດື່ອ ປັດ­ຈຸ­ບັນ​ຮ່າງ​ຂໍ້​ຕົກ­ລົງ​ດັ່ງ­ກ່າວ​ໄດ້​ປັບ­ປຸງ​ເປັນ​ທີ່​ຮຽບ​ຮ້ອຍ​ແລ້ວ ແຕ່​ຕ້ອງ​ມີ​ແຜນ​ວາດ​ຄອງ​ນ້ຳ​ນຳ ແລະ ເຂດ​ດິນ​ສະ­ຫງວນ​ຄອງ​ນ້ຳ​ຄັດ​ຕິດ ເພື່ອ​ຄວາມ​ຊັດ​ເຈນ ເຈົ້າ​ຄອງ​ນະ­ຄອນ­ຫຼວງ​ວຽງ​ຈັນ ໄດ້​ແຕ່ງ​ຄະ­ນະ​ໜຶ່ງ​ລົງ​ໄປ​ສຳ​ຫຼວດ ແຕ້ມ​ແຜນ​ວາດ​ດັ່ງ­ກ່າວ​ຄືນ­ໃໝ່ ໂດຍ​ນຳ​ໃຊ້​ທຶນ​ທີ່​ລະ­ດົມ​ໄດ້​ຈາກ​ບໍ­ລິ­ສັດ 1 ຕື້​ກີບ ກະ­ຊວງ​ຊັບ­ພະ­ຍາ­ກອນ​ທຳ​ມະ​ຊາດ ແລະ ສິ່ງ­ແວ­ດລ້ອມ​ຊ່ວຍ 500 ລ້ານ​ກີບ ຜ່ານ​ການ​ລົງ​ໄປ​ສຳ​ຫຼວດ​ແລ້ວ​ເຫັນ​ວ່າ­ການ​ຂີດ​ແຕ້ມ​ແຜນ​ວາດ​ໄດ້​ກວມ​ເອົາ​ດິນ ແລະ ເຮືອນ​ຂອງ​ປະ­ຊາ­ຊົນ​ຈຳ­ນວນ​ຫຼາຍ ຈຶ່ງ​ໄດ້​ໃຫ້​ປັບ­ປຸງ​ແຜນ​ວາດ​ເກົ່າ​ຄືນ­ໃໝ່​ໃຫ້​ກະ­ທົບ​ຕໍ່​ປະ­ຊາ­ຊົນ​ໜ້ອຍ​ທີ່​ສຸດ ມາ​ຮອດ​ປັດ­ຈຸ­ບັນ​ແຜນ​ວາດ​ດັ່ງ­ກ່າວ​ແຕ້ມ​ສຳ­ເລັດ​ແລ້ວ ກຳ­ລັງ​ລາຍ​ງານ​ຄະ­ນະ​ປະ­ຈຳ​ສະ­ພາ​ປະ­ຊາ­ຊົນ​ນະ­ຄອນ­ຫຼວງ​ວຽງ​ຈັນ​ເຫັນ​ຊອບ​ນຳ​ກ່ອນ ແລ້ວ​ຈຶ່ງ​ສະ­ເໜີ​ທ່ານ​ນາ­ຍົກ ລັດ­ຖະ­ມົນ­ຕີ ພິ­ຈາ­ລະ­ນາ​ປະ­ກາດ​ໃຊ້​ໃນ​ເວ­ລາ​ອັນ​ຄວນ ສ່ວນ​ຮ່າງ​ຂໍ້​ຕົກ­ລົງ​ວ່າ​ດ້ວຍ​ການ​ສົ່ງ­ເສີມ ການ​ຄຸ້ມ​ຄອງ​ຄຸ­ນະ­ພາບ ການ​ລ້ຽງ ແລະ ບໍ­ລິ­ໂພກ​ສັດ ຜະ­ລິດ​ຕະ​ພັນ​ສັດ­ປ່າ ແລະ ສັດ​ນ້ຳ​ໃນ​ນະ­ຄອນ­ຫຼວງ​ວຽງ​ຈັນ ເມື່ອ​ກ່ອນ​ເປັນ​ດຳ­ລັດ​ຂອງ​ນາ­ຍົກ­ລັດ­ຖະ­ມົນ­ຕີ​ກ່ຽວ​ກັບ​ວຽກ​ງານ​ດັ່ງ­ກ່າວ ຈຶ່ງ​ໄດ້​ມີ​ການ​ປັບ­ປຸງ​ມາ​ເປັນ​ນິ­ຕິ​ກຳ​ໃຫ້​ລະ­ອຽດ ໂດຍ​ເນັ້ນ​ໃສ່​ຫັນ​ມາ​ກຳ­ນົດ​ມາດ­ຕະ­ຖານ​ຜະ­ລິດ​ຕະ​ພັນ​ສັດ ປ່າ ແລະ ສັດ​ນ້ຳ ໃນ​ນະ­ຄອນ­ຫຼວງ​ວຽງ​ຈັນ ກຳ­ນົດ​ເງື່ອນ­ໄຂ​ຂອງ​ອົງ​ກອນ ບຸກ­ຄົນ​ທີ່​ຈະ​ຮັບ­ຜິດ­ຊອບ​ໃນ​ການ​ຕິດ­ຕາມ​ກວດ­ກາ​ວຽກ​ງານ​ດັ່ງ­ກ່າວ ເຊິ່ງ​ຮ່າງ​ນິ­ຕິ​ກຳ​ດັ່ງ­ກ່າວ​ໄດ້​ປັບ­ປຸງ​ເປັນ​ທີ່​ຮຽບ​ຮ້ອຍ​ແລ້ວ ກຳ­ລັງ​ຈະ​ຂໍ​ຄຳ​ເຫັນ​ນຳ​ຄະ­ນະ​ປະ­ຈຳ​ສະ­ພາ​ປະ­ຊາ­ຊົນ​ນະ­ຄອນ­ຫຼວງ​ວຽງ​ຈັນ ເນື່ອງ​ຈາ​ກວ່າ​ມີ​ການ​ປັບ­ປຸງ​ຫຼາຍ ແລ້ວ​ຈຶ່ງ​ສະ­ເໜີ​ທ່ານ​ເຈົ້າ​ຄອງ​ນະ­ຄອນ­ຫຼວງ​ວຽງ​ຈັນ​ລົງ​ນາມ​ປະ­ກາດ​ໃຊ້​ໄວໆ​ນີ້.

   ຮ່າງ​ຂໍ້​ຕົກ­ລົງ​ວ່າ​ດ້ວຍ​ກອງ​ທຶນ​ທາງ​ປະ­ຊາ­ຊົນ​ນະ­ຄອນ­ຫຼວງ​ວຽງ​ຈັນ ສະ­ພາ​ປະ­ຊາ­ຊົນ​ນະ­ຄອນ­ຫຼວງ​ວຽງ​ຈັນ​ໄດ້​ພິ­ຈາ­ລະ­ນາ 2 ຄັ້ງ​ແລ້ວ​ຈຶ່ງ​ຮັບ­ຮອງ ຫຼັງ​ຈາກ​ນັ້ນ ໄດ້​ລາຍ​ງານ​ຂໍ​ຄຳ​ເຫັນ​ຊອບ​ຈາກ​ລັດ­ຖະ­ບານ ແລະ ລັດ­ຖະ­ບານ​ໄດ້​ຊີ້​ນຳ​ຕາມ​ແຈ້ງ​ການ​ຂອງ​ຫ້ອງ​ວ່າ­ການ​ສຳ­ນັກ­ງານ​ນາ­ຍົກ­ລັດ­ຖະ­ມົນ­ຕີ ສະ­ບັບ​ເລກ​ທີ 1086/ລບ ມາ​ຮອດ​ປັດ­ຈຸ­ບັນ​ຮ່າງ​ຂໍ້​ຕົກ­ລົງ​ສະ­ບັບ​ດັ່ງ­ກ່າວ​ໄດ້​ຮັບ​ການ​ປັບ­ປຸງ​ສຳ­ເລັດ​ແລ້ວ ໄດ້​ຫຼຸດ​ອັດ­ຕາ​ການ​ເກັບ​ລົງ​ໜ້ອຍ​ໜຶ່ງ ແລະ ຄະ­ນະ​ພັກ​ອົງ­ການ​ປົກ­ຄອງ​ນະ­ຄອນ­ຫຼວງ​ວຽງ​ຈັນ​ໄດ້​ສະ­ເໜີ​ຕື່ມ​ວ່າ ເພື່ອ​ຄວາມ​ຍືນ​ຍົງ​ຂອງ​ກອງ​ທຶນ​ດັ່ງ­ກ່າວ ຈຶ່ງ​ໄດ້​ຫັນ​ການ​ເກັບ​ຄ່າ​ບໍ­ລິ­ການ​ເຮັດ​ກອງ​ທຶນ​ທາງ​ເປັນ​ພູດ​ໜຶ່ງ​ຂອງ​ອາ­ກອນ​ຕົວ​ເມືອງ ໃຫ້​ບັນ­ດາ​ເມືອງ​ທີ່​ຈຳ­ເປັນ​ໃນ​ການ​ສ້ອມ­ແປງ​ເສັ້ນ­ທາງ​ໃນ​ເມືອງ​ຕົນ​ໃຫ້​ຫັນ​ມາ​ນຳ​ໃຊ້​ສູດ​ກອງ​ທຶນ​ດັ່ງ­ກ່າວ ໄປ​ຈັດ​ຕັ້ງ​ປະ­ຕິ­ບັດ​ຢູ່​ໃນ​ເມືອງ​ຂອງ​ຕົນ ສືບ­ຕໍ່​ສະ­ເໜີ​ຮ່າງ​ນິ­ຕິ​ກຳ​ດັ່ງ­ກ່າວ​ໃຫ້​ລັດ­ຖະ­ບານ​ມີ​ທິດ​ຊີ້​ນຳ ພາຍ­ຫຼັງ​ໄດ້​ຈັດ​ສຳ​ມະ​ນາ​ໄດ້​ເຫັນ​ຄວາມ​ຊອບ​ຈາກ​ສະ­ມາ­ຊິກ​ພັກ ພະ­ນັກ­ງານ ທະ­ຫານ ຕຳ­ຫຼວດ ແລະ ປະ­ຊາ­ຊົນ​ຊາວ​ນະ­ຄອນ­ຫຼວງ​ວຽງ​ຈັນ​ເຫັນ​ດີ​ນຳ​ແລ້ວ ແລະ ສຳ­ລັບ​ຮ່າງ​ຂໍ້​ຕົກ­ລົງ​ວ່າ​ດ້ວຍ​ເປົ້າ​ໝາຍ​ການ​ສ້າງ​ນະ­ຄອນ­ຫຼວງ​ວຽງ​ຈັນ​ສະ­ຫງົບ​ສຸກ​ໃນ​ໄລ­ຍະ​ໃໝ່ ແມ່ນ​ໄດ້​ຖືກ​ຮັບ­ຮອງ​ໃນ​ກອງ​ປະ­ຊຸມ​ສະ­ໄໝ​ສາ­ມັນ​ເທື່ອ​ທີ 2 ຂອງ​ສະ­ພາ​ປະ­ຊາ­ຊົນ​ນະ­ຄອນ­ຫຼວງ​ວຽງ​ຈັນ​ຊຸດ​ທີ 1 ຮ່າງ​ນິ­ຕິ​ກຳ​ດັ່ງ­ກ່າວ​ໄດ້​ປັບ­ປຸງ ແລະ ລາຍ​ງານ​ໃຫ້​ລັດ­ຖະ­ບານ ຫ້ອງ​ວ່າ­ການ​ສູນ​ກາງ​ພັກ ກະ­ຊວງ ປກຊ-ປກສ ກະ­ຊວງ​ການ​ຕ່າງ­ປະ­ເທດ ເພື່ອ​ຂໍ​ຄຳ​ເຫັນ​ຊອບ​ນຳ​ກ່ອນ ແລ້ວ​ຈຶ່ງ​ສະ­ເໜີ​ເຈົ້າ​ຄອງ​ນະ­ຄອນ­ຫຼວງ​ວຽງ​ຈັນ​ລົງ​ນາມ​ປະ­ກາດ​ໃຊ້.

ຂ່າວທີ່ກ່ຽວຂ້ອງ