ຂ່າວຫຼ້າສຸດ

ຫຼາຍແຂວງພາກເໜືອ ແລະ ພາກກາງ ປະສົບໄພນ້ຳຖ້ວມໜັກ

239 25 ກ.ກ. 2018 ຂ່າວໜ້າ​ໜຶ່ງ

   ຈາກ​ສະ­ພາບ​ຝົນ­ຕົກ​ໜັກ​ຕິດ­ຕໍ່​ກັນ​ຫຼາຍ​ວັນ ນັບ​ທັງ​ພາ­ຍຸ​ໝູນ​ເຂດ​ຮ້ອນ​ເຊີນ​ຕິນ (Son-Tinh) ໃນ​ລະ­ຫວ່າງ ວັນ​ທີ 18-21 ກໍ­ລະ­ກົດ 2018 ເຊິ່ງ​ໄດ້​ກໍ່­ໃຫ້­ເກີດ​ນ້ຳ​ຖ້ວມ​ຢູ່​ຫຼາຍ​ທ້ອງ­ຖິ່ນ​ຂອງ​ແຂວງ​ຕ່າງໆ ເຊັ່ນ: ແຂວງ​ອຸ­ດົມ​ໄຊ ຫຼວງ​ພະ​ບາງ ຊຽງ​ຂວາງ ແລະ ແຂວງ​ບໍ​ລິ​ຄຳ​ໄຊ ເຮັດ​ໃຫ້​ຊັບ​ສິນ ເຮືອນ​ຊານ ເນື້ອ­ທີ່​ການ​ຜະ­ລິດ​ໄດ້​ຮັບ​ຄວາມ​ເສຍ​ຫາຍ ໃນ​ຂະ­ນະ​ດຽວ​ກັນ​ໄດ້​ມີ​ຜູ້​ເສຍ​ຊີ­ວິດ​ຈາກ​ໄພ​ທຳ​ມະ​ຊາດ​ຄັ້ງ​ນີ້.

   ເຈົ້າ​ໜ້າ­ທີ່ ແຂວງ​ອຸ­ດົມ​ໄຊ​ໄດ້​ລາຍ​ງານ​ໃຫ້​ຮູ້­ເມື່ອ​ທ້າຍ​ອາ­ທິດ​ຜ່ານ​ມາ​ນີ້​ວ່າ: ເມືອງ​ທີ່​ໄດ້​ຮັບ​ຜົນ​ກະ ທົບ​ຈາກ​ໄພ​ນ້ຳ​ຖ້ວມ​ຫຼາຍ​ກວ່າ​ໝູ່ ມີ​ເມືອງ​ແບ່ງ ເມືອງ​ຫຼາ ນາ​ໝໍ້ ແລະ ເມືອງ​ຮຸນ ເຮັດ​ໃຫ້​ເນື້ອ­ທີ່​ທຳ​ການ​ຜະ­ລິດ​ຫຼາຍ​ເຮັກ­ຕາ ແລະ ເຮືອນ​ປະ­ຊາ­ຊົນ​ຫຼາຍ​ກວ່າ 100 ຫຼັງ​ຖືກ​ນ້ຳ​ຖ້ວມ ລວມ​ມູນ​ຄ່າ​ຫຼາຍ​ກວ່າ 620 ລ້ານ​ກີບ.

   ໃນ​ວັນ​ທີ 22 ກໍ­ລະ­ກົດ 2018 ລາຍ​ງານ​ຈາກ​ແຂວງ​ຊຽງ​ຂວາງ ໃຫ້​ຮູ້​ວ່າ: 7 ເມືອງ​ຂອງ​ແຂວງ​ກໍ່​ໄດ້​ຮັບ ຜົນ​ກະ­ທົບ​ຈາກ​ໄພ​ນ້ຳ​ຖ້ວມ​ເຊັ່ນ​ກັນ ເປັນ­ຕົ້ນ ແມ່ນ​ເຂື່ອນ​ນ້ອຍ​ນ້ຳ​ກຶນ​ແຕກ​ຢູ່​ເມືອງ​ແປກ ໃນ​ຂະ­ນະ​ດຽວ​ກັນ​ເມືອງ​ພູ​ກູດ ມີ​ຜູ້​ເສຍ​ຊີ­ວິດ 2 ຄົນ ຈາກ​ດິນ​ເຈື່ອນ​ທັບ​ເຮືອນ ສຳ­ລັບ​ເມືອງ​ຄູນ ເມືອງ​ໝອກ ແລະ ເມືອງ ອື່ນໆ​ຖືກ​ນ້ຳ​ຖ້ວມ​ເປັນ​ບໍ­ລິ­ເວນ​ກວ້າງ ພ້ອມ​ນີ້ ກໍ່​ໄດ້​ເຮັດ​ໃຫ້​ເສົາ​ໄຟ­ຟ້າ​ຫັກ​ໂຄ່ນ ນ້ຳ​ຖ້ວມ​ເຮືອນ ນາ​ເຂົ້າ ໜອງ​ປາ ສັດ­ລ້ຽງ ສວນ​ສາ­ລີ ເສັ້ນ­ທາງ​ຄົມ­ມະ­ນາ­ຄົມ​ພາຍ​ໃນ​ເມືອງ​ໄດ້​ຮັບ​ຄວາມ​ເປ່​ເພ ໂດຍ​ສະ­ເພາະ ສາຍ​ທາງ​ເລກ 7 ຂົວ​ບາງ​ແຫ່ງ​ຫັກ ເຮັດ​ໃຫ້­ການ​ສັນ­ຈອນ​ພົບ​ຄວາມ​ຫຍຸ້ງ­ຍາກ.

   ສຳ­ລັບ​ແຂວງ​ບໍ​ລິ​ຄຳ​ໄຊ ໄດ້​ລາຍ​ງານ​ໃນ​ວັນ​ທີ 20 ກໍ­ລະ­ກົດ 2018 ນີ້​ວ່າ: ຢູ່​ເມືອງ​ປາກ​ກະ­ດິງ ນ້ຳ​ຖ້ວມ​ຫຼາຍ​ກວ່າ​ໝູ່​ແມ່ນ​ເຂດ​ນາ​ເຄືອ ລຽບ​ຕາມ​ເສັ້ນ­ທາງ​ເລກ​ທີ 13 ໃຕ້ ມີ​ນ້ຳ​ຖ້ວມ​ເນື້ອ­ທີ່​ນາ 167 ກວ່າ​ເຮັກ­ຕາ ສວນ​ມັນ­ຕົ້ນ 8 ເຮັກ­ຕາ ແລະ ສັດ­ລ້ຽງ​ອີກ​ຈຳ­ນວນ​ໜຶ່ງ ໃນ​ນັ້ນ ມີ​ຜູ້​ເສຍ​ຊີ­ວິດ 1 ຄົນ ເມືອງ   ຄຳ​ເກີດ ມີ​ຈຳ­ນວນ 30 ບ້ານ 835 ຄອບ­ຄົວ 1.385 ເຮັກ­ຕາ ທີ່​ຖືກ​ຜົນ​ກະ­ທົບ​ອຸ​ທົກ​ໄພ​ທຳ​ມະ​ຊາດ ນອກ­ຈາກ​ນີ້ ເມືອງ​ວຽງ​ທອງ ໄດ້​ລາຍ​ງານ​ຂໍ້​ມູນ​ເບື້ອງ​ຕົ້ນ​ວ່າ: ທົ່ວ​ເມືອງ​ມີ​ນ້ຳ​ຖ້ວມ​ເນື້ອ­ທີ່​ນາ 150 ກວ່າ​ເຮັກ­ຕາ ສວນ​ມັນ­ຕົ້ນ 16 ເຮັກ­ຕາ ໜອງ​ປາ 1 ໜອງ ເຮືອນ 10 ຫຼັງ ໃນ​ນີ້ ເສັ້ນ­ທາງ​ເລກ 8 ອາ ແລະ ເສັ້ນ­ທາງ 1 ດີ ຍັງ​ມີ​ດິນ​ເຈື່ອນ​ທັບ​ຖົມ​ເສັ້ນ­ທາງ​ຈຳ­ນວນ​ຫຼາຍ​ຈຸດ ແລະ ຢູ່​ນະ­ຄອນ­ຫຼວງ​ພະ​ບາງ ໄດ້​ລາຍ​ງານ​ເມື່ອ​ທ້າຍ​ອາ­ທິດ​ນີ້​ວ່າ ຝົນ­ຕົກ​ໜັກ​ຕິດ­ຕໍ່​ກັນ​ຫຼາຍ​ຊົ່ວ­ໂມງ ເຮັດ​ໃຫ້​ເກີດ​ມີ​ດິນ​ເຈື່ອນ ແລະ ເສັ້ນ­ທາງ​ຖືກ​ຕັດ­ຂາດ​ຫຼາຍ​ຈຸດ ໂດຍ​ສະ­ເພາະ ເສັ້ນ­ທາງ​ຫຼວງ​ທ້ອງ­ຖິ່ນ ແລະ ເສັ້ນ­ທາງ​ຫຼວງ​ແຫ່ງ​ຊາດ ຖືກ​ຕັດ­ຂາດ ເປັນ­ຕົ້ນ​ທາງ​ເລກ 1 C ເຂດ​ເມືອງ​ງອຍ ເສັ້ນ­ທາງ​ຫຼວງ​ແຫ່ງ​ຊາດ ເລກ​ທີ 13 ເໜືອ ແລະ ເສັ້ນ­ທາງ​ເລກ​ທີ 7.

   ປັດ­ຈຸ­ບັນ​ເຈົ້າ​ໜ້າ­ທີ່ ແລະ ພາກ­ສ່ວນ​ທີ່​ກ່ຽວ­ຂ້ອງ​ຂອງ​ແຂວງ ແລະ ເມືອງ ກຳ­ລັງ​ລົງ​ສຳ​ຫຼວດ ແລະ ປະ​ເມີນ​ຄວາມ​ເສຍ​ຫາຍ​ຈາກ​ສະ­ພາບ​ດັ່ງ­ກ່າວ ເພື່ອ​ຫາ​ວິ­ທີ​ແກ້​ໄຂ ແລະ ຊ່ວຍ­ເຫຼືອ​ພໍ່​ແມ່​ປະ­ຊາ­ຊົນ​ຜູ້​ທີ່​ໄດ້​ຮັບ​ຜົນ​ກະ­ທົບ​ໃນ​ເບື້ອງ​ຕົ້ນ ພ້ອມ​ທັງ​ຮຽກ­ຮ້ອງ​ໃຫ້​ທຸກ​ຄົນ​ຈົ່ງ​ມີ​ສະ­ຕິ​ໃນ​ການ​ກະ­ກຽມ​ເຄື່ອນ​ຍ້າຍ​ວັດ­ຖຸ​ສິ່ງ​ຂອງ​ມີ­ຄ່າ ແລະ ສັດ­ລ້ຽງ​ໄປ​ໄວ້​ບ່ອນ​ທີ່​ປອດ​ໄພ ຂໍ​ໃຫ້​ຕິດ­ຕາມ​ຂ່າວ​ພະ­ຍາ­ກອນ​ອາ­ກາດ ລະ­ດັບ​ນ້ຳ​ຈາກ​ກົມ​ອຸ­ຕຸ­ນິ­ຍົມ ແລະ ອຸ​ທົກ​ກະ​ສາດ​ເປັນ​ປະ­ຈຳ ພາຍ­ຫຼັງ​ນ້ຳ​ຫຼຸດ​ລົງ​ແລ້ວ​ໃຫ້​ຂຸ້ນ­ຂ້ຽວ​ອະ­ນາ­ໄມ ເກັບ​ມ້ຽນ​ງ່າ­ໄມ້ ຫີນ ອອກ​ຈາກ​ທົ່ງ​ນາ ສ້ອມ­ແປງ​ຝາຍ​ທີ່​ເປ່​ເພ ເພື່ອ​ລຳ­ລຽງ​ນ້ຳ​ເຂົ້າ​ໃສ່​ນາ ບ່ອນ​ໃດ​ທີ່​ເສຍ​ຫາຍ​ຫຼາຍ​ໃຫ້​ປູກ​ພືດ​ອື່ນ​ທົດ​ແທນ.

ຂ່າວທີ່ກ່ຽວຂ້ອງ