ຂ່າວຫຼ້າສຸດ

ລັດຖະບານ ລົງຕິດຕາມຊ່ວຍເຫຼືອຜູ້ປະສົບໄພນ້ຳຖ້ວມ ຢູ່ແຂວງອັດຕະປື ຢ່າງຮີບດ່ວນ

373 25 ກ.ກ. 2018 ຂ່າວໜ້າ​ໜຶ່ງ

   ທ່ານ ທອງ​ລຸນ ສີ​ສຸ​ລິດ ນາ­ຍົກ­ລັດ­ຖະ­ມົນ­ຕີ ພ້ອມ​ດ້ວຍ​ຄະ­ນະ ໄດ້​ເດີນ­ທາງ​ດ້ວຍ​ເຄື່ອງ​ບິນ ເຮລີ​ຄອບ​ແຕ ລົງ​ໄປ​ແຂວງ​ອັດ​ຕະ​ປື ໃນ​ຕອນ​ເຊົ້າ​ວັນ​ທີ 24 ກໍ­ລະ­ກົດ 2018 ເພື່ອ​ຕິດ­ຕາມ​ໃຫ້​ກຳ­ລັງ​ໃຈ ແລະ ຊ່ວຍ­ເຫຼືອ​ປະ­ຊາ­ຊົນ​ທີ່​ໄດ້​ຮັບ​ຜົນ​ກະ­ທົບ​ໄພ​ນ້ຳ​ຖ້ວມ​ໄຫຼ­ຊຸ ເຊິ່ງ​ມີ​ບ້ານ ຫີນ​ລາດ ບ້ານ​ໃໝ່ ບ້ານ​ສະ­ໜອງ ບ້ານ​ທ່າ​ແສງ​ຈັນ ບ້ານ​ທ່າ​ຫີນ ບ້ານ​ໂຄກ​ກ່ອງ ບ້ານ​ຕະ​ໝໍ​ຍອດ ບ້ານ​ທ່າ​ບົກ ບ້ານ​ມ່ວງ ແລະ ບັນ­ດາ ບ້ານ​ລຽບ​ຕາມ​ສາຍ​ນ້ຳ​ເຊ​ປຽນ ເມືອງ​ສະ­ໜາມ​ໄຊ ແຂວງ​ອັດ​ຕະ​ປື ພາຍ­ຫຼັງ​ປະ­ຊາ­ຊົນ​ຊາວ​ເມືອງ​ດັ່ງ­ກ່າວ ໄດ້​ຮັບ​ວິ​ກິດ​ການ​ນ້ຳ​ຖ້ວມ​ຈາກ​ເຫດ­ການ​ເຂື່ອນ​ເຊ​ປຽນ-ເຊ​ນ້ຳ​ນ້ອຍ​ທະ­ລຸ​ໄຫຼ​ໃນ​ຄືນ​ວັນ​ທີ 23 ກໍ­ລະ­ກົດ 2018 ຜ່ານ​ມາ.

   ຈາກ​ເຫດ­ການ​ຄັ້ງ​ນີ້ ລັດ­ຖະ­ບານ​ປະ­ກາດ​ໃຫ້​ເອົາ​ເຂດ​ທີ່​ໄດ້​ຮັບ​ຜົນ​ກະ­ທົບ​ຈາກ​ໄພ​ນ້ຳ​ຖ້ວມ​ຂອງ​ເມືອງ​ສະ­ໜາມ​ໄຊ​ຂອງ​ແຂວງ​ອັດ​ຕະ​ປື ເປັນ​ເຂດ​ໄພ­ພິ­ບັດ​ສຸກ​ເສີນ ທີ່​ໄດ້​ຮັບ​ຜົນ​ກະ­ທົບ​ຈາກ​ອຸ­ບັດ­ເຫດ​ໂຄງ­ການ​ກໍ່­ສ້າງ​ເຂື່ອນ​ໄຟ­ຟ້າ​ເຊ​ປຽນ-ເຊ​ນ້ຳ​ນ້ອຍ ຢູ່​ແຂວງ​ອັດ​ຕະ​ປື ເບື້ອງ​ຕົ້ນ​ມີ​ປະ­ຊາ­ຊົນ​ທີ່​ໄດ້​ຮັບ​ຜົນ​ກະ­ທົບ​ໃນ​ຈຳ­ນວນ 1.005 ຄອບ­ຄົວ ມີ​ຜູ້​ສູນ­ຫາຍ​ປະ­ມານ 34 ຄົນ.

   ສຳ­ລັບ​ອຸ­ບັດ­ເຫດ​ຄັ້ງ​ນີ້ ແມ່ນ​ຍ້ອນ​ນ້ຳ​ໃນ​ເຂື່ອນ​ລະ­ບາຍ​ໄດ້​ທະ­ລຸ​ໄຫຼ​ໄປ​ຕາມ​ເຊ​ປຽນ ສັນ​ອ່າງ­ເກັບ­ນ້ຳ​ຂອງ​ເຂື່ອນ​ເຊ​ນ້ຳ​ນ້ອຍ ມີ​ເນື້ອ­ທີ່​ອ່າງ​ກວ້າງ​ທີ່​ສຸດ​ໃນ​ບັນ­ດາ​ເຂື່ອນ​ທີ່­ຢູ່​ລວມ​ກັນ ຄື: 522 ຕາ­ລາງ​ກິ​ໂລ ແມັດ ເຊິ່ງ​ທາງ​ເຈົ້າ​ຂອງ​ໂຄງ­ການ​ໄດ້​ຄາດ​ປະ­ລິ­ມານ​ນ້ຳ​ໄວ້​ທີ 5.000 ລ້ານ​ໂຕນ ແລະ ມວນ​ນ້ຳ​ດັ່ງ­ກ່າວ ຈະ​ໄຫຼ​ລົງ​ສູ່​ນ້ຳ​ເຊ​ປຽນ ເຮັດ​ໃຫ້​ບັນ­ດາ​ບ້ານ​ທີ່​ຕັ້ງ​ຢູ່​ໃກ້​ບໍ­ລິ­ເວນ​ເຂື່ອນ​ໄດ້​ຮັບ​ຜົນ​ກະ­ທົບ​ຢ່າງ​ໜັກ.

   ພາຍ­ຫຼັງ​ເກີດ​ເຫດ​ເຈົ້າ​ໜ້າ­ທີ່​ແຂວງ​ອັດ​ຕະ​ປື ໄດ້​ລາຍ​ງານ​ວ່າ ລະ­ດັບ​ນ້ຳ​ເຊ​ປຽນ​ທີ່​ວັດ­ແທກ​ຢູ່​ບ້ານ​ເວີນ ແຄນ ສູງ​ເຖິງ 15 ແມັດ ແລະ ໄດ້​ໄຫຼ​ເຂົ້າ​ຖ້ວມ​ບັນ­ດາ​ບ້ານ​ດັ່ງ­ກ່າວ​ສູງ​ເຖິງ​ລະ­ດັບ​ຫຼັງ­ຄາ​ເຮືອນ ປັດ­ຈຸ­ບັນ ເຈົ້າ​ໜ້າ­ທີ່​ກ່ຽວ­ຂ້ອງ​ກຳ­ລັງ​ຂຸ້ນ­ຂ້ຽວ​ລົງ​ຊ່ວຍ​ປະ­ຊາ­ຊົນ​ທີ່​ຕິດ​ຄ້າງ​ຕາມ​ຕົ້ນ­ໄມ້ ຕາມ​ຫຼັງ­ຄາ​ເຮືອນ ມີ​ເຮືອນ​ຊານ ບ້ານ​ຊ່ອງ​ໄຫຼ​ໄປ​ກັບ​ນ້ຳ​ເປັນ​ຈຳ­ນວນ​ຫຼາຍ ແລະ ໄດ້​ແຈ້ງ​ເຕືອນ​ເຖິງ​ພໍ່​ແມ່​ປະ­ຊາ­ຊົນ​ທີ່​ອາ­ໄສ​ຢູ່​ຕາມ​ສາຍ​ນ້ຳ ຕ່າງໆ​ທີ່​ມີ​ຄວາມ​ສ່ຽງ​ໃຫ້​ຮີບ​ຮ້ອນ​ເກັບ​ມ້ຽນ​ເຄື່ອງ​ຂອງ ຊັບ​ສິນ​ທີ່​ມີ­ຄ່າ ແລະ ສັດ­ລ້ຽງ​ໄວ້​ບ່ອນ​ສູງ​ທີ່​ປອດ​ໄພ ພ້ອມ​ຕິດ­ຕາມ​ຂ່າວ­ສານ ແລະ ປະ­ສານ​ງານ​ການ­ຈັດ­ຕັ້ງ​ເພື່ອ​ໃຫ້​ຄວາມ​ຊ່ວຍ­ເຫຼືອ.

   ທ່ານ ປະ­ສົງ ວົງ​ຄຳ​ຈັນ ຫົງ​ໜ້າ​ກົມ​ສັງ­ຄົມ​ສົງ­ເຄາະ ທັງ​ເປັນ​ຫົວ­ໜ້າ​ກອງ​ເລ­ຂາ​ຄະ­ນະ​ກຳ­ມະ­ການ​ປ້ອງ​ກັນ ແລະ ຄວບ​ຄຸມ​ໄພ­ພິ­ບັດ​ແຫ່ງ​ຊາດ ໄດ້​ໃຫ້​ສຳ­ພາດ​ວ່າ: ໃນ​ນາມ​ກອງ​ເລ­ຂາ​ແຫ່ງ​ຊາດ ກຳ­ລັງ​ສືບ­ຕໍ່​ຄົ້ນ­ຄວ້າ​ຊ່ວຍ­ເຫຼືອ​ສຸກ​ເສີນ​ຜູ້​ປະ­ສົບ​ໄພ​ທີ່​ໄດ້​ຮັບ​ຜົນ​ກະ­ທົບ​ຈາກ​ເຫດ­ການ​ດັ່ງ­ກ່າວ ເປັນ­ຕົ້ນ ແມ່ນ​ການ​ຊ່ວຍ ເຫຼືອ ອາ­ຫານ ທີ່​ພັກ​ອາ­ໄສ ເຄື່ອງ­ນຸ່ງ​ຫົ່ມ ແລະ ຢາ​ປົວ​ພະ­ຍາດ ເຊິ່ງ​ປັດ­ຈຸ­ບັນ ກໍ່​ໄດ້​ສົມ­ທົບ​ກັບ​ກຳ­ລັງ​ທະ­ຫານ ຕຳ­ຫຼວດ ອົງ​ການ­ຈັດ­ຕັ້ງ​ຂອງ​ລັດ-ເອ­ກະ​ຊົນ ແລະ ປະ­ຊາ­ຊົນ​ນຳ​ໃຊ້​ພາ­ຫະ­ນະ​ທາງ​ເຮືອ­ບິນ ລົດ ແລະ ເຮືອ ເພື່ອ​ລະ­ດົມ​ກັນ​ຊ່ວຍ​ອົບ​ພະ​ຍົບ​ປະ­ຊາ­ຊົນ​ຜູ້​ປະ­ສົບ​ໄພ​ມາ​ໄວ້​ໃນ​ສະ­ຖານ­ທີ່​ສູງ ແລະ ປອດ​ໄພ ພ້ອມ​ທັງ​ສືບ­ຕໍ່​ກູ້​ໄພ​ຜູ້​ທີ່​ຍັງ​ຫຼົງ​ເຫຼືອ ຫຼື ຕົກ​ຄ້າງ​ຢູ່​ຕາມ​ບ້ານ​ເຮືອນ ແລະ ເຂດ​ທີ່​ປະ­ສົບ​ໄພ​ຍັງ​ອອກ​ມາ​ບໍ່​ໄດ້ ປັດ­ຈຸ­ບັນ ປະ­ຊາ­ຊົນ​ຈຳ­ນວນ​ໜຶ່ງ​ກໍ່​ໄດ້​ຂຶ້ນ​ໄປ​ຢູ່​ສູນ​ອົບ​ພະ​ຍົບ​ຊົ່ວ­ຄາວ​ແລ້ວ ໄພ­ພິ­ບັດ​ຄັ້ງ​ນີ້ ຖື​ໄດ້​ວ່າ​ເປັນ​ຄັ້ງ​ຮ້າຍ​ແຮງ​ທີ່​ສຸດ ແລະ ຍັງ​ບໍ່​ສາ­ມາດ​ປະ​ເມີນ​ການ​ເສຍ​ຫາຍ​ໄດ້.

ຂ່າວທີ່ກ່ຽວຂ້ອງ