ຂ່າວຫຼ້າສຸດ

ອາກ​ຊັງ​ຕິນ ອະນຸຍາດ​ໃຫ້​ກອງທັບ​ເຂົ້າ​ຮ່ວມ​ການ​ຮັກສາ​ຄວາມ​ສະຫງົບ

131 25 ກ.ກ. 2018 ຂ່າວຕ່າງປະເທດ
ອາກ​ຊັງ​ຕິນ ອະນຸຍາດ​ໃຫ້​ກອງທັບ​ເຂົ້າ​ຮ່ວມ​ການ​ຮັກສາ​ຄວາມ​ສະຫງົບ

     ວັນ​ທີ 23 ກໍລະກົດ​ນີ້ ລັດຖະບານ​ອາກ​ຊັງ​ຕິນ ໄດ້​ປະກາດ​ດຳລັດ​ຂອງ​ປະທານາທິບໍດີ ມາ​ອູ​ຣີ​ຊີ​ໂອ ມາກ​ຣີ ກ່ຽວ​ກັບ​ການ​ປະຕິ​ຮູບ​ລະບົບ​ປ້ອງ​ກັນ​ຊາດ ໂດຍ​ຜ່ານ​ນັ້ນ​ກໍ​ອະນຸຍາດ​ໃຫ້ ກອງ​ກຳລັງ​ຂອງ​ກອງທັບ ເຂົ້າ​ຮ່ວມ​ໃນ​ໜ້າທີ່​ຈຳນວນ​ໜຶ່ງ ສົມທົບ​ກັບ​ກອງ​ກຳລັງ​ຕຳຫຼວດ ເພື່ອ​ຮັບປະກັນ​ຄວາມ​ສະຫງົບ​ຢູ່​ພາຍ​ໃນ​ປະເທດ.

    ຂ່າວ​ແຈ້ງວ່າ ຈາກ​ໂຄງການ​ປະຕິ​ຮູບ​ດັ່ງກ່າວ ນອກຈາກ​ໜ້າທີ່​ຕົ້ນຕໍ​ກໍ​ຄື​ການ ປົກ​ປັກ​ຮັກສາ​ອຳນາດ​ອະທິປະ​ໄຕ​ແຫ່ງ​ຊາດ ແລະ​ຜືນ​ແຜ່ນດິນ​ອັນ​ຄົບ​ຖ້ວນ​ແລ້ວ ກອງທັບ​ອາກ​ຊັງ​ຕິນ ກໍ​ຍັງ​ໄດ້​ຮັບ​ອະນຸຍາດ​ໃຫ້​ຮ່ວມ​ມື​ກັບ​ກອງ​ກຳລັງ​ຮັກສາ​ຄວາມ​ສະຫງົບ ແລະ​ຕຳຫຼວດ ໃນ​ໜ້າທີ່​ຊ່ວຍເຫຼືອ ດ້ານ​ພາລາ​ທິ​ການ​ຢູ່​ໃນ​ເຂດ​ຊາຍ​ແດນ ຕະຫຼອດ​ຮອດ​ບັ້ນ​ກວາດ​ລ້າງ​ບັນດາ​ອົງການ​ຄ້າ​ຢາ​ເສບ​ຕິດ ເຖື່ອນ ແລະ​ອົງການ​ກໍ່​ການ​ຮ້າຍ ທີ່​ມີ​ຈຸດປະສົງ​ແຊກ​ຊຶມ​ເຂົ້າ​ໄປ​ໃນ​ດິນແດນ​ຂອງ​ປະເທດ​ນີ້.

    ນອກຈາກ​ນັ້ນແລ້ວ ກອງ​ກຳລັງ​ກອງທັບ​ຂອງ​ອາກ​ຊັງ​ຕິນ ກໍ​ມີໜ້າ​ທີ່​ປົກ​ປັກ​ຮັກສາ​ບັນດາ ເປົ້າ​ໝາຍ​ຍຸດ​ທະ​ສາດ ສິ່ງ​ທ້າ​ທາຍ​ຈາກ​ເຄື່ອ​ຂ່າຍ​ອິນ​ເຕີ​ເນັດ ຮັບປະກັນ​ຄວາມ​ສະຫງົບ​ໃຫ້​ແກ່​ຊັບ​ສິນ ແລະ​ພື້ນຖານ​ໂຄງ​ລ່າງ​ຂ່າວສານ​ວິທະຍາ ຢູ່​ໃນ​ລະບົບ​ປ້ອງ​ກັນ​ຊາດ.

    ໃນ​ອະດີດ​ນັ້ນ ກົດໝາຍ​ວ່າ​ດ້ວຍ​ວຽກ​ງານ​ປ້ອງ​ກັນ​ຊາດ​ຂອງ​ອາກ​ຊັງ​ຕິນ ໄດ້​ກຳນົດ ຂອບ​ເຂດ​ການເຄື່ອນໄຫວ​ຂອງ​ກອງທັບ ໃນ​ການ “ແກ້​ໄຂ​ການ​ໂຈມ​ຕີ​ຈາກ​ພາຍ​ນອກ”. ມາ​ຮອດ​ປີ 2006 ດຳລັດ​ສະບັບ​ໜຶ່ງ​ຂອງ​ປະທານາທິບໍດີ ແນ​​ສ​ໂຕ ຄິ​​ສ​ເນີ ຜູ້​ທີ່​ໄດ້​ລ່ວງ​ລັບ​ໄປ​ແລ້ວ​ນັ້ນ ໄດ້​ຍົກເລີກ​ໜ້າທີ່​ທັງ​ໝົດ​ຂອງ​ກອງທັບ ໃນ​ການ​ປ້ອງ​ກັນ​ຄວາມ​ສະຫງົບ​ພາຍ​ໃນ​ປະເທດ.

 

ຂ່າວທີ່ກ່ຽວຂ້ອງ