ຂ່າວຫຼ້າສຸດ

ໄຟ​ໄໝ້​ປ່າ​ຮ້າຍ​ແຮງ​ຢູ່​ໃນ​ເກ​​ັຣກ

196 25 ກ.ກ. 2018 ຂ່າວຕ່າງປະເທດ
ໄຟ​ໄໝ້​ປ່າ​ຮ້າຍ​ແຮງ​ຢູ່​ໃນ​ເກ​​ັຣກ

     ມີ​ຜູ້​ເສຍ​ຊີວິດ 20 ກວ່າ​ຄົນ ແລະ​ບາດເຈັບ​ອີກ 104 ຄົນ ຈາກ​ເຫດການ ໄຟ​ໄໝ້​ປ່າ​ຫຼາຍ​ກໍລະນີ ທີ່​ໄດ້​ທຳລາຍ​ເຂດ​ໜຶ່ງ​ຢູ່​ໃກ້​ກັບ​ນະຄອນຫຼວງ​ອາ​ແຕນ ຂອງ​ເກ​​ັຣກ ເມື່ອ​ວັນ​ທີ 23 ກໍລະກົດ​ນີ້. ໃນ​ຈຳນວນ​ຜູ້​ທີ່​ໄດ້​ຮັບ​ບາດເຈັບ​ນັ້ນ ມີ​ເດັກນ້ອຍ​ລວມ​ຢູ່​ນຳ 16 ຄົນ.

    ເຈົ້າ​ໜ້າທີ່​ເກ​​ັຣກ ໄດ້​ຮຽກຮ້ອງ​ຄວາມ​ຊ່ວຍເຫຼືອ​ຈາກ​ສາກົນ ທ່າມກາງ​ທີ່​ສະພາບ​ໄຟ​ໄໝ້​ປ່າ ພວມ​ເກີດ​ຄວາມ​ສ່ຽງ​ທີ່​ຈະ​ຄວບ​ຄຸມ​ບໍ່​ໄດ້. ທ່ານ ດີ​ມີ​ຕຣິ​​ສ ຊາ​ນາ​ໂກ​ປູ​​ລົສ ໂຄສົກ​ຂອງ ລັດຖະບານ​ເກ​​ັຣກ ເວົ້າ​ວ່າ ຜູ້​ທີ່​ໄດ້​ຮັບ​ເຄາະ​ຮ້າຍ​ສ່ວນ​ຫຼາຍ ແມ່ນ​ຖືກ​ພົບ​ເຫັນ​ຢູ່​ໃນ​ເຮືອນ ຫຼື​ໃນ​ລົດຍົນ ຢູ່​ໃນ​ເຂດ​ພັກຜ່ອນ​ເພື່ອ​ສຸຂະພາບ ມາຕີ (Mati) ທີ່ຢູ່​ໃກ້​ກັນ​ແຄມ​ຝັ່ງ​ທະເລ ຫ່າງ​ຈາກ​ນະຄອນ ຫຼວງ​ອາ​ແຕນ 40​ ກມ ໄປ​ທາງ​ທິດຕາເວັນອອກ​ສ່ຽງ​ເໜືອ.

    ນາຍົກລັດຖະມົນຕີ​ເກ​​ັຣກ ອາ​ເລ​ຊິ​​ສ ຊີ​ປຣາ​​ສ ຖະແຫຼງ​ວ່າ​ຈະ​ເຮັດ​ທຸກ​ວິທີ​ທາງ ເພື່ອ​ຄວບ​ຄຸມ​ໄຟ​ໄໝ້​ປ່າ​ດັ່ງກ່າວ​ໃຫ້​ໄດ້ ໂດຍ​ທ່ານ​ເວົ້າ​ວ່າ​ທຸກໆ​ກອງ​ກຳລັງ​ປະຕິບັດ​ງານ​ສຸກ​ເສີນ ໄດ້​ຮັບ​ການ​ລະດົມ​ເຂົ້າ​ປະຕິບັດ​ໜ້າທີ່ ເພື່ອ​ຮັບ​ມື​ກັບ “ເສິກ​ໄຟ” ພ້ອມ​ກັນ​ນັ້ນ​ກໍ​ປະກາດ​ພາວະ​ສຸກ​ເສີນ ຢູ່​ໃນ​ເຂດ​ອັດ​ຕີ​ກາ ທີ່​ອ້ອມ​ຮອບ​ນະຄອນຫຼວງ​ອາ​ແຕນ. ໃນ​ຂະນະ​ດຽວ​ກັນ ນາຍົກລັດຖະມົນຕີ ຊີ​ປຣາ​​ສ ກໍ​ໄດ້​ຍົກເລີກ​ການ​ຢ້ຽມຢາມ ​ບົສ​ນີ ຢ່າງ​ເປັນ​ທາງ​ການ ເພື່ອ​ຊ່ວຍເຫຼືອ​ໃນ​ການ​ປະສານ​ງານ ແກ້​ໄຂ​ສະພາບ​ໄຟ​ໄໝ້​ປ່າ ທີ່​ພວມ​ຢູ່​ໃນ​ລະດັບ “ຫຍຸ້ງຍາກ​ຢ່າງ​ຍິ່ງ” ນັ້ນ.

 

ຂ່າວທີ່ກ່ຽວຂ້ອງ