ຂ່າວຫຼ້າສຸດ

ແດດ​ຮ້ອນ​ເອົ້າ​ຍັງ​ຈະ​ສືບຕໍ່​ແກ່ຍາວ​ຢູ່​ໃນ​ຍີ່ປຸ່ນ

102 25 ກ.ກ. 2018 ຂ່າວຕ່າງປະເທດ
ແດດ​ຮ້ອນ​ເອົ້າ​ຍັງ​ຈະ​ສືບຕໍ່​ແກ່ຍາວ​ຢູ່​ໃນ​ຍີ່ປຸ່ນ

   ເຈົ້າ​ໜ້າທີ່​ຍີ່ປຸ່ນ ມີ​ຄຳ​ແຈ້ງ​ເຕືອນ​ໃໝ່​ອອກ​ມາ​ເມື່ອ​ວັນ​ທີ 23 ກໍລະກົດ​ນີ້ ເນື່ອງ​ຈາ​ກວ່າ ອາກາດ​ຮ້ອນ​ເອົ້າ​ພວມ​ເກີດ​ຂຶ້ນ ເຮັດ​ໃຫ້​ຍັງ​ສືບຕໍ່​ມີ​ຜູ້​ເສຍ​ຊີວິດ ຊຶ່ງ​ອຸ່ນ​ຫະ​ພູມ​ຢູ່​ໃນ​ພື້ນ​ທີ່​ນະຄອນ ຫຼວງ​ໂຕ​ກຽວ ສູງ​ຂຶ້ນ​ສູ່​ລະດັບ​ສ້າງ​ສະຖິຕິ.

    ອົງການ​ອຸຕຸນິຍົມ​ຍີ່ປຸ່ນ ໃຫ້​ຮູ້​ວ່າ ອຸ່ນ​ຫະ​ພູມ​ທີ່​ແທກ​ໄດ້​ໃນ​ວັນ​ທີ 23 ກໍລະກົດ​ນີ້ ຢູ່​ໃນ​ເຂດ ກູ​ມາ​ກາ​ຢາ ທີ່​ຂຶ້ນ​ກັບ​ແຂວງ​ຊາຍ​ຕາ​ມາ ໃກ້​ກັບ​ນະຄອນຫຼວງ​ໂຕ​ກຽວ ສູງ​ເຖິງ 41,1 ອົງສາ C. ໃນ​ຂະນະ​ດຽວ​ກັນ ອຸ່ນ​ຫະ​ພູມ​ຢູ່​ໃນ​ນະຄອນ ໂອ​ເມ (ທາງ​ທິດຕາເວັນຕົກ​ນະ​ຕອນ​ຫຼວງ​ໂຕ​ກຽວ) ກໍ​ສູງ​ເຖິງ 40,3 ອົງສາ C. ອຸ່ນ​ຫະ​ພູມ​ສູງ​ເປັນ​ປະຫວັດ​ການ​ກໍ​ມີ​ຂຶ້ນ ຢູ່​ໃນ​ສະຖານີ​ວັດແທກ​ອື່ນໆ​ອີກ 13 ແຫ່ງ​ໃນ​ທົ່ວ​ຍີ່ປຸ່ນ ໂດຍ​ທີ່​ອຸ່ນ​ຫະ​ພູມ​ແທກ​ໄດ້​ຢູ່​ໃນ​ກວ່າ 10 ນະຄອນ ຢູ່​ທີ່​ປະມານ 40 ອົງສາ C.

   ອົງການ​ອຸຕຸນິຍົມ​ຍີ່ປຸ່ນ ໄດ້​ແຈ້ງ​ເຕືອນ​ໄປ​ຍັງ​ປະຊາຊົນ​ຢູ່​ໃນ​ເຂດ​ຕ່າງໆ​ດັ່ງກ່າວ ຊຶ່ງ​ແທກ ອຸ່ນ​ຫະ​ພູມ​ໄດ້​ແຕ່ 35 ອົງສາ C ຂຶ້ນ​ໄປ ວ່າ​ຄວນ​ມີ​ຄວາມ​ລະມັດລະວັງ ເພື່ອ​ຫຼີກເວັ້ນ​ການ​ຖືກ ເມົາ​ແດດ. ໃນ​ຂະນະ​ດຽວ​ກັນ ທ່ານ ໂຢ​ຊີ​ຮີ​ເດ ຊູ​ກາ ໂຄສົກ​ຂອງ​ລັດຖະບານ​ຍີ່ປຸ່ນ ກໍ​ໄດ້​ແຈ້ງ​ເຕືອນ ອອກ​ມາ​ວ່າ ຊຸມ​ມື້​ທີ່ ມີ​ແດດ​ຮ້ອນ​ສູງ ຍັງ​ຈະ​ສືບຕໍ່​ໄປ​ຮອດ​ຕົ້ນ​ເດືອນ​ສິງຫາ​ໜ້າ​ນີ້.

    ສະຖິຕິ​ໃຫ້​ຮູ້​ວ່າ ອາກາດ​ຮ້ອນ​ອົບເອົ້າ​ຢູ່​ໃນ​ຍີ່ປຸ່ນ ໃນ​ຫຼາຍ​ອາທິດ​ມໍ່ໆມານີ້ ໄດ້​ເປັນ​ເຫດ​ໃຫ້​ມີ ຜູ້​ເສຍ​ຊີວິດ​ໄປ​ແລ້ວ 40 ກວ່າ​ຄົນ ແລະ ມີ​ຫຼາຍ​ໝື່ນ​ຄົນ ຕ້ອງ​ໄດ້​ເຂົ້າ​ໂຮງໝໍ.

 

ຂ່າວທີ່ກ່ຽວຂ້ອງ