ຂ່າວຫຼ້າສຸດ

ລາຄາ​ສະບຽງ​ອາຫານ ແລະ ການ​ບໍລິການ ເຮັດ​ໃຫ້​ເງິນ​ເຟີ້​ໃນ​ສິງກະໂປ ເພີ່ມ​ຂຶ້ນ

131 25 ກ.ກ. 2018 ຂ່າວຕ່າງປະເທດ
ລາຄາ​ສະບຽງ​ອາຫານ ແລະ ການ​ບໍລິການ ເຮັດ​ໃຫ້​ເງິນ​ເຟີ້​ໃນ​ສິງກະໂປ ເພີ່ມ​ຂຶ້ນ

     ຕົວ​ເລກ​ຈາກ​ກົມ​ສະຖິຕິ​ຂອງ​ສິງກະໂປ ທີ່​ນຳ​ອອກ​ມາ​ເປີດເຜີຍ​ເມື່ອ​ວັນ​ທີ 23 ກໍລະກົດ​ນີ້ ໃຫ້​ຮູ້​ວ່າ ດັດ​ສະ​ນີ​ເງິນ​ເຟີ້​ຂອງ​ສິງກະໂປ ໃນ​ເດືອນ​ມິຖຸນາ 2018 ໄດ້​ເພີ່ມ​ຂຶ້ນ 0,6% ເມື່ອ​ທຽບໃສ່ ເວລາ​ດຽວ​ກັນ​ຂອງ​ປີ​ກາຍ ຊຶ່ງ​ຕົ້ນຕໍ​ແມ່ນ​ເປັນ​ຍ້ອນ​ລາຄາ​ສະບຽງ​ອາຫານ ແລະ​ການ​ບໍລິການ​ເພີ່ມ​ຂຶ້ນ.

    ໃນ​ນັ້ນ ລາຄາ​ສະບຽງ​ອາຫານ ເພີ່ມ​ຂຶ້ນ 1,5% ໃນ​ເດືອນ​ມິຖຸນາ​ທີ່​ຜ່ານ​ມາ ຊຶ່ງ​ສາເຫດ ກໍ​ແມ່ນ​ຍ້ອນ​ຈັງຫວະ​ຂຶ້ນ​ລາຄາ ຂອງ​ພວກ​ສິນຄ້າ​ອາຫານ​ທີ່​ຍັງ​ບໍ່​ຜ່ານ​ການ​ປຸງ​ແຕ່ງ  ເພີ່ມ​ຂຶ້ນ​ໄວ​ກວ່າ ເມື່ອ​ທຽບໃສ່​ຈັງຫວະ​ຂຶ້ນ​ລາຄາ​ຂອງ​ອາຫານ​ທີ່​ປຸງ​ແຕ່ງ​ແລ້ວ.

    ໃນ​ຂະນະ​ດຽວ​ກັນ ລາຄາ​ການ​ບໍລິການ ກໍ​ເພີ່ມ​ຂຶ້ນ 1,7% ຊຶ່ງ​ສ່ວນ​ໃຫຍ່​ແມ່ນ​ເປັນ​ຍ້ອນ ຄ່າ​ໃຊ້​ຈ່າຍ​ໃນ​ການ​ພັກຜ່ອນ​ເພີ່ມ​ຂຶ້ນ ປະກອບ​ກັບ​ຄ່າ​ບໍລິການ​ດ້ານ​ໂທລະ​ຄົມມະນາຄົມ ເພີ່ມ​ຂຶ້ນ ມາ​ຕັ້ງແຕ່​ປີ​ກາຍ ຫຼັງ​ຈາກ​ທີ່​ໄດ້​ຫຼຸດ​ລົງ​ພຽງ​ໜ້ອຍ​ດຽວ ໃນ​ເດືອນ​ພຶດສະພາ ປີ 2017.

    ກົມ​ສະຖິຕິ​ຂອງ​ສິງກະໂປ ໃຫ້​ຮູ້​ວ່າ ແກນ​ຂອງ​ເງິນ​ເຟີ້ (core inflation) ໄດ້​ເພີ່ມ​ຂຶ້ນ ຈາກ​ລະດັບ 1,5% ໃນ​ເດືອນ​ພຶດສະພາ ຂຶ້ນ​ສູ່​ລະດັບ 1,7% ໃນ​ເດືອນ​ມິຖຸນາ. ຄາດ​ວ່າ ແກນ​ຂອງ​ເງິນ​ເຟີ້ ຈະ​ຄ່ອຍໆ​ເພີ່ມ​ຂຶ້ນ​ໃນ​ຊຸມ​ເດືອນ​ຖັດ​ໄປ​ຂອງ​ປີ​ນີ້ ແລະ​ເຄື່ອນ​ໄຫວ​ຢູ່​ທີ່​ປະມານ 1-2% ຂອງ​ການ​ຄາດ​ຄະເນ​ທີ່​ມີ​ອອກ​ມາ​ກ່ອນ​ໜ້າ​ນີ້ ເປັນ​ການ​ສ້າງ​ໂອກາດ​ໃນ​ການ​ຊ່ວຍເຫຼືອ​ພື້ນຖານ ເສດຖະກິດ ໃຫ້​ພັດທະນາ​ຕາມ​ທີ່​ຄອງ​ຄອຍ​ໄວ້.

 

ຂ່າວທີ່ກ່ຽວຂ້ອງ