ຂ່າວຫຼ້າສຸດ

ຜູ້ນຳ​ຈີນ​ຊີ້​ນຳ​ການ​ສືບສວນ​ສອບ​ສວນ​ກໍລະນີ​ຫຍຸ້ງ​ເຫຍືອງ​ກ່ຽວ​ກັບ​ວັກ​ຊິນ

169 25 ກ.ກ. 2018 ຂ່າວຕ່າງປະເທດ
ຜູ້ນຳ​ຈີນ​ຊີ້​ນຳ​ການ​ສືບສວນ​ສອບ​ສວນ​ກໍລະນີ​ຫຍຸ້ງ​ເຫຍືອງ​ກ່ຽວ​ກັບ​ວັກ​ຊິນ

   ທ່ານ ສີ​ຈິ້ນ​ຜິງ ປະທານ​ປະເທດ​ຈີນ ໄດ້​ຊີ້​ນຳ​ໃຫ້​ອົງການ​ທີ່​ກ່ຽວຂ້ອງ​ຂອງ​ຈີນ ສືບສວນ​ສອບ​ສວນ​ກ່ຽວ​ກັບ​ກໍລະນີ​ການ​ຜະລິດ​ວັກ​ຊິນ​ທີ່​ຜິດ​ກົດໝາຍ ຂອງ​ບໍລິສັດ Changchun Changseng Life Sciences Limited ແລະ ​ລົງໂທດ​ຢ່າງ​ເຂັ້ມ​ງວດ​ຕໍ່​ເປົ້າ​ໝາຍ​ທີ່​ຮັບຜິດຊອບ ຢູ່​ໃນ​ກໍລະນີ ຫຍຸ້ງ​ເຫຍືອງ​ດັ່ງກ່າວ.

   ຂ່າວສານ​ຊິນ​ຮວາ ລາຍ​ງານ​ວ່າ ຕຳຫຼວດ​ພວມ​ສຸມ​ໃສ່​ສືບສວນ​ສອບ​ສວນ​ຕໍ່ 5 ເປົ້າ​ໝາຍ ທີ່​ເປັນ​ສະມາຊິກ​ລະດັບ​ສູງ​ຂອງ​ບໍລິສັດ​ດັ່ງກ່າວ ໃນ​ນັ້ນ​ມີ​ແມ່ຍິງ​ຄົນ​ໜຶ່ງ ທີ່​ເປັນ​ປະທານ​ຂອງ​ບໍລິສັດ.

    ອົງການ​ທີ່​ກ່ຽວຂ້ອງ​ໄດ້​ຕົກລົງ​ຍື່ນ​ຟ້ອງ​ຄະດີ​ດັ່ງກ່າວ ຫຼັງ​ຈາກ​ທີ່​ເຈົ້າ​ໜ້າທີ່​ທ່ານ​ໜຶ່ງ ຈາກ​ສະຫະ​ກົມ​ຕິດຕາມ​ກວດກາ​ອາຫານ ແລະ ​ຢາ​ແຫ່ງ​ຊາດ​ຈີນ (CFDA) ແຈ້ງ​ໃຫ້​ຮູ້ເມື່ອ​ວັນ​ທີ 22 ກໍລະກົດ​ທີ່​ຜ່ານ​ມາ​ວ່າ ເຂົາເຈົ້າ​ໄດ້​ກວດ​ພົບ​ວ່າ Changchun Changseng Life Sciences Limited ໃຫ້​ຂໍ້​ມູນ​ປອມ​ກ່ຽວ​ກັບ​ການ​ຜະລິດ ແລະ​ກ່ຽວ​ກັບ​ການ​ທົດ​ລອງ​ຜະລິດ​ຕະ​ພັນ ພ້ອມ​ກັນ​ນັ້ນ ກໍ​ປ່ຽນແປງ​ອຸປະກອນ ແລະ​ ຕົວ​ເລກ​ຂອງ​ຂັ້ນ​ຕອນ​ການ​ຜະລິດ​ຕາມ​ລຳພັງ​ໃຈ ສຳລັບ​ວັກ​ຊິນ ປ້ອງ​ກັນ​ພະຍາດ​ວໍ້​ທີ່​ໃຊ້​ກັບ​ຄົນ.

    ປັດຈຸບັນ​ນີ້ CFDA ໄດ້​ຢຶດ​ໃບ​ອະນຸຍາດ​ເຄື່ອນ​ໄຫວ​ຂອງ​ບໍລິສັດ​ດັ່ງກ່າວ​ແລ້ວ ຍ້ອນ​ລະເມີດ ຢ່າງ​ຮ້າຍ​ແຮງ​ຕໍ່​ຂໍ້​ກຳນົດ​ຂອງ​ກົດໝາຍ ພ້ອມ​ກັນ​ນັ້ນ​ກໍ​ສະເໜີ​ໃຫ້​ເກັບ​ຄືນ​ປະລິມານ​ວັກ​ຊິນ​ທີ່​ຍັງ​ບໍ່​ທັນ ໄດ້​ນຳ​ໃຊ້.

 

ຂ່າວທີ່ກ່ຽວຂ້ອງ