ຂ່າວຫຼ້າສຸດ

ເບິ່ງບ້ານເຂົາເອົາບົດຮຽນ 25/07/2018

163 25 ກ.ກ. 2018 ຫົວຂໍ້ຂ່າວອື່ນໆ

ຜ່ານ​ຄໍ​ລຳ​ປະ­ຈຳ​ວັນ​ນີ້ ທ່ານ​ຈະ​ຮູ້​ກ່ຽວ​ກັບ​ຜົນ­ສຳ­ເລັດ​ໃນ​ການ​ຫຼຸດ­ຜ່ອນ​ຄວັນ​ຢາ­ສູບ​ທີ່ ສ ເກົາ­ຫຼີ ກາບ​ປັບ­ປຸງ​ລະ­ບົບ​ບຳ­ນານ​ທີ່​ສະ​ວິດ ແລະ ຕໍ່​ທ້າຍ​ກັບ​ເລື່ອງ​ຄວາມ​ໂປ່ງ​ໃສ​ໃນ​ການ​ເຮັດ​ວຽກ​ຂອງ​ລັດ­ຖະ­ບານ​ໃໝ່​ມາ​ເລ​ເຊຍ.

ທີ່ ສ ເກົາ­ຫຼີ: ດັ່ງ​ທີ່​ເຄີຍ​ເປັນ​ຂ່າວ​ໄປ​ແລ້ວ​ໃນປີ­ຜ່ານ­ມາ​ນີ້​ວ່າ: ທາງ​ການ​ຂອງ ສ ເກົາ­ຫຼີ ໄດ້​ເອົາ​ມາດ​ຕະ­ການ​ອັນ​ຈຳ­ເປັນ ແລະ ມີ​ຜົນ​ສັກສິດ ເພື່ອ​ຫຼຸດ­ຜ່ອນ​ຈຳ­ນວນ​ຜູ້​ສູບ­ຢາ​ລົງ​ໃຫ້​ໄດ້​ຕາມ​ລະ­ດັບ​ຄາດ­ໝາຍ ແລະ ຫວ່າງ​ບໍ່​ດົນ​ມາ​ນີ້ ທາງ​ກະ­ຊວງ​ຍຸດ​ທະ​ສາດ ແລະ ການ​ເງິນຂອງ​ປະ­ເທດ​ນີ້​ ກໍ່​ໄດ້​ສະ­ຫຼຸບ​ຜົນ­ສຳ­ເລັດ​ທີ່​ເກັບ​ກ່ຽວ​ມາ​ ໄດ້​ເປັນ​ກອບ​ເປັນ​ກຳ​ຈາກ​ມາດ​ຕະ­ການ​ຫຼຸດ­ຜ່ອນ​ຄວັນ​ຢາ­ສູບ​ໃນ​ປະ­ເທດ.

ສຳ­ລັບ​ໃນ 6 ເດືອນ​ຕົ້ນ​ປີ​ນີ້ ຍອດ​ຈຳ­ໜ່າຍ​ຢາ­ສູບ​ທຳ​ມະ​ດາ ແລະ ຢາ­ສູບ​ໄຟ­ຟ້າ​ໄດ້​ຫຼຸດ​ລົງ 1,6% ທຽບ​ກັບ​ໄລ­ຍະ​ດຽວ​ກັນ​ຂອງ​ປີ 2017 ສ່ວນ​ການ​ເກັບ​ພາ­ສີ​ຈາກ​ຢາ­ສູບ​ກໍ່​ບັນ­ລຸ​ໄດ້ 5,5 ພັນ​ຕື້​ວອນ ເພີ່ມ​ຂຶ້ນ 1,5% ທຽບ​ກັບ​ໄລ­ຍະ​ດຽວ​ກັນ​ຂອງ​ປີ​ກາຍ.

ໃນ​ປີ 2017 ທາງ​ການ ສ ເກົາ­ຫຼີ ໄດ້​ດຳ­ເນີນ​ບັ້ນ​ໂຄ­ສະ­ນາ​ຕ້ານ​ຢາ­ສູບ​ໃນ​ທົ່ວ​ສັງ­ຄົມ ​ໄປ​ພ້ອມໆ​ກັບ​ການ​ປັບ​ຂຶ້ນ​ລາ­ຄາ​ຢາ­ສູບ​ສູງ​ເຖິງ 80% ຄື: ຈາກ​ລາ­ຄາ​ຢາ­ສູບ​ຊອງ​ລະ 2.500 ວອນ ເປັນ 4.500 ວອນ ການ​ຂຶ້ນ​ລາ­ຄາ​ຢາ­ສູບ ແນ່­ນອນ​ຄົງ​ເຮັດ​ໃຫ້​ບັນ­ດາ​ສິງ​ອົມ​ຄວັນ ແລະ ກຸ່ມ​ບໍ­ລິ­ສັດ​ຜະ­ລິດ-ຈຳ­ໜ່າຍ​ຢາ­ສູບ​ບໍ່​ພໍ­ໃຈ ແຕ່​ເພື່ອ​ຊີ­ວິດ ແລະ ສຸ­ຂະ­ພາບ​ຂອງ​ພົນ­ລະ­ເມືອງ​ແລ້ວ​ທາງການ ສ ເກົາ­ຫຼີ ກໍ່​ຕ້ອງ​ເດີນ​ໜ້າ.

ທີ່ ສະ​ວິດ (ສະ​ວິດ​ເຊີ​ແລນ): ໃນ​ທ້າຍ​ປີ 2017 ທາງ​ການ​ຂອງ​ປະ­ເທດ​ສະ​ວິດ ໄດ້​ລິ​ເລີ່ມ​ການ​ປະຕິ​ຮູບ​ລະ­ບົບ​ບຳ­ນານ ໂດຍ​ໄດ້​ຈັດ​ມີ​ການ​ລົງ​ປະຊາ​ມະ­ຕິ​ຕໍ່​ແຜນ­ການ​ດັ່ງ­ກ່າວ ເຊິ່ງ​ແມ່ນ​ການ​ປະຕິ​ຮູບ​ຄັ້ງ​ທຳ​ອິດ​ໃນ​ຮອບ 20 ປີ ແຜນ­ການ​ປັບ­ປຸງລະ­ບົບ​ບຳ­ນານ ​ໄດ້​ເນັ້ນ​ການ​ປັບ​ຂຶ້ນ​ພາ­ສີ​ສູ່​ລະບົບ​ສະ­ຫວັດ­ດີ​ການ​ສັງ­ຄົມ​ຂອງ​ປະ­ເທດ ເພື່ອ​ຮັບມື​ກັບ​ບັນ­ຫາ​ຈຳ­ນວນ​ຄົນ​ເຖົ້າ​ເພີ່ມ​ຂຶ້ນ ແຕ່​ລະ­ບົບອັດ­ຕາ​ດອກ​ເບ້ຍ​ຜັດ​ຕ່ຳ​ທີ່​ສົ່ງ​ຜົນ​ກະ­ທົບ​ໂດຍ​ກົງ​ຕໍ່​ທຶນ​ບຳ​ເນັດ​ບຳ­ນານ ຈຳ­ນວນ​ພົນ­ລະ­ເມືອງ​ປະເທດ​ສະ​ວິດ​ທີ່​ມີ​ອາ­ຍຸ​ລະ­ຫວ່າງ 50-60 ປີ ເຊິ່ງ​ເປັນ​ໄວ​ກຽມ​ເຂົ້າ​ບຳ­ນານ​ນັ້ນ​ເພີ່ມ​ຂຶ້ນ​ຢ່າງ​ຫຼວງຫຼາຍ ແຜນ​ປະ­ຕິ​ຮູບ​ລະ­ບົບ​ບຳ­ນານ​ທີ່​ຜ່ານ​ການ​ລົງ​ປະ­ຊາ​ມະ­ຕິ​ນີ້ ໄດ້​ປັບ​ຂຶ້ນ​ມູນ​ຄ່າ​ພາ­ສີ​ຈາກ 8% ເປັນ 8,3% ຫັກ​ເງິນ​ປະ­ກັນ​ສັງ­ຄົມ​ຈາກ​ຄ່າ​ຈ້າງເພີ່ມ​ຈາກ 10,25% ເປັນ 10,55% ແລະ ແກ່­ຍາວ​ອາ­ຍຸ​ພາ­ສີ​ຂອງ​ຜູ້­ຍິງ ຈາກ 64 ປີ ເປັນ 65 ປີ ເທົ່າ​ກັບ​ຜູ້​ຊາຍ.

ທີ່ ມາ​ເລ​ເຊຍ: ແຫຼ່ງ​ຂ່າວ​ໜັງ­ສື­ພິມ ເດິ​ເນ​ເຊິນ (The Nation) ສະ­ບັບ​ວັນ​ທີ 10 ເດືອນ​ກໍ­ລະ­ກົດ​ນີ້ ໃຫ້​ຮູ້​ວ່າ: ມາ​ເລ​ເຊຍ ພາຍ​ໃຕ້​ການ​ນຳ​ຂອງ​ນາ­ຍົກ­ລັດ­ຖະ­ມົນ­ຕີ ດຣ. ມາ​ຮາ​ເທຍ ໂມ​ຮາ​ມັດ ໄດ້​ໃຫ້​ຄວາມ​ສຳ­ຄັນ​ເປັນ​ພິ­ເສດ​ກັບ​ຄວາມ​ໂປ່ງ​ໃສ​ໄຮ້​ມົນ­ທິນ​ຈາກ​ສິນ​ບົນ ແລະ ພະ­ຍາດ​ສໍ້ລາດ​ບັງ​ຫຼວງ ໂດຍ​ໄດ້​ກຳ­ນົດ​ວ່າ ສະ­ມາ­ຊິກ​ລັດຖະ​ບານ​ທັງ​ໝົດ ເຊິ່ງ​ລວມ​ເອົາ​ທັງ​ນາ­ຍົກ ຮອງ​ນາ­ຍົກ ນັ້ນ​ຕ້ອງ​ແຈ້ງ​ຊັບ​ສິນ ແລະ ລາຍ​ຮັບ​ຂອງ​ພວກ​ຕົນ.

ທ່ານ​ນາ­ຍົກ​ຍັງ​ໄດ້​ເວົ້າ​ຕື່ມ​ວ່າ: ບັນ­ດາ​ນັກການ­ເມືອງ (ສະ­ມາ­ຊິກ​ລັດ​ຖະ​ສະ­ພາ) ກໍ່​ຄືພະ­ນັກ­ງານ​ໃນ​ກົງ­ຈັກ​ລັດ­ຖະ­ບານ​ມີ​ສິດ​ຮັບ​ຂອງຂວັນ​ທີ່​ເປັນ​ດອກ​ໄມ້ ແລະ ອາ­ຫານ​ເທົ່າ​ນັ້ນ ລື່ນ​ນັ້ນ ບໍ່​ວ່າ​ຈະ​ເປັນ​ພຽງ​ປະ​ຫຼັກ​ແຂນ​ທີ່​ເຮັດ​ດ້ວຍ​ດີ​ບຸກ​ປະ­ສົມ​ທອງ ກໍ່​ແມ່ນ​ຕ້ອງ​ໄດ້​ຂໍ­ອະ­ນຸ­ຍາດ​ຈາກ​ຂັ້ນ​ເທິງ​ກ່ອນ ຖ້າ​ຂອງ­ຂວັນ​ຫາກ​ເປັນ​ລົດ​ເບັນ ຫຼື ລົດ​ເກງ​ໂປຼ​ຕອນ (ລົດ​ເກງ​ທີ່​ຜະ­ລິດ​ຢູ່​ມາ​ເລ​ເຊຍ) ກໍ່​ຕ້ອງ​ຮີບ​ສົ່ງ​ຄືນ.

ຂ່າວທີ່ກ່ຽວຂ້ອງ