ຂ່າວຫຼ້າສຸດ

ງານມະຫາກຳກິລານັກຮຽນອາຊຽນ ຄັ້ງທີ 10 ລາວສົ່ງນັກກີລາເຂົ້າຮ່ວມເກືອບ 100 ຄົນ

155 25 ກ.ກ. 2018 ວົງຈອນກີລາ
ງານມະຫາກຳກິລານັກຮຽນອາຊຽນ ຄັ້ງທີ 10 ລາວສົ່ງນັກກີລາເຂົ້າຮ່ວມເກືອບ 100 ຄົນ

   ເປີດ​ສາກ​ຂຶ້ນ​ຢ່າງ​ເປັນ​ທາງ​ການ​ແລ້ວ ສຳ­ລັບ​ງານ​ມະ­ຫາ​ກຳ​ກິ­ລາ​ນັກ­ຮຽນ​ອາ​ຊຽນ ຄັ້ງ​ທີ 10 ທີ່​ປະ­ເທດ​ມາ​ເລ​ເຊຍ ໃນ​ຕອນ​ແລງ​ຂອງ​ວັນ​ທີ 20 ກໍ­ລະ­ກົດ ຜ່ານ​ມາ ທີ່​ມະ­ຫາ​ວິ​ທະ​ນາ​ໄລ ເທັກ​ໂນ​ໂລ​ຢີ​ມາ​ຣາ ເມືອງ​ສາ​ຫະ​ລຳ ປະ­ເທດ​ມາ​ເລ​ເຊຍ, ໂດຍ​ໃຫ້​ກຽດ​ເຂົ້າ​ຮ່ວມ​ຂອງ​ທ່ານ ແມັດ​ລີ ບິນ ມາ​ລິກ ລັດ­ຖະ­ມົນ­ຕີ ກະ­ຊວງ​ສຶກ​ສາ​ທິ​ການ ແລະ ກິ­ລາ ປະ­ເທດ​ມາ​ເລ​ເຊຍ ພ້ອມ​ດ້ວຍ​ຄະ­ນະ​ນຳ ຄູ​ເຝິກ ແລະ ນັກ​ກິ­ລາ​ຈາກ 11 ປະ­ເທດ. ໃນ​ນັ້ນ ສປປ ລາວ ນຳ​ໂດຍ​ທ່ານ ກອງ​ສີ ແສງ​ມະ­ນີ​ຮອງ​ລັດ­ຖະ­ມົນ­ຕີ ກະ­ຊວງ​ສຶກ​ສາ​ທິ​ການ ແລະ ກິ­ລາ ທັງ​ເປັນ​ຫົວ­ໜ້າ​ຄະ­ນະ​ນຳ​ນັກ​ກິ­ລາ​ລາວ​ໃນ​ຄັ້ງ​ນີ້.

   ການ​ແຂ່ງ­ຂັນ​ກິ­ລາ​ນັກ­ຮຽນ​ຄັ້ງ​ນີ້, ແມ່ນ​ເລີ່ມ​ແຕ່​ວັນ​ທີ 20-26 ກໍ­ລະ­ກົດ 2018 ລວມ​ມີ 11 ປະ­ເພດ​ກິ­ລາ​ບັນ­ຈຸ​ເຂົ້າ​ໃນ​ການ​ແຂ່ງ­ຂັນ ຄື: ກິ­ລາ​ແລ່ນ-ລານ ລອຍ­ນ້ຳ ກະ­ຕໍ້ ດອກ​ປີກ​ໄກ່ ບານ­ບ້ວງ ກາ​ຍະ​ກຳ​ປະ­ກອບ​ອຸ­ປະ­ກອນ ກາ​ຍະ​ກຳ​ເສລີ ປິ່ງ​ປ່ອງ ບານ­ສົ່ງ ເນັດ​ບານ ແລະ ກິ­ລາ​ສະ​ຄອດ ໂດຍ​ມີ​ຄະ­ນະ​ນຳ ຄູ​ເຝິກ ແລະ ນັກ​ກິ­ລາ​ຈາກ 11 ປະ­ເທດ​ເຂົ້າ​ຮ່ວມ​ແຂ່ງ­ຂັນ ປະ­ກອບ​ມີ ປະ­ເທດ​ກຳ­ປູ­ເຈຍ ອິນ​ໂດ​ເນ​ເຊຍ ລາວ ມຽນ​ມາ ຟີ​ລິບ​ປິນ ຫວຽດ­ນາມ ໄທ ສິງ­ກະ­ໂປ  ບຣູ​ໄນ ຕີ​ມໍ ເລ​ັສ​ເຕ ແລະ ປະ­ເທດ​ມາ​ເລ​ເຊຍ (ເຈົ້າ­ພາບ).

   ຂະ­ນະ​ທີ່ ສປປ ລາວ ໄດ້​ສົ່ງ​ຄະ​ນຳ, ຄູ​ເຝິກ ແລະ ນັກ​ກິ­ລາ​ເຂົ້າ​ຮ່ວມ​ແຂ່ງ­ຂັນ​ທັງ​ໝົດ 77 ຄົນ. ໃນ​ນັ້ນ, ມີ​ຄະ­ນະ​ນຳ 17 ທ່ານ ຄູ​ເຝິກ 13 ທ່ານ ແລະ ນັກ​ກິ­ລາ 47 ຄົນ ຍິງ 16 ຄົນ ໃນ 4 ປະ­ເພດ​ກິ­ລາ ຄື: ກິ­ລາ​ແລ່ນ-ລານ ຈຳ­ນວນ 17 ຄົນ ຍິງ 9 ຄົນ ລອຍ­ນ້ຳ 7 ຄົນ ຍິງ 3 ຄົນ ດອກ​ປີກ​ໄກ່ 11 ຄົນ ຍິງ 4 ຄົນ ແລະ ກິ­ລາ​ກະ­ຕໍ້ ຈຳ­ນວນ 12 ຄົນ (ຊ້າຍ​ລ້ວນ).

   ສຳ­ລັບ​ການ​ເຂົ້າ​ຮ່ວມ​ງານ​ມະ­ຫາ​ກຳ​ກິ­ລາ​ນັກ­ຮຽນ​ອາ​ຊຽນ ຄັ້ງ​ທີ 10 ທີ່​ປະ­ເທດ​ມາ​ເລ​ເຊຍ​ໃນ​ຄັ້ງ​ນີ້, ສປປ ລາວ ຕັ້ງ​ເປົ້າ​ຈະ​ສູ້​ຊົນ​ສ້າງ​ຜົນ­ງານ​ໃຫ້​ອອກ​ມາ​ດີ​ກວ່າ​ຫຼາຍ​ຄັ້ງ​ທີ່​ຜ່ານ​ມາ ຂະ­ນະ​ທີ່​ໃນ​ງານ​ມະ­ຫາ​ກຳ​ກິ­ລາ​ນັກ­ຮຽນ​ອາ​ຊຽນ ຄັ້ງ​ທີ 9 ທີ່​ປະ­ເທດ​ສິງ­ກະ­ໂປ ເປັນ​ເຈົ້າ­ພາບ ໃນ​ປີ 2017 ທັບ​ນັກ​ກິ­ລາ​ນັກ­ຮຽນ​ລາວ​ສາ­ມາດ​ຍາດ​ໄດ້ 2 ຫຼຽນ​ທອງ ໃນ​ປະ­ເພດ​ກິ­ລາ​ກະ­ຕໍ້ ລາຍ­ການ​ທີມ​ດ່ຽວ ແລະ ທີມ​ຄູ່.

ຂ່າວທີ່ກ່ຽວຂ້ອງ