ການຊື້ຂາຍຢູ່ຕະຫຼາດກະສິກຳອິນຊີ ສູນການຄ້າລາວ-ໄອເຕັກ ເລີ່ມຄຶກຄື້ນ

182 25 ກ.ກ. 2018 ຂ່າວໜ້າ​ໜຶ່ງ
ການຊື້ຂາຍຢູ່ຕະຫຼາດກະສິກຳອິນຊີ ສູນການຄ້າລາວ-ໄອເຕັກ ເລີ່ມຄຶກຄື້ນ

    ໃນ​ເບື້ອງ​ຕົ້ນ​ຊາວ​ຄ້າ­ຂາຍ​ກຸ່ມ​ກະ­ສິ­ກຳ​ອິນ​ຊີ ​ນະ­ຄອນ­ຫຼວງ​ວຽງ​ຈັນ ມີ​ຄວາມ​ທໍ້­ຖອຍ​ ທີ່​ເຫັນ​ລູກ​ຄ້າ​ມາ​ຊື້​ເຄື່ອງ​ຫຼຸດ​ລົງ​ ພາຍ­ຫຼັງ​ທີ່​ໄດ້​ຍົກ­ຍ້າຍ​ອອກ​ຈາກ​ສະ­ຖານ­ທີ່​ສວນ​ໜອງ​ສະ­ພັງ​ເລນ ທີ່​ຕັ້ງ​ຢູ່​ໃກ້​ກັບ​ເດີ່ນ​ພະ​ທາດ­ຫຼວງ ເມືອງ​ໄຊ​ເຊດ​ຖາ ໄປ​ຂາຍ​ຢູ່​ສະ­ຖານ­ທີ່​ແຫ່ງ​ໃໝ່​ ຢູ່​ລານ​ຈອດ​ລົດ​ສູນ​ການ​ຄ້າ​ລາວ-ໄອ​ເຕັກ ນັບ​ແຕ່​ວັນ​ເສົາ​ທີ 2 ມິ­ຖຸ­ນາ 2018 ເປັນ­ຕົ້ນ​ມາ ຖ້າ​ທຽບ­ໃສ່​ສະ­ຖານ­ທີ່​ເກົ່າ​ກັບ​ສະ­ຖານ­ທີ່​ແຫ່ງ​ໃໝ່ ​ລູກ​ຄ້າ​ຫຼຸດ​ລົງ 50% ສ້າງ​ຄວາມ​ຕົກ­ໃຈ​ໃຫ້​ແກ່​ຊາວ​ຄ້າ​ຊາວ​ຂາຍ​ພໍ​ສົມຄວນ ໃນ​ເບື້ອງ​ຕົ້ນ​ນີ້ ແລະ ແຕ່​ປັດ­ຈຸ­ບັນ​ຊາວ​ຄ້າ­ຂາຍ​ເລີ່ມ​ມີ​ຮອຍ​ຍິ້ມ​ດີ​ຂຶ້ນ ​ເມື່ອ​ທີ່​ເຫັນ​ລູກ​ຄ້າ​ເພີ່ມ​ຂຶ້ນ ແລະ ສິນ­ຄ້າ​ກໍ່​ໄດ້​ຂາຍ​ດີ​ຂຶ້ນ​ຄື​ກັບ​ເມື່ອ​ກ່ອນ.

    ຜ່ານ​ການ​ສອບ​ຖາມ​ຊາວ​ຄ້າ­ຂາຍ​ເມື່ອ​ວັນ​ເສົາ 14 ກໍ­ລະ­ກົດ 2018 ເຫັນ​ວ່າ ປັດ­ຈຸ­ບັນ​ການ​ຊື້​ຂາຍ​ຢູ່​ຕະ­ຫຼາດ​ກະ​ສິກຳ​ອິນ​ຊີ​ເລີ່ມ​ຄຶກ­ຄື້ນ​ມາ​ອີກ​ຄັ້ງ ພາຍ­ຫຼັງ​ທີ່​ຍົກ­ຍ້າຍ​ມາ​ຂາຍ​ຢູ່​ແຫ່ງ​ໃໝ່​ເດີ່ນ​ຈອດ​ລົດ​ສູນ​ການ​ຄ້າ​ລາວ-ໄອ​ເຕັກ ​ທີ່​ມີ​ຄວາມ​ສະ­ດວກ​ສະ­ບາຍ​ໃນ​ການ​ຊື້​ຂາຍ­ເຄື່ອງ ແລະ ການ​ຈອດ​ລົດ​ຂອງ​ລູກ​ຄ້າ ຖ້າ​ທຽບ­ໃສ່​ເບື້ອງ​ຕົ້ນ​ທີ່​ຍົກ­ຍ້າຍ​ມາ​ໃໝ່​ລູກ​ຄ້າ​ຫຼຸດ​ລົງ​ເປັນ​ຈຳ­ນວນ​ຫຼວງ­ຫຼາຍ ສ້າງ​ຄວາມ​ຕົກ­ໃຈ​ຫຼາຍ​ໃຫ້​ຊາວ​ຄ້າ­ຂາຍ ສາ­ເຫດ​ກໍ່​ຍ້ອນ​ການ​ຍົກ­ຍ້າຍ​ຮີບ​ດ່ວນ ເຮັດ​ໃຫ້​ລູກ​ຄ້າ​ຫຼາຍ​ຄົນ​ອາດ​ຈະ​ບໍ່​ຮູ້​ທັນ ແຕ່​ຍ້ອນ​ຄວາມ​ອົດ­ທົນ ແລະ ຄວາມ​ເອົາ­ໃຈ­ໃສ່​ຊຸກ­ຍູ້​ສົ່ງ­ເສີມ​ຂອງ​ພາກ​ລັດ ກໍ່​ຄື​ພາກສ່ວນ​ກ່ຽວ­ຂ້ອງ ນະ­ຄອນ­ຫຼວງ​ວຽງ​ຈັນ ເຮັດ​ໃຫ້­ການ​ຊື້​ຂາຍ​ດຳ­ເນີນ​ໄປ​ໄດ້​ດີ ແລະ ອີກ​ຢ່າງ​ໜຶ່ງ ​ກໍ່​ຍ້ອນ​ລູກ​ຄ້າ​ຮູ້­ຈັກ​ຫຼາຍ​ຂຶ້ນ​ທີ່​ຍ້າຍ​ໄປ​ຂາຍ​ຢູ່​ແຫ່ງ​ໃໝ່ ​ກໍ່​ໄດ້​ນຳ​ມາ​ຊື້ ເນື່ອງ​ຈາກ​ປັດ­ຈຸ­ບັນ ​ຜັກ​ອິນ​ຊີ​ທີ່​ປາ­ສະ­ຈາກ​ສານ​ເຄ​ມີ​ຕົກ​ຄ້າງ ເຮັດ​ໃຫ້​ສັງ­ຄົມ​ຫັນ​ມາ​ບໍ­ລິ­ໂພກ​ຫຼາຍ​ຂຶ້ນ ຈຶ່ງ​ເຮັດ​ໃຫ້​ຊາວ​ຄ້າ­ຂາຍ​ມີ​ກຳ­ລັງ​ໃຈ​ຂະ­ຫຍາຍ​ເນື້ອ­ທີ່​ການ​ຜະ­ລິດ​ຫຼາຍ​ຂຶ້ນ ເພື່ອ​ເພີ່ມ​ຈຳ­ນວນ​ຜົນ​ຜະ­ລິດ​ຕອບ​ສະ­ໜອງ​ໄດ້​ຕາມ​ຄວາມ​ຕ້ອງ­ການ​ຂອງ​ຜູ້​ບໍ­ລິ­ໂພກ ທັງ​ຄົນ​ລາວ ແລະ ຊາວ​ຕ່າງ­ປະ­ເທດ ​ທີ່​ມາ​ດຳ­ລົງ​ຊີ­ວິດ​ຢູ່ ສປປ ລາວ ໂດຍ​ສະ­ເພາະ ຢູ່​ນະ­ຄອນ­ຫຼວງ​ວຽງ​ຈັນ.

   ສຳ­ລັບ​ຊາວ​ສວນ​ກະ­ສິ­ກຳ​ອິນ​ຊີ​ແມ່ນ​ມາ​ຈາກ 6 ເມືອງ​ໃນ​ນະ­ຄອນ­ຫຼວງ​ວຽງ​ຈັນ ປະ­ກອບ​ມີ 11 ກຸ່ມ​ທີ່​ໄດ້​ນຳ​ເອົາ​ສິນ­ຄ້າ​ພາຍ​ໃນ​ສວນ​ຂອງ​ຕົນ​ມາ​ຂາຍ ໃນ​ນັ້ນ ກໍ່​ມີ​ບໍ­ລິ­ສັດ ແກ້ວ​ທະ­ວີ­ຄູນ​ເພີ່ມ​ພູນ​ຊັບ​ຂາ​ເຂົ້າ-ຂາ​ອອກ ຈຳ­ກັດ​ຜູ້​ດຽວ ທີ່​ໄດ້​ນຳ​ເອົາ​ພືດ​ຜັກ​ກະ­ສິ­ກຳ​ອິນ​ຊີ​ຂອງ​ບໍ­ລິ­ສັດ​ຕົນ​ ມາ​ຂາຍ​ຢູ່​ຕະ­ຫຼາດ​ແຫ່ງ​ນີ້ ນອກ​ນີ້ ກໍ່​ຍັງ​ມີ​ສິນ­ຄ້າ​ອາ­ຫານ​ລາວ​ທີ່​ເປັນ​ອາຫານ​ປອດ​ໄພ ແລະ ສະ­ອາດ ໂດຍ​ລວມ​ແລ້ວ​ມີ​ຫຼາກ​ຫຼາຍ​ສິນ­ຄ້າ​ທີ່​ມາ​ຂາຍ​ຢູ່​ຕະ­ຫຼາດ​ກະ­ສິ­ກຳ​ອິນ​ຊີ ລານ​ຈອດ​ລົດ​ສູນ​ການ​ຄ້າ​ລາວ-ໄອ​ເຕັກ ໃນ​ທຸກ​ຕອນ​ເຊົ້າ​ວັນ​ພຸດ ແລະ ວັນ​ເສົາ ດັ່ງ­ນັ້ນ ເຊີນ­ຊວນ​ຜູ້​ທີ່​ຕ້ອງ­ການ​ພືດ​ຜັກ​ອິນ​ຊີ ກໍ່​ຄື ອາຫານ​ການ​ກິນ​ທີ່​ສະ­ອາດ​ປອດ​ໄພ ກໍ່​ສາ­ມາດ​ໄປ​ຊື້​ໄດ້​ທີ່​ຕະ­ຫຼາດ​ແຫ່ງ​ດັ່ງ­ກ່າວ​ອາ­ທິດ​ໜຶ່ງ 2 ຄັ້ງ.

ຂ່າວທີ່ກ່ຽວຂ້ອງ