“ເອັມປັບເປ-ເນມາ” ຄົນໜຶ່ງເດັ່ນ ຄົນໜຶ່ງດັບ ໃນເຕະບານໂລກ 2018

219 24 ກ.ກ. 2018 ວົງຈອນກີລາ
“ເອັມປັບເປ-ເນມາ” ຄົນໜຶ່ງເດັ່ນ ຄົນໜຶ່ງດັບ ໃນເຕະບານໂລກ 2018

ເຕະບານໂລກ 2018 ຈົບລົງດ້ວຍໄຊຊະນະຂອງຝຣັ່ງ ຂະນະທີ່ບັນດານັກເຕະກໍມີທັງດາວດັງທີ່ແຈ້ງເກີດ ແລະ ແຈ້ງດັບພໍໆກັນ ຄົນທີ່ເກີດຢ່າງເປັນຮູບປະທໍາ ຍ່ອມເປັນຄີລ່ຽນ ເອັມບັລເປ ກອງໜ້າໄວ 19 ປີ ຂອງທີມແຊັມເຈົ້າຂອງຕຳແໜ່ງດາວຮຸ່ງໂດດເດັ່ນປະຈຳລາຍການນີ້.

           ເອັມບັລເປ ຍັງບໍ່ຄົບເຄື່ອງສົມບູນແບບ ແຕ່ເທົ່າທີ່ເຫັນໃນບານໂລກ ກໍເຮັດໃຫ້ກອງເຊຍບານຕື່ນຕາຕື່ນໃຈໄປກັບຄວາມວ່ອງໄວ ເຕັກນິກ ແລະ ຄວາມສຽບຂາດ ຍິງໄປ 4 ປະຕູ ລວມທັງປະຕູປິດທ້າຍໃນນັດຊີງຊະນະເລີດ ທີ່ຖະຫຼົ່ມກຣົວຊີ  4-2.

          ເອັມບັບເປ ກາຍເປັນນັກເຕະໄວລຸ້ນ ອາຍຸບໍ່ເຖິງ 20 ປິຄົນທີ 2 ທີ່ຍິງໄດ້ໃນຮອບຊີງບານໂລກ ຄົນທໍາອິດກໍຄື ເປເລ່ຕອນອາຍຸ 18 ປີ ເໝົາຄົນດຽວ 2 ປະຕູໃຫ້ບຣາຊິນ ຖະຫຼົ່ມ ຊູແອັດ 5-2 ເມື່ອປີ 1958.

          ເອັມບັບເປ ຕ້ອງພິສູດຕົວເອງອີກຫຼາຍ ເມື່ອທຽບກັບເປເລ່ ແຕ່ດ້ວຍຂອງດີທີ່ມີຢູ່ ອະນາຄົດຂ້າງໜ້າຂອງເຂົາກໍເປັນເລື່ອງໜ້າຕິດຕາມຢ່າງທີ່ສຸດ.

          ອາຍຸພຽງແຕ່ 19 ປີ ຍັງຫຼິ້ນບານໂລກໄດ້ອີກ 3 ສະໄໝສະບາຍໆ ແລ້ວການຫຼິ້ນໃຫ້ທີມໃຫຍ່ລະດັບປາຣີສ ແຊງ ແຊແມງ (ຫຼືອາດຈະຕໍ່ດ້ວຍ ຣິວ ມາດຣິດໃນອະນາຄົດ) ກໍຍິ່ງເຮັດໃຫ້ອຢູ່ໃນກະແສ ມີໂອກາດພັດທະນາຝີຕີນໄດ້ອີກຫຼວງຫຼາຍ.

           ເອັມບັບເປ ອີກ 4 ປີຂ້າງໜ້າ ຈະເກັ່ງກວ່າເອັມບັບເປຕອນອາຢຸ 19 ປິແນ່ນອນ ແລ້ວຄິດເບິ່ງວ່າຖ້າຍົກລະດັບໄປເລື້ອຍຈົນອາຍຸ 27 ປີ ນັກເຕະຄົນນີ້ອາດຈະເປັນເທບຍິ່ງກວ່າໂຣນັນໂດ ຫຼື ເມສຊີ່!.

           ເລື່ອງລາວຂອງຄີລ່ຽນ ເອັມບັບເປ ຄືຄວາມສົດໃສທີ່ໃຜໆກໍຊື່ນຊົມ ຕ່າງຈາກພາບຂອງເນມາ ດາວດັງບຣາຊິນທີ່ຊີວິດປ່ຽນຢ່າງແຮງ.

          ເນມາ ບໍ່ແມ່ນວ່າບໍ່ເກັ່ງ ບານໂລກຄັ້ງນີ້ກໍຍິງໄດ້ 2 ປະຕູ ແຕ່ແທນທີ່ຄົນຈະຈົດຈຳໃນຖານະຍອດນັກເຕະ ກັບພິກລ໊ອກ ກາຍເປັນຕົວຕະຫຼົກສາຍເຮຮາໄປເສຍແລ້ວ.

          ສິ່ງທີ່ກອງເຊຍນຶກເຖິງເຂົາໃນບານໂລກ 2018 ຄື ຈອມດີດດີ້ນກິ້ງເກີນຄວາມຈິງ ການສະແດງລະດັບດາລາອັອສກາ ຊຶ່ງຈະວ່າໄປກໍ8້ອນຂ້າງໂຫດຮ້າຍ ເພາະຜູ້ກ່ຽວກໍຖືກເຕະອີຫຼີ ຖືກເຮັດຜິດກະຕິກາອີຫຼີເປັນສ່ວນໃຫຍ່ ແຕ່ພໍ “ຫຼິ້ນຫຼາຍ” ເກີນງາມ ພາບພົດກໍເລິຍພ້ຽນໄປຢ່າງທີ່ເຫັນ.

           ຈາກວ່າທີ່ວິລະບູລຸດ ກາຍເປັນຈະຫຼວດລາຄາຖືກ ຖືກຄົນລໍ້ລຽນທັງໂລກ ເນມາ ຈຶ່ງເປັນດາວດັບທີ່ໜ້າຜິດຫວັງທີ່ສຸດ ຂ້າພະເຈົ້າເສຍດາຍພອນສະຫວັນ ແຕ່ຖ້າຍັງບໍ່ປັບທັດສະນະຄະຕິໃນການຫຼິ້ນບານ ເນມາ ກໍຈະຍິ່ງເສື່ອມ ຍິ່ງເສຍຂອງ.

          ລົງສະໜາມຍາມໃດ ຄົນຕັ້ງຕາລໍຖ້າເບິ່ງວ່າເມື່ອໃດມັນຈະກິ້ງ… ນີ່ຄືເລື່ອງຈິງທີ່ໂຄດເສົ້າ.

ຂ່າວທີ່ກ່ຽວຂ້ອງ